Won tanczens werdens niemer vol.
*** Sey hieten für die knaben gsungen, 25
Stayn geworffen und gesprungen,
Da was es in nicht gar gewon,
Dar umb so liessen seu dar von.
Was scholt man in dann ze trinken tragen?
Die chruog die warend all zerschlagen. 30
Also kam daz ander geschray:
Pheiff auf, lieber Gunterfay!
Des antwurt er: Ich mag nicht me.
Wisst, mir tuet der schedel we.
Daz ist mir läid, nu hab es dir! 35
Sprach do Pertschi mit begir,
So schullen wir eins singen,
Ze ring umb älleu springen.
Der red warend sey vil fro.
Des huob do Pertschi an also: 40
** Daas schaffet alz die minn, die minn,
Daas schaffet alz die minn, die minn,
Daz wir leben ane syynn,
Daz wir leben aneee synn.
Daz schaffet als der wein, der wein, #38d
Daz wir müssen froleich sein.
Daz schaffet alz daz gold, daz gold,
Daz niemant ist dem andern holt.
Daz schaffet alz daz phand, daz phand, 5
Daz man porget so ze hand.
Daz schaffet alz daz spil, daz spil,
Daz ich nit mag behalten vil.
*** Et cetera, daz ward so lang,
Daz yeder auf ze lesten sprang 10
Mit einem füss, dar umb daz,
Daz er geruwen mocht dester bas
An dem andern, so er gelag,
An tretten, sam ein fauler mag.
Söleich gnepfen und ein hopphen, 15
Hupfen lupfen und ein zoppen
Hiet sich an dem ring derhaben,
Ir gsacht es nie pey ewern tagen.
Des gie dem singer dar nach ab.
Er sprach: Nu we mir heut den tag! 20
Daz ich nicht kan des liedes me,
Daz tuot mir in der versenn we.
Die andern warend tanczens vol,
Yeder sprach: So tuocz mir wol.
Seu vielent nider in daz gras 25
Und ruowten da, das fuogt in bas.
Des nam do Galgenswanch ein äy
Und sprang her gen dem Gunterfay.
Er sprach: Se hin und mach ein guocz!
Ich pin nicht eines chranchen muocz. 30
Do nu der pfeiffer hiet sein lon,
Er schluog dar an, es donet schon.
Galgenswank fro Schurenprand
Nam pey ir sneweissen hand
Und spranch da hin mit seinen gesellen 35
Röschleich gar an alles stellen,
Er feget umb und umb und umb,
Daz seu vil schiere warind tumb
Worden von der selben geschicht.
Do was der pheiffer nach dersticht 40
Von dem staub, der in in kam,
Und leczet so den guoten man,
Daz er muost lassen von dem gäyl.
Daz cham den andern auch ze häyl,
Den von trümelen swindlent wart, #39
Und vielent nider an der vart.
Daz tet dem vorspringer zorn,
Er schre: Ich han ein äy verlorn
An dem choczen spilman, 5
Des muoss er heut den hoger han!
Dar zuo geb ym got den rampf!
Daz schol er han von mir ze danch.
Warens vor ym gras gelegen,
Erst do muostens schlaffens phlegen. 10
Doch so snarchelt Uocz so ser
Und stanch so saur durch frowen er,
Daz ym daz gnafzgen gar vergieng.
Da mit der Schreiber ane vieng
Und sprach: Stet auf, wir müssen springen, 15
Ich chan ein hübschs, daz wil ich singen.
Seiner red der warens fro.
Da mit huob er an also:
** Wem schol ichs geben,
Ze fröden seinem leben?
Was ist das? 20
Sagt uns, herre, was?
Es ist fro Gredel Erenfluoch; wem fuogt sey bas?
Es ist fro Gredel Erenfluoch; wem fuogt sey bas?
Anders niempt, dann mir;
Sey ist meins herczen gir.
Jächel Gumpost, seysts ein gesell, so hab sie dir!
Jächel Gumpost, seysts ein gesell, so hab sey dir! 25
Nu muoss mirs got gesegen!
Wie schon wil ich ir phlegen!
Wem schol ichs geben,
Ze fröden seinem leben?
Waz ist daz?
Sagt uns, herre, was?
Es ist die schon fro Genepferin; wem fuogt sey bas? 30
Es ist die schon fro Genepferin: wem fuogt sey bas?
Anders niempt, dann mir;
Sey ist meins herczen gir.
Rüfli Lechspiss, pist ein gesell, so hab sey dir!
Nuo muoss mirs got gesegen!
Wie schon wil ich ir phlegen! 35
*** Et cetera so gie daz lied,
Bis daz yeder seinen hiet,
Die da warent an dem tancz.
Da mit so was die fröde gancz.
Do sprungen plümlen durch den cle, 40
Von liebe schayden, daz tuot we,
Sungen sey da in dem gras.
Des cham do Pertschi Trieffnas
Und macht sich hin zuo Gunterfay.
Er sprach: Pfeiff auf und nim daz äy! 45
Da mit her Colman cham der alt
Und fro Perchta mit gewalt. #39b
Se hin zway, der ist vil me,
Und pfeiff uns nach der alten ee
Eines, sprachen seu zuo im.
Perschti hiet einn hohen sinn 5
Und sprach: So hab dir dreu von mir
Und pheiff mir nach meines herczen gir
Nach dem neuwen sitten eins!
Der alten chan ich aller cheins.
Der stoss was gross von inen payden, 10
Doch warts ze lesten also gschayden,
Daz Colman und fro Laychdenman
Hofieren scholten vor hin an
Und dem preutgom tanczen vor
Mit der praut vil hoh enbor, 15
Die Genepferin und Grabinsgaden
Scholten in den zagel haben.
Secht do huob sich erst ein swingen,
Ochsendringen, kälberspringen!
Der spilman pfeyff, daz nie gestaub 20
Nie gedont noch nie geflog.
Do chnatens hin, do trattens her,
Nicht anders sam die wilden per.
We wie, wie höh seu sprungen,
Ir armen auf swungen! 25
Der ein der schre: Hie ju, hy jo!
Der ander: Jo, wie get es so?
Storkenpäyn der waz vil jung
Und mass ym selber einen sprung
Also höh, in daucht er fluog. 30
Dez tet er wider einen zuog
Also geswind, daz er gesass
Mit dem hintern in dem gras.
Die Mäczli warent also also rüg
Und sprungen her so gar gefüg, 35
Daz man in oft ich wayss nit wie
Hin auf gesach bis an die knie.
Hilden haubtloch was ze weyt,
Dar umb ir an derselben zeit
Daz tüttel aus dem puosem sprang. 40
Tanczens gyr sey dar zuo twang.
Hüdellein der ward so hayss,
Daz sey den kittel vor auf rayss;
Des sach man ir die iren do
Und macht vil mängeu herczen fro. 45
Seu schreuwen all: Sey wil ein man, #39c
Sey hat ein maul und har dar an.
Chnopfeln, nestell prachent vil,
Und recht, sam ich euchs kurczen wil,
Von dem gumpen und gedreng 5
Ward der tancz so übrigs eng,
Daz der preutgom wisst nicht, wo
Er was und keren scholt aldo.
Er was gesteket in der mitt
Sam in dem sne ein andrer schlitt. 10
Waz scholt daz do die gsellen btragen,
Die der minn mit grifflen phlagen?
Pertschi zuo dem trüller schre:
Läss dar von und pheiff nicht me!
Der spilman tet nach seinem sin, 15
Da mit so was der tancz da hin.
Do woltens gesessen sein da nider;
Des schre her Troll hinwider wider:
Die weil es in der hicze sey,
Macht euch an den ring hie pey! 20
Ich wil euch sunderleichen singen
Eins, daz füget wol ze springen.
Der red wurdens alle fro.
Da mit so huob er an also:
** Es ass mein vatter Eberhart 25
Und tranch in eyn ein rympart
Es schlieff mein vetter Oll, her Oll, Hol, her
Oll, her Oll, her Oll, her Oll, her Oll, her Oll, her Oll,
Es schlie ie ief her Oll Oll Oll Oll,
Es sang mein sun der Perchtold 30
Und sprang mein nef her Hylpold,
Es tanczt her Scholl, lo, lo, lo, loll, lo, lo,
Lo, lo, lo, lo, loll, lo, lo, lo, lo, lo, lo, lo, loll,
Es swanczt her Scho o, o, o, o, o oll
*** Et cetera. Er sang ye bas; 35
Und do es an dem besten was,
Da sât der tiefel aschen dreyn,
Daz schuoff der laidig Eysengreyn,
Der wolt in Greduln minn verprennen
Und sey des lassen werden innen 40
Mit chraczlen haymleich in der hand.
Daz stuond nicht wol, es waz ein scand,
Won die junchfraw an der vart
Von dem chreczen pluotend wart.
Dar umb so cham der gpauren schimph 45
Nach ir gewon ze ungelymph.