TRATTENEMIENTO X De la Jornata IV.
_Lo Rrè de Bellopajese desprezzato da Cintiella figlia de lo Rrè de
Surco-luongo, dapò, che n’appe fatta na gran vennetta, redocennola
a mmale termine, se la piglia pe mmogliere._
_Si Ciommetella non faceva comparere priesto lo mago a ghiettare
acqua sopra lo ffuoco, s’erano assottigliate de manera li spirite
de tutte pe la pietate de Liviella, ch’oramaje le veneva manco lo
sciato. Ma nne la conzolazione de la povera figliola se conzolaro
tutte quante, e soscetate l’aneme, aspettaro, che Jacova trasesse
’n campo co la livrea de lo cunto sujo, la quale corze co sta lanza
a lo vastaso de lo desederio lloro._
Chi troppo la tira la spezza: chi cerca guaje, le veneno guaje, e
malanne: quanno la perzona và pe le ccimme de le mmontagne, si casca,
lo danno è lo sujo, comme sentarrite nne lo socciesso de na femmena,
la quale sprezzanno le Ccorune, e li Scettre, scenne a nnecessetà de na
stalla, si bè le rrotte de capo, che beneno da lo cielo, portano sempre
li ’nchiastre, che non deze maje castico senza carizze, nè mmazze senza
panelle.
Dice ca era na vota lo Rrè de Surco-luongo, lo quale avea na figlia
chiammata Cintiella, bella comme na Luna; ma non avea dramma de
bellezza, che non fosse contrapesata da na livra de soperbia: tanto,
che non facenno cunto de perzona nesciuna, non era possibele, che
lo povero patre che desederava de collocarela, trovasse marito pe
buono, e pe granne, che ffosse de darele sfazione. Ma fra tante
Princepe, ch’erano concurze a demannarela pe mmogliere, nce fu lo Rrè
de bello-Pajese, lo quale non lassava cosa da fare pe guadagnarese
l’affezzione de Cintiella; ma non tanto isso le faceva mala mesura de
premmio: non tanto isso le faceva buon mercato dell’affiette suoje,
quanto essa le faceva carestia de le boglie; non tanto isso l’era
liberale dell’arma, quanto essa l’era scarza de lo core; tanto che
lo poverommo non era juorno, che non le decesse: Quanno, o crodele,
a ttanta mellune de speranze, che mme so rresciute cocozze, nne
trovarraggio ’n prova uno russo? Quanno, o cana perra, cessarranno le
ttempeste de la crodeletate toja, e io porraggio co biento prospero
addrizzare lo temmone de li designe mieje a sso bello puorto? quanno
dapò tante scalate de scongiure, e de prieghe chiantarraggio lo
stennardo e li desiderie ammoruse mieje ncoppa le mmura de ssa bella
fortezza. Ma tutte ste parole erano jettate a lo viento: ca essa aveva
uocchie da spertosare le pprete, ma non aveva arecchie de sentire
li lamiente de chi feruto se gualiava, nnanze le mostrava mala cera,
comme si l’avisse tagliato la vigna, tale che lo povero Segnore visto
la canetate de Cintiella, che nne faceva chillo cunto, che fa lo
Chilleto de li forfante, reterannose co le ntrate soje, co na trinca
de sdigno, disse; fore mme ne chiammo da lo juoco d’Ammore; ma facette
joramiento solenno de vennecarese de sta mora Sarracina, de manera,
che s’avesse a chiammare pentuta d’averelo tanto straziato. E cossì
partutose da chillo pajese, e ffattose crescere la varva, e ddatose
non saccio, che tenta a la facce, ncapo de certe mise stravestuto de
villano, tornaje a Surco-luongo, dove a fforza de veveraggio procuraje
de trasire pe cciardeniero de lo Rrè, dove attennenno a llavorare
comme meglio poteva, no juorno spase sotto a le ffenestre de Cintiella
na rrobba a la mperiale tutta pontale d’oro, e diamante; la quale
vista da le ddammecelle, subeto lo ddissero a la patrona, che fece
ntennere a lo ciardeniero, si la voleva vennere: lo quale disse,
che non era mercante, o rrobbevecchie de vestite, ma che l’averria
volentiere donata, puro che l’avessero fatto dormire na notte a
la sala de la Prencepessa: la quale cosa sentuto, le ddammecelle,
dissero a Cintiella: Che nce pierde, Segnora, a dare na sfazione a
lo ciardeniero, e pizzolejarene sta rrobba, che è ccosa de Regina?
Cintiella fattose ncroccare da chill’ommo, che pesca autre bavose
de cheste, se contentaje, e pigliatose la rrobba, le fece avere sto
gusto. Ma la matina appriesso, a lo medesimo luoco, spase na gonnella
de la stessa fattura, la quale vista da Cintiella, le fece dicere, si
la voleva vennere, ca l’averria dato quanto voleva, e lo Ciardeniero
respose, ca no la venneva, ma l’averria donato liberamente, quanno
l’avessero fatto dormire drinto l’antecammara de la Prencepessa; e
Cintiella pe apparare lo vestito, se fece tirare pe ccanna a darele
sto contento; e benuta la terza matina, nnanze, che lo Sole venesse a
battere lo focile sopra l’esca de li campe, stese a la stessa parte
no bellissemo jeppone de conzierto co lo vestito, lo quale visto,
comme l’autre da Cintiella, disse si non aggio chillo jeppone, io
non me tengo contenta; e fatto chiammare lo Ciardeniero le disse,
è besuogno ommo da bene mio, che mme vinne chillo jeppone, ch’aggio
visto a lo ciardino, e pigliate lo core mio. Io no lo venno, Signora
mia, ma si ve piace, ve dò lo jeppone, e na catena de ddiamante perzì,
e faciteme dormire na notte a la cammara vostra. Ora mo si aje de lo
villano, disse Cintiella, non te vasta, ch’aje dormuto a la sala, po
a l’antecammara, mo vuoje la cammara, a mmano a mmano vorraje dormire
a lo lietto mio perzì. Lo Ciardeniero respose, Segnora mia, io mme
tengo lo jeppone mio, e buje la cammara vostra, si avite voglia de
ciammellare, sapite la strata. Io mme contento dormire nterra, cosa,
che non se negarria a no Turco; e si vedissevo la catena che ve voglio
dare fuorze mme sarrissevo no poco de meglio piso. La Prencepessa parte
scannata da lo nteresse, e parte vottata da le dammecelle, ch’ajutavano
li cane a la sagliuta, se lassaje correre a ccontentarelo, e benuta la
sera quanno la notte, comm’a cuoiro jetta l’acqua de concia ncoppa la
pelle de lo cielo, pe la quale deventa negra, lo Ciardeniero pigliata
la catena, e lo jeppone, jette a l’appartamiento de la Prencepessa,
e datole ste ccose, lo fece trasire a la cammara soja, e fattolo
sedere a no pontone, le disse: Ora statte lloco ciunco, e non te
movere pe quanto stimme la grazia mia, e fatto no signo ’n terra co
lo cravone, sogghionse, si chisto passe lo culo nce lasse; e accossì
ditto, fatte ’ntorniare lo sproviero de la travacca soja, se corcaje.
Lo Rrè Ciardeniero, comme la vedde addormuta, parennole tiempo de
lavorare lo terretorio d’ammore, se le corcaje a ccanto, e nnanze che
se scetasse la patrona de lo luoco, cogliette li frutte d’ammore; la
quale scetata, che fu, e bisto chello, che l’era socciesso, non voze
fare de no male duje, e pe rrovinare lo Giardeniero, mannare a rroina
lo stisso Ciardino, ma facenno de la necessità vizio, se contentaje
de lo desordene, e ssentette piacere dell’arrore; e dove sdegnaje
le tteste coronate, non se curaje de soggettarese a no pede peluso,
che ttale pareva lo Rrè, e pe ttale era da Cintiella stemmato. Ma
continoanno sta pratteca, scette prena, e bedenno de juorno ’n juorno
crescere la panza, disse a lo Ciardeniero, comme se vedeva roinata, si
lo Patre s’addonasse de sto chiaito; e perzò pensassero de remmediare
a sto pericolo. Lo Rrè respose: Che autro remmedio non sapeva penzare
a sto male lloro, che ghieresenne, perchè l’averria portata a la casa
de na Patrona antica soja, che l’averria dato quarche commodetà de
figliare: Cintiella, che se vedde male arredotta, tirata da lo peccato
de la soperbia soja, che la portava da scuoglio a scuoglio, se lassaje
movere da le pparole de lo Rrè, lassanno la propria casa, e mmettennose
’n arbitrio de la fortuna. Ma lo Rrè dapò luongo cammino la portaje
a la casa soja mmedesema, ed azzennato tutto lo fatto a la mamma,
la pregaje, che dessemolasse lo negozio, perchè se voleva pagare de
l’auterezza de Cintiella. E accossì arremmediatola drinto na stalluccia
de lo palazzo, la faceva vivere miseramente, facennole vedere lo
ppane co la valestra. Ora facenno lo ppane le zitelle de lo Rrè, isso
le commannaje, che chiammassero Cintiella ad ajutarele, e ttutto no
tiempo disse ad essa, che bedesse de zeppoliarene quarche tortaniello,
pe rremmdiare a la famme lloro. Cintiella negrecata, sfornanno lo
ppane fra uocchie, ed uocchie scervecchiatone no tortaniello, se lo
schiaffaje drinto na sacca, ma a lo stisso tiempo arrivaje lo Rrè
vestuto da chillo, ch’era, e disse a le zitelle: Chi v’ha ditto che
facite trasire sta femmenella guitta drinto sta casa? non bedite a la
cera, ch’è mmariola, e che sia lo vero, mettitele mano a la sacca, ca
trovarrite lo delitto ’n genere; e cercatole, trovannoce lo negozio,
le lavaro la capo de bona manera che l’abbaja, e l’allucco duraje
tutto lo juorno. Ma tornatose a stravestire lo Prencepe, e ttrovatala
scornata, e mmalanconeca de l’affrunto recevuto, le disse, che non se
pigliasse tanto abbasca de sto socciesso, ca la necessetà è tteranno
dell’uommene, e comme disse chillo Poeta Toscanese:
_Che ’l Poverel digiuno,_
_Vien ad atto talor, che ’n miglior stato_
_Avria in altrui biasmato._
Perzò mentre la famme caccia lo lupo da lo vosco, essa era scusata,
se faceva chello, che non starria bene ad autro. E perzò sagliesse ad
auto, ca la Segnora tagliava certe ttele, e afferennose de l’ajutare,
vedesse de granciaresenne quarche pezza, sapenno, ch’era vicino a lo
punto de figliare, e l’abbesognavano mille cose. Cintiella, che non
sapeva desdicere a lo marito, che pe tale lo teneva, sagliette ad
auto, e mmescatase co le dammecelle a ttagliare na mano de savannelle,
de sopra fasce, de coppolelle, e de tillicarelle, ne arravogliaje
no fasciaturo, e se lo pose sotto a li panne, ma arrevato lo Rrè, e
fatto n’autra levata de pietto, comme aveva fatto de lo ppane, la fece
cercare, e ttrovatole lo furto adduosso, n’appe n’autra sceroppata
de ngiurie, che comme fosse stata trovata co sta colata sotta, se ne
scese a la stalla. Ma stravestennose lo Rrè corze a bascio, e bedennola
desperata, le disse, che non se lassasse vencere da la malanconia, ca
tutte le ccose de lo munno erano openejone, e perrò vedesse la terza
vota si potesse abboscare quarche cosella, già che steva pe scire a
lluce, e che l’accasione era pronta a ffare na bona abbusca, pocca la
Signora soja ha ’nzorato lo figlio co na Signora de fora, e perchè le
vò mannare na mano de vestite de mbroccato, e de tela d’oro fatte,
e buone, dice, ca la Zita è ghiusta de la statura toja, e ca le bò
tagliate a mmesura de ssa perzona. Ora mo sarrà facele cosa, che te
venga pe le mmano quarche bella retaglia, e tu miette ncorbona, ca la
vennimmo, e campammo la vita. Cintiella fatto chello, che le commannaje
lo marito, s’aveva puosto nzino no buono parmo de mbroccato riccio,
quanno arrivaje lo Rrè, e ffatto na granne parapiglia, fece cercare
Cintiella, e ttrovato l’abbusco, la cacciaje co gran vregogna: ma
subeto stravestitose da Ciardeniero, corze a bascio a cconzolarela,
perchè si co na mano la pogneva, co l’autra pe l’ammore, che le
portava, se compiaceva d’ontarela, pe no la mettere ’n desperazione;
ma a la negra Cintiella pe l’angoscia de chello, che l’era socciesso,
penzanno, che tutto era castico de lo cielo pe l’arroganza, e soperbia,
ch’aveva mostrato, che tenenno pe pezza de piede tanto Princepe, e
Rrè, mò era trattata da pettolella, e pe avere avuto lo core tuosto
a li conziglie de lo patre, mo faceva la facce rossa all’allajo de
le bajasse, pe la collera dico, che se pigliaje de sto scuorno, le
vennero le ddoglie, de la quale cosa avisata la Regina, la fece venire
ad auto, e mmostranno compassione de lo stato sujo, la pose a no
lietto tutto ragamato d’oro, e de perne, drinto na cammara tapezzata
de tela d’oro, cosa che fece strasecolare Cintiella, vedennose posta
da na stalla a na cammara riale, e da la lotamma a no lietto accossì
preziuso, e non sapeva, che l’era socciesso; dove le foro subeto date
sorziche, e ttorte, pe ffarela cchiù gagliarda figliare. Ma comme voze
lo cielo, senza troppo affanno fece duje bellisseme figlie mascole, che
non se poteva vedere la cchiù pentata cosa, ma non accossì ppriesto
fu ffigliata, che trasette lo Rrè decenno, e dove avite puosto lo
jodizio vuostro a mmettere la gualtrappa all’aseno, è lietto chisto
pe na perchia guaguina; priesto facitela sautare a cuorpe de mazzate
da lloco, e sfommecate de rosamarina sta cammara, che se nne leva sta
pesta. La Regina sentenno chesto disse: Non cchiù, non cchiù figlio
mio: vasta, vasta lo tormiento, ch’aje dato nfi mò a sta povera
fegliola, deverrisse oramaje essere sazio, l’aje arreddutta a ccoppola
de notte co ttante cotture, e si non si sodisfatto de lo despriezzo,
che te fece a la Corte de lo patre, vaglia a pagarete sto debeto doje
belle gioje, che t’ha fatto. Accossì decenno fece venire li nennille
le cchiù bellezze cose de lo munno. Lo Rrè vedenno accossì belle
paciune, se le ntennerette lo core, ed abbraccianno Cintiella, se deze
a ccanoscere pe chillo ch’era, decennole, che quanto l’aveva fatto era
stato pe sdigno de vedere fatto poco cunto da essa de no Rrè paro sujo:
ma che da ora nnenante l’averria tenuta sopra la capo soja. La Regina
dall’autra parte abbracciatala comme nora, e figlia le dettero accossì
buono veveraggio de li figlie mascole, che le parze assaje cchiù ddoce
chillo punto de conzolazione, che tutte l’affanne passate; se bè sempre
appe a mmente de tenere vascie le bele, pensanno sempre comme
_Figlia de la soperbia, è la roina._
Scompute li cunte date pe staglio a chella jornata, lo Prencepe pe
llevare quarche malanconia dall’armo, che l’aveva puosto lo travaglio
de Cintiella, chiammaje Cicco Antuono, e Narduccio, che facessero la
parte lloro, li quale co ccoppole cchiatte, e ccosciale nigre co li
denocchiale, e ccasacche fellate a ttaglio co li merlette, scettero da
no quatro de lo ciardino a rrecetare l’Egroca, che ssecota.