TRATTENEMIENTO VI De la Jornata IV.
_Marchetta arrobbata da lo viento, e portata a la casa de n’Orca,
da la quale dapò varie accedente, recevuto no boffettone, se parte
vestuta d’ommo, capeta ’n casa de no Rrè, dove ’nnammoratose d’essa
la Regina, e sdegnata pe non trovare cagno, e scagno, l’accusa a
lo marito de tentata vregogna, e connannata ad essere mpesa, pe
bertù de n’aniello datole da l’Orca è lliberata, e ffatta morire
l’accosatrice, essa deventa Regina._
_Piacette ’n estremo lo cunto de Popa, e non nce fu nesciuno, che
non sentesse gusto de la bona fortuna de Porziella. Ma non nce
fu nnesciuno, che le ’nvidiasse sta sciorte comprata co ttante
travaglie, pocca p’arrivare a lo stato riale, nce aveva lassato
quase lo stato perzonale. Ma vedenno Tolla, che li guaje de
Porziella avevano ntrovolato l’aneme de li Principe, voze sollevare
no poco li spirete, cossì parlanno._
La veretà, Segnure, sempre assomma comm’uoglio, e la buscia è no
fuoco, che non po stare nascuosto, anze è na scoppetta a la moderna,
che accide chi la spara, e non senza che se chiamma busciardo chi non
è ffedele nne le pparole; perchè abruscia, ed arde, non sulo tutte
le bertù, e li bene che porta drinto a lo pietto, ma la stessa vorza
dov’erano conservate, comme ve farraggio confessare ne lo Cunto, che
ssentarrite.
Era na vota lo Rrè de Valletescuosse, lo quale non potenno avere
figlie, a tutte l’ore, dovonca se retrovava, deceva: O Cielo, manname
n’arede de lo stato, pe non lassare desolata la casa mia. E fra l’autre
bote, che fece sto stimmolo, trovannose drinto a no Ciardino, e decenno
ad aute gride le stesse pparole, sentette scire na voce da drinto e le
ffrasche, la quale deceva:
_Rrè, che buoje nnante? figlia, che te fuja?_
_O figlio, che te struja?_
Lo Rrè confuso a sta proposta, non se seppe resorvere comme avesse da
responnere, e ffacenno penziero de consigliaresenne co li sapute de la
Corte, se nne jette subeto a le ccammare soje, dove fatto chiammare li
Consigliere, l’ordenaje, che descorressero sopra sto fatto; dove chi
respose, che se doveva fare cchiù cunto de lo nnore, che de la vita:
n’autro, che se doveva stimmare cchiù la vita, comme a bene ’ntrinseco,
dove l’onore era cosa strinseca, e perzò da tenerese ’n manco priezzo;
uno deceva, che la vita essenno acqua, che passa, poco mportava la
spesa perderela; e cossì le rrobbe che sò ccolonne de la vita poste
sopra la rota vitriola de la fortuna; ma l’onore essenno cosa dorabele,
che llassa pedate de famma, e ssegnale de grolia, se deve tenere
’n gelosia, e starene cuocolo; n’autro argomentava, che la vita, pe
la quale se conserva la spezie, e la rrobba, pe la quale se mantene
la grannezza de la casa, se deve tenere cchiù ccara de lo nnore, pe
d’essere l’annore opinione, pe rragione de la vertù, e che lo pperdere
na figlia pe ccorpa de la fortuna, e non pe proprio defietto, non
pregiodecava la virtù de no patre, e non portava lordizia a lo nnore
de na casa; ma sopra tutto nce foro arcune autre, che cconcrusero, che
lo nnore non consisteva a le ppettole de na femmena, otra che comm’a
Prencepe justo deveva mirare cchiù ppriesto a lo beneficio commune,
ch’a lo ’nteresse partecolare; e che na femmena fojeticcia faceva no
poco de scuorno schitto a la casa de lo patre, ma no figlio tristo
metteva a ffuoco e la casa propria, e tutto lo Regno, e perzò mentre
desiderava figlie, e l’erano propuoste sti duje partite, cercasse
la femmena, ca non metteva a ppericolo la vita, e lo stato. Chisto
parere, piaciuto a lo Rrè, tornaje a lo ciardino, e gridato de nuovo,
comme soleva, e sentuto la stessa voce, respose: Femmena, Femmena. E
ttornato a la casa la sera, quanno lo Sole ’nvita l’ore de lo juorno
a ppigliarese na vista de li scuccemucce de l’Antipode, corcatose co
la mogliere, ’n capo de nove mise nn’appe na bella figliola, ch’a lo
medesemo tiempo la fece serrare a no palazzo forte, e co bone guardie,
pe non lassare da lo canto sujo tutte le ddelegenzie possibele, che
potessero remmediare a lo tristo nfruscio de la figlia; e fattala
allevare co ttutte le bertù, che stanno bene a na razza de Rrè, comme
fu bella granne, trattaje de mmaritarela co lo Rrè de Pierdesinno,
e concruso lo matremmonio, cacciannole da chella casa, da dove non
era sciuta maje, pe mmannarela a lo marito, venne tale ventelorio,
che ppigliatola pesole, non se vedde cchiù; ma portatola no piezzo pe
l’ajero, la venne a llassare nnanze la casa de n’Orca, ch’era drinto
a no vosco, lo quale aveva sbannuto lo Sole, comm’a ’mpestato, perchè
accise Pitone ’nfietto: dove trovato na vecchiarella, che l’Orca aveva
lassata pe guardia de le rrobbe soje, le disse: Oh mara la vita toja, e
dove aje puosto lo pede! negrecata te, se vene arrivanno l’Orca patrona
de sta casa, io non preggiarria pe tre ttornise lo cuojero tujo, ca
non se pasce d’autro, che de carne omana; e ttanto nce stà secura la
vita mia, quanto la necessetate de lo servizio mio la retene, e sto
nigro scuorzo chino de sincope d’antecore, de frate, e d’arenella, e
schifato da la ssanne soje. Ma saje, che buoje fare? eccote le cchiave
de la casa, trasetenne drinto, arresedia le ccammare, e ppolizza ogne
ccosa, e ccomme vene l’Orca nascunnete, che non te vea, ca io non
te farraggio mancare da vivere; trattanto chi sà? lo cielo ajuta:
lo tiempo pò portare gran cosa; vasta, agge jodizio, e pacienzia, ca
passe ogne guorfo, e ssupere ogne ttempesta. Marchetta, che cossì se
chiammava la figliola, facenno de la necessetà vertù, se pigliaje la
chiave, e trasuta a la cammara dell’Orca, dato pe la primma cosa de
mano a na scopa, fece la casa cossì nnetta, che nce potive magnare li
macarune; pigliato po na cotena de lardo scergaje de manera le ccasce
de nuce, e le ffece accossì llustre, che te nce specchiave; e fatto lo
lietto, comme sentette venire l’Orca, se mese drinto na votte, dove
era stato lo ggrano. L’Orca che trovaje sta cosa ’nsoleta, appe no
gusto granne, e chiammato la vecchia, le disse: Chi ave fatto sto bello
arresidio? e la vecchia responnenno, ch’era stata essa, leprecaje: chi
te fa chello, che fare non sole, o t’ha gabbato, o gabbare te vole.
Veramente puoje mettere lo spruoccolo a lo pertuso, avenno fatto na
cosa ’nsoleta, e mmierete la menestra grassa. Cossì decenno, magnaje,
e ttornata a scire trovaje levate tutte le ffolinie da li trave,
scergata tutta la ramma, ed appesa tanto bella a lo muro, e fatto no
scaudatiello a ttutte li panne lurde, che sentennose no piacere da
stordire, benedicette mille vote la vecchia, decennole: lo Cielo te
pozza ’mprofecare sempre, maddamma Pentatola mia, che puozze sempre
arregnare, ed ire nnante, pocca mme ralliegre lo core co sti belle
arresidie, facennome trovare na casa de Pipata, e no lietto de Zita.
La vecchia co ssa bona openione guadagnata, se ne jeva ’n siecolo, e
refonneva sempre buone voccune a Marchetta, nfrocennola comme a Ccapone
mpastato. E ttornanno a scire l’Orca, la vecchia disse a Marchetta:
sta zitto, ca volimmo arrivare sto zuoppo, e ttentare la fortuna toja,
perzò fa quarche bella cosa de mano toja, che dia a l’omore de l’Orca,
e s’essa jorasse le ssette celeste no le ccredere, ma se pe sciorte
jura le ttrè corune soje, e tu lassate vedere, ca la cosa te resce
colata a ppilo, e canoscerraje ca lo consiglio mio è stato de mamma;
ntiso chesto Marchetta, scannaje na bella papara, e de le stremetà
nne fece no bello spezzato, e ’mbottonatala bona de lardo, arecato,
ed aglie, la mese a no spito, e ffatto quatto strangola-prievete a lo
culo de lo canistro, le fece trovare na tavola tutta sciorata de rose,
e ffrunne de cetrangole. Venuta l’Orca, e trovato st’apparicchio, appe
a scire da li panne, e chiammato la vecchia, le disse: Chi ha fatto sto
buono servizio? Magna, respose la vecchia, e non cercare autro: vasta
ca aje chi te serva, e te dia sfazione. Ll’Orca magnanno, e scennennole
sti buone muorze fi a l’ossa pezzelle, commenzaje a dicere. Io juro
pe le tre pparole de Napole, ca si sapesse chi è stato lo cuoco, io
le vorria dare le bisole meje; po secotaje: Io juro pe tre arche, e
tre frezze, ca si lo conosco, lo voglio tenere drinto a sto core: Io
juro pe le tre ccannele, che s’allummano quanno se fa no strommiento
de notte, pe li tre ttestimmonie, che fanno essere mpiso n’ommo, pe
li tre parme de funa, che danno vota a lo mpiso; pe tre ccose, che
cacciano l’ommo da la casa, fieto, fummo, e ffemmena marvasa; pe tre
ccose, che la casa strude, zeppole, pane caudo, e mmaccarune: pe tre
femmene, e na papara, che fanno no mercato; pe le tre F de lo pesce,
fritto, friddo, e futo: pe le tre cantature principale de Napole,
Gio: de la Carrejola; Compa Junno, e lo Rrè de la museca: pe le tre,
S ch’abbesognano a no ’nnammorato, sulo, solliceto, e ssecreto: pe le
tre ccose, ch’abbesognano a no mercante, credito, armo, e bentura; pe
le tre sciorte de perzune, che se tene la pottana, smargiasse, belle
giuvene, e ccorrive: pe le tre ccose mportante a lo mariuolo, uocchie
ad allommare, granfe ad azzimmare, e pede ad affuffare: pe le tre
ccose, che arroinano la Gioventù, juoco, femmene, e ttaverne: pe le
tre bertù princepale de lo Sbirro, abbista, secuta, ed afferra; pe le
tre ccose utele a lo Cortesciano, fegnemiento, flemma, e sciorte; pe le
tre ccose, che bole avere lo Roffiano, gran core, assaje chiacchiare,
e poco vregogna; pe le tre ccose, ch’osserva lo Miedeco, lo puzo, la
facce, e lo cantaro. Ma potea dicere da oje a craje, ca Marchetta, che
steva co lo vizio non pipetava. Ma sentenno all’utemo dire pe le tre
ccorune meje, che s’io saccio chi è stata la bona massara, che m’ha
fatto tante belle servizie, io le voglio fare tante belle carizze, e
bruoccole, che non se lo porria ’mmagenare. Essa scette fora, e disse
eccome; e l’Orca vedennola, respose: ajeme no cauce; aje saputo cchiù
de me: l’aje fatta da mastro, e t’aje sparagnato na bella ’nfornata
drinto a sto cuorpo; ma pocca aje saputo fare tanto, e m’aje dato
gusto, io te voglio tenere cchiù che ffiglia: perzò eccote le cchiave
de le ccammere, e singhe dommene, e dommenanzio: sulo mme reservo na
cosa; che non vuoglie aprire ’n cunto nesciuno l’utema cammara, dove và
bona sta chiave, che mme farrisse saglire buono la mostarda a lo naso,
ed attienne a sservire, che biata te, ch’io te mprommetto pe le ttre
ccorune meje de te mmaritare ricca ricca. Marchetta vasannole le mmano
de tanta grazie, prommesse de servirela cchiù de schiava. Ma partuta
l’Orca, se sentie tillicare grannemente da la curiosetà de vedere, che
nce fosse drinto a chella cammara proibeta, ed apertola nce trovaje
tre ffigliole vestute tutte d’oro, sedute a tre ssegge a la mperiale,
che pparevano che ddormessero. Erano cheste tutte figlie de la Fata
’ncantate da la matre, e perchè sapeva ch’avevano da passare no gran
pericolo, si no le beneva a scetare na figlia de Rrè; e perzò l’aveva
nchiuse llà ddrinto, pe llevarele da lo riseco che le ammenacciavano
le stelle. Ora trasuto llà drinto Marchetta, a lo rremmore, che fece
co li piede, chelle se sentettero, comme se scetassero, e le cercaro
da magnare, le quale comm’appero pigliato spireto, vozero scire a
ppigliare ajero fora la sala, tra lo quale tiempo arrivata l’Orca,
ebbe tanto desgusto, che schiaffaje no boffettone a Marchetta, la
quale se nne pigliaje tant’affrunto, ch’a la mmedesema ora cercaje
lecienzia all’Orca de se partire pe ghire sperta, e ddemerta pe lo
munno, cercanno la sciorte soja. Pe quanto cercaje l’Orca d’accordarela
de belle parole, decenno, ch’aveva abborlato, e ca no lo boleva fare
cchiù, non fu possibele a llevarela de pede; tanto che fu ccostretta
a llassarela partire, dannole n’aniello, e decennole, che lo portasse
co la preta drinto la mano, e non ce tenesse mente maje, si non quanno
trovannose a gran pericolo sentesse lo nomme sujo leprecare dall’ecco,
e otra a cchesto, no bello vestito d’ommo, che le cercaje Marchetta,
la quale accossì bestuta se mese ’n cammino, e arrevata a no vosco,
dove jeva a ffare legna la notte, pe scarfarese da la jelata passata,
scontraje no Rrè, che ghieva a la caccia, lo quale visto sto bello
fegliulo (che cossì pareva) l’addemannaje da dove veneva, e che ghieva
facenno; la quale respose, ch’era figlio de no mercante, lo quale
essenno morta la mamma, pe li strazie de la matreja, se n’era fojuto.
Lo Rrè piacennole la prontezza, e lo buono termene de Marchetta, se
lo pigliaje pe ppaggio, e portatolo a lo palazzo sujo, la Regina lo
vedde appena, che se sentette da na mano de grazie mannare pell’ajero
tutte le boglie soje; e si be cercaje pe na mano de juorne parte pe
ppaura, parte pe ssoperbia, che fu sempre ncrastata co la bellezza,
de semmolare la sciamma, e de sforzare le pponture d’ammore sotto la
coda de lo desedderio, tuttavota essenno corta de carcagne, non potte
stare sauda a li ’ncuntre de le sfrenate voglie, e perzò chiammatase no
juorno da parte Marchetta, l’accommenzaje a scommogliare le ppene soje;
e a ddirele quanto sopr’uosso d’affanno l’era puosto ’n cuollo da che
aveva visto le bellezze soje, che si non se resorveva de dare l’acqua
a lo territorio de li desiderie suoje, sarria seccata senz’autro
co la speranza la vita. Laudaje da na parte le bellezzetudene cose
de la facce soja, mettennole nnanze a ll’uocchie, ca sarria cosa
de male scolaro nne la scola d’ammore, a ffare no scacamarrone de
crodeletate drinto a no libro de tanta grazia, e ca n’averria avuto
no buono cavallo de pentemiento; a le llaude agghionze li prieghe,
scongiurannolo pe ttutte le ssette celeste, che non volesse vedere
drinto na carcara de sospire, e ’n miezo no pantano de lagreme una,
che teneva pe ’nsegna a la poteca de li penziere la bella ’mmagene
soja: appriesso secotaro l’afferte, promettennole de pagare ogne dito
de gusto a pparme de beneficio, e de tenere apierto lo funnaco de
la gratetudene ad ogne piacere de cossì bello accunto. Le recordaje
finalemente, ca essa era Regina, e mmentre essa era de già trasuta ’n
varca, isso no le deveva lassare ’n miezo a sto guorfo senza quarche
soccurzo, perchè sarria data a scuoglio co ddanno sujo. Marchetta
sentute sti vruoccole, e ffilatielle, ste promesse, e mmenacce, ste
ffacce lavate, e llevate de cappa, averria voluto dicere, ca ped
aprire la porta a le ccontentizze soje le mancava la chiave, averria
voluto spalesecare, ca pe darele chella pace, che ddesederava, non
era mercurio, che portasse lo Caduceo; ma non volenno smascararese,
le respose, che non se poteva dare a ccredere, che avesse voluto fare
le ffusa storte a no Rrè de tanto miereto, comm’a lo marito: ma puro
quanno essa avesse puosto da parte la repotazione de la casa soja,
isso non poteva, nè boleva fare sto tuorto a no patrone, che tanto
l’ammava. La Regina sentuta sta primma repreca a la ntemazione de le
boglie soje, le disse; ora susso, pensace buono, e ssorca deritto,
ca le ppare meje, quanno pregano tanno commannano, e quanno se
’ngenocchiano, tanno metteno li cauce ’n canna; perzò fa buono li cunte
tuoje, e bide comme te pò rescire sta mercanzia: vasta e ssuffice,
ch’io co dirte na cosa schitto mme parto, ed è, che quanno na femmena
de la qualetà mia resta scornata, procura co lo sango di chi l’affese
levare la magriata da la facce soja. E cossì decenno, co na gronna pe
torcere, le votaje le spalle, restanno la povera Marchetta confosa, e
ghielata. Ma continuato pe na mano de juorne la Regina de dare assaute
a sta bella fortezza, e bedenno a la fine ca fatecava ’n pierdeto,
stentava a lo viento, e ssodava nvatola, jettanno le pparole a lo
viento, e li sospire ’n vacanto, mutaje registro, cagnanno l’ammore ’nn
odio, e la voglia de gaudere la cosa amata ’n desederio de vennetta.
Pe la quale cosa fegnenno le llagreme ’n ponta all’uocchie, se ne
jette a lo marito, decennole: Chi nce l’avesse ditto, marito mio, de
nce crescere lo serpe a la maneca? chi se l’avesse ’mmagenato maje,
che no smiuzo sciauratiello avesse avuto tanto armo? Ma tutto nce lo
ccorpa li ttroppo cassesie, che tu l’aje fatto; a lo villano si l’è
ddato lo dito, se piglia la mano; ’n somma tutte volimmo pisciare
all’aurinale; ma si tu no le daje lo castico che mmereta, mme ne
jarraggio a la casa de patremo, e non boglio cchiù nè bederete, nè
sentirete nnommenare. Che cosa t’ha fatto, respose lo Rrè; e la Regina
leprecaje; cosa de no lippolo. Voleva lo forfantiello essere esattore
de lo debeto matremoniale ch’aggio co ttico; e senza nullo respetto,
senza nullo temore, senza nulla vregogna ave avuto facce de venireme
nnanze, e lengua de cercareme lo passo libero de lo terretorio,
dove aje tu lo ssemmenato pe lo nnore. Lo Rrè sentenno sto fatto,
senza cercare autre testemmonie, pe non pregiodecare a la fede, e a
l’autoretate de la mogliere, lo fece subbeto acciaffare da li Tammare,
e caudo caudo, senza darele termene de defenziune, lo connannaje a
bedere quanto portava ncanna la statela de lo Boia, la quale portata
de pesole a lo luoco de lo sopprizio; essa che non sapeva, che l’era
socciesso, nè ccanosceva d’avere fatto male, commenzaje a gridare:
O Cielo, ch’aggio fatto io, che mmeretasse lo fonerale de sto nigro
cuollo nnanze de l’assequie de sto scuro cuorpo? chi mme l’avesse
ditto, senz’assentareme la chiazza sotto la vannera de mariuole, e de
marranchine, trasire de guardia a sto palazzo de morte, co tre passe
de miccio a lo cannaruozzo? oimmè chi mme conzola a sto stremo passo,
chi m’ajuta a ttanto pericolo? chi mme libera da sta forca? _Orca_,
respose l’Ecco, e Marchetta, che se sentette responnere de sta manera,
se allecordaje de l’aniello, che portava a lo dito, e de le parole,
che le disse l’Orca, quanno partette, e dato d’uocchie a la preta, che
non aveva mirato ancora, ecco se sentie tre bote na voce pell’ajero,
_lassatela ire, ch’è ffemmena_; le quale fu cossì tterribele, che non
nce restaje nè acciaffature, nè zaffarenare a lo luoco de la jostizia;
e lo Rrè sentuto ste pparole, che fecero tremmare lo palazzo da le
ppedamenta, fece venire Marchetta a la presenzia soja, e ddittole,
che ddecesse lo vero, chi fosse, e comm’era capetata a cchille paise,
essa sforzata da la necessetà, contaje tutto lo socciesso de la vita
soja, comme nascette, comme fu schiusa drinto a cchillo palazzo, comme
fu arrobbata da lo viento, comme capitaje a la casa dell’Orca, comme
se voze partire, chello che le disse, e le dette, chello che passaje
co la Regina, e comme non sapenno ’n che avesse fatto arrore, s’è
bista a ppericolo de vocare co li piede a la galera de tre llegne.
Lo Rrè sentuto sta storia, e cconfrontatala co chello, che n’aveva
trascurzo na vota co lo Rrè de Valletescuosse ammico sujo, recanoscette
Marchetta pe cchella, ch’era; e ccanoscette nsiemme la malignetate
de la mogliere, che l’aveva puosto sta mala nfammia, pe la quale cosa
commannato che fosse subbeto jettata co na mazzara a mmaro, mannanno
a ccommitare lo patre, e la mamma de Marchetta, se la pigliaje pe
mmogliere, la quale facette chiara prova,
_Ch’a barca desperata,_
_Dio le retrova puorto._