Charles... savoir faisons... que, oÿe la supplication des varlèz
cordoanniers de nostre bonne ville de Paris, requeranz que, comme
passéz sont V ans ou environ, ilz aient ordonné à faire celebrer en
l’onneur de monseigneur Saint Crespin le petit [et Saint Crespinien]
qui furent cordoanniers en leur vivant, une messe chascune sepmaine au
jour du lundi en l’église Nostre-Dame de Paris devant les ymages des
diz sains, et aient en devocion de y faire une confrarie le jour de
la solempnité des diz sains chascun an, nous leur vueillions donner
congié de ordonner, faire et tenir la dicte confrarie par la maniere
que autres confraries sont faictes à Paris en cas semblable, nous...
octroions par la teneur de ces lettres que ilz puissent fonder, faire
et tenir la dicte confrarie en nostre dicte ville de Paris chascun an
perpetuelment le jour de la solempnité des diz sains et ycelle faire
crier par la dicte ville à la clochete, faire et establir procureurs
pour les faiz d’icelle confrarie poursuir, et [faire] toutes autres
choses appartenans à fait de confrarie par la maniere que acoustumé
est de faire es autres confraries qui y sont faictes es solempnitéz
d’autres sains... Donné au bois de Vincennes le VIe jour de juillet
l’an de grace MCCCLXXIX et le XVIe de nostre regne.
(Trésor des Chartes, reg. 118, pièce 456.)