lointainnes marches. Vous avés bien chi dessus oy comment li prinches
de Galles estoit tous malades retournés en Engleterre, et madamme la
princesse ossi, et leur fil le jone damoiziel Richart, qui fu puis rois
d’Engleterre, sicomme vous orés en l’istoire. Li dus de Lancastre,
qui estoit là ordonnés et estaublis de par le dessus dit prinche à
gouvrenner et à seignourir la duché d’Acquittainne, avoit ja fait
depuis le departement de son frère le prinche pluisseurs chevauchies,
armées et yssues sus les terres, qui leurs estoient ennemies, et se
tenoit une fois en Angouloime et l’autre à Bourdiaux, et li baron de
Poito, de Gascoingne, de Roherge et de Saintonge dallés lui. Encorres
s’entretenoient bien chi[l] païs et li seigneur, baron et chevalier
qui dedens demoroient, pour lui et en sen aye, tels que li sires de
Duras, li sires de Rosen, li seigneur de Pumiers, li sirez de Chaumont,
li sires de Courton, li sires de Longheron, li sirez de Lespare, li
captaux de Beus, li soudis de Lestrade, messires Bernadet de Labreth,
li sires de Geronde, messires Aimeris de Tarse; et de Poito: li sires
de Partenay, messires Guicars d’Angle, messires Loeis de Halcourt,
li sires de Surgières, li sires de Puiane, li sires de Tannai Bouton
et pluisseurs autrez barons et chevaliers de ces marches et contrées
dessus nomméez. Or fu enssi adont regardé et adviset entre cez signeurs
et pluisseurs chevaliers d’Engleterre ossi dou consseil dou duc qui là
estoient, que li dessus dis dus de Lancastre estoit à marier, et que
une damme de hault affaire et de grant linage seroit bien emploiiée en
lui, car il estoit durement haut gentils homs et de noble generation,
et avoit eu à femme une très noble et gentil dame, madamme Blanche,
fille au bon duc Henry de Lancastre, que li Gascon avoient moult
amé. Si n’estoit mies li dus Jehans de Lancastre à present tailliés
d’amenrir ne de lui marier en plus bas degret ne de menre linage; car
ja estoit il filz de roy et ungs grant sires de soy meysme. Si savoient
chil dessus dit signeur deus jonnes dames et filles au roy dant
Pierre d’Espaingue et hiretièrez par droit dou royaumme d’Espaingne,
qui estoient à Bayonne, et là les avoit laissiées en plèges et en
crant pour grant argent li roys dan Piètres, leurs pèrez. Si fu enssi
remoustret et dit au duch que adont il ne se pooit mieux mettre et
asener que en l’ainnée de ces filles madamoiselle Constanse qui estoit
de droit, par le succession dou roy son père, hiretière d’Espaingne, et
encorres par che costé poroit il y estre roys d’Espaingne, qui n’est
pas petis hiretaiges, mès ungs des grans dou monde royaumes crestyens,
ou chil qui de li et de ceste damme descenderoient; et que on devoit
bien presumer et ymaginer si grant prouffit sus le temps à venir. A ces
parolles entendi li dus de Lancastre mout vollentiers, et li entrèrent
si ou coer que oncques puis ne l’en partirent, et bien le moustra;
car tantost il fist appareillier douse de ses chevaliers, et envoya
querre et delivrer les dessus dittes dammoiselles Constance et Ysabel à
Bayonne, et furent amenées et acompaignies des dammes de Gascoingne et
de là environ jusques à Bourdiaux sus Geronde et là rechuptes à grant
joie. Assés tost apriès espousa li dus de Lancastre l’ainnée madamme
Coustanse, en ung villaige dallés Bourdiaux, où il y a un grant mannoir
dou signeur, que on appelle Rocefort, et là eut grant feste et grant
solempnité des barons et des chevaliers, des dammez et des dammoiselles
dou pays, et durèrent les noches et les festez bien douse jours.
Apriès les espousailles dou duc Jehan de Lancastre et de madamme
Coustance, fille ainnée au roy dan Piètre d’Espaingne que ses frères,
li rois Henris, avoit fait morir, sicomme chy dessus est deviset en
ceste histoire, li dus de Lancastre eult consseil et vollenté de
retourner en Engleterre et de amener y sa femme et sa serour ossi,
madammoiselle Ysabiel. Si ordonna ses besoingnes et fist touttes
ses pourveanches, et recommanda le pays de Poito et les marches par
de delà, qui pour yaux se tenoient, en le garde et ou gouvernement
des barons des pays, et par especial il elisi quatre souverains,
dont li ungs fu li sires de Duras pour les marches de Gascoingne, li
secons li captaus de Beus pour les frontières de Bourdiaux, li tiers
messires Thummas de Persi pour les tierez de Poito et de Saintonge,
et li quars avoecq lui li sires de Partenay. Et il leur dist ensi
que il ne se partoit mies pour cose que il n’ewist grant vollenté et
bonne de gueriier, mès pour imfourmer le roy, son père, et les barons
d’Engleterre de l’estat dou pays, et que, se il plaisoit à Dieu, il
retouroit à l’esté si bien pourveus de bonne gent d’armes que pour
reconcquerir tout le pays qui perdu estoit; et li dessus dit signeur et
gardiien estaubli de par lui respondirent: «Dieus y ait part!» Assés
tost apriès, quant touttez ses pourveanches furent faittes et cargies,
se departi li dus de Bourdiaux, et tous ses hostes, et montèrent en mer
sus le rivière de Geronde et nagièrent tant au vent et as estoilles
qu’il arivèrent en Engleterre ou havene de Hantonne. Si descargièrent
depuis leurs vaissiaus tout bellement, et missent hors lors chevaux et
tout leur harnois, et se reposèrent en ce faisant en le ditte ville de
Hantonne par deus jours.
Quant il eurent là sejourné ces deus jours, et qu’il y furent
rafresci, li dus et la ducoise se partirent et tous leurs arois, et
chevauchièrent deviers Londres, et fissent tant par leurs journées
qu’il y vinrent. Si y furent recheu moult sollempnement et très
reveramment, et fu la nouvelle ducoise de Lancastre moult honerée,
festiée et conjoïe, et tout chil et touttes celles qui avoecq lui
estoient, pour l’amour de lui. Meysmement li rois en son palais de
Wesmoustier le festia et conjoy mout grandement, car bien le savoit
faire. Assés tost après le revenue dou duch de Lancastre en Engleterre,
fu fais li mariaigez par l’acord et le vollenté dou roy englès et de
son consseil, de monseigneur Aimon, comte de Cantbruge, son fil, et
de la seconde fille au roy d’Espaingne, madammoisielle Ysabel qui
estoit là avoecq sa soer, et eut as espousailles grant feste et grant
solempnité; et dissent adont li Englès que cis mariaiges leur plaisoit
grandement et que leur doy seigneur s’étoient aloiiet à noble sanch et
grant, et que grans biens et grans prouffis leur en venroit encorres et
à leurs hoirs; car il en demoroient hiretier dou royaumme d’Espaingne.
Et avoecq tout ce, il avoient fait très grant aumosne; car ces deus
dammes estoient escachies et deshiretées: si n’euissent jammès esté
relevées, se li enfant dou roy n’ewissent esté. Si en devoient avoir
grant grace et grant loenge à Dieu et à tout le monde, voirs de chiaux
qui loiauté et franchise amoient et aidoient à parmaintenir: telle
estoit la vois et la renommée communement des Englès parmy le royaumme
d’Engleterre.
Tout cest yvier se tinrent enssi chil signeur en Engleterre, regardans
et ymaginans comment à l’estet il poroient faire un grant fet en
Franche. Li aucun dou consseil le roy englès consilloient que li dus
de Lancastre empresist à porter en touttes ses armoiries les plainnes
armes de Castille, comme drois hoirs, et mesist sus une grande armée
de naves et de vaissiaus, de gens d’armes et d’archiers, et venist en
Espaingne combattre le roy Henry et reconcquerre le pays, et furent li
Englès ung grant temps sus cel estat. Fºs 175 rº et vº, 176 rº et vº,
177 rº.
P. 27, l. 9: oy.--_Ms. A 8_: oy cy dessus.
P. 27, l. 10: rois.--_Ms. A 8_: rois James.
P. 27, l. 13: Montferrat.--_Ms. A 8_: Montferrant.
P. 27, l. 22: en.--_Ms. A 8_: à.
P. 27, l. 25: de rechief au chemin en istance de ce que pour
guerriier.--_Ms. A 8_: au chemin de rechief en entencion de guerrier.
P. 27, l. 27: mort.--_Ms. A 8_: tué.
P. 28, l. 2: au dit roy.--_Ms. A 8_: au roy.
P. 28, l. 4: peut.--_Ms. A 8_: pouoit.
P. 28, l. 11 et 12: et acord... Arragon.--_Ms. A 8_: du dit roy de
Navarre et entrèrent en Arragon.
P. 28, l. 15: essillier.--_Ms. A 8_: assaillir.
P. 28, l. 16: plain.--_Ms. A 8_: plat.
P. 28, l. 21: furent meneur et.--_Ms. A 8_: furent.
P. 29, l. 3: quoi c’aucun.--_Ms. A 8_: combien que aucun. Fº 345 rº.
P. 29, l. 8: moullier.--_Ms. A 8_: femme.
P. 29, l. 15: le doubtance.--_Ms. A 8_: la doubte.
P. 29, l. 17: les deus filletes.--_Ms. A 8_: les filletes.
P. 29, l. 26: celles.--_Ms. A 8_: elles.
P. 30, l. 4: encontre.--_Ms. A 8_: contre.
§ =683= et =686=. Ces nouvelles et Nous retourrons.--_Ms. d’Amiens_:
Bien estoit li rois Henris d’Espaingne enfourmés des mariages dessus
dis de ses deus cousinnes, mariées as enfans d’Engleterre, pourquoy
il estoit en doubte qu’il ne li fesissent trop grande guerre et que
par aucun meschief il s’acordaissent au roy de Franche, affin que plus
plainnement il le peuissent gueriier. Si envoiea tantost li roys Henris
grans messaiges deviers le roy de Franche, en lui remoustrant ces
perils et les doubtes qu’il y metoit, et que pour Dieu et par amours il
y volsist regarder et arester, car il estoit bons et loyaux Franchois
et seroit tousjours. Li roys de Franche, comme sages et ymaginans,
regarda le bonne vollenté dou roy Henri, et que voirement dou tamps
passet l’avoit il en tous estas loyamment servi, et ossi que, se li
royaummes de Castille estoit soumis ne concquis pas les Englès, sa
guerre en seroit plus layde: si aseura tantost le roy Henry, et dist
enssi qu’il fuist tout reconfortés, car jammais il n’aroit as Englès
pais, acord, trieuwez ne respit, que il ne fuist ossi plainnement
dedens enexés, comme il seroit ilz meysmes. Ces parolles et proummesses
pleurent grandement au roy Henry, che fu bien raison, et en leva
lettrez et instrummens publicques seellées dou propre seel le roy de
Franche; et li roys de France ossi à l’autre lés prist lettrez et
instrumens autentikes saiellées dou roy Henry et de tous les barons
d’Espaingne. Enssi s’aliièrent, jurèrent et confermèrent chil doy roy
enssemble, et ne peuvent faire pais ne acord as Englès li ungs sans
l’autre, et doient estre aidant et confortant enssamble, et leur doy
royaumme; ne point ne s’en doivent ne puevent repentir ne relenquir,
che ont il juré par veu solempnel, presens prelas, dus, comtes, barons
et chevaliers.
Par celle mannière vinrent les alianches entre le roy Carlon de Franche
et le roy Henry d’Espaingne, et meysmement messires Bertrans de
Claiequin, connestables de Franche, y mist et rendi grant painne; car
moult amoit le roy Henry, et grans biens en disoit et recordoit. Dont
il avint qu’il fu consilliet au duc de Lancastre que il fesist le roy
son père pourcachier une trieuwe à durer deus ans ou trois entre lui
et le roy de Franche; si aroit plus grant loisir et milleur avantaige
de gueriier en Espaingne. Et fu adont li roys englès si enfourmés et
consilliés qu’il envoiea en Franche grans messaiges sus tel estat
que pour avoir unes trieuwez; mès chil qui envoiiet y furent, n’en
peurent riens esploitier, et en respondi li roys de Franche plainnement
qu’il n’avoit cure des trieuwes ne des respis son adverssaire le roy
d’Engleterre. De ces responsses furent li rois englès et li dus de
Lancastre durement courouchiés et virgongneux, et se repentirent mout
quant envoiiet y avoient; et dist adont et jura li dis dus de Lancastre
que hasteement il enterroit en Franche si poissamment que li royaummes
s’en dieurroit vint ans apriès, et que jammais n’en partiroit, s’en
aroit em partie sa vollenté, fust par pais ou autrement, à sen honneur.
Si fist de rechief ses pourveances plus grandez et plus grosses assés
que devant, et retint et manda gens de tous lés où il les pooit avoir,
et estoit sen entente qu’il aroit le duc de Guerles, son cousin, et le
duc de Jullers; car cil li avoient proummis qu’il le serviroit à douse
cens lanches toutez etoffées, et feroient ung grant trau en Franche,
et bien li en ewissent tenu couvent, mès ungs empecemens leur vint en
celle meysme année, qui leur rompi leur pourpos, sicomme vous orés chy
apriès en l’istoire. Encorres remanda li dus de Lancastre le seigneur
Despenssier qui se tenoit à Venise et avoit gueriiet les seigneurs
de Melans, messire Galeas et messire Bernabo, plus de deus ans; et
li pria et enjoindi qu’il revenist en Engleterre au plus tost qu’il
pewist, car il volloit mettre sus une très grande armée de gens d’armes
et chevauchier en Franche. Sitost que li sires Despenssiers oy ces
nouvellez, il se hasta ce qu’il peut, et se parti de Venise, mès ce ne
fu mies si trestost.
En ce tamps trespassa de ce siècle chils gentilz et preus chevaliers
messires Gautiers de Mauny, qui si par ses proèces et par ses biaux
vassellages renlumine che livre em pluisseurs lieux. De le mort de lui
furent li rois et tout li signeur d’Engleterre durement courouchiet,
et fu mout plains et regretés de tous ses amis. Se li fist on faire
son obsèque très reveramment en une eglise de Cartrous dehors Londres,
que il avoit fait faire et edefiier, et la prouvenda [à] Chartrous qui
tous les jours y font le divin offisce. Si furent à son obsèque li
roys et tout si enfant, excepté le prinche, et ossi y eut grant fuisson
de prelas d’Engleterre, et fist li evesques de Londres le service. De
monsigneur Gautier de Mauny remest une fille appellée damme Anne, qui
eut à marit le jone comte Jehan de Pennebrucq, liquelx se traist assés
tost apriès as hiretaiges monsigneur Gautier comme hiretiers de par sa
femme, et envoya saisir et relever par un de ses chevaliers la terre de
Mauny en Haynnau. Fº 177 rº et vº.
P. 31, l. 30: selonch.--_Ms. A 8_: sur. Fº 345 vº.
P. 32, l. 2: pour le temps se tenoient Englès.--_Ms. A 8_: pour Anglois
se tenoient.
P. 32, l. 4: avoient.--_Ms. A 8_: avoit desir et.
P. 32, l. 6: qui revenoit.--_Ms. A 8_: prochain venant.
P. 32, l. 7: ses frères.--_Ms. A 8_: son père.
P. 32, l. 14: estre mainbour et.--_Ms. A 8_: estre.
P. 33, l. 2: se s’i.--_Ms. A 8_: s’i se. Fº 346 rº.
P. 33, l. 17: rescheï.--_Ms. A 8_: cheï.
P. 33, l. 18: cha en Haynau.--_Ms. A 8_: cha.
§ =687=. Tout cel iver.--_Ms. d’Amiens_: Vous devés savoir que quant
li dus de Lancastre se parti de Bourdiaux et qu’il amena la ducoise sa
femme, sicomme chy dessus est contenu, ens ou royaumme d’Engleterre,
avoecq yaux se partirent de la ducé d’Acquittainne, tant pour yaux
acompaignier que pour remoustrer au roy englès les besoingnes dou pays
de Poito et de Saintonge, messires Guichars d’Angle, li sires de Puiane
et messires Ammeris de Tarse. Si s’estoient chil chevalier tout l’ivier
et le temps tenu en Engleterre, ung jour à Londres, l’autre fois dalléz
le roy qui se tenoit le plus ens ou castiel de Windesore, ou dallés
le prinche, qui gisoit tous maladez ens son mannoir de Berkamestede.
Et avoient li dessus dit chevalier pluisseurs fois remoustré au roy
l’estat et les besoingnes pour lesquellez il estoient là venu et
envoiiet, et par especial messires Ghuicars d’Angle que li rois veoit
vollentiers et l’en ooit parler, et li prioient chierement que il y
volsist entendre et pourveir de remède. Li roys qui mout enclins a esté
tousjours à aidier et à adrechier ses gens et par especial chiaux à qui
il besongnoit, leur respondi que ossi feroit il prochainnement, mès il
ne savoit encorres de quel part ceste armée qu’il metoit sus, dont si
doy fil estoient chief, se trairoit, ou en Franche, ou em Pikardie, ou
en Normandie par le pays de Constentin, ou se il iroient em Poito par
le Rocelle; se leur prioit que ilz se volsissent souffrir et atendre
tant que ses conssaux en aroit ordonné. Telle estoit la cause pour
quoy li troi chevalier dessus nommet sejournoient en Engleterre, dont
mout leur desplaisoit; mès amender ne le pooient puisque li roys et
ses conssaux le volloient enssi. Or parlerons ung petit dou duc de
Bretaingne.
Voirs est que en ce temps que ces coses se varioient sicomme vous avés
oy recorder, li dus de Bretaingne metoit et rendoit grant cure à ce
que ses pays et li noble et gentil homme de sa terre fuissent englès;
et en fist pluisseurs assamblées et parlemens tant de chevaliers
que des conssaux des chitéz et des bonnes villes de Bretaingne, mès
nullement il ne pooit ses gens amenner ad ce qu’il fuissent englès ne
qu’il gueriaissent le royaumme de Franche, leurs boins voisins; et
s’escusoient souffissamment et disoient tout plainnement au duc et d’un
acord que il n’avoit que faire de demourer en Bretaingne, se il volloit
gueriier le royaumme de France, mès se tenist en sa pais et allast
voller et cachier et lui deduire, et layast le roy de Franche et le
roy d’Engleterre gueriier enssamble, et les Bretons servir le roy de
Franche, se armer il se volloient. Chils dus, qui le coer avoit moult
englès, ne prendoit mies en trop grant gret les responsces que cil de
son pays li faisoient, car il se sentoit si tenus au roy d’Engleterre
que il disoit bien à ses plus especials amis, tels qu’il estoit, li
roy[s] englès et se puissanche l’avoit fait, et ja n’ewisst estet dus
de Bretaingne, se li dis rois englès n’euist esté: pour quoy il se
veist trop vollentiers dalés lui en renumerant les serviches et amistés
que on li avoit fais. Si en eut chils dus pluisseurs imaginations et
pourpos l’espasse de deus ou de trois ans, et tout ce savoit assés li
roys de Franche par lez barons et les chevaliers de Bretaingne qui se
court hantoient, dont li dis roys les tenoit à amour che qu’il pooit,
et ossi les prelas et les riches hommes dez chités et des bonnes
villez de Bretaingne, et les honneroit grandement, quant il venoient à
Paris, et leur donnoit dou sien largement pour yaux mieux atraire à se
vollenté, et tant faisoit que il estoient tout enclin et obeïssant à
lui, et en avoit l’amour, l’antise et le service.
Or retourons à monseigneur Ghuichart d’Angle et as compaignons qui se
tenoient en Engleterre dalés le roy et estoient ung grant temps puis
le revenue dou duc de Lancastre ens ou païs, sicomme chy dessus est
dit. Quant li yviers fu passés et la douce saison d’esté revenue que
on compta l’an mil trois cens settante et deus et qu’il y eut ews
pluisseurs parlemens en Engleterre sus l’estat des guerres et d’une
très grosse armée que li dus de Lancastre volloit mettre sus et venir
en Franche, sicomme il fist; mès ce ne fu mies si tost qu’il esperoit,
et ce le arriera [enssi] que je vous diray. Le saison devant, avoit eu
entre Tret sus Meuze et Jullers une très grosse bataille dou duc de
Jullers et de monsigneur Edouwart de Guerles d’un lés, et de monsigneur
Winchelans, duc de Luxembourcq et de Braibant, d’autre, à laquelle
besoingne chils messires Edouwars de Guerles avoit esté ochis, dont
li confors et espoirs des Englès estoit mout afoiblis; car il devoit
servir le roy englès son oncle à mil lanches et faire ung grant trau en
Franche, et devoit li dus de Jullers, ses serourges, estre avoecq lui;
mès leur chevauchie et armée demoura tant pour le mort dou dessus dit
monsigneur Edouwart que pour ce que li dus de Jullers se trouva mout
empeschiés, car messires Carles de Behaingne, empereur de Romme, le
volloit guerriier pour le cause de son frère, le duc de Braibant, qu’il
tenoit em prison et lequel il delivra par le doubtanche et puissance
de l’empereur. Et ossi messires Jehans de Blois, et comtez de Blois,
avoit pris à femme la sereur de monsigneur Edouwart dessus nommet, et
clammoit à la ducé de Guerles grant part de par sa femme; si ne s’osoit
li dus de Jullers partir de son pays, car il avoit l’autre serour de
monsigneur Edouwart. Enssi estoient chil pays de Guerles et de Jullers
ensonniiet et entriboulet, car la contesse de Blois y faisoit grant
guerre à l’encontre de son serourge le duc de Jullers, et de laquelle
matère je me voeil partir assés briefment pour tant que elle ne touce
de riens à nostre histoire des rois, fors tant que li Englès furent
mout courouchiés de la mort de monsigneur Edouwart, car au voir dire
c’estoit chils de par dechà le mer qui plus les pooit valloir et
aidier. Si eurent toutte celle saison li Englès pluisseurs conssaux ens
ou palais à Wesmoustier. Finalement il fu consilliet et aresté que li
dus de Lancastre et li contes de Cantbruge seroient chief, gouvreneur
et souverain de ceste armée, et passeroient le mer à quatre mil hommes
d’armes et douse mil archiers et bien otant de Galois et d’autre gens.
Si ordonnèrent leurs pourveancez grandes et grosses seloncq chou, et
mandèrent et priièrent gens tout partout où il les penssoient à avoir,
et retinrent bien de purs Escos quatre cens lances de bonne estoffe.
Quant messires Guichars d’Angle et li sires de Puiane et messires
Aimeris de Tarse qui tout le temps s’estoient tenu en Engleterre,
veirent et entendirent le certain arrest dou consseil le roy et de ses
barons, et que li doy fil le roy seroient chief et souverain de ceste
armée, et que nul il n’en aroient pour remenner en Poito avoecq yaux,
si se adrechièrent deviers le roy englès, et li fissent une priière et
requeste qui s’estendoit en telle mannierre: «Chiers sires et nobles
roys, nous veons et entendons que vous devés envoiier en ceste saison
une grant armée et chevauchie dez vostres ens ou royaumme de Franche,
pour gueriier les marches de Pikardie, de France, de Bourgoingne et
d’Auviergne, de laquelle grosse armée vo doi fil seront gouvreneur et
souverain, et ce soit à l’onneur de Dieu et d’iaux, si vous prions et
requerons, chiers sires, ou kas que nous ne les poons avoir, ne l’un
d’iaux par lui, que vous nous voeilliés baillier et delivrer le comte
de Pennebrucq à gouvreneur et cappittainne, et que il vous plaise que
il s’en viengne avoecq nous en es marcez de Poito.» Adont s’aresta li
roys sous monseigneur Guichart d’Angle plus que sus les autres, et
dist: «Messires Ghuichart, et se je ordonne le comte de Pennebrucq,
mon fil, à aller avoecq vous ens ou pays de Saintonge, vous faurra il
grant carge de gens pour aidier à garder et à defendre le pays contre
nos ennemis?»--«Monsigneur, respondi messire Ghuichars, nennil, mais
que nous aiiens deus cens hommes d’armes et otant d’archiers pour les
rencontres dessus mer et le finanche pour gagier trois mil combatans;
nous en recouvrerons bien par de delà; car encorres y sont grant
fuison de gens des compaingnes et gens d’autres nations, qui vous
serviront vollentiers, mès qu’il aient bons gaiges, et que on lor paie
ce avant le main pour cinc ou pour sis mois.» Adont respondi ly roys
englès: «Messires Guichars, ja pour or ne pour argent ne demourra que
je n’aie gens assés et que chils voiages ne se fache; car j’ay bonne
vollenté de deffendre et garder mon pays de Poito. Or soiiés de ce
costé tous recomfortés et assegurés, car j’en ordonneray temprement,
et vous cargeray, avec le mise que vous emporterés, tels gens et tel
cappitainne qu’il vous devera bien souffire.» Adont respondirent tout
li troy chevalier, et dissent: «Monsigneur, grant merchis». Fºs 177 vº,
178 rº et vº.
P. 33, l. 30: Ghiane.--_Ms. A 8_: Guienne.
P. 34, l. 1: ens es.--_Ms. A 8_: es.
P. 34, l. 2: pluiseur signeur.--_Ms. A 8_: pluiseur.
P. 34, l. 4: appareil de pourveances et.--_Ms. A 8_: appareil et.
P. 34, l. 5: ost que.--_Ms. A 8_: ost aussi quant comme.
P. 34, l. 13: li rois Edouwars.--_Ms. A 8_: li rois.
P. 34, l. 19: ghertier.--_Ms. A 8_: jaretier.
P. 34, l. 24: li contes de Cantbruge, ses frères.--_Ms. A 8_: li
Cantbruge. Fº 346 vº.
P. 34, l. 26: prière et requeste.--_Ms. A 8_: prière.
P. 34, l. 32: peuist.--_Ms. A 8_: feïst.
P. 35, l. 21: mainbour.--_Ms. A 8_: meneur.
P. 35, l. 29: l’emploie.--_Ms. A 8_: l’emploieray.
§ =688=. Ensi et de pluiseurs.--_Ms. d’Amiens_: Depuis ne demoura
guaires de tamps que li roys englès ordonna et pria au comte Jehan
de Lennebrucq d’aller avoecq les dessus dis chevaliers ens ou pays
de Poito et de Saintonge, pour garder les frontierres contre les
Franchois, liquelx comtes à l’ordonnanche dou roy obeï et descendi
vollentiers et emprist liement le voiaige à faire. Avoecques le dit
comte furent nommet chil qui iroient: premierement, messires Othe de
Grantson, banereth et riche homme durement, messires Robers Tuifort,
messires Jehans Courson, messires Jehan de Gruières, messires Thummas
de Saint Aubin, messire Simons Housagre, messires Jehans de Mortain,
messires Jehans Touchet et pluisseurs autres bon chevalier et escuier,
tant qu’il furent bien deus cens hommes d’armes et otant d’archiers, et
fissent leurs pourveanches tout bellement et à grant loisir de tout ce
qu’il leur besongnoit, et leur fist li roys delivrer une grande somme
de florins pour gagier et paiier un an tout entier trois mil combatans;
puis se departirent dou roy li dessus dit seigneur, quant il eurent
pris congiet à lui, et se missent au chemin et s’en vinrent à Hantonne.
Là sejournèrent il en ordonnant et regardant à lors pourveances et en
cargant leurs vaissiaux et en atendant le vens plus de trois sepmaines.
Et quant il eurent tout cargiet et ordonné, et le vent pour yaux, il
entrèrent en leurs vaissiaux, et puis se desancrèrent: si se partirent
des mettes d’Engleterre, et singlèrent par deviers Poito et le Rocelle.
Fº 178 vº.
P. 36, l. 12 et 13: que li rois... d’Angle.--_Ms. A 8_: que monsigneur
Guicart avoit faite au roy.
P. 36, l. 15: gagier.--_Ms. A 8_: paier.
P. 36, l. 19: XVIIe.--_Ms. A 8_: XVIe.
P. 36, l. 24: sçai par.--_Ms. A 8_: sçai comment ne par.
P. 36, l. 28: mainbour.--_Ms. A 8_: meneur.
P. 37, l. 5: breteschies.--_Ms. A 8_: bretanchées. Fº 347 rº.
P. 37, l. 7: Boukenègre.--_Ms. A 8_: de Boukenègre.
P. 37, l. 8 et p. 41, l. 3: Pyon.--_Ms. A 8_: Piou.
P. 37, l. 12: venir et ariver.--_Ms. A 8_: venir.
P. 37, l. 13: à l’ancre.--_Ms. A 8_: et ancrez.
P. 37, l. 18: calengièrent.--_Ms. A 8_: destourbèrent.
P. 38, l. 1: amiroient ne.--_Ms. A 8_: doubtoient et.
P. 38, l. 2: atendant.--_Ms. A 8_: afendant.
P. 38, l. 3: trairie.--_Ms. A 8_: crierie.
P. 38, l. 10: si grans.--_Ms. A 8_: grans.
P. 38, l. 14: malement.--_Ms. A 8_: mout malement.
P. 38, l. 16: et proèce remoustrées.--_Ms. A 8_: et remoustrée proèce.