_ De Eurysthenis domo et Agidis — Echestrato regnante Lacedæmonii
ejiciunt Cynurenses — Labota regnante primum bellum Argivis inferunt
— de Lycurgo et Minoe legislatoribus — Lacedæmonii Archelao regnante
Ægyn urbem subigunt — Teleclo regnante finitimas urbes Pharin,
Amyclas et Geranthras expugnant — Alcamene regnante Charmidan in
Cretam mittunt, urbem Helos evertunt et Argivos vincunt. _
Eurysthene Aristodemi filio natu grandiore Agin genitum ferunt: a quo
sunt omnis Eurysthenis posteritas Agidæ appellati. Agide regnante,
Patreum Preugenis filium in condenda urbe in Achaia, quam de nomine
Patrei nostra etiam ætate Patras vocant, adjuverunt Lacedæmonii: comites
etiam ac socios cum Grai Echelæ filio, Penthili nepote, Orestis
pronepote, in coloniam classe transmittenti, miserunt. Et ille quidem
regionem eam, quæ inter Ioniam et Mysos est, cui ætate nostra Æolidi
nomen, occupaturus erat, quum avus ejus Penthilus multo ante Lesbon,
insulam Æolidis hujus continenti adjacentem, cepisset. (2) At Echestrato
Agidis filio Spartæ regnum obtinente Lacedæmonii Cynurenses omnes, qui
militari essent ætate, sedibus suis expulerunt. Crimini datum, quod
prædones e Cynuriaco agro Argivorum, qui sibi consanguinei essent, fines
populationibus infestos redderent, ipsique adeo Cynurenses in eundem
agrum aperte excursiones facerent. Cynurenses quidem ab Argivis oriundos
esse et in coloniam a Cynuro Persei filio deductos memoriæ proditum est.
(3) Non multis post annis Echestrato Labotas filius in regnum succedit.
Hunc Labotan Herodotus in historia, ubi de Crœso scripsit, in Lycurgi,
qui Lacedæmoniis leges tulit, tutela fuisse scribit: sed Leobotan eum,
non Labotan, nominat. Hoc regnante, Lacedæmonii tunc primum Argivis
bellum indicunt. Crimini eis datum est, quod Cynurensem agrum, quem
armis ipsi cepissent, invaserint, quodque finitimos socios suos ad
defectionem sollicitarint. In eo tamen bello ab neutris quicquam memoria
dignum gestum est. (4) Jam qui in regnum ex hac familia successerunt
Labotæ, videlicet Doryssum et Doryssi filium Agesilaum, mors brevi
utrumque oppressit. Agesilao regnante Lycurgus Lacedæmoniis leges tulit:
quas eum nonnulli ab oraculo Delphico accepisse, alii autem Cretensium
scita eum ascivisse tradidere. Cretenses ipsi istas Minoi leges acceptas
referunt, de quibus illum ferunt non sine deo consuluisse: quod ipsum
his versibus videtur Homerus de Minois legibus significare voluisse:
Quas inter magni Minois regia Cnosos,
quem Jovis alloquium ter terna æstate beavit.
Verum de Lycurgo in iis quæ posterius sequuntur memorabo. (5) Agesilaus
Archelaum filium sibi successorem reliquit. Dum hic regnaret,
Lacedæmonii unam de finitimis urbibus, Ægyn nomine, bello subactam
exciderunt, Ægytarum ad Arcadas defectionem metuentes. In ea urbe
evertenda opem tulit Archelao Charillus ex altera familia rex: cujus
ductu quæ gesserint Lacedæmonii, tunc exponemus, quum eorum res gestas
stylo persequemur, qui Eurypontidæ sunt appellati. (6) Archelao Teleclus
nascitur. Hujus temporibus Lacedæmonii finitima oppida, Amyclas, Pharin,
Geranthras, quas Achæi occuparant, bello captas everterunt. Ex his
Pharitæ et Geranthratæ Dorum adventu territi, certis conditionibus e
Peloponneso decesserant: Amyclæenses vero non sunt illi quidem primo
impetu ejecti, sed acriter resistentes, belli diuturnitate superati,
quum multa prius virtutis documenta dedissent. Id ipsi Dores tropæo de
Amyclæensibus erecto testati sunt, quod nihil scilicet illis temporibus,
quod memoriæ consecrarent, dignius gessisse ipsi sibi visi sunt. Non ita
multo post Teleclus a Messeniis in Dianæ occiditur. Templum id in vico
fuit, quæ Limnæ appellatæ sunt, inter Laconici et Messeniaci agri fines.
(7) Teleclo demortuo successit Alcamenes filius. Eo regnante Lacedæmonii
Charmidam Euthyis filium, Spartanorum de optimatibus unum, in Cretam
mittunt, qui ortas inter Cretenses seditiones comprimat, persuadeatque
ut oppidis, quæ a mari longius sita vel alioquin invalida essent,
relictis in ea, quæ navibus appellendis essent opportuna, demigrarent.
Eodem tempore maritimum etiam oppidum, quod ab Achæis tenebatur, Helos
nomine, everterunt; et Helotis auxilia ferentes Argivos prœlio vicerunt.