Ich vogt vlreich von matsch der Elter graue zu Kirchbergk Haubtmann
an der Etsch vnd wir der gesworen Ratt an Meran edel vnd ander yecz
an Stat vnd als Oebrist verweser des durchleuchtigen Hochgeboren
fuͤrsten vnd herrn herczog Sigmunds Herczog zu Oesterreich vnd grauen
zu tirol etc. vnsers gnaͤdigen lieben Hern vnd seiner lanndschafft
der Egenannten graffschafft Bekennen als weilendt der edel Strenng
Ritter Herr Oswalt von wolkenstain zwen slussel dy zu vnsers benanten
gnaͤdigen Herrn Herczog Sigmunds etc. vnd seiner lanndtschaft
verschreibung vnd ander etc. gehören dy selben sluͤssel vns nach
abgang seines lebens widervmb In Ratt schon verpetschatt geben vnd
geantwurtt sindt, von seiner gemahel Margarethen geboren von Swongew
Also sagen wir dye benanten witib vnd alle ir vnd des benanten Herrn
Oswaltz säligen Irs gemahels Erben Quitt ledig vnd loß getreulich vnd
vngeuarlich zu vrchundt versigelt mit der Stat an Meran Insiegel vnd
mein des Hawptmans petschatt Geben an Meran Am Montag Nach petri ad
vincula nachster Anno etc. Im xlv^{to}
Original auf Papier.