_ De loco Teumeso et Minervæ Telchiniæ templo — Glisantis reliquiis et
loco Serpentis Caput dicto — monte et Jove Hypato — Harmatis et
Mycalessi urbium reliquiis ac Cereris Mycalessiæ templo — Aulide et
memorandis ibi. _
In hac eadem militari via vicus est Teumesus, ubi occultatam a Jove
Europam ferunt. Est alius quoque de Teumesia vulpe sermo, Bacchum
scilicet iratum ad Thebanorum perniciem eam feram ali voluisse; quæ quum
jam prope ab eo cane quem Procridi Erechthei filiæ Diana dono dedit
caperetur, et vulpes et canis in lapidem sunt conversi. Est Teumesi
etiam Minervæ Telchiniæ ædes, in qua nullum exstat signum. Quod cognomen
deæ attinet, licet suspicari partem Telchinum, qui in Cypro olim
habitabant, in Bœotiam profectam templum dedicasse Minervæ Telchiniæ.
(2) A Teumeso stadia ad lævam septem progressis Glisantis ruinas se
ostendunt, et ante illas ad viæ dexteram tumulus non magnus quum agresti
silva, tum consitis arboribus opacus. Illic humati sunt qui Ægialeum
Adrasti filium sunt ad bellum Thebanum secuti Argivorum proceres, et
inter eos Promachus, Parthenopæi filius. Ægialeo vero ipsi Pagis
monumentum erectum esse jam ante, dum Megarensium res persequerer,
exposui. (3) Qua Thebis recta Glisantem iter est, locum videas rudibus
lapidibus circumseptum: Serpentis Caput Thebani vocant. Serpentem enim,
quocunque ille fuerit nomine appellandus, e lustro suo caput ibi
exserentem gladio a Tiresia, quum forte illuc venisset, percussum
tradunt, atque ex eo nomen inditum loco. Supra Glisantem mons est cui
nomen Hypati (_Supremi_); et in eo Jovis Hypati est templum cum signo.
Torrentem fluvium præterlabentem Thermodontem nuncupant. Teumesum versus
et in viam quæ Chalcidem ducit regressis in conspectu est Chalcodontis
monumentum; qui, quum prœlium inter Thebanos et Eubœenses fieret, ab
Amphitryone est occisus. (4) Cernuntur exinde urbium Harmatis et
Mycalessi ruinæ; illi nomen, quod eo in loco, non autem ubi Thebani
dicunt, Amphiaraum cum curru in terræ voraginem descendisse Tanagræi
memorant. Mycalessum vero appellatam est utriusque populi consensus,
quod bos ea, quæ ad Thebas Cadmo et ejus sociis dux fuit, illic
immugierit. Quemadmodum vero Mycalessus fuerit ad vastitatem redacta,
est a me in ea quæ ad Atheniensium res pertinet historia expositum. (5)
In ea quæ ad mare spectat Mycalessi parte est Cereris Mycalessiæ fanum;
occludi illud singulis noctibus et aperiri ab Hercule ferunt; Herculem
vero ipsum de iis unum esse qui sunt Idæi Dactyli appellati. Ostenditur
eodem in loco hujusmodi miraculum: ad simulacri pedes poma omnia quæ
ferre solet autumnus exponunt; ea quam recentissima totum annum
perdurant. (6) Ad Euripi, qua parte is Eubœam a Bœotiorum finibus
dividit, et Mycalessiæ Cereris dexteram paulo longius progressis est
Aulis. Nuncupatam credunt ab Ogygis filia. Est ibi Dianæ ædes et duo in
ea e candido marmore signa; faces altera præfert, jaculanti est altera
similis. Ad ejus templi aram quum ex Calchantis vaticinio essent Græci
Iphigeniam immolaturi, pro puella cervam mactandam submisisse deam
perhibent. (7) Platani vero ejus cujus in Iliade mentionem facit
Homerus, nunc etiam in templo reliquam e trunco partem servant. Proditum
memoriæ est, quum Aulide per malaciam Græci detinerentur, ubi repente
secundi venti flare cœperunt, mactasse statim eos Dianæ quascumque vel
feminas vel mares habuit quisque in promptu hostias; mansisse dehinc
ritum ut quavis hostia Aulide litari possit. Ostenditur etiam fons ad
quem platanus enata est: et prope in colle Agamemnonis tabernaculi æneum
limen. (8) Palmæ vero ante ædem surgunt fructum ferentes, qui non est
omnino suavis edentibus uti palmulæ ex Palæstina; mitiorem tamen iis quæ
in Ionia leguntur. Homines non sane multi Aulidem incolunt, et ii omnes
figulinam exercent. Agrum istum et totam Mycalessi atque Harmotis
viciniam colunt Tanagræi.