que li prinches de Galles fu retrès en Engleterre, et entroes que li
dus de Lancastre et li baron de Gascoingne entendoient à faire le
obsèque dou fil le prince, et qu’il regardoient entre yaux là où il se
poroient traire pour emploiier leur saisson et grever lors ennemis, se
partirent de le chité de Pieregort une grande routte de Bretons, qui là
s’estoient tenu en garnisson tout le temps, et chevauchièrent deviers
un castiel mervilleusement fort, que on appelle Mont Paon. Si en estoit
sires messires Guillaumme de Mont Paon, et se tenoit pour englès.
Si tost que chil Breton furent venu jusques à là, desquels Bretons
estoient cappitainne messires Guillammes de Loncval, messires Jehans
de le Housoie, messires Loeis de Mailli et li sires d’Arsi, à petit
de fait et de parlement, et me samble, seloncq ce que je fui adont
infourméz, que li dessus dis messires Guillaummes de Mont Paon les
mist en le fortrèche, et se tourna franchois. Ces nouvelles vinrent au
duc de Lancastre et as barons de Gascoingne et de Poito, qui estoient
adont à Bourdiaux. Quant il en seurent le verité, si en furent durement
courouchiet, et regardèrent que tantost et sans delay il se trairoient
deviers Mont Paon et y meteroient le siège et n’en partiroient jammès,
si le raroient à leur vollenté, combien qu’il deuist couster. Si
fist li dus Jehans de Lancastre, comme chiés et souverains de toutte
la ducé d’Acquitainne, une priière et un mandement à touttes gens
d’armes, barons, chevaliers et escuiers, qu’il fuissent, dedens un
brief jour qu’il i mist, à Bregerach; car il s’en alloit devant Mont
Paon. A ce mandement ne volt nus desobeïr, mais se partirent de leurs
hostels touttes mannières de gens d’armes, et vinrent à Bregerach
et à Bourdiaux au jour qui y fu assignés. Dont s’esmurent li dus de
Lancastre, li contes de Cantbruge, li comtes de Pennebrucq, li sires de
Duras, li sirez de Courton, li captaus de Beus, li sires de Lesparre,
li sires de Pummiers, li sires de Longeren, li sirez de Chaumont,
messire Loeis de Halcourt, messire Guichars d’Angle, li sires de Pons,
li sirez de Partenay, li sires de Puiane, messires Jakes de Surgières,
li sires de Tannai Bouton et tout li autre baron, chevalier et escuier,
et estoient bien set cens lances de bonne gent d’estoffe et deus mil
hommes autres parmy les archiers. Si chevauchièrent et cheminèrent
moult areement et ordonneement par deviers Mont Paon, et fissent tant
par leur esploit qu’il y vinrent. Si se logièrent tout à l’environ; il
estoient gens assés pour faire y et bastir grand siège. Fºs 172 vº et
173 rº.
P. 11, l. 2: Si le fist.--_Ms. A 8_: Et le fist faire.
P. 11, l. 17: dou quel messires Guillaumes de Mont Paon.--_Ms. A 8_:
dont un chevalier.
P. 11, l. 23: se rendi et tourna.--_Ms. A 8_: se tourna et rendi.
P. 12, l. 15: l’Estrade.--_Ms. A 8_: l’Estrau. Fº 341 rº.
P. 12, l. 22: Fraiville.--_Ms. A 8_: Framville.
P. 12, l. 30: feroient morir à grant painne.--_Ms. A 8_: feroit morir
de male mort.
§ =674=. Quant li dus.--_Ms. d’Amiens_: Par devant le ville et le
castiel de Mont Paon s’amanagièrent et hebregièrent li Englès, et
li Gascons de leur costé ossi bien et ossi fort et par ossi bonne
ordonnance que don qu’il y dewissent demourer un an; car il sentoient
en le fortrèce bons chevaliers et escuiers et bien tailliés dou garder
et dou deffendre. Si ordonnèrent encorre li dessus dit instrumens
et atournemens d’assaus grans et fors durement, et faisoient leurs
gens priesque tous les jours aller assaillir, traire, lanchier et
escarmuchier à ceux de le fortrèche, qui moult bien se deffendoient, et
plus y perdoient li assallant que li assis, car messires Guillaummes de
Lonchval, messires Alains de le Houssoie, messires Loeis de Mailli et
li sirez d’Arssy estoient droite gent d’armes pour yaux souffissamment
acquiter en telz besoingnes, et ossi il en fissent bien leur devoir,
tant que li dus de Lancastre et ses gens qui estoient plus de trois
mil combatans, y sisent plus de nuef sepmaines. En ce tamps et le
siège pendant devant Mont Paon, s’avisa uns bons escuiers bretons qui
s’appelloit Selevestre Rude, et hardi homme durement, et estoit chils
cappittainne et souverains d’une autre fortrèce qui se nomme Sainte
Basille, et regarda en soy meysmes que chil chevalier breton, qui
se tenoient dedens Mont Paon, gisoient assés honnerablement, et que
tous les jours il avoient parti et fait d’armes, et c’estoit tout ce
qu’il demandoit: si se parti à dis hommes d’armes seullement de sa
garnison, et s’en vint de nuit tout à chevauchant, et fist tant qu’il
vint jusques à Mont Paon. Si trestost que chil de le garde sceurent que
c’estoit Selevestre Bude et se route, qui venoit là pour querre les
armes et aider ses compaignons, si en eurent grant joie et le missent
en le forterèce et ses gens ossi, et le conjoïrent li chevalier breton
et li compaignon qui là estoient, grandement, et le remerciièrent moult
de sa venue. Fº 173 rº.
P. 13, l. 10: lés.--_Ms. A 8_: costez.
P. 13, l. 16: de belourdes.--_Ms. A 8_: autres choses.
P. 14, l. 15: y.--_Ms. A 8_: vers eulx. Fº 341 vº.
P. 14, l. 28: gas.--_Ms. A 8_: fable.
§ =675=. Si com je vous.--_Ms. d’Amiens_: Ensi se tint li sièges des
Englès devant le castiel de Mont Paon, où il y eut fait maintes bellez
appertisses d’armes, maint assaut et mainte escarmuce, et priesque
tous les jours se venoient combattre chil dou castiel à leur barrière
à ciaux de hors, et là en y avoit des blechiés souvent des uns et des
autres. Enssi se tinrent il ung grant temps mout honnerablement: si
estudioient li signeur, qui devant seoient nuit et jour, comment il
pewissent aprochier le fin de leur siège et yaux emploiier ailleurs, et
fissent à l’un des lés à leur avis aporter et achariier grant fuisson
de bois et de velourdes et de faghos et jeter ens es fossés et terre
par dessus, et raemplir tant que on pooit bien aprochier les murs. Si
tost que cela fu fait et qu’il eurent l’avantaige pour venir traire,
lanchier et combattre à ce costé à chiaux dou fort, il estoient trop
pourveu de grans escaufaus et mantiaus bien ouvrés et fort carpentés,
où il pooient bien [estre] en chacun vint hommez d’armes et quarante
archiers. Si les fissent par roes et enghiens amener et aprochier
jusques as murs, tous garnis et emplis de gens d’armes, d’archiers et
d’artillerie. Si commencièrent chil à traire par dedens le fortrèche et
à assaillir durement; car ou piet de ces escaffaux avoit autrez hommes
atout grans pilz et haviaux, qui piketoient et brisoient le mur et tout
à le couverte, car d’amont on ne les pooit grever. Là eut ung très fort
asaut et trop dur, car on ne poroit ymaginer coumment chil de dedens
se deffendoient vaillamment et corageusement, et estoient sur les murs
armé et paveschiet contre le tret, et faisoient là merveilles d’armes;
mès ce qui les greva et esbahy, che fu par le picketer desoubs ou mur,
car on y fist ung grant trau. Si n’estoit ils nulx qui y osast entrer;
car il y avoit à l’encontre par de dedens grant fuisson de bonnes
gens d’armes, qui trop bien gardoient et deffendoient le passaige et
lanchoient à l’encontre mout vistement tonniaux, et les emplissoient de
terre pour estouper ces pertruis. Enssi dura ung jour tout entier li
assaus, et convint les Englès departir pour le cause de la nuit, mais
il pourveirent bien de bonne gent d’armes et d’archiers leurs escaufaus
et leurs instrummens d’asaut, par quoy chil dou fort ne leur fesissent
nul contraire, et les retrayrent à ce dont par les roes ens sus dou
mur, et s’arestèrent tout li seigneur de l’ost que à l’endemain on
yroit assaillir plus fort que devant. Cette nuit se renforchièrent li
Franchois dou plus qu’il peurent, et restoupèrent les pertruis dou mur;
mès bien perçurent li chevalier breton qui là estoient et Selevestre
Bude, que il ne se poroient longement tenir. Si aurent tamainte
imagination à savoir quel cose il feroient, se il demoroient ou se il
se partiroient. Toutteffois tout consideré et pour leur honneur, il
demourèrent, et dissent que il avoient pluz chier à atendre l’aventure
de Dieu et y estre pris par biau fait d’armez, que ce qu’il leur fuist
reprochie nulle vilonnie.
Quant ce vint à l’endemain environ soleil levant, li dus de Lancastre
fist sonner sez trompettez. Si s’armèrent touttes gens, et se traist
chacuns à se livrée, et puis aprochièrent le castiel, et entrèrent
dedens les escaufaus touttes nouvellez gens, hommez d’armes et
archiers, et puis furent par les roes amenés jusques as murs. Si
commencièrent li archier à traire fort et roit, et les gens d’armez à
combattre. Là eut, je vous dis, fait mainte belle appertisse d’armes,
et trop bien se deffendirent chil dou fort. Entroes que on entendoit
à l’assaillir et que priès tout chil de l’ost estoient à l’assaut,
messires Guillaummes de Mont Paon, qui ces Bretons avoit mis dedens
le fortrèce, regarda le peril et le parti où il estoient, et que
nullement à le longe il ne se pooient tenir, et que, se il estoient
pris, de se vie estoit noiens, si s’avisa qu’il s’embleroit des autres
et se partiroit sans congiet et les lairoit finer au mieux qu’il
poroient: si monta sus un courssier, et fist ouvrir une posterne à
l’opposite de l’asaut et se mist as camps, et se sauva par telle
mannière, et toudis duroit li assaux. Quant ce vint environ primme, li
picketeur, qui estoient au darrain estage de l’escauffault, avoient
tant ouvré et picketé, que il fissent reverser un pan dou mur, dont
n’y eut ens es chevaliers bretons que esbahiz. Si se traissent avant
et fissent signe qu’il volloient parler et tretiier d’acort. Li dus
de Lancastre, qui en vit le mannière, y envoiea monsigneur Guichart
d’Angle, et fist cesser l’assaut; car bien li sambla qu’il les aroit,
quant il vorroit. Sitost que li marescaux d’Acquittainne fu là venus,
il li dissent: «Monsigneur Guichart, nous nos vollons rendre sauve
nos corps et le nostre, et nous partirons de chy, et vous lairons le
fortrèce.»--«Signeur, signeur, respondi messires Ghuicars, il n’yra
mies enssi. Vous avez tant cousté, argué et courouchié monsigneur de
Lancastre que je croi bien qu’il ne vous prendera à nul merchy.» Dont
respondirent li chevalier breton, et dissent: «Monsigneur Guicart,
nous sommez saudoiiers gaegnans nos saudées au roy de France, et qui
loyaumment nous vollons acquitter envierz no signeur, sicomme vous
feriés pour le vostre; si vous requerons que vous nous menés justement
au droit d’armes, enssi que chevalier et escuier doient faire l’un
l’autre, et que vous vorriés que on vous fesist, ou les vostrez, se
vous estiés ou parti où nous sommes.» Dont respondi messires Guichars,
et dist: «J’en iray vollentiers parler à monsigneur de Lancastre, et
savoir quel cose il l’em plaira à fere, et tantost retourray.» Adont
se parti messires Guicars, et s’en vint au dit ducq qui n’estoit
mies loing de là, et li remoustra comment li chevalier de Mont
Paon se volloient partir et laissier leur fortrèche. Dont respondi
li dus, et dist: «Maugré en aient il! Sachiés, messire Guichars,
qu’il ne s’en partiront pas enssi, mès demoront deviers my et en me
vollenté.»--«Monsigneur, dist li marescaux, vostre vollenté serra telle
qu’il passeront parmy courtoise raenchon; car, se il se sont tenu et
ont gardé le forterèce vaillamment et à leur pooir, on ne leur en doit
savoir nul mauvais gré, et ou parti où il sont poevent vos gens escheïr
tous les jours, siques vous leur ferez le droit d’armes.»--«Monsigneur,
ce dist li captaus de Beus, messires Guicars dist bien et l’en creés,
car il vous consseil à vostre honneur.» Adont se rafrenna un peu li
dus de Lancastre, et li dist: «Messire Guicart, je le vous acorde, mès
nullement je ne voeil que messires Guillaummes de Mont Paon soit mis ou
tretiet.»--«Sire, dist li marescaux, de par Dieu!» Adont s’en revint
il là où li chevalier breton l’atendoient, et leur dist: «Certes,
signeur, à grant dur j’ai empetré deviers monsigneur que vous soiiés
pris et mis à raenchon convignable par droit d’armes, sans vous trop
presser; toutteffois vous le serés; mès monsigneur Guillaume de Mont
Paon ne voet nullement li dus pardonner son mautalent, mès le voet
avoir à faire son plaisir.» Dont respondirent li chevalier breton, qui
ja estoient enfourmet que chils s’estoit partis, et dissent: «Messire
Guicart, nous parlons de nous tant seullement. De monsigneur Guillaumme
ne savons nous riens, et quidons mieux qu’il soit hors que ceens ou que
dedens, et vous jurons que nous ne savons où il est ne quoi devenus.
Par raison vous ne nous en devés demander plus avant.»--«C’est voirs,»
dist messires Guichars. Adont fist on retraire touttez mannièrez de
gens assallans. Si se vinrent li chevalier françois et li hommes
d’armes, qui là estoient avoecq yaux, rendre et mettre en le prison
le duc de Lancastre, qui les prist vollentiers et qui envoya tantost
dedens Mont Paon querre et cerchier, se on poroit trouver le chevalier
dessus nommet; mès il raportèrent que nennil et qu’il s’estoit partis
très le matin. De ce fu li dus de Lancastre mout courouchiés, mès
amender ne le peut. Si envoiea de rechief par dedens le fort monsigneur
Guicart d’Angle prendre le saisinne et le possession dou castiel,
et y estaubli à demourer le seigneur de Muchident et monseigneur le
soudich de Lestrade et cent hommez d’armes et deus cens archiers pour
le garder, lequel chevalier dessus noummet le fissent remparer et
fortefiier par les hommes dou pays mieux que devant, et en fissent une
grosse garnison et qui mout grevoit et cuvrioit chiaux de Pieregorch
avoecq le garnison de Bourdelle qui se tenoit englesse. Fºs 173 rº et
vº, 174 rº.
P. 15, l. 12: pis.--_Ms. A 8_: pics.--_Mss. B 1_ et _B 4_: pilz.
P. 15, l. 23: par mi ce mur trauet.--_Ms. A 8_: premierement.
P. 16, l. 14: Guillaume.--_Ms. A 8_: Guillaume de Mont Paon. Fº 342, rº.
P. 17, l. 1: abrisier.--_Ms. A 8_: abregier.
P. 17, l. 11: païsans.--_Ms. A 8_: maçons.
§ =676=. Apriès le reconquès.--_Ms. d’Amiens_: Apriès le prise de Mont
Paon, se departirent li signeur, et leur donna li dus de Lancastre
de revenir ung tierme, tant qu’il les manderoit, à leurs maisons. Si
s’en rallèrent li signeur de Gascoingne en leur pays, pour garder lors
fortrèces à l’encontre dou conte d’Ermignach et dou signeur de Labreth
et des compaingnes de leur costé qui leur faisoient grant guerre. Ensi
estoit li pays entouilliés li uns sur l’autre: li fors foulloit le
foible, li voisins desroboit et tolloit son voisin quanqu’il avoit;
un jour tenoit les camps li Englès, et l’autre li Franchois, ne on ne
vit oncques tel guerre, ne on ne se savoit en quoy apoiier; et avint
pluisseurs fois que, quant li Englès venoient devant une fortrèche
franchoise et il les requeroient à rendre, il s’en tournoient englès;
et sitost qu’il estoient parti, et li Franchois revenoient, il se
retournoient franchois. Dont par celle mannière et par tel variement
tamainte ville en fu violée, robée, arse et gastée, et tamains castiaux
abatus et reverssés pas terre, et tamains homs mors et perdus sans
merchy. Fº 174 rº.
P. 17, l. 22: espardre.--_Ms. A 8_: estendre.
P. 17, l. 26: à avoir besongne.--_Ms. A 8_: avoir à besoingnier.
P. 18, l. 5: Charuels.--_Ms. A 8_: Carlouet le Breton.
P. 18, l. 6: adamagoient.--_Ms. A 8_: dommageoient.
P. 18, l. 11: doubtance.--_Ms. A 8_: doubte. Fº 342 vº.
§ =677= et =678=. Assés tost et Cilz chastiaus.--_Ms. d’Amiens_: Or
vous diray dou signeur de Pons en Poito qu’il en avint. Assés tost
apriès chou que on fu revenu de Mont Paon, il se tray franchois, dont
li seigneur d’Engleterre eurent grant merveille, car il avoit estet
ja grant plenté en leurs chevauchies. Et si trestost qu’il fu tournés
franchois, il envoya souffissamment deffiier le ducq de Lancastre et
tous ses aidans, liquelx dus fu de ceste aventure durement courouchiés,
car li sirez de Pons li estoit ungs grans bourdons en son pays; et
quoyque li sires de Pons fust tournéz franchois, ma damme sa femme se
tint englesce, et dist que ja ne relenquiroit le roy d’Engleterre,
et ses maris avoit tort, quant il estoit devenus franchois. Enssi se
portoient lez parchons. Si envoiea li dus de Lancastre saisir le ville
de Pons en Poito, et i mist grant garnison de par lui et fuisson de
bonnes gens d’armes, et en fist souverain et cappitainne monseigneur
Aimmenon de Bourch, un hardi et sceur chevalier durement. Enssi se
tenoit li ville de Pons et la damme englesse, et li sires estoit
franchois, et couroit tous lez jours jusques as barrières de sa ville.
Fº 174 rº.
P. 18, l. 28: est là uns grans sires malement.--_Ms. A 8_: estoit
malement grant seigneur.
P. 18, l. 31: de le ville... englès.--_Ms. A 8_: qui se voloient tenir
englès, qui demouroient en la dite ville de Pons.
P. 19, l. 13: en l’autre.--_Ms. A 8_: dedens les autres.
P. 19, l. 18: les.--_Ms. A 8_: qui les.
P. 19, l. 20: cité.--_Ms. A 8_: ville.
P. 20, l. 2: ou de.--_Mss. A 8_ et _B 4_: pour aidier à.
P. 20, l. 16: de le cité... Touars.--_Ms. A 8_: de Touars et de la cité
de Poitiers. Fº 343 rº.
P. 21, l. 4: pertruisièrent.--_Ms. A 8_: percièrent.
§ =679= et =680=. Nous retourrons et Quant li Englès.--_Ms. d’Amiens_:
Or revenrons à monsigneur Bertran de Claiequin, connestable de Franche,
qui s’estoit tenus à Paris dallés le roy ung grant temps après le
revenue de Pont Volain, où il avoit rués jus les Englès, sicomme chi
dessus est recordé. Si regarda que pour emploiier son tamps, il se
trairoit en le Langhedoc et feroit guerre as fortereches qui englesces
se tenoient, car encorres y en avoit pluisseurs en Auviergne, en
Limozin, en Roherge, en Quersin et en Pieregorch, sans le pays de
Poito, de Saintonge et de le Rocelle; et par especial il y avoit un
chevalier englès en La Millau sus le marce de Rodès et de Montpellier,
qui s’appelloit messires Thummas de Wettevalle, qui là gisoit trop
honnerablement, car il tenoit le garnison et avoit tenu plus d’un an et
demy contre les Franchois, et ossi Le Roche Vauclere, quoyque li pays
d’environ fust tous tournés franchois; et faisoit li dis chevaliers
avoecques ses gens pluisseurs belles yssuez, et gaegnoit moult souvent
sour le pays pourveances et prisonniers à fuison, dont les plaintes
venoient au duc d’Ango et au roy de Franche. Se dist ly connestables
qu’il se trairoit celle part et que ce ne faisoit mies à souffrir. Si
fist ung très grant mandement à estre à Bourges en Berri dedens un
jour qu’il i assigna. Entroes qu’il ordonnoit ses besoingnes et qu’il
se pourveoit de gens d’armes, se departirent de Poito et dou ducq de
Lancastre li contes de Cantbruges et li contes de Pennebroucq, et
revinrent arrière en Engleterre, car li roys les remanda; et messires
Bertrans de Claiequin esploita fort et songneusement, et se parti
dou roy et s’en vint vers Orlyens. Si le sieuwoient touttes mannières
de gens d’armes, et vint à Bourges, et là trouva il le duc de Berri.
Si ne fissent gaires long sejour, mès se partirent de Bourges et
passèrent tout le pays à grant esploit, et entrèrent en Auviergne, et
s’en vinrent premierement devant une cité que on appelle Uzès, que li
Englès tenoient, qui se nommoient à monseigneur Thummas de Wettevalle
chi dessus. Si s’avisa li connestablez qu’il n’yroit plus avant, si
aroit pris la garnison d’Uzès, car elle grevoit trop le pays, et si
avoit adont avoecques lui toutte le fleur de le chevalerie de Franche
ou en partie: le ducq de Berri, le ducq de Bourbon, monseigneur Robert
d’Allenchon, conte du Perche, le conte de Saint Pol, messire Wallerant
de Lini, son fils, le dauffin d’Auviergne, messire Huge Daufin, le
conte de Bouloingne, messire Jehan de Bouloingne, le signeur de
Biaugeu, Ainbaut dou Plasciet et grant fuison de bonnes gens d’armes,
et estoient bien deus mil lanches. Si s’atrayrent tout chil signeur
et leurs routtes devant Uzès, et le fissent assaillir fortement et
durement, et y eut pluisseurs grans assaus et durs et faite tamainte
appertisse d’armes, car li seigneur et li chevalier qui là estoient,
ne s’espargnoient nient pour leur honneur, mès entroient en es fossés
qui estoient grans et parfons et plains d’aighe, et y avoient fait
ruer grant fuisson de faghos et d’estrain, sour quoy il passoient et
venoient comme bon chevalier et appert li ungs par l’autre, enssi
que par envie, jusques au piet dou mur, et montoient contremont, les
targes sour lor testes. Ensi et en cel estat s’aquitoient il trop bien
de l’assaillir, et ossi cil de le fortrèche d’iaux deffendre, car ils
jettoient pierres et baus et gros mangonniaux, dont il les reculloient
comme avanchiés qu’il fuissent, et les reboutoient à grant meschief
jusques ens es fossés. A l’un de ces assaux fu en grant peril messires
Wallerans de Lini, car il montoit contremont sa targe sour sa teste,
armés de touttes pièces et vestus d’un jake de kamoukas très rice et
bien ouvré; mès il fu ravallés d’une pierre par tel mannière que on le
reverssa ens es fossés, et tourna jusques ou bruech, et ne s’en fuist
jammès partis, qui ne l’euist secourut. Mès li contes de Saint Pol, ses
pères, et se bannière estoient là en present: si saillirent tantost
avant à le recousse, chevalier et escuier, et le traissent hors de
l’aighe et du broecq où il estoit si entouilliés que on ne savoit de
quel coulleur ses jaques estoit. En tel dangier et en tel aventure en y
eut pluisseurs celle journée, car oncques gens ne se deffendirent plus
aigrement ne plus vassaument comme cil qui dedens Uzès estoient. Quant
li connestables de France eut consideret les grans assaus et certains
que leurs gens faisoient, qui point ne s’espargnoient, et comment en
vain il se travilloient, si lez fist retraire arrière, et chascun
aller à son logeis pour yaux rafrescir et reposer, et ils meysmes se
retrayst, et vint en le tente monsigneur de Berri. Là furent mandé
li plus grant partie des seigneurs pour avoir consseil comment il se
maintenroient, car li dis connestablez leur remoustra qu’il avoient
ja esté là plus de quinse jours et assaiié le garnison de pluisseurs
assaux; mès, à ce qu’il pooit connoistre, elle estoit imprenable,
car elle estoit forte, et si avoit dedens trop bonne gens d’armes et
grant fuison: si leur pria tout autour que chascuns en volsist dire
sen intention. A ce dont estoit nouvellement venus en Auvignon deviers
le saint pape Gregoire XIe li dus d’Ango. Si avoit mandé le ducq de
Berri, son frère, et le ducq de Bourbon, le conte du Perche, le conte
de Saint Pol, le conte de Bouloingne, le dauffin d’Auvergne et aucun
de ces seigneurs qui là estoient, qu’il le venissent veoir pour avoir
consseil comment apriès les Pâques dont il estoient mout prochain, il
se poroient maintenir; car il ne volloit mies que ces chevauchies ne
chil concquès se fesissent sans lui. Si estoient enclin chil signeur à
yaux trère deviers Auvignon et venir veoir le dist ducq et savoir quel
cose il voroit dire et ordonner. Si fu conssilliet que chil signeur
se partiroient et venroient tout en Avignon excepté le connestable et
li Breton, mès chil là chevauceroient deviers Roherge et Limozin et
tenroient les camps à leur pooir. Si se deslogièrent de devant Uzès
touttes mannières de gens d’armes, et descendirent par routtes deviers
Avignon sicomme dessus est. Et li connestables li sires de Clichon, li
viscontes de Rohem, messires Loeis de Sausoire, marescaux de Franche,
li sires de Laval, li sires de Biaumannoir et grant fuisson de bonnes
gens d’armes de Bretaingne se retraissent plus amont deviers Limozin,
et là se missent en le routte dou connestable chil baron de Limozin,
messires Loeis de Melval, messires Raimmons de Maroeil et li sires de
Pierre Bufière, qui estoient tourné franchois.
Tantost apriès le Pasque que on compta en ce tamps l’an mil trois
cent settante et un, et que chil signeur dessus nommet eurent estet
en Auvignon veoir le pappe Grigoire et tenu leur pasque avoecq
lui et parlet au duc d’Ango, il se departirent et s’en revinrent
deviers le connestable qui seoit devant La Millau, où messires
Thummas de Wettevalle se tenoit et estoit tenus ung grant tamps mout
honnerablement; mès li dus d’Ango, quoyque vollentiers y fuist allés,
n’y ala mies adont, car li rois de Franche, ses frères, li manda,
entroes qu’il estoit en Avignon, qu’il venist parler à lui. Si s’avala
li dis dus deviers Lions sus le Rosne pour venir en Franche; et lis
dus de Berri, li dus de Bourbon, li comtes de Saint Pol, li comtes
du Perche, li comtes de Bouloingne, li daufins d’Auviergne, li sires
de Sulli, li sires de Biaugeu et li autre chevalerie de Franche se
traissent en Auviergne et vers Roherge où li connestablez de Franche
se tenoit à siège devant La Millau où il y eut pluisseurs assaux,
escarmuches et paleteis, et dura li dis sièges mout avant en l’esté.
Finablement chil de le garnison furent si astraint qu’il ne peurent
plus souffrir, car li dis chevaliers englès, qui là s’estoit tenus
plus de vint mois, considera que tous li pays d’environ estoit rendus
et tournés franchois, si ne pooit avoir secours ne comfort de nul
costé, pour quoy il commencha à traitiier deviers le connestable et les
seigneurs qui là estoient, que il renderoient le forterèce, se on le
volloit laissier partir et tous les siens, sauve leurs corps et leurs
biens. Li signeur de France entendirent ad ce tretiet, et se passa, et
partirent li dit Englès de La Millau sauvement, yaux et le leur, et
furent conduit jusques en Poito, que oncques n’y eurent point de damage.