Verena diu edel meit,
als, uns daz puch von ir seit.
Die was ---- ----
und ez quam also,
Do der cheiser maximian [106c]
furt mauricium mit im dan
Her gen deutschen landen,
si begunde nach im belangen
So ser, daz si im fuor nach,
wanne vil gerne si in sach.
Verena was ein christenin,
und do si quam ze meilan in,
Die geuangen christen
die heimpt si an den vristen
Vnd bechlagt mit in ir not,
dar zue si in helfe pot
Mit trinchen und mit ezzen.
uerena, die vermezzen,
Si lie durch nieman daz
durch vorhte noch durch haz,
Swa die christen warn erslagen
und auch da si warn begraben,
Die staete suocht si alle tage
mit weinen vnd mit chlage.
Mit reinem leben was si sus
pei einem, der hiez, maximus.
Nu wart ir schir alda geseit,
daz mauricij schar preit
Durch got wer erslagen,
daz begunde die vrowe chlagen
Vnd wolde nicht leng'r da bestan,
si fuor ub'r die alben dan
Vnd ze einem wazzer si quam,
daz ist genant aram.
Alda vant si einen man,
der gevlohen was chomen dan
Der sagt ir die rechten maere,
wie ez mauricio ergangen waer.
Davon wolt si nicht furbaz,
in einer chlause si da saz
Mit chlage und mit leide.
da warn inne reine meide,
Der leben was also gestalt,
si waer iunc oder alt,
Daz si anders lebte nicht
wan chraut, arbaiz und anders nicht,
Des lebte si daz gantz iar; [106d]
daz quam auch von ier werch dar
Vnd des tages ein lutzel brot,
daz man igleicher pot.
Nu was dapei ein getwerch,
daz verchauft den meiden ir werch
Vnd chauft in da mit ettewaz,
daz die samenunge gaz
Anders lebten die vrowen nicht,
gab man in aber immer icht,
Des enpizzen si nimmer
und gabens durch got immer.
Sus was gestalt ir reines leben.
got hat verene den geist gegeben,
Daz man vber al daz lant
ir leben vil rein erchant,
Daz man sei het fur heilic gar,
daz auch si was furwar.
Wan got durch sei tet wunder
mit zeihen besunder.
Auzsetzig behaft macht si slecht,
plint, chrump macht si gerecht.
Solcher dinge tet si vil
mit got auff daz zil,
Daz man sei d'r meide muet'r nant
weiten uber al daz lant.
Nu was in der gegent da
ein richter sam anderswa,
Der het got gar verchorn.
dem was der meide leben zorn,
Vnd daz man ier so wol sprach;
mit zorn er daz an ier rach,
Wan er die vrowen vie,
dehein gut er ier nie geschehen lie.
Doch quam zaller zeit zu ir
ein liechter iungelinch fir[3],
Der pot ier guten trost,
si wurde schir da von erlost.
Doch vragt si in, wer er wer?
do sprach er offenwaer,
Er waer ir mag mauricius,
und mit der rede alsus
Quamen zu mauricio hin in [107a]
alle die gesellen sin
Und gruezten die vrowen schone,
damit schieden si davon.
Nu wart derselbe richter
vberladen mit sichtum swer,
Der gedacht rechte wider,
er lief hin und viel nider
Chlagunde für die reinen meit
und seinen sichtvm er ir chleit.
Doch pat si got umb in,
der richter gie gesunt hin
Vnd mit grozzer gedult
bat im vergeben sein schulde.
Daz was ysa getan,
die magt wart do leidich lan
Vnd gie zu iern swestern wider,
da si got diente sider.
Nu quamen die swest'r auch in not,
daz si ninder heten prot
Vnd grozzen hunger liten
doch mit dultichleichen siten.
Ier werches acht man nicht ein har,
wan ez was ein hunger iar.
Do verena die not ersach,
zu got von himel si do sprach:
Wan du deiner geschefte gist
ier leibnar zu rechter frist,
Jesu christ, du waist wol,
wez dein gesinde leben schol.
Do si daz vollen gesprach,
vor der chlause man ligen sach
Viertzig sekche mit mele vol.
er gedacht ir not da wol,
Wan daz prot wuchs in ier munde,
daz si lange vñ manic stunde
Heten da von ier leipnar,
des lobt got die rein schar.
Nu was verena, die genende,
chumen an ier lebens ende,
Vnd do si nu siech wart,
ier andacht sich nie verchart.
Da si vercheren scholt daz leben [107b]
und den geist widergeben,
Do quam unser vrowe dar
mit der hymelischen schar;
Vnd do verena sei ersach,
zu gotes mueter si do sprach:
Waz gernde han ich,
daz gotes mueter siechet mich?
Do sprach unser vrowe zu ier:
verena, volge mir,
Da hin, da du immer mer
vreude hast ane ser.
Mit der rede si verschied,
got ir sele da beriet
Der ewigen gnaden.
die vrowe wart begraben
In der chlause alda,
die noch haizzet z'rzyaca[4][Nachtrag 3],
Da got wol scheinen lie,
daz er sei minte hie.
Wand nieman wirt entwert,
der rechter dinge an sei gert.
Nu derhoret got dehein pet so gern,
so daz wir seiner hulden gern,
Dem gibt er, der die suohet,
vil gern, swer ir geruhet
Mit hertzen und mit andacht.
daz wir ze hulden in werden pracht,
Des helf uns maria
und ir dirne uerena. amen.
* * * * *