TRATTENEMIENTO V De la Jornata IV.
_Miuccio è mmannato ped’opera de na Regina a diverse pericole, e
da tutte, pe l’ajuto de n’Auciello fatato, nne resce a nnore. A la
fine more la Regina, e scopierto pe ffiglio de lo Rrè, fa liberare
la mamma, che deventa mogliere de chella Corona._
_Lo cunto de le ssette Cotenelle ngrassaje de manera la menestra
de lo gusto de lo Prencepe, che lo ggrasso sceva pe ffora sentenno
la gnorante malizia, e la maliziosa gnoranzia de Saporita, che
cco ttanto sapore era stata scioccarriata da Tolla: ma Popa non
volenno cedere mollica a Ttolla, se ’mmarcaje pe lo maro de le
ffilastroccole co lo Cunto, che ssecoteja._
Chi cerca lo mmale d’autro, trova lo danno proprio, e chi và pe
’ncappare lo tierzo, e lo quarto a ttrademiento, e a li ’nganne,
spisso ’ncappa a le bescate stesse, ch’aveva parato, comme sentarrite
de na Reggina, che se fravecaje co le mmano stesse la tagliola, dove
’ncappaje pe lo pede.
Dice, ch’era na vota lo Rrè d’Auta Marina, lo quale pe la canetate,
e tirannia, che osava, le fu (mentre era juto a spasso co la mogliere
a no Castellotto lontano da la Cetate) occupato lo sieggio rejale da
na certa femmena maga; pe la quale cosa fatta pregare na statola de
ligno, che dava certe rresposte cervune; chella respose, che tanno
recuperarria lo stato, quanno la maga perdesse la vista; e bedenno
ca la maga, otra che steva bona guardata, canosceva a lo naso le
gente mannate da isso a ffarele despiacere, e nne faceva jostizia de
cane, puostose ’n desperazione quanta femmene poteva avere ’n mano de
chillo luogo, pe despietto de la Maga, a tutte levava lo nnore, e co
lo nnore la vita; e dapò ciento, e ciento portate da la mala ventura
lloro, che rremmasero stompagnate de la repotazione, e sfasciate de
li juorne, nce capitaje fra l’autre na giovane chiammata Porziella,
la quale era la cchiù pentata cosa, che se potesse vedere sopra tutta
la terra. Aveva li capille, Manette de li sbirre d’amore; la fronte
tavola, dov’era scritta l’assisa a la poteca de le grazie de li guste
amoruse; l’uocchie, duje fanale, che assecuravano li vascielle de le
boglie a bottare la proda a lo puorto de li contiente; la vocca na
cupa de mele ’n miezo doje sepale de rose, la quale venuta ’n mano de
lo Rrè, e ffattala passare a rrollo, la voze accidere comm’all’autre;
ma a lo stisso tiempo, che auzaje lo pugnale, n’auciello lassannole
cadere non saccio che rradeca ncoppa a lo vraccio, le venne tale
tremmoliccio, che le cadette l’arma de mano. Era st’auciello na Fata,
che stanno poco juorne ’nnante a dormire drinto a no vosco, dove sotto
la tenna dell’ombre se jocava l’ardore a la galera de lo spaviento,
mentre no cierto Satoro le voleva fare le brutte cose, fu scetata da
Porziella, che pe sto beneficio secotava sempre le ppedate soje pe le
rennere la pareglia. Ora vedenno lo Rrè sto socciesso, penzaje, che
la bellezza de chella facce avesse fatto sto sequestro a lo vraccio,
e sto ncanto a lo pognale, che no l’avessero sficcagliata, comme de
tante autre aveva fatto, però fece penziero, che bastasse no pazzo pe
ccasa, e non tegnere de sango l’ardigno de morte, comme aveva fatto
de lo stromiento de vita; ma che mmoresse fravecata a no soppigno
de lo palazzo sujo, comme fece con affetto fravecanno l’ammata, e
nnegrecata fra quatto mura, senza lassarele drinto nè da magnare, nè
da vevere, perchè se ne jesse cessa cessa. L’Auciello che la vedde a
sto male termene, co pparole omane la conzolaje, decenno, che stesse de
buon’armo, che pe le rennere la gran merzè de no piacere, che l’aveva
fatto, l’averria ajutata co lo sango proprio, e pe quanto lo pregasse
Porziella, non voze dicere maje chi fosse, schitto, ca l’era obrecato,
e che n’averria lassato cosa a ffare pe sservirela; e bedenno ca la
povera fegliola era allancata de la famme, dette na volata fora, e
ttornaje subeto co no cortiello appontuto, che levaje da lo repuosto
de lo Rrè, e le disse, che a poco a poco avesse fatto no pertuso a no
pontone de lo solaro, che sarria juta a rresponnere a la cocina, da
la quale averria pigliato sempre quarcosa pe le mantenere la vita; e
cossì affatecatese no piezzo Porziella, tanto scavaje, che fece strata
a l’Auciello, lo quale abbestato lo Cuoco, ch’era juto a pigliare
no cato d’acqua a na fontana; scese pe cchillo pertuso, e nn’auzaje
no bello Pollastro, che steva ’n caudo, e lo portaje a Porziella; e
perchè remmediasse a la seta, non sapenno comme le portare da vevere,
volaje a la despenza, dove era tanta uva appesa, e nce ne portaje no
bello piennolo, e cossì fece pe na mano de juorne. Fra chisto miezo
essenno remasa prena Porziella, fece no bello figlio mascolo, lo
quale allattaje, e ccrescette co lo continuo ajuto de l’Auciello: ma
essenno fatto granne, fu consegliata la Mamma da la Fata, che ffacesse
lo pertuso cchiù granne, e levarene tante chiancarelle da lo solaro,
che nce capesse Miuccio (che cossì se chiammava lo figliuolo), dapò
che l’avesse calato a bascio co ccerte ffonecelle, che l’Auciello
portaje, tornasse a mmettere le cchiancarelle a lo luoco sujo, azzò
non se vedesse pe dov’era sciso; e fatto Porziella comme le disse
l’Auciello, e commannato a lo Figlio, che non decesse maje da dove
fosse venuto, nè de chi era figlio, lo calaje a bascio quanno lo Cuoco
era sciuto fore, lo quale tornato a ttrasire, e bisto cossì bello
figliulo, l’addemmannaje chi era, da dove era trasuto, e ch’era venuto
a ffare; e Miuccio tenenno a mmente lo conziglio de la mamma, disse ca
s’era sperduto, e ghieva cercanno patrone. A sto contrasto arrivaje lo
Scarco, e bisto no Peccerillo de tanto spireto, penzaje, che ssarria
stato buono pe paggio de lo Rrè, e pportatolo a le stanzie rejale,
comme fu visto cossì bello, e graziuso, che pareva na gioja, subeto
piacette a lo Rrè, tenennolo a lo servizio pe paggio, e a lo core pe
ffiglio, facennolo ’mmezzare tutte li sarzizie, che stanno buone a no
Cavaliero, tanto, che se crescette lo cchiù bertoluso de la Corte, e
lo Rrè le voleva assaje chiù bene, che non voleva a lo figliastro,
pe la quale cosa la Regina commenzaje a pigliarelo ’ndesagro, e ad
averelo ’nsavuorrio. E ttanto cchiù guadagnava terreno la ’nvidia,
e la malevolenza, quanto cchiù le schianavano la strata li favure,
e le grazie, che lo Rrè faceva a Miuccio; tanto che fece penziero de
mettere tanto sapone a le scaliate de la fortuna soja, che sciuliasse
da coppa a bascio; e mmentre che na sera, dapò accordate li stromiente
’nziemme, facevano na museca de trascurzo fra lloro, disse la Regina
a lo Rrè, ca Miuccio s’era vantato de fare tre castielle n’ajero, e lo
Rrè, si perchè era confuso, si pe ddare gusto a la mogliere, comme la
matina la Luna maestra dell’ombre dà feria a le ddescepole pe la festa
de lo Sole, fece chiammare Miuccio e le commannaje, che ’nn ogne cunto
avesse fatto li tre castielle ’n ajero comm’aveva prommiso, autramente
l’averria fatto fare li saute ’n ajero. Miuccio sentenno sta cosa, se
nne jette a la cammara soja, e accommenzaje a fare n’ammaro lamiento,
e bedenno quanto era vitriola la grazia de li Princepe, e comme poco
duravano li favure, che le facevano; e mmentre chiagneva co tanto de
lagreme, eccote venire l’auciello, lo quale le disse, piglia core, o
Miuccio, e non dobetare, mentre aje sto fusto co ttico, ca io sò buono
a cacciarete da lo ffuoco, e cossì decenno, l’ordenaje che avesse
pigliato cartune, e ccolla, e ffattone tre gran castielle, e facenno
venire tre gruosse Grifune, nne pose legate uno pe Ccastiello, li quale
volanno pe coppa l’ajero, Miuccio chiammaje lo Rrè, lo quale co ttutta
la Corte corze a sto spettacolo, e bisto lo nciegno de Miuccio, le
mese cchiù gran affezzione, e le fece carizze dell’autro munno: pe la
quale cosa refose nove a la ’nvidia de la Regina, e ffuoco a lo sdigno,
vedenno ca nesciuna cosa le sceva ’mparo, tanto che non begliava lo
juorno, che non penzasse muodo, nè dormeva la notte, che non sonnasse
manera da levarse da nante sto spruoccolo dall’uocchie suoje: tanto,
che dapò certe autre juorne, disse a lo Rrè: Marito mio, mo è lo tiempo
de tornare a le grannezze passate, e a li guste de mò fa l’anno, pocca
Miuccio s’è affierto de cecare la Fata, e co na sborzata d’uocchie
farete recattare lo Regno perduto. Lo Rrè, che se sentette toccare
dove le doleva, a lo stisso punto, chiammato Miuccio le disse: Io resto
maravegliato assaje, che bolennote tanto bene, e potenno tu metteremme
de nuovo a lo sieggio da dove sò tommoliato, te nne staje cossì
spenzerato, non te cure chiù de levareme da la meseria, addove mme
trovo, vedennome arreddutto da no Regno a no vosco, da na Cetate a no
povero Castelluccio, e da lo commannare a ttanto puopolo, essere appena
servuto da quatto pane a parte, fella pane, e mmiette vruodo; però
se non vuoje la desgrazia mia, curre mo proprio a ccecare l’uocchie a
la Fata, che se tene la rrobba mia; perchè serranno le ppoteche soje,
raprarraje lo funnaco de le grannizze meje, stutanno chelle llocerne,
allommarraje le llampe dell’annore mio, che stanno scure, e nnegrecate.
Sentuta sta proposta Miuccio, voleva responnere, ca lo Rrè steva male
nformato, e ca l’aveva pigliato a scagno, perchè non era cuorvo, che
cecasse uocchie, nè latrinaro, che spilasse pertosa, quanno lo Rrè
leprecaje: nò cchiù pparole: cossì boglio, cossì sia fatto: fa cunto,
ca a la zecca de sto cellevriello mio aggio apparato la valanza; da ccà
lo premmio, si faje chello, che dive, da ccà la pena, si lasse de fare
chello che te commanno. Miuccio, che non poteva tozzare co la preta, e
aveva da fare co n’ommo, che trista la mamma che nce aveva la figlia,
se nne jeze a no pontone a trivoliare, dove arrivato l’Auciello, le
disse; è possibile, Miuccio, che sempre t’annieghe a no becchiero
d’acqua? se io fosse stato acciso, porrisse fare maje sto sciabbacco?
non saje, ca io aggio cchiù ppensiero de la vita toja, che de la
propria? però non te perdere d’armo, e bieneme appriesso, ca vedarraje
chello, che sà fare Meniello; e puostose a bolare se fermaje drinto
lo vosco, dove puostose a bernolejare, le vennero na mano d’aucielle
a ttuorno, a li quale essa demannaje, che chi se confidava de levare
la vista a la Maga, l’averria fatto na sarva-guardia contra le granfe
de li spreviere, e d’Asture, e na carta franca contra le Scoppette,
archette, valestre, e bescate de li cacciature. Era fra chiste na
rennena, che aveva fatto lo nido a no travo de la casa rejale, e aveva
’nn odio la Maga, che pe ffare li mmarditte percante suoje, l’aveva
cacciato cchiù bote da la cammara soja co li fomiente, pe la quale
cosa parte pe ddesedderio de la vennetta, parte pe guadagnarese lo
premmio, che prometteva l’Auciello, se afferze de fare lo servizio, e
bolare comme no furgolo a la Cetate, e ttrasut’a lo palazzo, trovaje
che la Fata steva stesa ’ncoppa a no lietto de repuoso, facennose fare
frisco co no ventaglio da doje dammecelle. Arrevata la Rennena, se
pose a chiummino sopra l’uocchie de la Fata, e cacannoce drinto, le
levaje la vista; la quale vedenno a miezo juorno la notte, e sapenno
ca scompeva co sta serrata de doana la mercanzia de lo Regno, jettanno
strille d’arma dannata renonziaje lo scettro, e se nne jette a ntanare
a ccerte grotte, dove tozzanno sempre la capo pe le mmura scompette
li juorne. Partuta la Maga, li Consigliere mannattero mmasciature a lo
Rrè, che se nne venesse a gaudere la casa soja; pocca lo cecamiento de
la Maga l’aveva fatto vedere sto buono juorno; ed a lo stisso tiempo,
che chiste arrivaro, jonze ancora Miuccio, lo quale nfrocecato da
l’Auciello, disse a lo Rrè, t’aggio servuto de bona moneta: la Maga
è ccecata: lo regno è lo tujo; perrò s’io mmereto pagamiento de sto
servizio, non voglio autro, che mme lasse stare co li malanne mieje,
senza mettereme n’autra vota a sti pericole. Lo Rrè abbracciatolo co
n’ammore granne, le fece mettere la coppola, e ssedere a ccanto ad
isso, che se la Regina ’ntorzaje, lo cielo te lo ddica, tanto che a
l’arco de tante colure, che se mostraje a la facce soja, se canoscette
lo viento de le rroine, che contra lo povero Miuccio machinava drinto
a lo core. Era poco lontano da sto castiello no Dragone ferocissemo,
lo quale nascette a no stisso partoro co la Regina, e chiammate da lo
Patre l’Astrolache a strolacare sopra sto fatto, decette, che ssarria
campata la figlia soja quanto campava lo Dragone, e che mmorenno
l’uno, sarria muorto necessariamente l’autro: sulo na cosa poteva
resorzetare la Regina, ed era se l’avessero ontato le cchiocche, la
forcella de lo pietto, le fforgie de lo naso, e ppoza co lo sango de
lo stisso Dragone. Ora mo la Regina sapenno la furia, e la forza de
l’anemale, pensaje de mannarele Miuccio drinto le granfe, secura, che
se n’averria fatto no voccone, e le sarria stato comm’a ffraola ’n
canna a l’Urzo, e botatase a lo Rrè, le disse: Affè, ca Miuccio è lo
tresoro de la casa toja, e sarrisse sgrato se non l’amasse, tanto chiù,
ca s’è lassato ’ntennere de volere accidere lo Dragone, che si bè mm’è
ffrate, essennote cossì nnemmico, io voglio cchiù pe no pilo de no
marito, che pe cciento frate. Lo Rrè, che odiava a morte sto Dragone,
e non sapeva comme levaresillo da nanze all’uocchie, subeto chiammato
Miuccio, le disse: Io saccio ca miette la maneca a dove vuoje, e perzò
avenno fatto tanto e tanto, besogna, che mme faccie n’autro piacere,
e po votame dove vuoje. Vattenne a sta medesima pedata, ed accide lo
Dragone, ca mme faje no servizio signalato, e io te ne darraggio buono
miereto. Miuccio a ste parole appe a scire de sentemiento, e dapò che
potte sperlire le parole, disse a lo Rrè: Ora chessa è doglia de capo
mò, vuje m’avite pigliato a ffrusciare, è ffatto de crapa negra la
vita mia, che nne facite tanta struderie? Chisto non è ppiro monnato,
cascame ncanna, ca è no Dragone; che co le granfe deslenza, co la capo
stompagna, co la coda sfracassa, co li diente spetaccia, coll’uocchie
nfetta, e co lo sciato accide. Ora comme mme volite mannare a la
morte? chesta è chiazza morta, che mm’è data, ppe t’avere dato no
Regno? chi è stata l’arma mmardetta, c’ha puosto sto dado ’ntavola?
chi è stato lo figlio de lo Zefierno, che v’ave puosto a sti saute, e
v’ave mprenato de ste pparole? lo Rrè, che era lieggio comme pallone
a ffarese sbauzare, ma tuosto chiù de na preta a mmantenere chello
ch’aveva ditto na vota, mpontaje li piede, decenno; aje fatto, e mò
te pierde a lo mmeglio: però non cchiù pparole, và leva sta pesta da
lo Regno mio, se non vuoje, che te leva la vita. Miuccio negrecato,
che se senteva fare mo no favore, mo n’ammenaccia, mo n’allesciata de
facce, mo no cauce ’n culo, mo na cauda, e mo na fredda, consideraje
quanto erano mutabele le fortune de la Corte, e averria voluto essere
cchiù ca diuno de la canoscenza de lo Rrè; ma sapenno ca lo leprecare
all’uommene granne è bestiale, e quanto pelare la varva a no Lione, se
reteraje a na parte, mmardecenno la sciorte soja, che l’avev’arreddutto
a la Corte, pe ffare corte l’ore de la vita soja; e mmentre seduto a no
grado de porta co la facce ’n miezo a le ddenocchia lavava le scarpe
co lo chianto, e scaudava li contrapise co li sospire, eccote venire
l’Auciello co n’erva ’n pizzo, e ghiettannoncella ’n sino le disse:
Auzate Miuccio, e assecurate, ca non joquarraje a scarreca l’aseno de
li juorne tuoje, ma a sbaraglino de la vita de lo Dragone; perzò piglia
st’erva, e arrivato a la grotta de sto brutto anemale, jettacella
drinto, ca subeto le venarrà tale suonno spotestato, che scapizzarà
a ddormire, e tu co no bello cortellaccio fra nacca e ppacca, fanne
subeto la festa, e bienetenne, ca le ccose resceranno meglio, che non
te pienze. Vasta io saccio buono, che porto ssotta, ed avimmo cchiù
ttiempo, ca denare, e chi ha ttiempo, ha bita. Ditto accossì s’auzaje
Miuccio, e schiaffatose na cortella carrese sotta, e pigliatase l’erva
s’abbiaje a la Corte de lo Dragone, la quale steva sotta na montagna
de cossì bona-crescenza, che li tre mmunte, che fecero gradiata a
li Gegante, no le sarriano arrivate a la centura; dove arrivato,
jettaje l’erva drinto chella spelonca, e appiccecato subeto suonno
a lo Dragone, Miuccio l’accommenzaje a ttaccarejare. A lo stisso
tiempo, ch’isso adacciava l’anemale, se sentette la Regina adacciare
lo core, e bistose a mmale termene, s’addonaje de l’arrore sujo, che
s’aveva comprato a denare contante la morte; e chiammato lo marito, le
disse, che l’avevano pronostecato l’Astrolache, e che da la morte de
lo Dragone penneva la vita soja, e comme dobetava, che Miuccio avesse
acciso lo Dragone, mentre essa se ne senteva sciuliare appoco appoco;
a la quale respose lo Rrè, se tu sapive ca la vita de lo Dragone
era pontella de la vita toja, e rradice de li juorne, perchè mme nce
faciste mannare Miuccio? chi nc’ha corpa? tu t’aje fatto lo mmale, e
tu te lo chiagne: tu aje rutto lo gotto, e tu lo paga; e la Regina
respose: non me credeva maje, che no smiuzillo avesse tanta arte,
e ttanta forza de jettare a tterra n’anemale, che faceva poca stima
de n’asserzeto, e aveva fatto penziero, che nce lassasse li stracce;
ma pocca aggio fatto lo cunto senza l’oste, e la varca de li designe
mieje è ghiuta traverza, famme no piacere, si mme vuoje bene, comme sò
morta, de fare pigliare na spogna nfosa de lo sango de sto Dragone, e
ontareme tutte le stremetà de la perzona ’nnanze de m’atterrare. Chesta
è ppoca cosa a l’ammore, che te porto, respose lo Rrè, e si non vasta
lo sango de lo Dragone, nce mettarraggio lo mio pe ddarete sfazione;
e bolenno la Regina rengraziarelo, le scette lo spirito co la parola,
perchè a lo stisso tiempo avea Miuccio scomputo de fare tonnina de
lo Drago; e appena venuto nnante lo Rrè a darele nova de lo fatto, le
commannaje, che fosse juto pe lo sango de lo Dragone. Ma curiuso lo Rrè
de vedere la prova fatta da le mmano de Miuccio, se l’abbiaje retomano,
e mmentre Miuccio, sceva la porta de lo palazzo se la fece ’ncontra
l’Auciello decennole, dove vaje? E Miuccio respose: vao dove mme manna
lo Rrè, che facennome ire comme a nnavettola, non me lassa resistere
n’ora. A fare che? disse l’Auciello; e Miuccio: a pigliare lo sango de
lo Drago; e l’Auciello leprecaje: Oh nigro te, ca sto sango de Drago
sarrà sango de Toro pe te, che te schiatterà ncuorpo, e co sto sango
resorzetarà chella mala semmenta de tutte li travaglie tuoje, pocca
essa te và mettenno sempre a nnuove pericole, perchè nce lasse la vita;
e lo Rrè, che se fa mettere la varda da na brutta scerpia, te manna
comme a ghiettariello ad arresecare la perzona, ch’è puro sango sujo,
ch’è puro vruoccolo de chella chianta; ma lo scuro non te conosce:
puro devarria l’affetto ntrinseco essere spione de sto parentato, azzò
li servizie, ch’aje fatto a sto Segnore, e lo guadagno, ch’isso fa de
cossì bello arede, avessero forza de farele trasire ’n grazia chella
sfortunata de Porziella mammata, ch’ora maje sò quattuordece anne,
che stace atterrata viva drinto no soppigno, dove se vede no tempio de
bellezza fravecato drinto a no cammariello; mentre accossì le deceva la
Fata, lo Rrè ch’aveva sentuto ogne ccosa, se facette nnante pe ssentire
meglio lo fatto; e ntiso ca Miuccio era figlio de Porziella, restata
prena d’isso, e la Porziella era ancora viva drinto la cammara, dette
subeto ordene, che ffosse sfravecata, e pportata ’nnante ad isso;
la quale comme la vedde cchiù bella, che maje, pe lo buono covierno
de l’Auciello, abbracciatola co n’ammore granne, non se saziava de
stregnere mo la mamma, e mo lo figlio, cercanno perduono a chella de
lo male trattamiento, che l’aveva fatto, ed a chillo de li pericole, a
che l’aveva puosto; e fattole subeto vestire dell’abete cchiù ricche de
la Regina morta, se la pigliaje pe mmogliere; e saputo che tanto essa
era campata, e tanto lo figlio era sciuto franco da tante pericole,
quanto l’Auciello aveva l’una mantenuta de vitto, e l’autro ajutato de
consiglio, l’offerse lo stato, e la vita; lo quale disse, non volere
autro premio de tante servizie, che Miuccio pe mmarito; e cossì decenno
deventaje na bellissema Giovane, la quale co gusto granne de lo Rrè,
e de Porziella fu data a Miuccio pe mmogliere, e tutto a no tiempo,
mentre la Regina morta fu jettata a no tummolo, la cocchia de li Zite
cogliettero li contiente a ttommola; e pe ffare cchiù granne le ffeste
s’abbiaro a lo Regno loro, dove erano aspettate co gran desederio,
reconoscenno tutta sta bona fortuna da la Fata, pe lo piacere, che le
fece Porziella, pocca a la fine de li fine,
_Lo fare bene non se perde maje._