Ik wull, wi weern noch kleen, Jehann,
Do weer de Welt so grot!
We seten op den Steen, Jehann,
Weest noch? by Nawers Sot.
An Heben sell de stille Maan,
Wi segen, wa he leep,
Un snacken, wa de Himmel hoch,
Un wa de Sot wul deep.
Weest noch, wa still dat weer, Jehann?
Dar röhr keen Blatt an Bom.
So is dat nu ni mehr, Jehann,
As höchstens noch in Drom.
Och ne, wenn do de Scheper sung—
Alleen in’t wide Feld:
Ni wahr, Jehann? dat weer en Ton—
De eenzige op de Welt.
Mitünner inne Schummerntid
Denn ward mi so to Mod,
Denn löppt mi’t langs den Rügg so hitt,
As domals bi den Sot.
Den dreih ik mi so hasti um,
As weer ik nich alleen:
Doch Allens, wat ik finn, Jehann,
Dat is—ik stah un ween.