_ Arcadum res bellis gestæ memorantur — de vario ad Arcadiam aditu. _
Quod vero ad res eorum publicis totius gentis auspiciis gestas attinet,
antiquissima memoria est Iliacæ expeditionis; alterum locum obtinent quæ
pro Messeniis propugnantes gesserunt contra Lacedæmonios; eorundem etiam
partes fuerunt aliquæ in prœlio, quod ad Platæas contra Medos est
commissum. (2) Coacti potius necessitate quam benevolentia ducti
Spartanis contra Athenienses auxilia misere, et in Asiam cum Agesilao
transmiserunt, eosque in Bœotiam secuti Leuctricæ pugnæ interfuerunt.
Nam fuisse semper ambiguo se animo in Lacedæmonios, et alias
declararunt, et tunc maxime quum post Leuctricam cladem ab iis ad
Thebanos statim desciverunt. Iidem cum reliquis Græcis neque contra
Philippum Macedonum regem ad Chæroneam, neque contra Antipatrum in
Thessalia arma cepere; non tamen hostile quicquam in Græcos admisere.
(3) Quod vero ipsi quoque ad Thermopylas contra Gallos non prodierint,
eam nempe afferunt causam, veritos ne interea dum militaris ætas
abesset, Lacedæmonii agrum populationibus vexarent. Ad Achæorum
concilium promptius se quam ulli Græciæ populi aggregarunt. Hæc in
commune ab Arcadibus gesta; quæ vero gessisse privatim urbes acceperim,
suis illa locis referentur.
4. Ducit in Arcadiam ex Argivorum finibus trames is qui ab Hysiis juxta
Parthenium montem in agrum Tegeaticum pervadit. Duo vero alii accessus
circa Mantineam per Prinum et Climacem (_Scalas_); quorum posterior hic
latior et olim gradus in ea semita, per quos descendebatur, facti
fuerant. Perveniunt qui hinc descenderint ad vicum, cui nomen Melangea;
hinc etiam potabilis Mantinensibus aqua intra oppidum defluit. (5) Ubi e
Melangeis progressus septem fere stadiis ab urbe abfueris, occurrit fons
qui Meliastarum vocatur. Hi Meliastæ Bacchi orgia celebrant, cujus ad
fontem istum est delubrum. Est ibidem etiam Veneris Melænidis (_id est
Nigellæ_) fanum. Cognominis causa non alia est quam quod hominum coitus
non interdiu, uti pecudum, sed etsi non semper, plerumque tamen fiunt
noctu. (6) Trames alter, priore angustior, per Artemisium ducit. Hujus
montis supra jam mentionem feci, ubi esse in eo dixi Dianæ templum et
simulacrum, ac præterea fontes Inachi. Is qua per montem decurrit, inter
Argivos et Mantinenses terminus est; ubi vero ex illa via se averterit,
reliquum deinceps cursum per Argivam regionem absolvit: quare Inachum et
alii et Æschylus poeta Argivum fluvium appellant.