TRATTENEMIENTO VII De la Jornata IV.
_Marziella pe mmostrarese cortese co na vecchia, ave la fatazione;
ma la Zia ’nvediosa de la bona fortuna soja, la jetta a mmaro, dove
la serena la tene gran tiempo ncatenata: ma liberata da lo frate,
deventa Regina, e la zia porta la pena de l’arrore sujo._
_Averriano securamente ditto li Princepe, ca sto cunto de Antonella
passava vattaglia de quante se n’erano contate, si n’era pe llevare
d’anemo Ciulla, la quale avenno posta la lanza de la lengua a
rresta, dette l’aniello de lo gusto de Taddeo, e de la mogliere, de
manera, che ssecota._
Sempre aggio sentuto dicere, chi fa piacere, nne trova; la campana de
Manfredonia dice, danne, e dotte; chi non mette l’esca de la cortesia
all’ammo de ll’affezzione, non piglia maje pesce de beneficio, e
bolitene vedere lo ccostrutto, sentite sto cunto, e po derrite si
sempre perdette cchiù l’avaro, che lo liberale.
Ora dice, ch’era na vota, doje sore carnale Luceta, e Ttroccola,
ch’avevano doje figlie femmene, Marziella, e Puccia. Era Marziella
cossì bella de facce, commo bella de core: commo a lo contrario
lo core, e la caira de Puccia facevano pe na stessa regola facce
de gliannola, e ccore de pestelenzia; ma la zita arresemegliava a
li pariente: perchè Troccola la mamma era n’arpia, dinto e ffora
correggia. Ora soccesse, ch’avenno Luceta a scaudare quatto pastenache
pe le ffriere co la sauza verde, disse a la figlia: Marziella mia, va
bene mio a la fontana, pigliame na lancella d’acqua. De bona voglia,
mamma mia, respose la figlia, ma si mme vuoje bene damme na pizzella,
ca mme la voglio magnare a chell’acqua fresca: volentiere, disse
la mamma, e da drinto no panaro che penneva a n’ancino, pigliaje na
bella pizzella, che lo juorno nnante aveva fatto lo furno de pane, e
la dette a Marziella, la quale puostose la lancella ’n capo sopra no
truocchioniello, se nne jette a la fontana, la quale comm’a Cciarlatano
ncoppa a no banco de preta marmora a la Museca de n’acqua cascariccia,
venneva secrete pe ccacciare la sete; dove stanno a nchire la lancella,
arrivaje na vecchia, che sopra lo parco de no gruosso scartiello
rappresentava la tragedia de lo tiempo, la quale vedenno chella bella
pizza, che ttanno nce voleva Marziella dare de muorzo, le disse: Bella
figliola mia, se lo cielo te manna bona ventura, damme no poco de ssa
pizza. Marziella, che pozzava de Regina, le disse: eccotella tutta,
magna femmena mia, e mme dispiace, che non è de zuccaro, ed ammennole,
ca puro te la darria co ttutto lo core. Visto la vecchia l’amorosanza
de Marziella, le disse và, che te pozza mprofecare sempre lo Cielo de
sto buono ammore, che m’aje mostrato, e prego tutte le stelle, che
puozz’essere sempre felice, e ccontenta, che quando sciate t’escano
Rose, e Giesommine da la vocca; quanno te piettene cadano sempre perne,
e granatelle da ssa capo, e quanno miette lo pede ’n terra, aggiano
da sguigliare giglie, e biole. La fegliola rengraziannola, tornaje
a la casa, dove cocinato ch’appe la mamma, dettero sodisfazione a lo
cuorpo de lo debeto naturale, e passato chillo juorno, comme l’autra
matina a lo mercato de li campe celeste, fece mostra lo Sole de le
mmercanzie de luce, che portava dall’Oriente, Marziella volennose
pettenare la capo, se vedde cadere ’n sino na chioppeta de perne, e
granatelle, che chiammato co allegrezza granne la mamma, le mmesero
drinto a no cuofano, ed essenno juta Luceta a smautirene na gran parte
a no bancarotto ammico sujo, venne arrivanno Troccola a bedere la
ssore, e ttrovato Marziella tutta ammassariata, e affacennata sopra
a cchelle pperne, domannaje commo, quanto, e dove l’avesse avute? Ma
la figliola, che non sapeva ntrovolare ll’acqua, e non aveva fuorze
ntiso chillo proverbio: _non fare quanto puoje, non magnare quanto
vuoje; non spennere quanto aje, nè dire quanto saje_, contaje tutto
lo negozio a la Zia, la quale non curannose d’aspettare la sora, le
parze ogn’ora mill’anne de tornare a la casa, e dato na pizzella a
la figlia, la mannaje ped’acqua a la fontana, dove trovato la stessa
vecchia, e demmannatole no poco de pizza, essa ch’era na bella mosogna,
le respose; non avea, che fare autro, che dare la pizza a ttene? che
m’avive mprenato l’aseno, che te voleva dare la rrobba mia? Và, ca so
chiù becino li diente, che li pariente; e accossì decenno, se nnorcaje
’n quatto muorze la pizza; facenno cannaola a la vecchia, la quale
quanno nne vedde sciso l’utemo muorzo, e sepelluta co la pizza la
speranza soja, tutta arraggiata le disse. Và, che quanno sciate, puozze
fare scumma, comme a mmula de miedeco, quanno te piettene, pozzano
cadere da la capo a mmontune li piccenache, e dovonca miette lo pede
’n terra, pozzano schiudere fielice, e tutomaglie. Pigliata l’acqua
Puccia, e ttornata a la casa, la mamma non bedde l’ora de pettenarela,
e postase na bella tovaglia ’n sino, nce mese la capo de la figlia, e
ccommenzanno a ppettenare, eccote cadere na lava d’anemale alchemiste,
che fermavano l’argento vivo; la quale cosa vedenno la mamma, a la
neve de la ’nvidia agghionze lo ffuoco de la collera, che ghiettava
sciamma, e ffummo pe nnaso, e pe bocca. Ora passato quarche tiempo,
trovatose Ciommo frate de Marziella a la Corte de lo Rrè de Chiunzo,
e descorrennose de le bellizze de varie femmene, isso, senz’essere
chiammato, se mese ’nnante, decenno, che tutte le belle potevano ire a
botare ossa a lo ponte, dove fosse comparza la sore, la quale otra le
bellezze de li miembre, che facevano contrapunto sopra lo canto fermo
de na bell’arma, aveva de cchiù na bella virtù nne li capille, nne la
vocca, e nne li piede, che le dette la Fata. Lo Rrè, che sentette sti
vante, disse a Ciommo, che la facesse venire, che si la trovava tale,
quale la metteva ’mperecuoccolo, se l’averria pigliata pe mmogliere.
Ciommo, che non le parze chesta occasione de perdere, mannaje subeto
corriero a posta a la mamma, contannole sto ffatto, e pregannola a
beniresene subeto co la figlia pe no le fare perdere sta bona ventura.
Luceta, che se trovava assaje male racommannanno la pecora a lo Lupo,
pregaje la sore, che le facesse piacere d’accompagnare Marziella pe
fi a la Corte de Chiunzo pe ttale, e ttale cosa. Troccola vedenno
ca lo negozio le jeva nchienno pe le mmano, prommese a la sore de
portarencella sana, e ssarva ’n potere de lo fratiello, e nvarcatose co
Marziella, e co Puccia drinto na varca, comme fu a mmiezo mare, mentre
li marinare dormevano, la jettaje drinto l’acqua, dove mentre steva
pe ffare lo papariello, venne na bellissema Serena, e ppigliannola ’n
braccio, se la portaje. Ora arrivata Troccola a Chiunzo, e rrecevuta
Puccia da Ciommo, comme si fusse stata Marziella, che pe la longhezza
de tiempo, che no l’aveva vista, l’aveva scanosciuta, la portaje subeto
’nnante a lo Rrè, lo quale facennole pettenare la capo, commenzaro a
cchiovere chille anemale cossì nemmice de lo vero, che sempre offenneno
li testimmonie, e puostole mente ’n facce, vedde, che pe lo cammino,
resciatanno fore de muodo, aveva fatto na ’nsaponata a la vocca, che
pareva varchera de panne, e basciato l’uocchie a tterra, miraje no
prato d’erve fetiente, che le venne stommaco a bederele, pe la quale
cosa cacciato Puccia, e la mamma, mannaje pe ddespietto Ciommo a
guardare le ppapare de la Corte; lo quale desperato pe sto negozio,
non sapenno, che l’era socciesso, portava le ppapare ’n campagna, e
lassannole ire a boglia lloro pe la marina, isso se retirava drinto
na pagliara, dove pe fi a la sera, quanno era tiempo de retirarese,
chiagneva la sciorta soja. Ma le ppapare scorrevano pe lo lito,
sceva Marziella da drinto l’acqua, e le ccevava de pasta riale, e
abbeverava d’acqua rosa, tanto che le ppapare erano fatte quanto no
crastato l’uno, che non nce vedevano, e quanno la sera arrevavano a
n’orteciello, che rresponneva sotto la fenestra de lo Rrè, commenzavano
a ccantare. Pire, pire, pire.
_Assaje bello è lo Sole co la Luna,_
_Assaje cchiù bella è chi coverna a nnuje._
Lo Rrè sentenno ogne ssera sta museca paparesca, se fece chiammare
Ciommo, e boze sapere, dove, e ccomme, e de che cosa pasceva le ppapare
soje, e Ciommo le disse: autro no le faccio magnare, che l’erva fresca
de la campagna. E lo Rrè, che non le jeva a ssuono sta resposta, le
mannaje no servetore fidato retomano, perchè occhejasse mente dove
portava le ppapare; lo quale secotanno le ppedate soje, lo vedde
trasire a lo pagliaro, e lassare le ppapare sole, che abbiatese verzo
la marina, arrivate che fforo, scette Marziella da lo maro, che non
creo, che cossì bella scesse dall’onne la mamma de Chillo Cecato, che
(comme disse chillo Poeta) _non vole autra lemmosena, che de chianto_:
la quale cosa visto lo servetore de lo Rrè, tutto spantato, e ffore
de se stisso, corze a lo Patrone, contannole lo bello spettacolo,
ch’aveva visto ’n miezo la scena de la marina. La curiosità de lo
Rrè sbauzata da le pparole de st’ommo, le mosse desederio de ire ’n
perzona a bedere sta bella vista, e la matina, quanno lo Gallo capo
puopolo dell’aucielle le solleva tutte ad armare le vive contra la
notte, essenno juto Ciommo co le ppapare a lo luoco soleto, isso non
perdennolo maje de la vista, le jeze appriesso, e arrivate le ppapare
a lo maro, senza Ciommo, ch’era restato a lo luoco soleto, vedde scire
Marziella, che dato a mmagnare na spasa de pastetella a le ppapare, e
ffattele vevere a na caudarella d’acqua rosa, se sedette ’ncoppa a na
preta a ppettenarese li capille, da li quale cadevano a branca a branca
le pperne, e granatelle, e ’ntanto da la vocca le sceva na nugola de
sciure, e ssotto li piede suoje s’era fatto no trappito soriano de
giglie, e biole: la quale cosa visto lo Rrè, fece chiammare Ciommo, e
mostrannole Marziella, le disse; si canosceva chella bella figliola,
e Ciommo recanosciutala, corze ad abbracciarela, e ’n presenzia de
lo Rrè sentette tutto lo trademiento fattole da Troccola, e ccomme la
’nvidia de chella brutta pesta aveva arredutto sto bello fuoco d’ammore
ad abetare drinto l’acqua de lo mare. Non se po dire lo gusto, che
sentette lo Rrè de sta bella gioja acquistata, e botatose a lo frate,
disse, ch’aveva gran ragione de laudarela tanto, e ca trovava duje
tierze e cchiù de chello, che nne l’aveva contato, e perzò la stimmava
cchiù ca degna de l’essere mmogliere, quanno essa se contentasse de
recevere lo scettro de lo regno sujo. O che lo bolesse lo Sole lione,
respose Marziella, e potesse venire a sservirete pe bajassa de la
Corona toja. Ma non vide sta catena d’oro, che tengo a lo pede, co la
quale mme tene presone la Maga, e quanno piglio troppo d’ajero, e mme
trattengo assaje a sta marina, essa mme tira drinto, tenennome co na
ricca servetù ’ncatenata d’oro. Che remmedio nce sarria, disse lo Rrè
a llevarete da le granfe de sta serena? lo remmedio sarria, respose
Marziella, a ssecare co na limma sorda sta catena, e sbegnaremella.
Aspettame craje mmatino (leprecaje lo Rrè) ca mme ne vengo co lo
negozio lesto, e mme te porto a la casa, dove sarraje l’uocchio deritto
mio, la popella de lo core mio, e la visciola de st’arma. E datose
lo caparro de l’ammore loro, co na toccata de manzolla, essa se nne
jette pe drinto l’acqua, ed isso pe drinto a lo ffuoco, e ffuoco tale,
che non appe n’ora de repuoso tutto lo juorno: e come scette la negra
cargiumma de la notte a ffare tubba catubba co le stelle, non chiudenno
maje uocchie, jette romenanno co le mmasche de la memoria le bellezze
de Marziella, descorrenno co lo penziero ’ntuorno a le mmaraviglie de
li capille, a li miracole de la vocca, e a li stopure de lo pede, e
ttoccanno l’oro de le grazie soje a la preta paragone de lo jodizio, le
trovava de vintequatto carate: ma desgraziava la notte, che ttardasse
tanto a ’nzoperare da li racamme, che fa de stelle, e ghiastemmava lo
Sole, che non arrivasse priesto co lo carruggio de luce ped’arrecchire
la casa soja de lo bene, che desederava, pe pportare a le ccammare
soje na menera d’oro, che ghietta perne, na quaquiglia de perne, che
ghietta sciure. Ma ntanto, che ghieva pe mmaro penzanno a chella che
stava a mmaro, ecco li guastature de lo Sole, che schianaro lo cammino
pe dove doveva passare co l’asserceto de li ragge, e bestutose lo Rrè,
s’abbiaje co Ciommo a la marina, dove trovato Marziella, co la limma,
che avevano portato, lo Rrè secaje de mano propia la catena de lo pede
de la cosa ammata; ma se nne fravecaje n’autra chiù forte a lo core,
e postase ngroppa chella, che le cravaccava lo core, toccaje a la vota
de lo Palazzo riale, dove trovaje ped’ordene de lo Rrè tutte le belle
femmene de lo pajese, che la recevettero, e nnotarono comm’a ppatrona
loro: e nguadiatosella co na festa granne fra tante vutte, che s’ardèro
pe llommenaria, voze che nce fosse ncruso pe ccarrattiello la perzona
de Troccola, azzò pagasse lo nganno, ch’aveva fatto a Marziella; e
mmannato a chiamare Luceta, dette ad essa ed a Ciommo da vivere da
Segnure: e Puccia cacciata da chillo regno, jette sempre pezzenno: e pe
n’avere semmenato no pocorillo de pizza, appe sempre carestia de pane,
essenno volontà de lo Cielo,
_Che chi non ha pietà, pietà non trova._