TRATTENEMIENTO IX De la Jornata IV.
_Jennariello pe ddare gusto a Milluccio Rrè de Fratta ombrosa,
fratiello sujo, fa luongo viaggio, e portatole chello che
desederava pe lliberarelo da la morte, è connannato a la morte; ma
pe mmostrare la ’nnocenzia soja, deventanno statua de preta marmora
pe strano socciesso, torna a lo stato de primmo, e gaude contente._
_S’io avesse ciento canne de canna, no pietto d’abbrunzo, e mille
lengue d’acciaro, non porria spalifecare quanto piacquette lo
cunto de Paola, sentenno comme non restaje nesciuna dell’opere bone
ch’aveva fatto senza remonerazzione, tanto, che besognaje carrecare
la dosa de li prieghe a Ciommetella, che decesse lo sujo, essennose
sconfedata de tirare lo carro de lo commannamiento de lo Prencepe:
paricchie dell’autre, puro non potenno fare de manco de n’obedire
pe non guastare lo juoco, accossì decette._
È no gran proverbio veramente chillo: _vedimmo stuorto, e ghiodequammo
deritto_; ma è accossì defficele serviresenne, che poche jodizie
dell’uommene danno a lo chiuovo, anze drinto a lo maro de le ccose
umane la magiore parte sò pescature d’acqua doce, che pigliano grance,
e chi se crede pigliare chiù ghiusta la mesura de chello, che le vace
’n pensiero, cchiù ppriesto la sgarra; da la quale cosa nne nasce,
che tutte correno a la mmorrune, tutte faticano a la cecata, tutte
penzano a la storza, tutte operano a la babalà, tutte jodecano a
spaccastrommola, e lo cchiù de le bote co na trista vrocciolata de
na resoluzione a lo sproposeto, se accattano no pentemiento a buono
sinno, comme fece lo Rrè de Fratta ombrosa, de lo quale sentarrite
lo socciesso, se drinto la rota de la modestia mme chiammarrite co lo
campaniello de la cortesia, a dareme no poco d’audienzia.
Ora dice, ch’era na vota Milluccio lo Rrè de Fratta-ombrosa, lo quale
era accossì perduto pe la caccia, che mmetteva a mmonte le ccose cchiù
necessarie de lo stato, e de la casa soja pe ghire dereto a le ppedate
de no leparo, o appriesso lo vuolo de no marvizzo; e tanto secotaje
sta strata, che no juorno lo portaje la Fortuna a no vosco, che aveva
fatto squatrone de terreno, e d’arvole serrato serrato, pe non essere
rutto da li Cavalle de lo Sole; dove ’ncoppa na bellissema preta
marmora trovaje no Cuorvo, che frisco frisco era stato acciso; lo Rrè
vedenno chillo sango vivo vivo sghizziato sopra chella preta janca
janca, jettanno no gran sospiro, disse: O cielo, e non porria avere na
mogliere accossì ghianca, e rrossa, comme a chella preta, e che avesse
li capille, e le cciglia accossì negre, comme so le penne de chisto
Cuorvo? e sopra sto penziero se sprofonnaje de manera, che pe no piezzo
fece li duje simmele co chella preta; tanto, che pareva na statola
de marmora, che facesse l’ammore coss’autra marmora: e chiavatose sto
nigro capriccio drinto a le cchiocche, e ccercannolo tutta via co la
pappola de lo desederio, se fece ’n quatto pizzeche de palicco perteca,
da milo sciuoccolo cocozza d’Innia, da focone de varviero, fornace de
vritaro, e da naimuozzo, gegante, de manera, che non penzava ad autre,
che a la ’mmagene de chella cosa ncrastata drinto a lo core sujo,
comme preta a preta: dovonca votava l’uocchie sempre se trovava chella
stessa forma dereto, che portava drinto a lo pietto, e scordatose
d’ogne autra facenna, autro non avea, che chella marmora ’n capo,
tanto che s’era assottegliato de manera sopra sta preta, che se nne
jeva de pilo ’n pilo: essennole sta preta de molino, che le mmacenava
la vita, porfeto, dove se stemperavano li colure de li juorne suoje;
focile, che le metteva fuoco a lo zorfariello de ll’arma, calamita,
che lo terava, e finalmente preta, che non poteva arrequiare; tanto
che Jennariello lo frate vedennolo accossì mortacino, ed appagliaruto,
le disse: Frate mio, che cosa t’è pigliato, che puorte lo dolore
alloggiato nell’uocchie, e la desperazione assentata sotto la ’nsegna
spalleta de ssa facce? che t’è socciesso? parla, spapura co ffrateto;
lo fieto de li craùne nchiuso a na cammara mpesta le pperzune, la
porvere stretta drinto na montagna, nne fa ire l’asche pe l’ajero; la
rogna serrata drinto le bene ’nfraceta lo sango: la ventosetà retenuta
drinto a lo cuorpo genera flate, e ccolacapasse: perzò apre ssa vocca,
e dimme chello che te siente: all’utemo puoje assecurarete, ca dove
pozzo, mettarraggio millanta vite pe soggiovarete. Milluccio mazzecanno
parole, e ssospire, lo rengraziaje de lo buono ammore decenno, che non
era ’n dubbio de l’affrezzione soja, ma che lo mmale sujo non aveva
remmedio, pocca nasceva da na preta, dove aveva semmenato li desiderie
senza speranza de frutto: da na preta, da la quale no sperava manco
no funcio de contentezza; da na preta de Sisefo, che portava a lo
monte de li designe, e com’era ncoppa, se vrociolava tuppete a bascio:
all’utemo dopò mille pregarie, le disse tutto chello, che passava de
l’ammore sujo. Jennariello, sentuto sta cosa, conzolannolo comme meglio
potte, le disse, che stesse de buon armo, e non se lassasse strascenare
da l’amore malanconeco, ca isso pe ddarele quarche sfazione, era
deliberato de cammenare tanto lo munno, nfi che trovasse na femmena,
che fosse l’originale de chella preta; e fatto subeto armare na grossa
nave chiena de mercanzie, e bestutose da mercante, tiraje a la vota de
Venezia, schiecco de la Talia, recietto de vertoluse, livro maggiore
de le mmaraviglie dell’arte, e de la natura: dove fattose dare sarvo
connutto pe passare a llevante, fece vela a la vota pe lo Cairo, e
ttrasuto a la Cetate, vedenno uno, che portava no bellissimo farcone,
subeto se lo compraje pe portarelo a lo frate, ch’era cacciatore; e
n’autro poco nnante, scontrato n’autro co no cavallo de spanto pure se
l’accattaje; e trasuto a na taverna se voze restorare de li travaglie
passate pe lo maro; ma la matina seguente, quanno l’asserzeto de le
stelle pe la carreca de Generale de la luce, leva le ttenne da lo
steccato de lo cielo, ed abbannona lo puosto, Jennariello commenzaje a
cammenare pe la Cetà, mettenno pe tutto comm’a lupo cerviero l’uocchie,
vedenno chesta femmena, e chella, si pe sciorte trovasse a na facce
de carne la semmeletudene de na preta; mentre jeva sbalestrato pa
ccà e da llà votannose sempre ’ntuorno, comm’a mariuolo, che ha paura
de li tammare, scontrato no pezzente, lo quale portava no spetale de
’nchiastre e na jodeca de pezze, che le decette: Galant’ommo mio, che
d’aje, che te veo accossì sbagottuto? Aggio da dicere a te li fatte
meje, respose Jennariello: mo si ch’aggio fatto lo ppane a contare
la ragione mia a li sbirre. Chiano, bello giovane mio, leprecaje lo
pezzente, ca la carne d’ommo non se venne a piso; si Dario non contava
li guaje a no muzzo de stalla, non sarria deventato patrone de la
Perzia; perrò non sarrà gran cosa, che decisse a no povero pezzente
li fatte tuoje, ca non c’è spruoccolo accossì sottile, che non pozza
servire pe annetta diente. Jennariello, che intese sto poveriello
parlare assestato, e co sinno, le disse la causa, che l’aveva portato a
chille paise; la quale cosa sentuta lo pezzente, le respose: Ora vide,
figlio mio, comme besogna fare cunto d’ogn’uno; ca si be so mmonnezza,
puro sarraggio buono a ’ngrassare l’uorto de le speranze toje. Ora
siente, io co scusa de cercare lemmosena tozzoliarraggio na porta
de na bella giovane figlia de no nigromante, aprece buono l’uocchie,
videla, contemprala, squatrala, considerala, mesurala, ca trovarraje la
’mmagene de chella, che desidera frateto. E cossì decenno, tozzolaje la
porta de na casa poco lontana, dove affacciatase Liviella, e ttiratole
no tuozzo de pane, Jennariello subeto che la vedde, le parze fraveca
secunno lo modiello datole da Milluccio; e dato na bona lemmosena a
lo pezzente, nne lo mannaje; e ghiuto a la taverna se stravestette de
lazze, e spingole, portanno drinto a doje cascette tutto lo bene de
lo munno: e tanto passaje gridanno de nante la casa de Liviella, che
lo chiammaje, e pigliatose na vista de le belle rizzole, coperchiere,
zagarelle, filonnente, pontille, e pezzille, pannecielle, vroghere,
spingole, scotelle de russo, e tocche de regina, che portava, e bisto,
e revisto tutta la mercanzia, all’utemo le disse, che le mostrasse
quarc’auta cosa bella, e isso respose: Segnora mia, drinto a ste
ccascette io porto cose zaffie, e de poca spesa: ma si ve degnassevo
de venire a la nave mia, ve farria vedere cose dell’autro munno; pocca
aggio tresoro de cose belle, e degne de gran Signore. Liviella, che
n’era scarza de curiositate, pe non pregiudicare a la natura de le
ffemmene, le disse: affè, ca si patremo non fosse fore, nce vorria dare
na passata. Tanto meglio, leprecaje Jennariello, ce porrisse venire,
ca fuorze isso non te concedarria sto gusto, e io te ’mprometto de
farete vedere sfuorgie da pazziare, che cannacchie, e scioccaglie? che
prattiglie, e apprettatore? che lavure de cartiglia? nsomma voglio
farete strasecolare. Liviella, che sentette sto granne apparato de
cose, chiammatose na commare soja, che l’accompagnasse, s’abbiaje a
la nave, dove sagliuta ’ncoppa, mentre Jennariello la teneva ncantata
a ffarele vedere tante belle cose, ch’aveva portate, fece destramente
auzare lo fierro, e stennere vela, che ’nnante, che Liviella auzasse
l’uocchie da le mercanzie, e se vedesse allargata da terra, aveva fatto
na mano de miglia; la quale addonatase tardo de lo corrivo, commenzaje
a fare l’Alimpia a la reverza, perchè se chella se lamentaje lassata
’ncoppa a no scuoglio, chesta se lamentaje, che lassava li scuoglie.
Ma Jennariello decennole chi era, dove la portava, e la fortuna, che
l’aspettava, e otra a chesto, depegnennole la bellezza de Milluccio,
lo valore, la vertute, e finalmente l’ammore, co la quale l’averria
recevuta, tanto fece, e tanto disse, che s’acquetaje, anze pregava
lo viento, che l’avesse portata subeto a bedere lo colorito de lo
designo, che l’aveva fatto Jennariello. E cossì navecanno allegramente,
ecco sentettero sotto la nave vervesiare l’onna, che si bè parlava
sotta lengua, lo patrone de la nave, che era comprennuoteco, gridaje
ogne ommo allerta, ca mò se ne vene no temporale, che Ddio nce la
manne bona. A le quale parole se nce agghionze lo testemmonio de
na fiscata de viento; ed eccote commogliato lo cielo de nuvole, e
lo maro chino de porcelluzze. E perchè l’onne curiose de sapere li
fatte d’autre, senz’essere ’nvetate a nnozze, saglievano ncoppa a
la nave, chi l’aggottava co na navetta drinto na tinella, chi le
deva lo sfratto co na tromma; e mmentre ogne mmarenaro, perchè se
trattava de causa propria, attenneva chi a lo temmone, chi a la vela,
chi a la scotta; Jennariello sagliette sopra la gaggia per bedere co
n’acchiale de vista longa, si poteva scoprire pajese, dove potessero
dare funno, ed ecco mentre mesurava ciento miglia de destanzia co
duje parme de cannuolo, vedde passare no palummo, e na palomma, che
fermatose ’ncoppa la ’ntenna, deceva lo mascolo: _rucche rucche_: e
la femmena le respose: che d’aje marito mio, che te lamiente? e lo
palummo deceva: sto nigro Prencepe ave accattato no Farcone, lo quale
subeto che jarrà ’nmano a lo frate, le cacciarrà l’uocchie; e chi non
nce lo portarrà, o chi l’avisarrà, preta marmora tornarrà. E ditto
chello, tornaje a gridare, _rucche rucche_; e la palomma de nuovo le
decette, e puro te lamiente? ence autro de nuovo: e lo palummo; nc’è
n’autro chiajeto, ca ave accattato perzì no cavallo, e lo frate la
primma vota che lo cavarcarrà, lo cuollo se romparrà, e chi non ce lo
portarrà, o nce l’avisarrà, preta marmora tornarrà: e _rucche rucche_:
oimè tante rucche rucche, secotaje a dicere la palomma, che autra
cosa và pe lo tagliero? e lo palummo decette, chisso porta na bella
mogliere a lo frate, ma la primma notte, che se nce corca, sarranno
manciate, l’uno, e l’autra da no brutto Dragone; ma chi non nce la
portarrà, o l’avisarrà, preta marmora tornarrà; e ditto chesto cessaje
la borrasca, e passaje la zirria a lo maro, e l’arraggia a lo viento;
ma se moppe assaje chiù granne tempesta a lo pietto de Jennariello pe
chello, che aveva sentuto, e chiù de quatto vote voze jettare tutte
ste cose a mmaro, pe non portare la causa de la roina de lo frate. Ma
dall’autra banna penzava a se stisso, e la primma causa commenzava
da se medesimo dubetanno, si non portava ste ccose a lo Frate, o si
l’avesse avisato, de deventare marmora, se resorvette de mirare chiù
priesto a lo pproprio, ca a l’appellazione, perchè le stregneva chiù
la cammisa, che lo jeppone; e arrivato a lo puorto de Fratta-ombrosa,
trovaje lo frate a la marina, che avenno visto retornare la nave,
l’aspettava co no gusto granne. E bisto, che portava chella, che
teneva drinto a lo core, confrontata una facce co l’autra, e bisto
ca non c’era no pilo de defferenzia, appe tanta allegrezza, che la
troppo careca de lo contiento l’appe a schiattare sotta la sarma; ed
abbraccianno lo frate co gran piacere le disse: Che Farcone è chisto,
che puorte ’n pugno? e Jennariello le disse, l’aggio comprato pe
daretillo. E Milluccio respose, ben se pare ca mme vuoje bene, pocca
vaje cercanno de dareme a l’ommore; e cierto, ca si mme portave no
tresoro non mme potive dare chiù gusto, che sto Farcone; e bolenno
pigliarelo ’n mano, Jennariello lesto co no cortiello gruosso che
portava a lato, le fece sautare lo cuollo. A la quale azzione restaje
stopafatto lo Rrè, e tenne pe pazzo lo frate, ch’avesse fatto sto
sproposeto; ma pe non ’ntrovolare l’allegrezza de la venuta, non ne
fece parola. Ma vedenno lo cavallo, e demannatole de chi era, ’ntese
ch’era lo sujo: pe la quale cosa le venne desederio de cravaccarelo, e
mentre se faceva tenere la staffa, Jennariello subeto co na cortella
le tagliaje le gamme: la quale cosa dette a lo naso de lo Rrè, e
le parze, che lo ffacesse pe despietto sujo, e se le commenzaro a
rrevotare li stentine: ma non le parze tiempo de farene resentemiento,
pe no ’ntossecare a primma vista la zita, la quale non se saziava de
merare, e stregnere pe la mano; e arrivate a lo palazzo Riale commetaje
tutte le Signore de la Cetate a na bella festa, dove se vedde a la
Sala na scola spiccecata de cravaccature a fare corvette, e bisce, co
na mano de polletre ’nforma de femmene, ma fornuto lo ballo, e dato
’mmasto a no gruosso banchetto, se jezero a corcare. Jennariello, che
n’aveva autro penziero ’n chiocca, che de sarvare la vita a lo frate,
se nascose dereto lo lietto de li zite, e stanno lesto a bedere quanno
venesse lo Drago, eccote a mmeza notte no bruttissemo Dragone trasire
drinto a chella cammara, che ghiettava sciamma dall’uocchie, e fummo
da la vocca, lo quale sarria stato buono pe ssanzaro a fare vennere
tutta la semmentella de li speziale pe lo terrore, che portava a la
vista: la quale cosa visto Jennariello, co na cortella damaschina, che
s’aveva puosto sotta, commenzaje a tterare lo sbaraglio a deritto, ed
a rrevierso, e tra l’autre cuorpe nne tiraje uno accossì spotestato,
che tagliaje pe mmiezo na colonna de lo lietto de lo Rrè, a lo
quale remmore se scetaje lo frate, e lo Dragone squagliaje. Ma visto
Milluccio la cortella ’n mano a Jennariello, e la colonna tagliata pe
miezo, commenzaje a gridare, o quattro de’ miei, o gente, olà ajuto
ajuto, ca sto tradetore de fratemo è benuto pe m’accidere. A le quale
vuce corzero na mano d’ajutante, che dormevano all’antecammera, e
fattolo legare, lo Rrè lo mannaje a la stessa ora presone, e ssubeto,
che la matina aperze banco lo Sole pe liberare lo deposeto de la luce a
li credeture de lo juorno, chiammaje lo conziglio, e contato lo fatto,
lo quale s’accordava lo mal’anemo mostrato ad accidere a despietto sujo
lo Farcone, e lo Cavallo, sentenziaro, che dovesse morire; e non foro
possienti li prieghe de Liviella a nnammollare lo core de lo Rrè, lo
quale deceva: tu non me vuoje bene, mogliere mia, mentre stimme chiù
lo cainato, che la vita mia; tu l’aje visto coll’uocchie proprie sto
cane assassino co na cortella, che tagliava no pilo n’ajero venuto a
tritolareme, che si non me reparava chella colonna de lietto (colonna
de la vita mia) a st’ora de mò sarrisse carosa. Cossì decenno, dette
ordene, che s’esequesse la jostizia. Jennariello, che se ’ntese ntimare
sto decreto, e pe ffare bene, se vedde redutto a tanto male, non
sapeva, che se penzare de lo fatto sujo, perchè si non parlava, male,
si parlava, peo; tristo rogna, e peo tegna, e zò che avesse fatto era
no cadere da l’arvolo ’n canna a lo Lupo; si steva zitto perdeva lo
cuollo sotto a no fierro, se isso parlava, forneva li juorne drinto
na preta, all’utemo dopò varie tropeje de consiglie, fece pensiero
de scoprire lo negozio a lo frate, e mmentre ad ogne cunto doveva
morire, stemava meglio risoluzione, sacredere lo frate de lo vero,
e scompire li juorne co titolo de ’nnozente, che tenerse ncuorpo la
veretà, ed essere cacciato da lo munno, comm’a ttradetore: e perzò
fatto ’ntennere a lo Rrè, ca voleva parlare de cosa mportante a lo
stato, fu fatto venire a la presenzia soja, dove le facette no granne
preammolo de l’ammore, che l’aveva sempre portato, po trasette a lo
’nganno fatto a Liviella, pe darele sfazione; a chello, che sentette da
li palumme ntuorno a lo Farcone, e perzò pe non tornare preta marmora
nce lo portaje, e senza revelare lo secreto l’accise, pe non lo vedere
senz’uocchie: cossì dicenno se sentette ’ndorare le gamme, e farese
de marmora, e secotanno la cosa de lo cavallo de la stessa manera, se
fece vedentemente de preta fi a la centura ntostanno miseramente, cosa
che ad autro tiempo averria pagato a denare contante, e mo le chiagneva
lo core. All’utemo venenno a lo fatto de lo Dragone, restaje tutto de
preta comme na statola ’nmiezo a chella sala, la quale cosa visto lo
Rrè, ’ncorpanno l’arrore sujo, e lo jodizio temmerario, ch’aveva fatto
de no frate accossì buono, e cossì ammoruso, nne tenne viseto chiù de
n’anno, e sempre che ’nce pensava, faceva no sciummo de lagreme. Fra
chisto tiempo, figliata Liviella, fece duje figlie mascole, ch’erano
doje bellezzetuddene cose de lo munno, e dapò cierte poche mise,
essenno juta la Regina a spasso ’n campagna, stanno lo patre co li
piccerille ’n miezo la sala meranno co l’uocchie a pisciarielle chella
statola, memoria de la sciocchezza soja, che l’aveva levato lo sciore
de l’uommene; eccote trasire llà drinto no gran vecchione, che co la
zazzara copreva le spalle, e co la varva commogliava lo pietto, lo
quale fatto lleverenzia a lo Rrè, le disse: Quanto pagarria la Corona
vostra, e sto bello fratiello tornasse comm’era? e lo Rrè respose: io
pagarria lo Regno mio. Non è cosa chesta, leprecaje lo viecchio, che
nce voglia premmio de recchezza; ma trattannose de vita co autrottanto
de vita se deve pagare: lo Rrè, parte pe l’ammore, che portava a
Jennariello, parte perchè se vedeva corpato a lo danno sujo, respose:
Crideme, messere mio, ca io mettarria la vita mia pe la vita soja, e
puro che chisto scesse da drinto sta preta, mme contentarria essere
schiaffato drinto na preta. Sentuto chesto disse lo viecchio: senza
mettere la vita vostra a sti cemiente, pocca se stenta tanto a crescere
n’ommo, vastarria lo sango de sti peccerille vuoste, ontato a sta
marmora, che lo farriano subeto sorzetare. Lo Rrè a ste parole respose,
de li figlie se ne fanno, siace la stampa de ste ccretelle, ca se ne
ponno fare dell’autre, e aggio no frate, che no spero maje d’averne
n’autro. Accossì decenno, fece nnanze a n’Idolo de preta, meserabele
sacrificio de duje crapettielle ’nnoziente, e ontato de lo sango loro
la statola, deventaje subeto viva; che abbracciata da lo Rrè, fecero
na prejezza, che non se po dire; e fatto mettere chelle povere criature
drinto na cascia, pe darele po sepotura co lo nore, che se deveva, nne
lo stisso punto tornaje la Regina da fore, e lo Rrè fatto annasconnere
lo frate, disse a la mogliere, che ppagarrisse, core mio, e fratemo
tornasse vivo? Io pagarria, respose Liviella, tutto sto Regno: e lo Rrè
leprecaje, darrisse lo sango de li figlie tuoje? chesso nò, respose la
Regina, che non sarria così crodele a cacciareme co le mmano stesse
le bisole dell’uocchie mieje: oimè, tornaje a dicere lo Rrè, ca pe
bedere vivo no frate, aggio scannarozzolato li figlie, ed ecco appunto
lo priezzo de la vita de Jennariello. Accossì decenno, le mostraje
li figliule drinto la cascia, la quale vedenno sto ammaro spettacolo,
gridanno comm’a pazza, decette: O figlie mieje, o pontelle de sta vita,
o popelle de sto core, o fontane de lo sango mio, chi ha fatto sta
magriata a le ffenestre de lo Sole? chi ha nsagnato senza licienzia de
miedeco la vena prencepale de la vita mia? oimè, figlie mieje, figlie
speranza seseta mia, luce ’ntrovolata, docezza ntossecata, stanfella
perduta. Vuje site spertosate da lo fierro, io smafarata da lo dolore?
vuje affocate drinto lo sango, io annegata drinto a le lagreme; oimè,
che pe dare vita a no zio, avite acciso la mamma, ch’io non pozzo
tessere cchiù la tela de li juorne mieje senza vuje contrapise belle
de lo telaro de sta negra vita: besogna che sfiate l’organo de le buce
meje, mo che ne so levate li mantece. O figlie, o figlie. Comme non
responnite a la mammarella vostra, che già ve dette lo sango drinto
lo cuorpo? mo ve lo dà fore dall’uocchie? ma pocca la sciorte mia
mme fa vedere seccata la fontana de li spassatiempe mieje, non boglio
chiù ccampare pe sfunnolo a sto munno? mo mme ne vengo pedata pedata
a rretrovareve. Accossì decenno, corze a na fenestra pe derroparese,
ma a lo stisso tiempo pe la stessa fenestra trasette lo patre sujo
drinto na nugola, lo quale le disse, fermate Liviella, ca io dapò avere
fatto no viaggio e ttre servizie, me so bennecato de Jennariello, che
benette a la casa mia a foiremenne la figlia, co farela stare tanta
mise comm’a statola de marmora dinto na preta, mme so pagato de lo
mmale termene tujo a farete sbiare senza respetto mio ’ncoppa na nave,
co farete vedere duje figlie, anze doje gioje scannate da lo patre
stesso, ed aggio mortefecato lo Rrè de lo crapriccio de femmena prena,
che s’aveva fatto venire, co ffarelo ’n primma Jodece crimmenale de
lo frate, po Boja de li figlie. Ma perchè v’aggio voluto radere, e no
scortecare, voglio, che tutto lo tuosseco ve torna pasta riale, e perrò
va te piglia li figliule tuoje, e nnepute mieje, ca so chiù belle che
maje; e tu Milluccio, abbracciame, ca t’azzetto pe ghiennero, e pe
ffiglio, e perdono a Jennariello l’affese, avenno fatto quanto ha fatto
pe servizio de no fratiello tanto meretevole. Cossì ditto, vennero li
figliule, che lo Vavo non fu maje sazio d’abbracciare, e basare, a le
quale allegrezze trasette pe tierzo Jennariello, ch’essenno passato
pe la trafila, mo se ne jeva ’mbruodo de maccarune, si bè ca co ttutte
li guste, che sentette a la vita soja, no le scettero maje da mente li
pericole passate, pensanno a l’arrore de lo frate, e quanto deve essere
accuorto l’ommo pe non cadere ’n fuosso, essenno che
_Ogne ghiodizio omano è fauzo, e stuorto._