TRATTENEMIENTO VIII De la Jornata IV.
_Sette Fratielle parteno da la casa lloro, perchè la mamma non
faceva na figlia femmena, a la fine fattone una, mentre aspettano
la nova, e lo signale, la mamma fa arrore a li signe, pe la quale
cosa vanno spierte. Cresce la sore, le ccerca, le ttrova, e dapò
varie socciesse tornano ricche a la casa._
_Lo cunto de le ddoje Pizzelle, fu beramente pizza chiena, che
dette a lo gusto de tutte, ch’ancora se ne liccano le ddeta.
Ma essennose posta ’n corzetto Paola de contare lo sujo, fu lo
commannamiento de lo Prencepe uocchio de lupo, che llevaje a ttutte
la parola, ed essa accossì accommenzaje a pparlare._
Chi fà piacere sempre ne trova. Lo beneficio è borpara de l’amecizie,
e ccrocco de l’ammore: chi non semmena non reccoglie, si comme ve
n’ha dato n’antepasto d’assempio Ciulla, e io ve ne darraggio no
soprattavola, si v’allecordarrite, ca Caro disse; parla poco a lo
convito. E perrò siateme cortese de no poco d’arecchie. Accossì lo
cielo ve cresca sempre l’arecchie, pe ssentire cose de sfazione, e de
gusto.
Era na vota a lo pajese d’Arzano na bona femmena, la quale ogn’anno
scarrecava no figlio mascolo, tanto che erano arrivate a ssette, che
bedie na serenga de lo Dio Pane a ssette canne, una cchiù granne
dell’autra, li quale avenno motato le pprimme arecchie, dissero a
Jannetella la mamma, che era n’auta vota prena: Sacce, mamma mia,
ca si tu dapò tanta figlie mascole non faje na femmena, nuje simmo
propio resolute de lassare sta casa, e ghire pe sso munno, comm’a
li figlie de le mmerole spierte, e demierte. La mamma, che sentette
sto male annunzio, pregava lo Cielo, che avesse spogliato li figlie
de sto desederio, e llevata essa da perdere sette gioje comme erano
li figlie. Ed essenno oramaje l’ora de lo partoro, li figlie dissero
a Jannetella: Nuje ce reterammo ncoppa a cchella tempa, o ripa, che
ce stà facce fronte, se faje mascolo, miette no calamaro, e la penna
ncoppa la finestra; e si faje femmena, miettece na cocchiara, e na
conocchia; perchè se vedarrimmo segnale de femmena, nce ne venimmo
a la casa a spennere sto riesto de vita sotto l’ascelle toje; ma si
vedimmo signale de mascolo, scordatenne de nuje, ca nce puoje mettere
nomme penna. Partute li figlie, voze lo Cielo, che Jannetella facesse
na bella figliaccara; e ditto a la mammana, che ne desse signo a li
frate, fu accossì storduta, e stonata, che nce mese lo calamaro, e
la penna; la quale cosa visto li sette fratielle, se mesero la via
fra le gamme, e tanto camminaro, che arrivattero dapò tre anne de
cammino a no vosco, dove l’arvole a suono de na sciommara, che faceva
contrapunte pe ccoppa le pprete, facevano na mpetrecata drinto a lo
quale nc’era la casa de n’Uorco, a lo quale essenno state cacciate
l’uocchie dormenno da na femmena, era accossì nemmico de sto sesso, che
quante nne poteva avere, tante se ne mangiava. Arrivate sti Giuvane a
la casa dell’uorco, stracque de lo viaggio, allancate da la famme, le
fecero ’ntennere si pe ccompassione le voleva dare quarche muorzo de
pane: a li quale respose l’uorco, che l’averria dato da vivere, si lo
volevano servire, ca no averriano avuto autro da fare, che guardarelo
no juorno pe d’uno, comm’a Cacciottiello. Sentuto chesto li Giuvane,
le parze de trovare la mamma, e lo patre, e accordatose, se restaro a
lo servizio dell’Uorco; lo quale mparatose li nomme lloro a mmente,
mo chiammava Giangrazio, mo Cecchitiello, mo Pascale, mo Nuccio, mo
Pone, mo Pezzillo, e mo Carcavecchia, che accossì avevano nomme li
fratielle, e consignatole no vascio de la casa soja, le mmanteneva
tanto, che potevano passare la vita. Ma fra tanto tiempo essenno
cresciuta la sore, e ssentenno ca sette fratielle suoje pe scordamiento
de la mammana, s’erano date a ccammenare pe lo munno, e non se ne
sapeva cchiù nnova, le venne crapiccio de irele cercanno; e tanto fece,
e tanto disse a la mamma, che scervellata da tante prieghe suoje, e
vestutala da pellegrina, le dette lecienzia; la quale cammenato, e
cammenato, domannanno sempre de parte ’n parte, chi avesse visto sette
fratielle, tanto corze paise, ch’a na taverna n’appe nova; e ffattose
llà nvezzare la strata de chillo vosco, na matina quanno lo Sole co
lo temperino de li ragge rade li scacamarrone fatte da la notte sopra
la carta de lo Cielo, se trovatte a chillo luoco, dove co gusto granne
fu rrecanosciuta da li frate, e mmardissero chillo calamaro, e chella
penna, che scrisse fauzariamente tanta malanne lloro; e ffattole mille
carizze, l’avvertèro a stare reterata drinto a chella cammara, che
non la vedesse l’Uorco; ed otra a chesto, che de qualesevoglia cosa,
che le venesse da mangiare ’n mano, nne desse la parte a na gatta,
che steva drinto a chella cammara, autramente l’averria fatto quarche
dammaggio. Cianna, che accossì se chiammava la sore, screvette sti
consiglie a lo quatierno de lo core, ed ogne cosa, ch’aveva, faceva
da buon compagno co la gatta, secanno sempre justo, decenno: chesto a
mme, chesto a tte, chesto a la figlia de lo Rrè, dannocenne la parte
pe fi a no fenucchio. Ora soccesse, ch’essenno jute li frate a caccia
pe sservizio dell’Uorco, le lassaro no panariello de cicere, che le
ccocenasse, la quale scegliennole, nce trovaje pe ddesgrazia n’antrita,
che fu la preta de scannalo de la quiete soja, pocca ’nvoccatasella
senza darene la meza parte a la gatta, chella pe despietto, correnno
a lo focolare pisciaje lo ffuoco, tanto che se stotaje. Cianna, che
bedde chesto, non sapenno comme se fare, scette da chelle ccammere
contra lo commannamiento de li frate, e ttrasuta drinto l’appartamiento
dell’Uorco, cercaje no poco de fuoco; l’Uorco, che sentette la voce de
na femmena, disse: Ben-venga lo mastro, aspetta no poco, ca aje trovato
chello, che baje cercanno: e accossì ditto, pigliaje na preta de Genoa,
e ontatala d’uoglio, accommenzaje ad affilare le zanne. Cianna, che
bedde lo carro male abbiato, dato de mano a no tezzone, corze a la
cammara soja, e pontellaje la porta, non lassanno de schiaffarence
dereto varre, segge, scanne de lietto, casciolelle, prete, e quanto
nc’era drinto a la cammara. L’Uorco, comm’ebbe date lo filo a li
diente, corze a la cammara, e trovannola chiusa, accommenzaje a darence
cuorpe de cauce, pe la scassare: a lo quale rommore venettero arrevanno
li sette frate, e trovanno sto streverio, e sentennose ’mproverare
dall’Uorco de tradeture, ca la cammara lloro era fatto lo beneviento de
le nnemmiche soje: Giangrazio, ch’era lo cchiù granne, ed avea cchiù
sinno de l’autre, visto lo negozio male parato, disse all’Uorco: Nuje
non sapimmo niente de sto fatto, e porria essere, che sta mmardetta
femmena fosse trasuta a sta cammara pe desgrazia, mentre nuje simmo
state a la caccia: ma pocca s’è fortefecata da dereto, viene co mmico,
ca te porto pe no luogo, dove le darrimmo adduosso senza, che se pozza
defennere. Accossì pigliato l’Uorco pe la mano, lo carriattero dov’era
no fuosso futo futo: e datole na spenta, lo fecero derropare a bascio:
e pigliato na pala, che trovaro ’n terra, lo coperzero de terreno,
e fatto aprire la sore, le ’ntronaro buono l’arecchie de l’arrore,
ch’aveva fatto, e de lo pericolo, a lo quale s’era posta, decenno,
e che pe l’abbenire stesse chiù ’n cellevriello, che se guardasse de
cogliere erva ’ntuorno a chillo luoco, dov’era atterrato l’Uorco, ca
sarriano tornate tutte sette Palommielle. Lo Cielo mme ne guarde,
respose Cianna, ch’io ve facesse sto danno; e accossì puostose ’n
possessione de la rroba dell’Uorco, e mpatronutose de tutta la casa,
stevano allegramente, aspettanno, che passasse la ’nvernata, e quanno
lo Sole desse pe nferta a la terra de la possessione pigliata a la casa
de lo Taoro na gonnella verde regamata de sciure, se potessero mettere
’n viaggio pe tornare a la casa lloro. Accorze, che trovannose li frate
a fare legna a la montagna pe repararese da lo friddo, che cresceva
de juorno ’n juorno, arrevaje a chillo vosco no povero pellegrino, lo
quale avenno fatto l’abbaja a no gatto maimone, che stava sopra a na
pigna, l’aveva terato no frutto de chillo arvolo ncoppa la catarozza,
che nc’era fatto no vruognolo accossì spotestato, che lo scuro gredava
comm’arma dannata. Cianna sciuta a lo remmore, piatosa de lo male sujo,
couze subeto na cimma de rosamarina da na troffa, ch’era nasciuta
ncoppa lo fuosso dell’Uorco, e co ppane mazzecato, e ssale le fece
no nchiastro, e datole da fare colazione, nne lo mannaje; e mentre
apparecchiava a tavola aspettanno li frate, eccote vedde venire sette
Palommielle, li quale le dissero; O che meglio te fossero cioncate le
mmano, o causa de tutto lo mmale nuostro, nnanze, che ccogliere chella
mmardetta rosamarina, che nce fa ire pe la marina. E ch’aje magnato
cellevrielle de gatta, o sore mia, che te aje fatto scire da mente
l’aviso nuostro? eccote deventate aucielle, soggette a le granfe de
nigle, de sproviere, e d’asture; eccote fatte compagne d’acquarule, de
capofusche, de cardille, de cestarelle, de cardole, de coccovaje, de
cole, de ciaole, de codejanche, de zenzelle, de capune sarvateche, de
crastole, de covarelle, de gallenelle, de gallinarcere, de lecore, de
golane, de froncille, de reille, de parrelle, de paglioneche, de capo
tortielle, de terragnole, de sciurole, de pappamosche, de paposce, de
scellavattole, de semmozzarielle, de sperciasepe, de rossielle, de
monacelle, de mazzarole, de morette, de paperchie, de lugane, e de
turzelupiche. Aje fatto la bella prova; mo simmo tornate a li paise
nuostre pe bederece aparate rezze, e poste viscate: pe ssanare la
capo de no pellegrino, aje rotta la capo a ssette frate, che non c’è
rremmedio a lo male nuostro, si non truove la mamma de lo tiempo, che
te mpare la strata a ccacciarence d’affanno. Cianna comm’a cquaglia
pelata de l’arrore ch’aveva fatto, cercaje perdonanza a li frate, e
s’afferze de ntorniare tanto lo munno, finchè trovasse la casa de sta
vecchia; e pregannole a stare sempre a la casa, azzò non le soccedesse
quarche desgrazia, fi tanto, ch’essa tornava, commenzaje a ccammenare,
senza stracquarese maje, che si bè marciava a pede, lo desederio
d’ajutare li frate, le serveva de mula de percaccio, co la quale faceva
tre mmiglia ad ora, e arrevato a no lito, dove lo maro co la sparmata
de ll’onne zollava li scuoglie che non bolevano responnere a lo latino,
che le deva a ffare, vedde na grossa valena, la quale le disse: Bella
giovane mia, che baje facenno? ed essa, vao cercanno la casa de la
mamma de lo tiempo. Saje che buoje fare, leprecaje la valena, và sempre
deritto pe sta marina, e lo primmo sciummo, che truove, tira capo ad
auto, che trovarraje chi te mostrarrà lo cammino: ma famme no piacere,
comme truove sta bona vecchia, cercale ’n grazia da parte mia, che mme
trova quarche remmedio, ch’io pozza cammenare secura senza mmorrare
tante vote a scuoglie, e dare tanta vote a l’arena. Lassa fare a sto
fusto, disse Cianna, e rrengraziatala de la via, che l’aveva mostrata,
commenzaje a trottare pe chella chiaja, e dapò luongo viaggio arrivata
a chillo sciummo, che comm’a commessario de fiscale sborzava monete
d’argiento a la banca de lo maro, pigliaje lo cammino ad auto, e
arrevato a na bella campagna, dove lo prato faceva la scigna de lo
cielo a mmostrare stellato de sciure lo manto verde, trovaje no sorece,
lo quale le disse: dove vaje accossì ssola, bella femmena? ed essa:
cerco la mamma de lo tiempo; troppo aje da cammenare, soggionse lo
sorece: ma non te perdere d’armo; ogne cosa ha capo: cammina puro verzo
chelle mmontagne, che comme a ssignure libere de sti campe, se fanno
dare lo titolo d’autezza, ca sempre averraje meglio nova de chello, che
cirche; ma famme no piacere, comme si arrivata a la casa, che desidere,
fatte a dicere da sta bona vecchiarella, che rremmedio porriamo trovare
pe llevarece da la terannia de li Gatte, e po commanname, ca m’accatte
pe schiavo. Cianna promettuto de farele sto piacere, s’abbiaje verzo
chelle mmontagne, le quale sibè parettero vecine, non s’arrevaro
maje: pure comme meglio potte arrivatace, se sedette stracqua ncoppa
a na preta, dove vedde n’aserceto de formiche, che carriavano na gran
mmonezione de grano; una de le quale votatase a Cianna, le disse, chi
si, e dove vaje? e Cianna ch’era cortese co ttutte, le disse: Io sò na
sfortonata giovene, che pe ccosa, che me mporta, cerco la casa de la
mamma de lo tiempo. Cammina cchiù ’nnanze, respose la formica, ch’a lo
sboccare de chelle mmontagne a na gran largura te ne sarrà dato nova,
ma fanne no gran piacere, vide de scanzare sta vecchia, che porriamo
fare nuje autre formiche pe ccampare quarche tiempo, che mme pare na
gran pazzia de le ccose terrene a fare tanto acchietto, e provisione
de mazzecatorio, pe na vita accossì ccorta: che comme a ccannela de
ncantatore a la mmeglio afferta dell’anne, se stuta. Quietate, disse
Cianna, ca te voglio rennere la cortesia, che m’aje fatta: e passate
chelle mmontagne, se vedde a no bello chiano, pe lo quale cammenato no
piezzo, trovaje no grann’arvolo de cierzo testemmonio de l’antichetà,
confiette de chella zita, ch’era contenta, e boccune che dace lo
tiempo a sto siccolo ammaro de le ddocezze perdute; lo quale formanno
lavra de le scorze, e llengue de lo medullo, decette a Cianna: Dove,
dove accossì affannata, figliola mia? viene sotto all’ombre meje,
e rreposate; ed essa decennole a gran merzè, se scusaje, ca jeva
de pressa a trovare la mamma de lo tiempo. La quale cosa sentuto la
cerqua, le disse: tu nne si poco lontano, che non camminarraje n’autra
jornata, che bedarraje sopra na montagna na casa, dove trovarraje
chello, che ccirche: ma s’aje tu tanta cortesia quanto aje bellezza,
procura sapere, che porria fare pe rrecuperare lo nnore perduto; pocca
da posto d’uommene granne so fatto civo de puorce. Lassa lo penziero
a Cianna, essa respose, ca vederraggio de te servire; e accossì ditto
partette, e cammenanno senza reposare maje, arrivatte a li piede de
na montagna sconcecajuoco, la quale jeva co la capo a dare fastidio
a le nnugole, dove trovaje no vecchiariello, che pe stracquezza de
cammenare, s’era corcato ’n miezo a cierto ffieno, lo quale vedenno
Cianna, la conoscette subito, ch’era chella, che l’aveva mmedecato lo
vruognolo, e ’ntiso chello che ghieva cercanno la giovene, le decette,
ch’isso portava lo cienzo a lo tiempo dell’affitto de la terra, ch’avea
semmenato, e che lo tiempo era no teranno, che s’aveva osorpato tutte
le ccose de lo munno, e boleva tributo da tutte, e particolaremente da
uommene de l’età soja, e perchè aveva receputo beneficio da la mano de
Cianna, nce l’è benuta a rrennere a ciento duppie, co darele quarche
buono avvertemiento circa la venuta soja a chesta montagna; dove le
despiaceva de non poterela accompagnare, pocca l’età soja connannata
cchiù priesto a scennere, ch’a ssaglire, l’astregneva a rrestarese
a le ffaude de chelle mmontagne pe sautare li cunte co li scrivane
de lo tiempo, che so li travaglie, li disguste, e le ’nfermetà de la
vita, e ppagare lo debeto de la natura. E perzò le decette: ora siente
buono, bella figlia mia, senza peccato, agge da sapere, qualemente cosa
ncoppa la cimma de chella montagna trovarraje no scassone de casa,
che non s’allecorda quanno fu ffravecata, le mmura songo sesete, le
pedamente fracete, le porte carolate, li mobele stantive, e ’n somma
ogne cosa conzomata, e destrutta, da ccà bide colonne rotte, da llà
statue spezzate, non essennoce autro sano, che n’arma sopra la porta
quartiata, dove nce vedarraje no serpe, che se mozzeca la coda, no
ciervo, no cuorvo, e na fenice, comme si ttrasuta drinto, vedarraje
pe tterra limme sorde, serre, fauce, e ppotature, e cciento, e ciento
caudarelle de cennere, co li nomme scritte comme arvarelle de speziale,
dove se lejano Corinto, Sagunto, Cartagene, Troja, e mmille autre Cettà
jute a l’acito; le quale conserva pe mmammoria de le ’mprese soje.
Ora comme si becino a sta casa, nascunnete da parte, nfi ch’esce lo
tiempo, e sciuto, trasetenne drinto, ca trovarraje na vecchia vecchia,
che co la varva tocca la terra, e co lo scartiello arriva a lo cielo,
li capille comm’a ccoda de cavallo liardo le coprono li tallune: la
facce pare no collaro a lattochiglia co le ccrepe teseche pe la posema
dell’anne, la quale sta seduta sopra n’alluorgio ’mpizzato a no muro:
e perchè le pparpetole so accossì granne, che l’ammarrano l’uocchie,
non te porrà vedere: tu comme si trasuta leva subeto li contrapise da
l’allorgio, e pò chiammata la vecchia, pregala a darete sfazione de
chello, che desidere, la quale darrà subeto na voce a lo figlio, che
venga a mmagnarete: ma perchè l’alluorgio che ttene sotta la mamma,
le mancano li contrapise, isso non porrà cammenare, e accossì sarrà
costretta a darete chello, che buoje. Ma non credere a nnesciuno
joramiento, che te faccia, se non jura pe l’ascelle de lo figlio:
all’ora dalle credeto, e fa chello, che te dice, ca sarraje contenta.
Accossì decenno, restaje lo poveriello desfatto, comm’a ccuorpo muorto
de jusoncuorpo, quanno vede la luce dell’ajero. Cianna pigliato chella
cennere, e mmescatoce no mesoriello de lagreme, le fece no fuosso, e
l’atterraje, pregannole da lo cielo quiete, e rrepuoso. E ssagliuta
la montagna, che le fece pigliare l’appietto, aspettaje, che scesse
lo tiempo, lo quale era no viecchio co na varva longa longa, portava
no mantiello viecchio viecchio, lo quale era tutto chino de cartelle
cosute co li nomme de chisto, e de chillo: aveva l’ascelle granne,
correva accossì beloce, che lo perdette subeto de vista; e ttrasuto a
la casa de la mamma, appe a sorrejere de vedere chillo nigro scuorzo:
e dato subeto de mano a li contrapise, disse a la vecchia, chello,
che desederava, la quale, jettanno no strillo, chiammaje lo figlio; ma
Ciannella le disse: puoje tozzare la capo a ste mmura ca non vederraje
cierto figlieto, mentre io tengo sti contrapise, e la vecchia vedennose
stroncato li passe, commenzaje a llosengarela, dicennole, lassala ire,
bene mio no ’mpedire la corzeta a ffigliemo, cosa che n’ha fatto ancora
nesciuno ommo vevente a lo munno; lassale ire, si Ddio te guarde, ca
io te mprommetto pe ll’acqua forte de figliemo, co la quale rode ogne
cosa, ca non te farraggio male; nce pierde lo tiempo, respose Cianna,
meglio vuoje dicere, si vuoje che le llassa. Te juro pe chille diente
che rosecano tutte le ccose mortale, ca te farraggio a ssapere quanto
desidere. Non ne faje spagliocca, leprecaje Cianna, ca faccio ca tu
mme gabbe; e la vecchia; ora susso, io te juro pe chelle ascelle, che
bolano pe tutto, ca io te voglio fare cchiù piacere de chello che te
mmagene; e Cianna lassato li contrapise, vasaje la mano a la vecchia,
la quale senteva de muffa, e ffeteva de liento, che bedenno la bona
crianza de sta giovane, le disse: Nascunnete dereto a chella porta,
che benuto che sarrà lo tiempo, mme farraggio dicere chello, che
buoje sapere. E comme isso torna a scire, perchè non stace maje fermo
a no luoco, tu puoje sbignare: ma non te fare a ssentire, ca isso è
accossì cannarone, che non perdona manco a li figlie, e quanno tutto
manca, se magna isso stisso, e po torna a sguigliare. E fatto Cianna
quanto le disse la vecchia; ecco arrivare lo tiempo, lo quale priesto
priesto, auto, e llieggio rosecato quanto le venne pe mmano pe fi a la
caucerogna de le mmure, mentre voleva partire, la mamma le disse tutto
chello, che aveva sentuto da Cianna, pregannolo, pe lo llatte, che
l’aveva dato, a rresponnere cosa pe ccosa a quanto le domannava; e lo
figlio dapò mille preghere, le respose: All’arvolo se pò responnere,
che non pò essere maje caro a le gente, mentre tene atterrate tresore
sotto a le rradeche. A li surece, che maje sarranno secure da la
gatta, si no l’attaccano na campanella a la gamma, pe ssentirela
quanno vene. A le fformiche, che camparanno ciento anne, si se ponno
spesare de volare, che quanno la formica vò morire, mette l’ascelle.
A la Valena, che faccia bona cera, e se tenga pe ammico lo sorece
marino, che le serverrà sempre pe guida, che non jarrà maje traverza;
ed a li Palommielle, che quanno se posarranno sopra la colonna de la
recchezza, tornarranno a ll’essere de primma. Ditto chesto lo tiempo,
commenzaje a ccorrere la soleta posta, e Cianna lecenziatase da la
vecchia, se ne scese da la montagna a bascio, a lo stisso tiempo,
che nc’erano arrivate li sette palommielle secotanno le ppedate de
la sore, li quale stracque da tanto volare, jezero tutte a posarese
sopra le ccorna de no voje, ch’era muorto, che non tanto priesto nce
appero puosto li piede, che tornaro belle giuvene comme primma, e
mmaravigliate de sto fatto, sentettero la resposta de lo tiempo, e
ccompresero, che lo cuorno, commo simmolo de la copia, fosse la colonna
de la recchezza, azzennata da lo Tiempo, e fatta na granne prejezza
co la sore, s’abbejattero pe lo stisso cammino, ch’aveva fatto Cianna,
e ttrovato l’arvolo de Cerqua, e rreferutole chello ch’aveva ntiso da
lo Tiempo, l’arvolo le pregaje a levarele lo tresoro de sotta, mentre
era causa, che la gliantra soja aveva scapetato de repotazione: e li
sette fratielle trovato na zappa ’n miezo a n’uorto, scavattero tanto,
ficchè trovaro no gruosso ziro de moneta d’oro, de la quale nne fecero
otto parte fra loro, e la sore, pe ppoteresela portare commodamente.
Ma essenno stracque da lo viaggio, e da lo piso, se mesero a dormire
a canto a na sepala; dove arrivato na mano de malantrine, e bisto
dormire sti negrecate co le capo ncoppa le mappate de li tornise;
legatole de mano, e de piede a certe arvole, se pigliaro li frisole,
e le llassaro: facenno lo trivolo non sulo de lo bene, che appena
trovato l’era scappato da le mmano, ma de la vita lloro, che senza
speranza d’ajuto, stevano a rriseco o de morire ciesse de la famme, o
de fare, che cessasse la famme a quarche animale servateco. E mmentre
se gualiavano de la negrecata sciorte loro, venne arrivanno lo sorece,
che ssentuto la resposta de lo Tiempo pe buono miereto de lo servizio,
rosecaje le ffonecelle, con che stevano legate, e le dette libertà.
Ma camminate n’autro buono piezzo, trovaro pe la strata la formica, la
quale ’ntiso lo consiglio de lo tiempo, addemmannaje a Cianna, che cosa
avesse, che stava accossì moscia, e de colore gialluoteco; e dittole
la desgrazia passata, e lo corrivo fattole da li latre, la formica
respose: Zitto, ca mme vene pe ttaglio de dareve lo cagno de lo piacere
ch’aggio receputo; ora sacciate, ca mentre portava no carreco de grano
sotterra, aggio visto no luoco, dove sti cane assassine ncaforchiano
li furte lloro; perchè hanno fatto sotta na fraveca vecchia cierte
caracuoncole, dove stipano tutte le ccose arrobbate; e mo che so ghiute
pe quarch’autro arravoglio, io ve nce voglio accompagnare, e mmezzateve
lo luoco, azzò pozzate recoperare lo buostro. Accossì dditto, pigliaje
la strata verzo certe ccase scarropate, e mmostraje a li sette frate
no voccaglio de fuosso, addove calato drinto Giangrazio, comme cchiù
anemuso dell’autre, trovaje tutte li denare, che l’erano state levate,
e pigliannoselle se posero a cammenare vierzo la marina, dove trovata
la Valena, le decettero lo buono parere datole da lo tiempo, lo quale
è patre de li consiglie, e mmentre stavano trascorrenno de lo viaggio
loro, e de quanto l’era socciesso, ecco veddero spontare l’aliviente,
armate a rrasulo, ch’erano venute pe la pista de le ppedate lloro, la
quale cosa vista, dissero: oimè, chesta è la vota, che non ce resta
sporchia de nuje negrecate, perchè mo se ne veneno li mariuole armata
mano, e nce levarranno lo cuojero; non dobetare, respose la Valena,
ca so bona a ccacciareve da lo ffuoco, pe ve rennere la pareglia de
lo buono ammore, che m’avite mostrato, e perrò sagliteme ’ncoppa la
schena, ca ve portarraggio subeto a lluoco securo. Li scure, che se
viddero li nnemmice a le spalle, e l’acqua ’n canna, sagliettero sopra
la Valena, la quale allargannose da li scuoglie, le pportaje a bista
de Napole, dove non se confidanno de sbarcare sti giuvene ped’essere lo
mare seccagne, disse, dove volite, che ve lasse: pe sta Costa d’Amarfe?
e Giangrazio respose: vi se nne potimmo fare de manco, bello pesce
mio, perchè a Massa, se dice saluta, e passa; a Sorriente, strigne
li diente; a Vico porta co ttico, a Castiello a mare nè ammice, nè
compare; e la Valena pe ddarele gusto, votaje carena a la vota de
lo scuoglio de lo ssale, addove le lassaje, che a la primma varca de
pescature, che passaje, se fecero mettere ’n terra, e ttornate a lo
pajese lloro sane, belle, e rricche, consolanno la mamma, e lo patre,
gaudettero pe la bontà de Cianna felice vita, la quale fece na fede
autenteca a lo mutto antico,
_Sempre che puoje, fa bene, e scordatenne._