La Redaktoro multe bedauxras, ke tiom da abonintoj plendis pri la
prokrasto de la sendo de siaj Gazetoj. Se oni sendis la abonpagon
rekte al li, The Esperantist cxiam estas sendita per revenanta
posxto. Sed, se la abonpago estas sendita al alilanda ricevanto,
la sendo ne povas esti tiel rapida. Kaj la Redaktoro ne povas
garantii tujan sendon de alilandaj Gazetoj, menditaj per li. Li
nur scias, ke la nomoj de la abonintoj cxiam estas tuj senditaj al la
Redaktoro de la mendita Gazeto, kaj ne plu estas lia afero.
_Cunctari funestissimum_ sxajne ne estas alilanda Esperanta proverbo.
Gxi estu la Angla devizo!
* * *
Cxiuj Esperantistoj multe gxojos lerni ke Sro. de Menil finigis sian
grandan laboron, kaj ke la _Tutmonda Jarlibro_ eldonigxis. La unua
parto estas la nova _Adresaro_, kaj poste trovigxas milojn da adresoj
el cxiuj landoj. Ja utilega verko, pri kiu la sindonema arangxinto
devis esti multe zorginta. Cxiuj Esperantistoj devas havi tiun cxi
libron, kiu enhavas multe da interesaj avizoj, krom la granda nomaro.
(Price 2s., post free, from the Librarian).
* * *
Ni ankaux ricevis _Esperanto in dieci Lezioni_, Itala traduko de
_Esperanto en dix Lecons_ (kosto 8d., verkita de Conte Albert
Gallois, en Riolunato). Gxi helpu la Italan movadon.
* * *
Ankoraux alia lernolibro por niaj Francaj amikoj! Tiun cxi fojon,
estas: _Cours Commercial d'Esperanto_ (1s. 6d. post free) verkita de
Leon Marissauxx, 139 pagxoj; estas nur unu vorto por priskribi tiun
cxi verkon: _Bonega._ Tie oni, de la komenco gxis la fino, nur legas
frazojn utilaj por cxiutaga vivado, kaj ne la fantaziajn frazojn,
kiuj kutime trovigxas en cxiaj lernolibroj. Kaj la pecetoj por
traduki estas mallongaj kaj utilaj skizoj pri gxeneralaj aferoj, tiel
kiel Bicikletoj, Logxejoj, Leteroj, k.t.p. Ni esperu ke ni Angloj
baldaux posedos tian utilan komercan lernolibron.
* * *
_"La fundo de l'Mizero,"_ tradukajxo de Pola rakonto farita de la
bonekonata Esperantisto "Kabe." Kosto 8d., 91 pagxoj. Nia Pola
Samideano donis al ni tre lertan tradukon, sed ni korege konsilas
almenaux niajn legantinojn, ke ili ne legu tiun cxi verkon. Priskribo
pri la vivado de lepruloj, rakontita en maniero kiel eble plej
terura, ne tute estas legindajxo por ili, kaj, ni estas preskaux
certaj ke, se iaj el niaj legantoj komencos la tralegon de tiu
cxi verko, ili senhalte legados gxis la fino, kaj pensos kune kun
ni, ke estus estinta pli bone, se la unua pagxo estis estinta la
lasta, kaj ke la restajxo skribigxis neniam. Ne gxin legu, do, cxar
gxi alportos nenian bonon.
* * *
_"Por niaj filoj kiam ili estos dek-ok jaraj"_ de Dro. Paul Rodet
enhavas 32 pagxojn, kaj traktas tre lerte pri malfacila kaj delikata
temo. Ni konsilas ke la junuloj, por kiuj la libro estis skribita,
gxin legu.
* * *
Eble, kiam oni vidos tiujn cxi vortojn, oni jam estos vidinta sur
cxiuj Anglaj stacidomaj librejoj malgrandan rugxan Esperantan
lernolibreton, kies kosto estas unu penco. La unua eldono estas cent
mil ekzempleroj, kaj espereble multe helpos je la rapida disvastigo
de la lingvo inter cxiuj Anglaj-parolantaj popoloj.
* * *
Ni deziras danki la multe da amikoj kiuj sendis prestrancxajxojn.
Tiuj cxi cxiam plioftigxas, kaj nepre pruvas la progreson de nia kara
afero.
* * *
Sukcesa parolado estis farita en la Urbestrejo de Dovero, kaj nova
sed forta grupo tie fondigxis, dank' al la klopodoj de kelkaj
fervoraj tieaj kunbatalantoj. La Hon. Sek. de la Grupo estas _Sro. H.
R. Geddes, Northumberland House, Dover_, kaj ni esperas, ke tiuj
legantoj, kiuj vizitos Doveron dum la somero, povos helpi lian
propagandon. La nova Grupo eldonas belajn posxtkartojn, ilustrantaj
la uzo de la Esperantaj participoj per la verbo Trinki! Kosto 8
pencoj la dekduo, 4s. la cento, de 41, Outer Temple, W.C.
* * *
Nova Grupo ankaux fondigxis en Brightono, laux la anonco en No. 8.
_Frauxlino C. Oxenford_, 16, _Upper Westbourne Villas, Hove, Sussex_,
estas la tiea Hon. Sek., kaj tre plezure ricevos la nomojn de novaj
Membroj, kaj proponoj pri la Grupaj aferoj.
* * *
Amikoj en Ilfordo, Essex, ankaux sukcesis krei novan grupon apud
Londono. La Hon. Sek. estas Sro. W. A. Jeffery, 42, Park Road,
Ilford, E.
* * *
La _Unua Akto_ de _La Ventego_ finigxas en tiu cxi numero. Laux la
anonco en No. 8, la tuta Dramo eldonigxos en aparta libro (kosto 1
fr. 50) tuj kiam suficxe da mendoj estos ricevitaj. Anstataux la
Ventega pagxo, estontaj numeroj enhavos pagxon en la Angla
lingvo titolata _"Our Progress"_ kiu enhavos avizojn pri la novaj
pruvoj de nia progreso.
* * *
La Maltaj Esperantistoj enkondukis tre sukcesan novajxon. Anstataux
ol kunveni en cxambro, ili fotografiigxis, faris tre plezuran
ekskursion en la kamparon, kaj auxskultis Esperantan rakonton, kaj
priparolis Esperante tre plezure. Certe, dum la varma vetero, tiu cxi
plano estas kiel eble plej multe sekvinda.
* * *
Kara Sinjoro Redaktoro, Doni Esperantajn nomojn al Esperantaj
aferoj estas sendube tre bona regulo. Sed oni ne havas ian
rajton sxangxi la titolon de la plej granda verko de la granda
Doktoro. _Krestomatio_ estas ordinara vorto en la Franca kaj Greka
lingvoj por _Ekzemplero klasika de la literaturo de ia lingvo_. Estus
tute facile aldoni al via anonco de tiu cxi fama libro kelkajn
priskribantajn vortojn, sed la titolo devas resti, cxar gxi estas nun
parto de la _historio de la lingvo_. Via fidele, R. J. Lloyd (D.
Litt., M.A.).
(N.B.--Pravege! sed ne estas dubo ia, ke la titolo de la verko multe
malhelpas je gxia disvastigxo tie cxi.--Red.).