A tres excellent, haut et puissant son tres cher et ame cousin
Philippe, par la grace de Dieu Roy de France, Challes, par cele meisme
grace Roy de Jerusalem et de Sezile, saluz et continuel accroissement
de gloire et de toutes honneurs. Tres cher cousin, nous vous feimes
assavoir par noz autres letres, encore na gueres, le point et lestat
u quel nostre guerre estoit adonques; et vous escripsimes entre les
autres choses, comme Robert nostre ainzne fils Duc de Calabre estoit en
nostre Isle de Sezile, o tout nostre efforz de genz darmes de nostre
Roiaume, tant françois comme latins, prouvenzaus, et dautres nacions,
et entendoit tant com il povoit a nostre guerre poursuivre. Et que
pour le departement du Roy Darragon de la dite Isle, le quel nous ne
povions plus retenir a poursuire icele guerre, il nous convenoit de
necessite de refere nostre armee et de renvoier la en la dite Isle, et
denvoier avec il, en aide et en secours de nostro devant dit filz et
de sa compaignie, ce pou de gent qui demoure nous estoit: et pour ce,
biau cousin, car nous savions bien que après ce que nous aurions envoie
celi secours nous devions demourer auques tout seul et avoir necessite
de gent darmes, vous priames nous, si chierement com nous peumes plus,
que vous nous voussessiez secourre et aidier de nous envoier, pour
estre avec nous par espace daucun tamps, aucune quantite de genz
darmes. Orendroit, biau cousin, vous fesons nous assavoir que nous,
selonc nostre desus dit propos, appareillames et feimes nostre de sus
dite armee bonne et fort de quarante gros vaissiaus, et i meimes tout
le demourant de la gent darmes que nous avions, les quex furent entour
siz cent homes a cheval, et grant compaignie de petons, sanz la gent de
mer, la quele fut si grant com il afferi a larmement des diz vaissiaus;
et envoiames aveques eaus Philippe nostre fils prince de Tarante, au
quel baillames nous conseil assez bon et souffisant de gent darmes usee
et esprouvee, pour li conseiller et adrecier. Si en est avenu, biau
cousin, un cas mout orrible et mout contraire, si comme ci desouz se
contient. Car puis que il furent passez en Sezile, et orent prise terre
pres dune cite que len appelle Trapes, le quel passage firent il mout
bien, et sanz avoir nul nuisement en mer, il tindrent siege par pou
de iours a cele cite. Et quant il orent veu que le siege nestoit pas
bien profitable, il ordonerent et firent recoillir tout leur harnois et
leur choses es galees, pour ce que elles sen allassent a un port qui
est pres dileques; et le prince et la chevalerie toute i devoient aler
par terre, pour entrer dedenz, et aler sen au duc, et soi assambler
avec li. Si avint que, si comme le prince et les autres sen aloient,
il encontrerent Frederic o tout son povoir quil avoit congregie de
toutes parz pour eaus courre sus; et quant il virent quil ne povoient
la bataille eschiver, il se combatirent a li; et ia soit ce que il
desconfississent et venquissent sa premiere bataille, toutevoies a la
grant multitude de gent tant a cheval comme a pie qui leur courrurent
sus, il ne porent durer; ainz les convint a la fin perdre, si que
pluseurs i furent morz et le prince et la greigneur part des Baronz et
des gentilx homes de sa compaignie pris. Les Galees voirement sen sont
retournees par de ça sans avoir nuisement ne empecchement autre, et
les avons avec nous. Pour lequel avenement, biau cousin, nous sommes
devenuz a si tres grant sousfraite de gent darmes que nous nen avons en
Sezile avec notre devant dit filz le duc que cele gent seulement quil
a euce puis son passage, nen avons par deça de qui nous le puissions
secourre. Si que ia soit ce que cesti avenement desus dit nous soit
assez grief et damageus, nous doutons trop que autre greigneur et plus
perilleus ne sensuie de cesti; car se dou duc et de sa gent avenist
chose contraire (la quele ia naviegne), nous serions emperil si comme
davoir tout perdu. Car ia soit ce quil soient tiex et tanz que il
nont doute que les annemis les puissent soudainement nuire, sauve se
dieu leur voulsist estre ouvertement contraire, toutevoies secourre
les convint il, et sil sont secourruz hastivement, nostre besoigne
retournent bien a son premier estat. Et pour ce, biau cousin, nous
recourrons encore a vous comme _a celi qui estes chief et soustenance
de vostre lignage_, et en qui avons et devons avoir greigneur esperance
que en autre après dieu; et vous prions comfiablement et de cuer tan
chierement com nous povons plus, que il vous pleise de veoir et de
penser com cesti cas est grant et com il est tres necessaire et nous
voilliez aidier et secourre daucune quantite de gent darmes. Car ia
soit ce, chier cousin, que vous aiez aucune guerre en voz parties
de la on set bien toutevoies que voz mains sont si puissanz et si
longues que vous le povez bien estandre es vostres sil vous plaist; et
vraiement, biau cousin, cesti secours que vous nous ferez orendroit,
quelque il soit ou petit ou grant, nous est orendroit plus necessaire
et sera mielz profitable que le greigneur autre fois. Car adonques par
avanture nostre besoingne pourroit estre si au desouz que nule aide li
proufiteroit. Escript a Naples, le VIII iour de Decembre.
_Dagli archivi del reame di Francia, J. 513, 48._