grandement, car ceste fortrèce leur avoit porté trop de contraire, se
traissent li Franchois devant Le Roce Vauclère qui point ne se tint
trop longement, mès se rendirent par composition enssi que li dessus
dit, et furent pris à merchy. En apriès reprist li connestables aucuns
petits fors sus les marches de Roherge, d’Auviergne et de Quersin, que
li Englès avoient fortefyé, et en delivra auques tout le pays parmy
le confort des dessus dis seigneurs qui estoient en se routte, puis
s’en vint devant le cité d’Uzès, et le assega comme en devant de tous
poins. En ce tamps repassa li dus d’Ango parmy Auviergne, qui avoit
estet en Franche et viseté le roy Carle, son frère. Si se rafresci à
Clermont en Auviergne et envoyea ses gens devant Uzès, où il y eut
maint assaut et mainte escarmuche. Finablement chil qui dedens estoient
et qui gardé l’avoient, le rendient par composition sauve leurs corps
tant seullement: nulle autre cose n’en portèrent. Apriès le prise et
le reconket d’Uzès, ces gens d’armes se departirent et passa oultre
li dus d’Ango deviers Montpellier et viers Toulouze, où le plus il se
tenoit, et li connestables revint en Franche et li plus grant partie
des autres seigneurs dessus nommés. Fºs 174 rº et vº, 175 rº.
P. 21, l. 26 _et partout_: de Claiekin.--_Ms. A 8_: du Guesclin.
P. 22, l. 8: encores de nouviel les.--_Ms. A 8_: encores les.
P. 22, l. 9: tenoient ou.--_Ms. A 8_: tenoient de nouvel ou.
P. 22, l. 11 et partout: Ussel.--_Mss. A 8_ et _B 4_: Uzès.
P. 22, l. 28: le assegièrent.--_Ms. A 8_: se logièrent. Fº 343 vº.
P. 23, l. 3: des chiés.--_Ms. A 8_: chiefz.
P. 23, l. 6: fisent.--_Ms. A 8_: orent parlé.
P. 23, l. 14: que.--_Ms. A 8_: quant.
P. 24, l. 1: non.--_Ms. A 8_: et non.
P. 24, l. 10: acquitta.--_Ms. A 8_: acquist.
P. 24, l. 17: voirs.--_Ms. A 8_: verité. Fº 344 rº.
P. 24, l. 31: lavés.--_Ms. A 8_: loez.
P. 24, l. 31: amises.--_Ms. A 8_: paroles.
§ =681= et =682=. Li rois d’Engleterre et Apriès celle desconfiture.
--_Ms. d’Amiens_: En ce tamps faisoit ung très grant appareil pour
passer le mer li dus de Lancastre, et avoit son passage segnefiié à
ses deus cousins germains, le duc de Guerle et le ducq de Jullers,
qui le devoient servir à mil lanches et entrer ou royaumme ou lés
deviers Tieraisse à si grant effort que pour combattre tout chiaux qui
contre eux se metteroient; et devoient ossi y estre, il en estoient
priiet et mandé, messires Robers de Namur, li comtez de Saumes en
Ardane et tout chil de l’empire, qui avoecques yaux estoient aliiet.
Et, quoyque ceste armée et emprise se mesist avant pour li, li roys
d’Engleterre l’ordonnoit ou nom de son fil, le ducq de Lancastre, qui
point n’estoit ou pays, ainschois estoit en Gascoingne, où il guerioit
là fortement et avoit gueriiet tous le tamps depuis le departement
dou prinche son frère. Mès on l’atendoit de jour en jour, car li roys
l’avoit remandé, et estoient ses pourveanches sus le Geronde ou havene
devant Bourdiaux. Or avint que ceste armée ne se fist point sicomme li
roys et ses conssaux l’avoient empensé à faire, pour le cause de ce
que en celle saison, ou mois d’aoust, une grosse assamblée de gens
d’armes se mist sus en l’empire entre le ducq Wincelin de Braibant et
de Luxembourcq qui en fu chiés de son costé, et le duc de Jullers et
messire Edouwart de Guerles de l’autre costé; et là eut, le nuit Saint
Bietremieu l’an dessus dit, entre ces seigneurs et leurs gens une très
grosse bataille et maint gentil homme mort et pris; et par especial,
li dus de Guerle, qui avoit empris le guerre si forte et aporté si
grant contraire le royaumme de Franche, y fu ochis, quoyque li dus de
Jullers obtenist le plache, et là furent pris, dou costé le ducq de
Braibant, il et tout li enfant et signeur de Namur qui là estoient, li
comtez de Saumes, messires Jakemes de Bourbon, messires Walerans de
Lini, et mors li comtes Guis de Saint Pol, ses pères, et grant fuisson
de bons chevaliers mors et pris, siques pour celle avenue et pour le
perte que li rois d’Engleterre eut là de son nepveult, messire Edouwart
de Guerles, où il avoit très grant fiance, et le prise de monsigneur
Robert de Namur et de pluisseurs bons chevaliers, dont li dus de
Lancastre, ses fils, euist estet servis et aidiés en son voiaige, il
rafrenna son pourpos et contremanda ceste armée et chevauchie: se ne se
prist nient si priès li dus de Lancastre de revenir. Depuis fu li dus
de Braibant delivrez de le prison le duc de Jullers par le puissanche
le roy Carle d’Allemaigne et empereur de Rome, son frère, et pluisseur
prisonnier qui furent pris avoecq lui, par le pourcach de madamme
Jehanne, femme au dit duch, ducoise de Braibant et de Luxembourcq.
Fº 175 rº.
P. 25, l. 1 et 2: guerriiés et cuvriiés.--_Ms. A 8_: hariez et guerriés.
P. 25, l. 13: bien cler.--_Ms. A 8_: amis.--_Ms. B 4_: bien d’acort.
P. 25, l. 14: heriiet.--_Ms. A 8_: hardoiez et envaïs.
P. 25, l. 17: à le Bay.--_Ms. A 8_: à la Bay.
P. 25, l. 24 et 25: Richars de Pennebruge... Sturi.--_Ms. A 8_: Richars
Savi.
P. 26, l. 4: grawés de fier et à kainnes.--_Ms. A 8_: crochèz de fer et
à kainnes de fer.
P. 26, l. 5: Toutes fois.--_Ms. A 8_: Et.
P. 26, l. 16: par mi.--_Ms. A 8_: par.
P. 26, l. 20: des.--_Ms. A 8_: des dis.
P. 26, l. 21: à guerriier et heriier et à clore.--_Ms. A 8_: guerrier
et clore. Fº 344 vº.
P. 26, l. 29: comment que il en touchoit.--_Ms. A 8_: comment il en
tenroit.
P. 26, l. 31: li plus sage des.--_Ms. A 8_: les.
P. 27, l. 3: ains.--_Ms. A 8_: avant.
P. 27, l. 5: ordenances qui furent ditté et seelé.--_Ms. A 8_:
ordenances seelé.
§ =683= et =684=. Vous avez bien oy et Li dus Jehans de
Lancastre.--_Ms. d’Amiens_: Vous avés bien chy dessus oy recorder
comment li rois de Maiogres avoit estet pris en Espaigne en une ville
qui s’appelle le Val d’Olif; or vous parlerai de se delivranche. Li
rois Henris, qui le tenoit en se prison, l’avoit rendut et delivret à
monsigneur Bertran de Claiequin, en cause de paiement de ses gaiges,
et estoit li dis rois de Maiogres prisonniers au dit connestable de
Franche, et li fist venir tenir prison à Montpellier. Assés tost apriès
pourcachièrent sa delivrance la marquis[e] de Montferrat, sa soer,
et la roinne de Naples, sa femme, parmy cent mille francs qu’il en
paiièrent, et tant en eut messires Bertrans. Depuis qu’il fu delivré,
il se composa et acorda au roy Henry d’Espaingne, et vint en Auvignon
et se complaindi au pappe Gregoire du roy d’Arragon, qui li tolloit son
hiretaige sans droit et sans raison. Li pappes fut adont si consillet
qu’il li acorda bien à faire guerre au roi d’Aragon pour le cause de
son hiretaige ravoir. Si se pourvei li roys James de Maiogres de gens
d’armes; et prist grant fuison de compaignes, dont messires Garsions
dou Castel, messires Jehans de Malatrait, messires Selevestre Bude et
Jackes de Bray estoient me[ne]ur et cappittainne. Si pooient bien estre
ces gens mil combatans, et entrèrent en Espaingne par l’acort dou roy
de Navarre et dou roy Henri, et fissent guerre au roy d’Aragon, mès
elle ne dura point longement, car li rois de Maiogres s’acoucha malades
en Espaingne ou Val de Sorie, de laquelle maladie il morut. Dont se
retraissent ces compaingnes et ces gens d’armes deviers le duc d’Ango,
qui les rechut vollentiers et qui bien les seut où emploiier.
Encorres avés vous bien oy recorder chy dessus comment la mère de
la roynne de Franche et dou duc de Bourbon fu prise en Belleperche,
et ossi de messire Ustasse d’Aubrecicourt, comment il fu pris de
Thieubaut dou Pont ou castiel de Pierre Bufière, si ques il avint ensi
(pour tant, une boute, l’autre requiert), messires Ustasse aida mout
grandement à le delivrance de la dessus ditte damme et en eut mout de
painne et mout de pourcach: ossi il en souvint le duc de Bourbon et
la roynne de Franche. Si fu li dis messires Ustasses mis à finanche
parmy douse mil frans que dubt paiier pour se raanchon, et en paya uit
mil tous appareillés; et pour les autres quatre mil, demoura li dus de
Bourbon parmy, tant que ungs biaux fils que messires Ustasses avoit,
nepveux au duc de Jullers, filz de sa soer, en fu plèges et delivrés
deviers le dit ducq. Depuis ceste ordonnanche, messires Ustasses
d’Aubrecicourt s’en vint en Constentin deviers le roy de Navarre, qui
le retint à lui et fist souverain deseure tous ses chevaliers. Assés
tost apriès li dis messires Ustasses se acoucha malades en le conté
d’Evrues, de laquelle maladie il morut. Dieux en ait l’ame, car ce fu
en son tamps ungs moult appers chevaliers!
Nous retourons as besoingnes de Poito, et parlerons des barons et des
chevaliers qui là se tenoient de par le roy d’Engleterre, telz que
messires Loeis de Harcourt, li sires de Partenay, messires Guicars
d’Angle, li sires de Puiane, li sires de Tanai Bouton, li sires de
Rousselon, messires Guillaummes de Crupegnach et pluisseurs autres. Si
regardèrent en celle saison que la ville et li castiaux de Montcontour
leur portoit trop grant contraire: si s’avisèrent qu’il metteroient
le siège par devant, et de ceste chevauchie seroit chief messires
Thummas de Perssi, senescaux de Poito, li sires de Partenay et messires
Ghuichars d’Angle, et feroient leur amas et leur assamblée à Poitiers.
Ensi regardèrent et advisèrent chil signeur dessus nommet, qu’il
venroient mettre le siège devant Montcontour. Si se ordonnèrent et
mandèrent gens de tous costés et especialement des compaingnes, et
fissent leur assamblées à Poitiers. Quant il furent tout venu, il
estoient bien trois mil combatans, uns c’autre: si se partirent de
le cité de Poitiers et cheminèrent à grant esploit, et fissent tant
qu’il vinrent devant Montcontour, qui est ungs très biaux castiaux
et fors seans sur le marche d’Ango et de Poito, à quatre lieuwes de
Touars. Si le assegièrent de tous costés et l’assaillirent vistement,
car il avoient avoecq yaux fait mener et akariier grans instrummens et
atournemens d’assaut, dont il grevoient grandement chiaux dou fort.
Par dedens le garnison se tenoient messires Pierres de la Gresille et
Jourdains de Couloingne, appert hommes as armes durement, et avoient
avoecq yaux des bons compaignons bretons et franchois qui leur aidoient
à garder le fortrèce. Si furent devant le fortrèce de Montcontour li
dessus dit Englès poitevin, desquelx messires Thummas de Perssi, li
sires de Partenay et messires Guicars d’Angle estoient souverain,
environ quinse jours; et eut là en dedens fait tamaint fort assaut et
dur, car mout pressoient li dessus dit que il le peuissent prendre
par forche ou autrement, car on leur disoit que li connestables
metoit sus grant fuison de gens d’armes pour venir lever le siège. Si
n’en estoient mies li dessus dit plus asseguret, et se hastoient ce
qu’il pooient à painnes nuit et jour sans cesser de l’assaillir; et
requeroient à chiaux dedens qu’il se rendissent, et on les lairoit
partir courtoisement; mès il n’y volloient entendre, car il esperoient
à estre comforté du connestable de Franche, et l’euissent esté sans
faute, se ilz se peuissent estre plus longement tenus; mès, enssi que
je vous ai dit, on les assalloit si ouniement et par tant de mannières,
que finablement li castiaux fu de forche concquis, et pris li doy
cappittainne messires Pieres de la Gresille et Jourdains de Couloingne,
et encorres ne say cinc ou sis bons hommes d’armes, et li demorans
tous tués sans merchy. Ensi eurent li Englèz le castiel de Montcontour
qu’il trouvèrent bien garny de touttes pourveanches et de fuison de
bonne artillerie. Si regardèrent entr’iaux li chevalier qu’il le
tenroient, puisque conquesté l’avoient, car il leur estoit bien seans
pour gueryer le terre d’Ango et les autres villes et fortrèchez qui
françoises se tenoient; et y ordonnèrent à demourer monsigneur Gautier
Huet, Carsuelle et David Holegrave et touttes les compaingnes, qui là
estoient de leur costé, et qui s’estoient remis enssamble depuis le
desconfiture de Pont Volain.
Apriès ceste ordonnance de Montcontour et l’estaublissement que
messires Guichars d’Angle et li autre y eurent fait, il donnèrent
congiet au demourant de leurs gens, et s’en revinrent à Bourdiaux où
li dus de Lancastre se tenoit, qui les rechupt à grant chière. Ensi
laissièrent il par les dessus dit gens de compaingnes gueriier le pays
d’Ango et les marches du Mainne, où il avoit ossi ens es garnisons
mout de bonne gens franchois. En ce tamps se trouvèrent sus mer en ung
lieu en Bretaingne, que on appelle Le Bay, li Flamenc et li Englès
qui adonc se herioient et avoient sur mer heriiet toutte le saison;
et consentoit bien li comtes de Flandres ceste guerre entre ses gens
et les Englès pour la cause dou duch de Bourgoigne, qui avoit sa
fille espousée sicomme vous savés, et euist encorres volentiers plus
plainnement gueriiet les Englès, se ses gens l’euissent acordé, mès il
n’en avoit mies bien l’acord. Touttefois, ensi que renommée couroit
en Engleterre et que li roys englès estoit enfourmés, li comtes Loeis
de Flandres avoit mis sus mer grant fuison de ses gens pour porter
dammaige as Englès, se il lez trouvaissent ou encontraissent, dont
Jehans Pietresone estoit amiraux et cappittainne de leur navie. Et à ce
dont venoient en Bretaingne lez gens le roy englès, c’est assavoir: li
contes de Herfort, messires Richars de Pennebruge, messires Alains de
Bouqueselle, messires Richars de Sturi et pluisseurs autres chevaliers
de l’ostel du roy, et pour parler au duc de Bretaingne de par le dit
roy; et pour ce que il estoient en doubte des Flammens, s’estoient il
pourveu bien et grossement: si estoit amiraux de leur navie messires
Guis de Briane. Si se trouvèrent ces deus navies, sicomme dessus est
dit, à Le Bay en Bretaingne: si se combatirent enssamble fierement et
radement, et y eut très dur hustin et très fort et mout perilleux, et
fait de l’un lés et de l’autre tamainte belle appertise d’armes, et
furent ce jour li Englès en grant peril d’estre tout mort et desconfi,
car li Flamencq estoient plus de gens qu’il ne fuissent et mieux
pourveus de gros vaissiaux et de toutte artillerie, dont il eurent un
grant temps bon avantaige; mès finalement li comtes de Herfort, qui fu
ungs appers et hardi chevaliers, s’i esprouva si bien, et tout chil de
se routte, ossi messires Richars Sturi et li autre, qu’il desconfirent
che qu’il y avoit là de Flammens; et y fu pris leurs amiraux, Jehans
Pietresonne, et prisonniers à monsigneur Gui de Brianne; et en y eut
grant fuison de mors et de noyés, et mout petit s’en sauvèrent. Si
retournèrent li dessus dit Englès atout leur concquès de barges et de
vaissiaux et leurs prisonniers en Engleterre, et recordèrent au roy
comment li Flamencq lez avoient envays et assaillis. De che fu li roys
moult courouchiés, mès ce le rejoyssoit qu’il veoit ses gens retournés
en bon point et à l’onneur d’iaux, et dist adont li roys, en maneçant
les Flammens, qu’il leur feroit encorres chier comparer le guerre qu’il
avoient de nouviel et sans raison reprise à lui et faite à ses gens.
Apriès le revenue dou dit comte de Herfort et de ses compaignons en
Engleterre et le infourmation faite ou dit roy, li roys englès assambla
ses gens de son consseil, et fist [mander] ung grant parlement à estre
à Londres en son palais de Wesmoustier. A ce parlement vinrent tout
chil qui semons et priiet en furent: là eut pluisseurs coses parlées
et devisées des sages d’Engleterre, et la principal cose estoit sus
l’estat de Flandres, qui celle fois et autre che font à savoir. Li
Flammencq avoient heriiet les Englès. Si fu enssi ordonné que li roys,
pour l’onneur de lui et de son pays, mesist et establesist une cantité
de vaissiaux armés et pourveus de gens d’armes sus les frontièrez de
Flandrez, entre Zanduich et Calais, et que chil qui de par le roy
là seroient, ne laiassent aller, passer ne venir nulle marchandise
en Flandres, et leur fuissent ennemis touttes mannières de gens, de
quelque nation qu’il fuissent, qui en Flandres voloient ariver pour
faire y marchandise. Tantost apriès ceste ordonnanche, li roys englès
par l’avis de son consseil mist et estaubli grant fuison de gens
d’armes et d’archiers et de bons vaissiaux bien armés et bien pourveus
sus mer, entre les destrois de Douvres et de Calais, sur l’estat dessus
dit. Si trestost que ces nefs et ces gens d’armes furent sur mer, et il
commencièrent à esploitier fort et delivrement à touttes mannièrez de
gens allans et venans en Flandres, et tant que les plaintes en venoient
tous lez jours as Flammens, et que tout marcheant resongnoient à venir
en Flandres pour le peril et le doubte des Englès, adont regardèrent
les bonnes villes de Flandres, et li conssaux et advis des sages hommez
qui dedens abitent et demeurent, que ceste guerre et haynne as Englès
ne leur estoit pas pourfitable, et que point n’en estoient cause, ne
ne se mouvoit de leur costé. Si se traissent enssamble et en eurent
pluisseurs conssaux: finablement il s’avisèrent tout d’un commun acord
et se traissent deviers leur signeur le comte, qui adont se tenoit
dehors Gand en une moult belle maison qu’il y avoit fait faire, et li
remoustrèrent les plaintes des marcheans estragniers, qui venoient
tous les jours jusques à yaux, comment il n’osoient aler ne venir ne
faire ariver nulle marchandise en Flandre pour le doubte dez Englès.
Et ossi li estaples des lainnes qui se tenoit à Calais, leur estoit
clos, che qui estoit grandement au prejudisce de toutte le communauté
de Flandrez; car sans le drapperie ne pooient il nullement vivre: «Pour
tant, chiers sires, voeilliés y remediier; si ferés bien et aumosne,
et acquerrés la grasce et amour de vos bonnes gens qui vous ont estet
appareilliés à tous vos commandemens jusques à ores.»
Quant li contes Loeis de Flandres eut oy les raisons et les complaintes
de ses gens, ilz, comme sages et ymaginans sires, leur respondi: «J’en
aray prochainnement avis; et tout le bonne remède parmi raison, sauve
l’onneur de moy et de mon pays, je y meteray.» Chil qui là estoient
envoiiet de par les bonnes villes, se tinrent de ceste responsce
à bien content. Au tierch jour apriès fu conssilliéz li comtes, et
en respondi plainnement et dist enssi, pour appaisier son païs, que
le guerre que ses gens avoit ne faisoit as Englès, elle n’estoit en
riens cause ne participans pour le roy de Franche ne pour le duch
de Bourgoingne, à qui par succession li hiretaiges de Flandres, par
la cause de sa fille, devoit retourner, ou à ses enfans, fors tant
que, pour aucuns despis que li Englès avoient, passet avoit ja deus
ans, fais à ses gens sur mer, si s’en volloit contrevengier; et, se
chil de Flandres volloient aller ou envoyer en Engleterre deviers le
roy englès et son consseil, et savoir à quel title il s’estoient de
commenchement esmeu contre lui, il le consentiroit assés legierement,
et tout ce que li communs en feroient et ordonneroient pour le milleur
et pour le commun prouffit de tout le pays, à l’onneur de li et de sa
terre, il s’y acorderoit volentiers. Ces parolles furent rapportéez,
au consseil dez bonnes villes, qui les acceptèrent, et ordonnèrent
tantost douse bourgois des sis milleurs villes de Flandres, liquel
yroient en Engleterre parlementer au roy et à son consseil, et saroient
plus plainnement qu’il ne savoient encorres pourquoi on les guerrioit.
Ainschois que chil s’en meussent ne partesissent de Flandres, il
envoiièrent devant impetrer un sauf conduit pour yaux et leur famille
aller et retourner sans dammage: si leur fu acordé dou roy assés
legierement. Adont se missent il à voie et cheminèrent tant qu’il
vinrent à Callais, et là montèrent il en mer. Si arivèrent à Douvres,
et puis chevauchièrent jusques à Windesore, là où li roys se tenoit
adont.
Quant chil bourgois de Flandres furent venu à Windesore, il n’eurent
mies accès de parler au roy, mès leur fu respondu de par le roy que il
se traissent deviers Londres, car là seroient il expediet: il fissent
ce que ordonné leur fu et vinrent à Londres. Au neufvime jour apriès,
il furent mandé au palais de Wesmoustier devant le consseil du roy, à
qui il remoustrèrent pourquoi il estoient là venu, et furent respondu
si à point que ilz se tinrent assés pour comptens; mès adont il se
departirent de le cambre et du consseil le roy sans certain accord, et
furent assigné de revenir le tierch jour après, et il oroient à ce jour
le plus grant partie de l’intension dou roy. Si se partirent sour ce,
et revinrent à lors hostelz. Vous devés savoir que à envis fuissent
parti li Flammencq du roy englès ne de son consseil, sans avoir certain
acord. Ossi li roys englès et ses conssaux n’avoient mies trop grant
desir de gueriier les Flamens, car il avoient assés affaire d’autre
part, et si leur est de necessité li pays de Flandres à tenir à amour,
pour le cause de le marchandise qu’il y prendent et qu’il y envoient;
car nulle part li Englès ne pueent avoir si belle delivranche de leurs
lainnes qu’il ont en Flandres et par les Flammens. Si estoit bien
chils poins et affaires considerés entre yaux, mès il se faindoient de
premiers pour tant qu’il volloient y estre priiet, et moustroient qu’il
n’avoient que faire des Flammens, mès li Flammens d’iaux. Touttezfois
il fu tant parlementé et allé de l’un à l’autre, que unes trieuwes
furent prisses à durer entre le roy englès et ses gens et le comte
Loeis de Flandres et les siens jusques à le Saint Jehan Baptiste,
que on compteroit l’an mil trois cens settante et deus, et de celle
Saint Jehan en nuef ans enssuiwant. Si se fissent fort li bourgois de
Flandres, qui là estoient venu et envoiiet, de le tenir et faire tenir
à leur seigneur le comte et tout le pays enexsé en le trieuwe, et
ossi il en avoient bonne procuration d’esploitier à leur entente. Si
se partirent d’Engleterre dou roy et de son consseil, sus l’estat que
je vous di, et s’en revinrent arrière à Bruges. Là eut à leur revenue
ung grant parlement des bonnes villes de Flandres et dou comte leur
signeur dessus noumet, et ossi de quatre chevaliers englès que li roys
englès et ses conssaux y avoient envoiiet sus le conduit des dessus
dis Flandrois, et le tretiet de le trieuwe dessus devisée, laquele fu
là partout confremmée et saiellée et jurée à tenir sans enfraindre le
tierme dessus deviset de l’une partie et de l’autre.
Après ces ordonnanches, furent li pas de le mer ouvert, et coururent
sceurement les marchandises de l’un pays en l’autre, mèz toudis se
tenoit li estaples des lainnes à Calais, et là les venoient querre li
Flammencq et acater, s’il les volloient avoir.