_ De fluvio Clitore et Aroanii fluvii piscibus Pœciliæ dictis —
Clitoriorum urbe, ejusque memorandis — templo et signo Minervæ
Coriæ. _
Abest vero a Ladonis fontibus sexaginta stadia Clitoriorum urbs. Huc via
ducit ab fontibus Ladonis secundum Aroanium amnem angusto calle. Prope
ipsum Clitoriuum oppidum trajicitur Clitor amnis. Influit is in Aroanium
stadia haud plus septem procul ab oppido. (2) Pisces alit Aroanius tum
alios, tum eos, qui Pœciliæ appellantur. Hos haud absimilem turdorum
avium voci sonum fundere aiunt. Vidi ego sane pisces jam captos; vocem
vero eorum nullam audivi, quum tamen ad solis usque occasum circa
Aroanium commoratus essem, quod eo maxime tempore vocales eos esse
pisces dictitant. (3) Urbi Clitoriorum nomen ab Azanis filio est
impositum. Sita est plano loco; non magnis circumvallata montibus.
Templa in ea sunt maxime illustria, Cereris, Æsculapii, Ilithyiæ
[_Ilithyiarum?_] ** esse, et nullum numerum in iis constituit (_sc.
Homerus_); at Lycius Olen, ætate superior, hymnis Deliorum in usum et in
alios deos et in Ilithyiam ipsam conscriptis, Eulinon (_bene nentem_)
appellat, aperte ut eandem cum Pepromene (_fato_), et Saturno
antiquiorem esse dicit. (4) Est etiam apud Clitorios Dioscurorum
templum, Magnorum Deûm nomine, ab urbe sejunctum stadia ferme quattuor.
Signa his ænea exstant. Jam vero in montis vertice procul ab urbe stadia
triginta ædes est cum signo Minervæ Coriæ.