Henris d’Espaigne, à le priière et requeste dou roy de France, mis sus
mer une grosse armée d’Espagnols et de Chatelains, liquel estoient
droite gens d’armes sus le mer de grant fait et de hardie emprise.
Et estoient li dit Espagnol pourveu de trèse grosses gallées touttes
armées et fretées, et gisoient à l’ancre devant le Rocelle, et avoient
ja jeu plus d’un mois, fors tant que chiés de fois il waucroient
sour les frontières de Poito pour veoir et savoir s’il trouveroit
nullez aventures; mès de touttes les marées il revenoient par droite
ordonnanche gesir devant le Rocelle, et se tenoient là à l’entente
que pour atendre et combattre lez gens d’armes que messires Guichars
d’Angle devoit amener ou pays. Si estoient patron de ceste navie
Ambrose Boukenègre, Cavesse de Vake, dan Ferant de Pion et Radigo de la
Rosele. En tout le royaume d’Espaigne, de Seville, de Ghalisce et de
Portingal ne pewist on recouvrer de quatre milleurs amiraux ne patrons
pour gouvrenner une grosse navie sus mer, et estoient chil bien pourveu
de grant fuison de bons combatans et de droite gent d’eslite. Bien les
veoient chil de le ville de le Rocelle et messires Jehans Harpedane,
qui estoit pour le temps senescaux de le Rocelle, mès point ne les
aloient combattre; et avint que li comtes de Pennebruc dessus nommés
et messires Ghuichars d’Angle et leur navie nagièrent tant par mer, en
costiant Normendie et Bretaingne et yaux adrechant pour venir en le
Rocelle, qu’il aprochièrent les mettes dou pays et trouvèrent à leur
encontre celle grosse navie d’Espaingne. Adont seurent il bien qu’il
les couvenoit combattre: che fu l’avant vegille de le nuit Saint Jehan
Baptiste, l’an mil trois cens settante et deus.
Quant li comtes de Pennebrucq et li chevalier qui là estoient en se
compaignie, perchurent le navie des Espagnolx qui estoient en leur
chemin, et ne pooient nullement venir ne ariver en le Rocele ne passer
fors que parmy yaux, et le virent si grande et si grosse et pourveue de
si gros vaissiaus enviers les leurs, si ne furent mies bien aseguret.
Nonpourquant, comme bonnes gens, il s’armèrent tost et appertement,
et fissent sonner leur trompettes et mettre leurs bannièrez et leurs
penons hors avoecq ceux de Saint Jorge, et moustrèrent bon visaige,
et requeillièrent et missent enssamble tous leurs vaissiaux, petis et
grans, et aroutèrent leurs archiers tout devant, et pooient y estre
quatorse nefs parmy leurs pourveanches. D’autre part, li Espagnol
qui mout les desiroient à combattre, si trestos comme il les virent
nestre ne approcier, il s’armèrent et ordonnèrent, et missent leurs
bannières et leurs pennons de Castille hors, et fissent sonner lors
trompettes et aller touttes mannières de gens à leur gardes, et
montèrent amont as cretiaux et as garittes de leurs vaissiaux qui
estoient bien breteskiés, et targièrent et paveschièrent tous leurs
rimeurs, dont en chascune gallée avoit grant fuison, et s’estendirent
tout au lonch affin que li Englès ne les pewissent fuir ne eslongier.
Et quant il se furent enssi ordonné, comme gent de bon et grant
couvenant, li quatre patron dessus nommet, dont chascuns estoit en une
gallée par soi et entre ses gens, se missent en frontière tout dentre
et aprochièrent les Englès vistement et radement. D’autre part, li
Englès qui estoient tout comforté de le bataille, car combattre les
couvenoit et atendre l’aventure ne ilz ne pooient fuir d’entre yaux ne
reculler, ne ossi il n’ewissent daigniet, aprochièrent moult bellement
et moult ordonneement. Si trestost que il furent li ung devant l’autre,
comme gens de guerre et ennemy, sans noyent parlementer, il se
commencièrent à envaïr, à atraire et à lanchier vistement et fortement.
Là s’acquitoient li archier d’Engleterre souffisamment au traire, et
estoient sour les bors de lors nefs, et traioient si roidement et si
ouniement c’à painnes se pooit ne osoit nuls amoustrer. D’autre part
Espagnol et Chateloing, qui estoient bien pavesciet et à le couverte en
leurs vaissiaux, lanchoient dars et archigaies si trenchans, que qui
en estoit à plain cop consieuwis, c’estoit sans remède: il estoit mors
ou trop villainnement navrés. Che premier jour tournièrent il enssi
en lanchant et escarmuchant, en jettant pierres et en traiant, dont
il en y eut des uns et des autres pluiseurs ochis et navrés, tant que
li marée dura et que li aige ne leur falli, car li mers seloncq son
usage se retraiioit. Si couvint retraire les Englès, mais à ce premier
estour il perdirent quatre nefs de leurs pourveanches, que li Espagnol
conquissent sus yaux et encloïrent au departement dou hustin entre
yaux, et furent mort et noiiet et jetté à bort le plus grant partie de
ceux qui dedens estoient: tout che veoient leur mestre et leur signeur
qui devant yaux estoient, mès amender ne le pooient. Fºs 178 vº et
179 rº.
P. 38, l. 28: ens ou.--_Ms. A 8_: au.
P. 39, l. 18: Harpedane.--_Ms. A 8_: Hardane. Fº 347 vº.
P. 39, l. 21: Cauderier.--_Ms. A 8_: Chauderon.--_Ms. B 1_:
Chaudouvrier.
P. 39, l. 23 et p. 40, l. 9: kay.--_Ms. A 8_: gué.
P. 39, l. 32: peuist.--_Ms. A 8_: sceust.
P. 40, l. 1: en le.--_Ms. A 8_: dedens la.
P. 40, l. 10: naviier.--_Ms. A 8_: nager.
§ =690=. Quant ce vint.--_Ms. d’Amiens_: Enssi sus heure de vespres au
retrait dou flos et que li wèbes leur falli, se departi li bataille,
et retournèrent à l’ancre li Englès tous courouchiés, c’estoit bien
raison; car il avoient ja perdu grosement jusques à quatre vaissiaux
de lors pourveanches et les gens qui dedens avoient estet trouvé, et
d’autre part li Espagnol se missent à l’ancre tout joieant, qui se
tenoient tout comforté que à l’endemain il aroient le demorant. Moult
estoit li tamps et li airs quois et seris, et ne faisoit point de
vent. Si eurent che soir et le nuit enssuiwant li signeur d’Engleterre
tamainte ymagination comment il se poroient maintenir et deduire contre
ces Espagnolz, car point ne se veoient en jeu parti contre yaux, dont
il n’estoient miez à leur aise. D’autre part, nullement il n’en pooient
venir ne ariver à le Rocelle, car leurs nefs estoient trop grandes, et
li aige trop basse, car c’estoit sus le decours de le lune; si n’avoit
li mers point de force. Bien avoient des batiaux en leurs nefs et
qui les siewoient, ens es quels li chevalier se pewissent bien estre
mis, se il volsissent, et venir à rime jusques au kay de le Rocelle,
mès il doubtoient le peril; car il ne pooient passer fors parmy leurs
ennemis qui avoient ossi otelle pourveance de barges et de batiaux,
et estoient tout enfourmé de ce fait; et au passer devant ou dalés
lors ghalées, chil qui seroient d’amont leur jetteroient pierres et
barriaux de fer et leur effonderoient leurs batiaux: si seroient
perdu d’avantaige. Dont à yaux mettre en ce parti il n’estoient point
d’acort; ossi dou retourner ne de prendre le parfont, il n’y veoient
ne prouffit ne honneur pour yaux, car sitost que li Espagnol les
veroient fuir, yaux qui ont leurs gallées armées et pourvewez de grant
fuisson de rimeurs, leur seroient mout tost au devant, et les aroient
à vollenté avoecq le blamme et le reproce qu’il aroient du fuir. De
quoy, tout consideret et peset le bien contre le mal, il dissent que il
atenderoient l’aventure de Dieu et se combateroient à l’endemain, tant
qu’il poroient durer, et se venderoient plus chier que oncques gens ne
fissent, siques sus ce pourpos et avis il s’arestèrent, et passèrent le
nuit au plus biel qu’il peurent.
P. 40, l. 19: tous li wèbes.--_Ms. A 8_: la marée.
P. 40, l. 30: et se.--_Ms. A 8_: et.
P. 41, l. 1: Evous.--_Ms A 8_: et puis vindrent. Fº 348 rº.
P. 41, l. 6: cros et havès de fier à kainnes.--_Ms. A 8_: crochès et
chaines.
P. 41, l. 7: peuissent.--_Ms. A 8_: pouoient.
P. 41, l. 10: Guichart.--_Ms. A 8_: Guichart d’Angle.
P. 41, l. 15: d’assallir et de yaus targier.--_Ms. A 8_: d’assallir.
P. 41, l. 22: ne onques.--_Ms. A 8_: que onques.
P. 41, l. 24: des leurs.--_Ms. A 8_: de leurs gens.
P. 42, l. 3: où il eut fait tamainte.--_Ms. A 8_: où l’en fist mainte.
P. 42, l. 15: li.--_Ms. A 8_: yceulx.
§ =691=. Qui se trueve.--_Ms. d’Amiens_: Celle meysme nuit et tout le
soir estoit en grant priière et pourcach messires Jehans de Harpedanne,
un chevalier englès et senescaux de le Rocelle pour le temps, enviers
chiaux de le ditte ville; et leur disoit et moustroit comment leurs
gens se combatoient as Espagnolz, et qu’il ne s’aquitoient mies
biens quant il ne les aloient aidier; mès, quoyque li chevaliers les
sermonast ne amonestast, il n’en faisoient nul compte, et moustrèrent
bien li pluisseur par samblant qu’il avoient plus chier le dammaige des
Englès que l’avantaige. A ce dont estoient en le Rocelle doy gentil
chevalier de Poito, li sires de Tannay Bouton et messires Jaquemes
de Surgières, liquel pour yaux acquitter dissent qu’il se meteroient
en barges et en batiaus et venroient dallés leurs gens, et priièrent
estroitement et fortement à ciaux de le ville qu’il volsissent aller
avoecq yaux, mès oncques nus ne dist: «Vollentiers,» ne ne s’avancha de
l’aler. Quant ce vint à l’endemain qui fu la nuit Saint Jehan Baptiste
l’an mil trois cens settante et deus, et que li flos de le mer fu
revenus, li chevalier, qui en le Rocelle se tenoient, ne veurent mies
estre là trouvé sejournant, et il veyssent leurs gens combattre, mèz
s’armèrent au plus tost et dou mieux qu’il peurent, et entrèrent et
se fissent menner et naviier à esploit de rimmes à l’endroit de leurs
gens qui ja se combatoient, et tant alèrent tourniant les gallées et
les Espagnols qui entendoient au combattre, qu’il vinrent jusques à
yaux, et entrèrent ens es nefs dou conte de Pennebrucq et de monsigneur
Ghuichart d’Angle, qui leur seurent mout grant gret de leurs secours
et de leur venue. Ja estoit li estours et li hustins commenchiet très
le point dou jour, qui fu ossi fors et ossi bien combatus que on vey
oncques gens sus mer combattre; car li assallant estoient droite gens
de mer, fort et rade, et bien durant et esploitant en tel besoingne,
et li Englès très bien deffendant ossi vassamment et radement que on
vey oncques gens, et ne l’avoient mies li Espagnol d’avantaige, car li
chevalier englès, gascon et poitevin, qui là estoient, se combatoient
et deffendoient leurs corps et leur navie de très grant vollenté et
mout durement, comment que la parchon n’estoit mies juste pour yaux;
car li Espagnol estoient grant fuisson, et se n’y avoit si petit
varlet entre yaux, qui ne fesist otant que uns homs d’armes en lors
gallées, car il jettoient d’amont pierres de fais, plommées et gros
barriaux de fier, dont il debrissoient et deffroissoient tous lez
vaissiaux des Englès. Là fu li jones comtes de Pennebrucq très bons
chevaliers, et fist merveillez d’armes de se main, et ossi furent
messires Othes de Grantson, messires Guichars d’Angle, messires Aimeris
de Tarse, li sires de Tannai Bouton, li sires de Puiane, messires James
de Surgières, messires Jehans Harpedane, messires Jehans Tuifort,
messires Jehans de Gruières, messires Jehans Toursès, messires Jehans
de Lantonne, messires Simons Housagre, messires Jehans de Mortain,
messires Jehanz Touchet et li autre chevalier et escuier, et estoient
par ordonnanche espars par leurs vaissiaux pour mieux entendre à leurs
gens et rencoragier les lassés et les esbahis.
A ceste bataille, qui fu, devant le Rocelle, dez Espagnols as
Englès, eut ce jour fait mainte[s] bellez appertises d’armes, car là
s’esprouvoient li hardit et li bien combatant; mais au voir dire li
Espagnol avoient moult grant avantaige de bien assaillir et de requerre
leurs ennemis, car il estoient en grans et gros vaissiaux, c’on dist
gallées, touttes frettées et armées, qui se remoustroient deseure tous
les vaissiaux des Englès, et pooient veoir li Espagnol par dedens leurs
vaissiaux, et point li Englès en chiaux des Espagnolz; et estoient li
jet et li cop lanchiet et ruet des vaissiaux des Espagnols en chiaux
des Englès de plus grant force et de plus grant virtu sans comparison,
pour ce qu’il descendoient de plus haut que ne fuissent chil des
Englès. Si traioient li archier d’Engleterre mout fortement et très
ounniement, mès li Espagnol estoient bien paveschiet contre ce, et
ne leur fist li très mies trop grant dammaige. Ensi en che hustin et
en celle rihotte se tinrent li Englès tout ce jour, et qui quidoient
toudis que chil de le Rocelle les dewissent comforter et secourir, mès
il n’en avoient nul talent, enssi qu’il apparu; car oncques plus nuls
ne s’en partirent, fors li troi chevalier dessus nommet, qui se veurent
acquiter de leur honneur, ensi que tout loyal chevalier par droit et
raison doient faire en telz besoingnes. Là estoient li quatre patron et
cappitainne des Espagnols, chascun en une gallée et entre ses gens en
bon couvenant, et moustroient bien chière et fait de hardit homme, et
resbaudissoient grandement leurs gens, et disoient en leur langage: «My
enfant, esploitiés vous et ne vous esbahissiés de cose que vous voiiés;
car ceux chy sont nostre, et apriès venront tout li autre.» De ces
parolles avoient li chevalier englès et gascon, qui les entendoient,
grant indination, mès amender ne le pooient: si en faisoient leur pooir
et leur devoir à leur milleur entente, et s’abandonnoient de grant
vollenté et chascun pour rencoragier l’un l’autre. Enssi continuèrent
ilz et perseverèrent le plus grant partie dou jour, et tant furent li
Englès et chil de leur costé fort requis, combatu et apresset, qu’il
furent durement lasset et foullé, et ne se peurent plus tenir, et en
furent li Espagnol mestre, et lez conquissent par force d’armes, mès
moult leur cousta de leurs gens, car là avoient ossi bonne chevalerie
tant pour tant que on pewist point recouvrer, et bien le moustrèrent,
car point ne se vorrent rendre jusques à tant que force leur fist faire
et que autrement leurs nefs ewissent estet touttes effondrées et yaux
perdu sans merchy. Là furent mort de leur costé messires Aimeris de
Tarse, gascons, bons chevaliers et preux durement et qui estoit yssus
de tamainte dure besoingne, et avoecq lui messires Jehans de Lantonne,
messires Simons Housagre et messires Jehans de Mortain, messires
Toucet et pluisseurs autres, et pris li comtes de Pennebruc, messires
Ghuicars d’Angle, messires Othes de Grantson, li sires de Puiane, li
sires de Tannai Bouton, messires Jehans de Harpedane, messires Robers
Tuifort, messires Jehans de Gruières, messires Jaquemes de Surgières,
messires Jehans Toursès, messires Thummas de Saint Aubin et bien dis
et set chevaliers, tous de nom: oncques nuls n’escappa de ceste armée,
que n’en fuissent tout mort ou tout pris; et fu li vaissiaus peris et
effondrés, où li finanche estoit, que li roys englès envoiioit en Poito
pour gagier trois mil combatans et paiier, se il besongnoit, un an. Si
poés bien croire que il y avoit grant somme de florins, et oncques ne
fist aise ne prouffit à nullui, dont ce fu dammaigez qu’il en escheï
enssi; et en furent li Espagnol meysmement courecié, quant il le
sceurent; mès ce fu si tart qu’il n’y peurent pourveir de remède.
Qui se treuve en tel parti d’armes que li dessus dit, il couvient qu’il
prende en gré l’aventure que fortunne li envoie. Che jour l’eurent
moult dur li Englès pour yaux et par le coupe de monsigneur Ghuicart
d’Angle et de monsigneur Ammeri de Tarse qui là demoura, et dou signeur
de Puiane, qui avoient enfourmé le roy englès qu’il estoient gens
assés pour ariver em Poito, de trois cens ou de quatre cens, siques
li roys sour leur requeste se fourma et leur acompli leur demande,
dont il leur mesvint; et, au voir dire, il s’estoient trop foiblement
parti d’Engleterre, seloncq le grant fuison d’ennemis qu’il avoient
par mer et par terre. Apriès celle desconfiture, et que li Espagnol
eurent quis et cherchié touttes les nefs dez Englès et pris les barons
et les chevaliers et fait entrer en leurs gallées, et qu’il se furent
tout saisi de leurs armures et les eurent fianchiés, il se tinrent
tout quoy à l’ancre devant le Rocelle en atendant le marée et le flos
de le mer qui devoit revenir, en menant grant joie et grant reviel.
Bien virent et congneurent tantost chil de le Rocelle que leurs gens
estoient desconfi, dont li pluisseur en requoy furent tout joieant,
et ne volsissent mies que la besoingne fuist autrement allée pour nul
avoir, et especialement li plus grant maistre de le ville; car il leur
estoit segnefiiet et dit pour certain que on devoit prendre douse de
leurs bourgois à election, sus lesquels li roys englès et ses conssaux
estoient mal enfourmet, et mener comme prisonniers en Engleterre.
Pour celle cause et celle doubte il s’en portèrent et passèrent plus
bellement; nonpourquant il se faindirent adont pour apaisier les
ennemis, et cloïrent leurs portes mout estroitement, et s’armèrent
touttes mannières de gens, et alèrent as cretiaux, as portes, as tours
et as gharittes par connestablies, et ne laissièrent nullui entrer
ne yssir; car il disoient enssi qu’il ne savoient que li Espagnol
penssoient et se ilz les venroient assaillir. Pour tant se tenoient
il sour leur garde, mès li Espagnol n’en avoient nul tallent fors de
partir au flos revenu et de tourner vers Espaingne et là menner leur
concquest et leurs prisonniers à sauveté. Che soir esceï trop bien à
monseigneur James de Surgières, un chevalier de Poito, qui là estoit
pris; car il parla si bellement et si sagement à son mestre qu’il fu
quittes parmy trois cens frans franchois qu’il paiia tous appareilliés,
et fu renvoiiés arrièrre en le Rocelle, delivrés sicomme vous avés
oy; et pour l’onneur de chevalerie on mist tout les chevaliers qui là
avoient estet mort, en une barge, et les envoiièrent li Espagnol en le
Rocelle. Là furent il recheu et ensepveli en sainte terre.
Quant li flos de le mer fu revenus et que li mestre patron et souverain
des Espagnols, loist assavoir: Ambroise Boukenègre, Cabesse de Vake,
dan Ferrant de Pyon et Radigo de la Roselle, eurent ordonné leur
besoingnes et mis gens et maronniers ens es nefs englèces qu’il
avoient concquis pour gouvrenner et amener avoecq yaux, ilz sachièrent
les singles amont et se desancrèrent, et se partirent trompant et
cornemusant et faisant grant feste, et entrèrent ou parfont pour
prendre le mer d’Espaingne. Fºs 179 rº et vº, 180 rº.
P. 42, l. 28: coi que.--_Ms. A 8_: combien que.
P. 43, l. 1: recorder en.--_Ms. A 8_: en. Fº 348 vº.
P. 43, l. 16 fuissent.--_Ms. A 8_: estoient.
P. 43, l. 25: coron.--_Ms. A 8_: boux.
P. 44, l. 10: d’Agoriset.--_Ms. A 8_: d’Angonse.
§ =692=. Cilz Yewains.--_Ms. d’Amiens_: Nous lairons un petit à parler
d’iaux et parlerons d’une armée que Yeuwains de Gallez et messires
Jehans de Ray, bourgignons, avoient au commandement dou roy de Franche
en celle saison mis sus, et estoient venut sus les ysles de Coustentin,
et pooient y estre environ uit cens hommez d’armes et avoient tout le
temps gardé le mer et les pas de Normendie, et estoient arivet chil
Franchois en l’isle de Grenesée, dont Ammons Rose, uns escuiers dou
roy d’Engleterre, estoit cappitainne. Quant il sceut que Yeuwains de
Galles et se routte devoient prendre terre en l’isle dont il estoit
gardiiens, il requeilla chiaux dou pays et chiaux qu’il avoit amenés
d’Engleterre avoecq lui, et s’en vint sus un certain pas où il penssoit
que li Franchois prenderoient terre. Là eut grant bataille et dure, et
moult fu trait, lanchiet et assailli, et coust(um)a moult grandement li
passaiges as Franchois, ainschois qu’il pewissent ariver. Toutteffois
finablement il le concquissent, et en y eut bien mors de le partie as
Englèz sis cens et se sauva à grant meschief Ammon Rose, et se bouta
ou castiel de Cornet, qui est priès de là. Depuis celle desconfiture
n’y eut riens retenu sus tout le pays, car il n’y a nulle forterèche.
Si ardirent et essillièrent li dit Franchois tout cesti ysle, et y
ranchonnèrent hommes et femmez, et apriès entrèrent en l’isle de
Gersée, et l’ardirent et ranchonnèrent ossi, et puis vinrent mettre le
siège devant le castiel de Cornet, où Ammon Rose et aucun gentil homme
d’Engleterre estoient retret. Là y eut pluisseurs assaux, mès il ne
fu mies adont gaegniés, car li roys de Franche manda au dit Yeuwain
de Gallez et à monsigneur Jehan de Ray qu’il se partesissent de là et
s’en allaissent en Espaingne parler au roy Henry et impetrer ou nom
de lui vint et cinc ou trente grosses gallées pour venir assegier le
Rocelle; car li roys savoit ja que cil qui le devoient rafrescir, li
comtes de Pennebrucq et li autre dessus nommet, estoient tout mort et
tout pris. Si se departi du siège de Cornet li dis Yeuwains, et entra
en mer à tout trèse barges tant seullement, et prist le droit chemin
d’Espaingne, et singlèrent tant qu’il arivèrent en Galisce, à ung port
et à une ville qui s’apelle le bourcq Saint Andrieu. Fº 180 rº.
P. 44, l. 31: par quel.--_Ms. A 8_: pour quelle.
P. 45, l. 5: et.--_Ms. A 8_: il. Fº 349 rº.
P. 45, l. 7: en gouvrenance.--_Ms. A 8_: gouvernement.
P. 45, l. 13: ci.--_Ms. A 8_: ci dessus.
P. 45, l. 16: Harflues.--_Ms. B 4_: Harfleux.
P. 45, l. 23: le dit isle.--_Ms. A 8_: la ditte.
P. 45, l. 28: dura.--_Mss. A 8_ et _B 4_: se tint.
P. 46, l. 1: de là.--_Ms. A 8_: près de là.
P. 46, l. 1: avoit esté.--_Ms. A 8_: fu.
P. 46, 1. 9: est.--_Ms. A 8_: estoit.
P. 46, l. 18: desous.--_Ms. A 8_: declin.
P. 47, l. 4: oy.--_Ms. A 8_: vi.
P. 47, l. 6: à toutes gens congiet.--_Ms. A 8_: congié à ses gens.
Fº 349 vº.
P. 47, l. 9: de.--_Ms. A 8_: de devant.
§ =693=. Vous devés savoir.--_Ms. d’Amiens_: En ceste meysme heure
arivèrent li dessus dit Espagnol, Cabesse de Vake et li autre, qui
avoient pris les dessus nommés Englès et Poitevins, et entrèrent auques
enssamble en le ville; si furent moult resjoy chil dou pays de le pris
des dessus dis et de le belle aventure qui estoit avenue à leurs gens.
Si vinrent li dessus dit patron, qui la bataille avoient desconfi,
deviers le roy Henry, leur seigneur, qui se tenoit à Burges, et li
fissent present de leurs prisonniers. Li roys leur en sceut grant gret,
et furent si bien d’acort que li dit prisonnier dubrent demourer et y
estre au dit roy parmy une grande somme de florins qu’il en rendoit.
Si furent envoiiet querre li dessus dit chevalier à le ville de Saint
Andrieu, et vint contre yaux bien acompaigniés li ainsnés filz dou
roy Henry, qui s’appelloit Jehans, et les honnoura et requeilli moult
bellement, et furent amenet à Burgez, et depuis furent il espars en
diviers lieux et mis tous en kainnes et en destroitez prisons, excepté
li comtes de Pennebrucq et messires Ghuichars d’Angle. Fº 180 rº.
P. 47, l. 14: tant c’à ceste fois.--_Ms. A 8_: pour celle fois.
P. 47, l. 14: si imaginèrent tantost li sage homme.--_Ms. A 8_: si
ymagina lui et les sages gens.
P. 48, l. 1: et embuiés.--_Ms. A 8_: de fer.
P. 48, l. 6: très.--_Ms. A 8_: entrés.
P. 48, l. 15: rampronnant.--_Ms. A 8_: reprouchant.
P. 48, l. 29: ne en voie.--_Ms. A 8_ et _B 4_: ne en lieu.
P. 49, l. 6: et.--_Ms. A 8_: ne.
P. 49, l. 27: cose.--_Ms. A 8_: cose il.
§ =694=. Nous retourrons.--_Ms. d’Amiens_: Nous retourrons as
besoingnes et as avenues de Poito, de Saintonge et de le Rocelle,
et vous parlerons que droitement le jour saint Jehan Baptiste, dont
le jour devant la bataille avoit esté desconfite sus mer, vinrent
en le Rocelle grant fuison de gens d’armes de le partie as Englèz,
dont li captaus de Beus estoit souverains, et de se route, li soudis
de Lestrades, messires Petiton de Courton, li bastart de Courton,
messires Berars de le Lande, messires Pierres de Landuras, messires
Bertrans dou Franch et pluisseurs autrez chevaliers et escuiers, et
furent mout courouchiet, quant il oïrent les nouvellez que leurs gens
estoient desconfit. Si trouvèrent là monsigneur Jehan d’Ewrues, qui
avoit estet à la besoingne et s’en estoit sauvés. Là eurent chil dit
signeur chevalier grant conseil enssemble quel cose il feroient et
comment il se maintenroient. Si fu enssi ordonné que messires Jehan
d’Ewrues demourroit ou castiel de le Rocelle et le garderoit, car
ja se commenchoient il à souppechonner de chiaux de le ville, et
entr’iaux chevaucheroient il sour le pays, et bouteroient hors Bretons
qui tenoient aucuns petis fors, marchissans sour le marinne, qui
ranchonnoient et herioient le pays.
Si se partirent ces gens d’armes de le Rocelle, et pooient estre
environ trois cens lanchez, et s’en vinrent deviers Subise; là environ
se tenoient Breton qui avoient fortefiiet eglises et petis fors. Si
se traist celle part li captaux et se routte, et les commenchièrent à
envayr et à assaillir asprement et roidement. Fº 180 rº et vº.