ce qu'appercevant, les chiens se jetteront entre les jambes de leurs
maîtres et n'en voudront partir, car ils craignent fort les esprits.
D'autrefois quelqu'un viendra tirer ou emporter la couverture du lit, se
mettra dessus ou dessous icelle, ou se pourmenera par la chambre. On a veu
des gens à cheval ou à pied comme du feu, qu'on cognoissoit bien et qui
estoyent morts auparavant. Parfois aussi ceux qui estoyent morts en
bataille ou en leur lict venoyent appeler les leurs, qui les cognoissoyent
à la voix. Souventes fois on a veu la nuict des esprits trainans les pieds,
toussans et souspirans, lesquels estans interroguez, se disoyent estre
l'esprit de cestui ou de cestui là. Estans de rechef enquis comme on
pourroit les aider, requeroyent qu'on fit dire des messes, qu'on allast en
pèlerinage et qu'ainsi ils seraient délivrés. Puis après sont apparus en
grande magnificence et clarté, disant qu'ils estoyent délivrés et
remercyoient grandement leurs bienfaiteurs: promettans d'intercéder pour
eux envers Dieu et la vierge Marie.»
[Note 1: _Des apparitions des esprits, etc._]
«Mélanchthon, dit le même auteur[1], en son _Traité de l'âme_ escrit avoir
eu lui mesme plusieurs apparitions, et connu plusieurs personnes dignes de
foy qui affirmoyent avoir parlé à des esprits. En son livre intitulé
_Examen ordinandorum_, il dit avoir eu une tante soeur de son père,
laquelle demeurée enceinte après la mort de son mari, ainsi qu'elle estoit
assise près du feu, deux hommes entrent en sa maison, l'un desquels
ressembloit au mari mort, et se donnoit a conoistre pour tel, l'autre de
fort haute taille, estoit vestu en cordelier. Celui qui ressembloit au mari
s'approche du fouyer, salue sa femme, la prie de ne s'estonner point,
disant qu'il venoit lui donner charge de faire quelque chose. Sur ce, il
commande au cordelier de se retirer dedans le poisle. Et ayant devisé
longuement avec la femme, lui parlant de prestres et de messes, estant
prest à partir, il lui dit, tendant sa main: Touchez là; mais pour ce
qu'elle estoit saisie d'estonnement, il l'asseura qu'elle n'auroit aucun
desplaisir. Ainsi donc elle le toucha et combien que la main d'icelle ne
devinst impotente, tant y a qu'il la brusla tellement qu'elle fut tousiours
nouée depuis. Cela fait, il appelle le cordelier, puis tous deux
disparurent.
[Note 1: Livre I, ch. XIV.]
Suivant Le Loyer[1], «Jean Pic de la Mirandole apparut à Hierosme
Savonarolle, jacobin ferrarais, et luy dist qu'il souffrait les peines du
purgatoire pour n'avoir assez fait profiter le talent que Dieu luy avait
donné et pour avoir faict fort peu de cas des révélations intérieures à luy
faictes, qui l'advertissaient de continuer ses honnêtes travaux et achever
ce qu'il avait pourpensé en son esprit. Et ne craignit point Savonarolle de
dire en plein sermon la révélation qu'il avait eue, admonestant ses parents
et amis de prier et faire prier Dieu pour son âme.»
[Note 1: _Discours et histoires des spectres_, p. 649.]
«Les trespassez, dit Jean des Caurres[1], recognoissent les biens qu'on
leur faict, comme a esté cogneu de nostre temps, en la cité de Ponts, près
Narbonne, où trespassa un escolier qui estoit excommunié, pour le salaire
qu'il devoit à un sien regent, à la cité de Rhodes, l'esprit duquel parla à
son amy, le priant s'en aller audit Rhodes querir son absolution, ce que
son compagnon luy accorda, et s'en allant, passa par les montagnes chargées
de neige; ledict esprit l'accompagnoit tousiours, et parloit à luy sans
qu'il veit rien. Et à cause que le chemin estoit couvert de neige, l'esprit
lui ostoit la neige et luy monstroit le chemin. Après avoir obtenu
l'absolution de l'évesgue de Rhodes, l'esprit le conduit derechef à
Saint-Ponts, et donna l'absolution au corps mort comme est la coustume en
l'Eglise catholique, et ledit esprit et ame du trespassé, ayans tous, print
congé de luy, le remerciant et promettant luy rendre le service.»
[Note 1: _Oeuvres morales et diversifiées_, p. 377.]
Ils se vengent aussi de ce qu'on leur manque de parole:
«Aux gestes de Charles le Grand, on lit, dit des Caurres[1], qu'un de ses
capitaines pria un sien compagnon que s'il mouroit en la bataille, qu'il
donnast un beau cheval qu'il avoit pour son ame. Luy trespassé, son
compagnon voyant la beauté du cheval, le tient pour luy. Douze jours après,
le trespassé s'apparut à luy, se lamentant, que à faute de n'avoir donné le
cheval en aumosne pour son ame, il avoit demouré douze jours en peine, et
qu'il en porteroit la peine. Pour quoy mourut soudain.»
[Note 1: _Oeuvres morales et diversifiées_, p. 377.]
«J'ai vu, dit Bodin[1], un jeune homme prisonnier l'an 1590 qui avoit tué
sa femme en cholère, et avoit eu sa grace qui lui fut intériné, lequel
néanmoins se plaignoit qu'il n'avoit aucun repos, estant toutes les nuicts
battu par icelle, comme il disoit. Les anciens tenoyent que les ames des
occis souvent pourchassent la vengeance des meurtriers. Nous lisons en
Plutarque que Pausanias, roy de Lacedemone, estant à Constantinople, on lui
fit présent d'une jeune damoiselle... Entrant, de nuit en la chambre, elle
fit tomber la lumière, ce qui esveilla Pausanias en sursaut, et pensant
qu'on voulust le tuer en tenebres; tout effrayé il print sa dague, et tua
la demoiselle sans connoistre qui elle estoit. Dès lors Pausanias fut
incessamment tourmenté d'un esprit jusques à la mort, qui ressembloit
(comme il disoit) à la damoiselle.»
[Note 1: _Démonomanie_, livre II, ch. III.]
Selon Taillepied[1]: «Si un brigand s'approche du corps qu'il aura occis,
le mort commencera à escumer, suer, et donner quelque autre signe. Platon
au neufviesme livre de ses loix, dit que les ames des meurtris poursuivent
furieusement, et souvent, les ames des meurtriers. A l'occasion de quoy
Marsile Ficius, au seiziesme livre de l'_Immortalité des âmes_, chapitre
cinquiesme, estime qu'il advient que si un meurtrier vient où sera à
descouvert le corps de celuy qu'il aura fraischement tué, et il approche
près pour regarder et contempler la playe, le sang en sortira de rechef. Ce
qu'aussi Lucrèce affirme estre véritable, et les juges l'ont observé...
Quand un voleur sera assis à table, s'il advient que quelque verre de vin
soit espandu, le vin ne tombera de côté ne d'autre, ains percera la
table...
[Note 1: _Traité de l'apparition des esprits_ p. 139.]
«D'après Jean de Caurres[1], saint Augustin au II de _Civitate Dei_ parle
de Tiberius Graccus, duquel aussi fait mention Saluste _de Bello
Jugurtino_, lequel fut meurdry estant tribun du peuple, et comment après sa
mort, son frère Caius Graccus, aspiroit audit office odieux au peuple, la
nuict en dormant luy apparut la face de son frère, luy disant que s'il
acceptoit ledit office, qu'avoit esté cause de sa mort, qu'il mourroit de
mesme mort que luy, ce qu'advint.
[Note 1: _Oeuvres morales et diversifiées_, p. 377.]
«Valère au premier[1], qui parle des songes et des miracles recite de
Simonides, lequel venant à un port de mer par navire, trouva audict port un
homme mort, non ensevely, lequel il ensevelit. Et pour recompense de ceste
oeuvre de charité l'esprit appartenant à ce corps, la nuict, en dormant,
parla à luy, en demonstrant qu'il se gardast le matin de monter sur le
navire s'il aymoit ne point mourir. Simonides creut, et estant au port, il
vit devant ses yeux perir le navire et tous ceux qui estoient avec luy. Le
jour precedent, ledit Simonides encore receut une autre bénéfice, pour
avoir ensevely celuy que dessus: car soupant chez Stophas, au village de
Cyanone en Thessale, voicy un messager qui vient à luy soudain, disant
qu'il y avoit à l'huys deux jeunes jouvenceaux qui instamment demandoient
parler à luy: parquoy il sortit sur l'heure, et s'en alla à l'huys, et ne
trouva aucun. Et estant là, le soupoir où Stophas, et autres invités
faisoient grande chere, tomba et tous moururent à ceste ruine, hormis le
Simonides.
[Note 1: En son premier livre.]
«Avenzoar Albamaaron, medecin arabe mahométiste, escrit comment luy estant
malade d'une grande maladie des yeux, un sien amy medecin; desia trespassé,
luy apprint en dormant la medecine pour sa maladie, par laquelle il guarit.
Loys Lavater[1] rapporte, d'après Manlius, en ses _Lieux communs_, le fait
suivant:
[Note 1: _De l'apparition des esprits_, liv. I, ch. II.]
«Théodore Gaza, docte personnage, avoit obtenu en don du pape certaine
mestairie. Son fermier fossoyant un jour en certain endroit trouva une buye
ou urne, en laquelle y avoit des os. Sur ce un fantosme lui aparut et
commanda de remettre cette urne en terre, autrement son fils mourroit. Et
pour ce que le fermier ne tint conte de cela, bien peu de temps apres son
fils fut tué. Au bout de quelques jours le fantosme retourna, menassant le
fermier de lui faire mourir son autre fils, s'il ne remettoit en terre
l'urne et les os qu'il avoit trouvés dedans. Le fermier ayant pensé à soy,
en voyant son autre fils tombé malade, conta le tout à Théodore, lequel
estant allé en sa mestairie, et au lieu d'où le fermier avoit tiré l'urne,
fit refaire une fosse au mesme endroit, où ils cachèrent et l'urne et les
os; ce qu'estant fait, le fils du fermier recouvra incontinent la santé.»
«Il y avoit, dit Jean des Caurres[1], en Athenes, une grande maison, mais
fort descriée et dangereuse. Lorsqu'il estoit nuict, on y entendoit un
bruict, comme de plusieurs fers, lequel commençoit premièrement de loin:
mais puis estant approché plus pres, il sembloit que ce fut le bruit de
quelques menotes, ou des fers que l'on met aux pieds des prisonniers.
Incontinent apparoissoit la semblance d'un vieil homme tout atténué de
maigreur et rempli de crasse, portant une longue barbe, et les cheveux
hérissés. Il avoit les fers aux pieds, et des menotes aux mains, qu'il
faisoit cliqueter. Et aussi ceux qui habitoient la dedans, passoient les
miserables nuicts sans dormir, estans remplis de peur et d'horreur: dont
ils tomboient en maladie, et en la fin, par augmentation de la peur, ils
mouroient. Car le long du jour encore que l'image fut absente, si est-ce
que la mémoire leur en demeuroit en l'entendement: si bien que la premiere
crainte estoit cause d'une plus longue. Ainsi la maison descriée demeura
deserte, et du tout abandonnée à ce monstre. Toutefois on y avoit mis un
escriteau pour la vendre ou louer à quelqu'un qui par aventure ne seroit
adverty du faict. Or sus ces entrefaictes, le philosophe Athenodore vint en
Athènes. Il leut l'escriteau, il sceut le prix, et soupçonnant par le bon
marché qu'on luy en faisoit, et s'en estant enquis, on luy en dist la
verité. Ce nonobstant il la loua de plus grande affection. Le soir
approchait, il commanda que l'on fist son lict en la première partie de la
maison. Il demanda ses tablettes à escrire, sa touche, sa lumière, et
laissa tous ses domestiques au dedans. Et à fin que son esprit oisif ne luy
fantastiquast les espouvantails et craintes, dont on luy avoit parlé, il se
mit attentivement à escrire, et y employa, non seulement les yeux, mais
aussi l'esprit et la main. La nuict venue, il entendit le fer qui
cliquetoit: toutefois il ne leva point l'oeil, et ne laissa d'escrire, mais
il s'asseura davantage, et presta l'aureille. Alors le bruit augmenta,
redoubla et approcha: tellement qu'il l'entendoit desia comme à l'entrée,
puis au dedans. Il regarde, et voit, et recognoist la semblance de laquelle
on luy avoit parlé. Elle estoit debout, et lui faisoit signe du doigt,
comme si elle l'eust appellé. Et luy au contraire luy faisoit signe de la
main qu'elle attendist un petit. Derechef il se mit à escrire. Mais elle
vint sonner ses chaisnes à l'entour de la teste de l'écrivain, lequel la
regarda comme auparavant. Et voyant qu'elle lui faisoit signe, tout
soudainement il prit sa lumière, et la suyvit. Elle alloit lentement comme
si elle eust eu peine à marcher, à cause de ses fers. Et incontinent
qu'elle fut au milieu de la maison, elle se disparut et laissa le
philosophe tout seul. Lequel print quelques herbes et feuilles, pour
marquer le lieu auquel elle l'avoit laissé. Le jour suivant il s'en alla
vers le magistrat, et l'advertit de faire fouiller au lieu marqué. On
trouva des os entrelassez de chaisnes, que le corps pourry par la terre, et
par la longueur du temps, avoit quitté aux fers, lesquels estant rassemblez
furent enterrez publiquement, et n'y eust onques depuis esprit qui apparust
en la maison.»
[Note 1: _Oeuvres morales et diversifiées_, p. 388.]
Goulart[1] rapporte l'histoire suivante:
[Note 1: _Trésor des histoires admirables_, t. I, p. 543.]
«Jean Vasques d'Ayola et deux autres jeunes Espagnols partis de leur pays
pour venir estudier en droit à Boulogne la Grasse, ne pouvant trouver logis
commode pour faire espargne, furent avertis qu'en la rue où estoit leur
hostellerie y avoit une maison déserte et abandonnée, à cause de quelques
fantosmes qui y apparoissoyent, laquelle leur seroit laissée pour y habiter
sans payer aucun louage, tandis qu'il leur plairoit y demeurer. Eux
acceptent la condition, sont mesmes accommodez de quelques meubles, et font
joyeusement leur mesnage en icelle l'espace d'un mois, au bout duquel comme
les deux compagnons d'Ayola se fussent couchez d'heure, et lui fust en son
estude fort tard, entendant un grand bruit comme de plusieurs chaisnes de
fer, que l'on bransloit et faisoit entrechoquer, sortit de son estude, avec
son espée, et en l'autre main son chandelier et la chandelle allumée, puis
se planta au milieu de la salle, sans resveiller ses compagnons, attendant
que deviendroit ce bruit, lequel procedoit à son advis du bas des degrez du
logis respondant à une grande cour que la salle regardoit. Sur ceste
attente, il descouvre à la porte de ces degrez un fantosme effrayable,
d'une carcasse n'ayant rien que les os, traînant par les pieds et le faut
du corps ces chaisnes qui bruioyent ainsi. Le fantosme s'arreste, et Ayola
s'acourageant commence à le conjurer, demandant qu'il eust à lui donner à
entendre en façon convenable ce qu'il vouloit. Le fantosme commence à
croiser les bras, baisser la teste, et l'appeler d'une main pour le suivre
par les degrez. Ayola respond: Marchez devant et je vous suivray. Sur ce le
fantosme commence à descendre tout bellement, comme un homme qui traîneroit
des fers aux pieds, suivi d'Ayola, duquel la chandelle s'esteignit au
milieu des degrez. Ce fut renouvellement de peur: néantmoins, s'esvertuant
de nouveau, il dit au fantosme: Vous voyez bien que ma chandelle s'est
amortie, je vay la r'allumer; si vous m'attendez ici, je retourneray
incontinent. Il court au foyer, r'allume la chandelle, revient sur les
degrez, où il trouve le fantosme et le suit. Ayant traversé la cour du
logis, ils entrent en un grand jardin, au milieu duquel estoit un puits; ce
qui fit douter Ayola que le fantosme ne lui nuisît: pourtant il s'arresta.
Mais le fantosme se retournant fit signe de marcher jusques vers un autre
endroit du jardin: et comme ils s'avançoyent celle part, le fantosme
disparut soudain. Ayola resté seul commence à le rappeler, protestant qu'il
ne tiendroit à lui de faire ce qu'il seroit en sa puissance; et attendit un
peu. Le fantosme ne paroissant plus, l'Espagnol retourne en sa chambre,
resveille ses compagnons, qui le voyant tout pasle, lui donnerent un peu de
vin et quelque confiture, s'enquerans de son avanture, laquelle il leur
raconta. Tost après le bruit semé par la ville de cest accident, le
gouverneur s'enquit soigneusement de tout, et entendant le rapport d'Ayola
en toutes ses circonstances, fit fouiller en l'endroit où le fantosme
estoit disparu. Là fut trouvée la carcasse enchaînée ainsi qu'Ayola l'avoit
veuë, en une sépulture peu profonde, d'où ayant esté tirée et enterrée
ailleurs avec les autres, tout le bruit qui paravant avoit esté en ce grand
logis cessa. Les Espagnols retournez en leur pays, Ayola fut pourvu
d'office de judicature: et avoit un fils président en une ville d'Espagne
du temps de Torquemada, lequel fait ce discours en la troisième journée de
son _Hexameron_.»
Taillepied[1] raconte le fait suivant: «Environ l'an 1559, un gentilhomme
d'un village près de Meulan sur Seine, seigneur de Flins, avoit ordonné par
testament qu'on ensevelist son corps avec ses ancetres en la ville de
Paris. Quand il fut trespassé, son fils héritier ne s'en souciant beaucoup
d'exécuter la volonté de son père le fit inhumer dans l'église dudit
village. Mais advint que l'esprit du père fit tant grand bruit et tourmente
dans la chambre du fils qui couchoit en son lict à Paris que le fils fut
contrainct d'envoyer des saquemans (pillards, voleurs) qu'il loua à prix
d'argent, pour aller deterrer le corps dudit trespassé, et le faire
apporter au lieu où il avait esleu sa sépulture. Le lendemain matin je fus
à ce village, en un jour de dimanche, où l'histoire me fut récitée tout au
long, et y avoit dans l'église une si grande puanteur de ce corps qui avoit
esté levé le jour précédent, qu'on n'y pouvoit aucunement durer pour
l'infection.»
[Note 1: _Traité de l'apparition des esprits_, p. 123.]
«En Islande, dit Jean des Caurres[1], qui est une isle vers Aquilon des
dernières en laquelle, au solstice de l'esté, n'y a nulle nuit, et à celuy
de l'hyver n'y a nul jour, il y a une montagne nommée Hecla, qui est
bruslante comme Ethna, et là bien souvent les morts se monstrent aux gens
qui les ont cogneus, comme s'ils estaient vifs: en sorte que ceux qui n'ont
sceu leur mort, les estiment vivans. Et revelent beaucoup de nouvelles de
loin pays. Et quand on les invite de venir en leurs maisons, ils respondent
avec grands gemissemens qu'ils ne peuvent, mais faut qu'ils s'en aillent à
la montaigne de Hecla, et soudain disparaissent, et ne les voit-on point.
Et communément apparoissent ceux qui ont esté submergez en la mer, ou qui
sont morts de quelque mort violente.»
[Note 1: _Oeuvres morales et diversifiées_, p. 378.]
Adrien de Montalembert[1] raconte cette histoire d'Antoinette, jeune
religieuse de l'abbaye de Saint-Pierre à Lyon et d'une grande piété, qui
parlait souvent de l'abbesse du monastère, morte dans le repentir après une
vie déréglée et se recommandait à elle:
[Note 1: _La merveilleuse histoire de l'esprit qui depuis naguères
est apparu au monastère des religieuses de Saint-Pierre de Lyon,
laquelle est plaine de grant admiration, comme l'on pourra voir à
la lecture de ce présent livre_, par Adrien de Montalembert Paris,
1528, in-12.]
«Or advint une nuit que la dicte Antoinette, jeune religieuse, estoit toute
seule en sa chambre, en son lict couchée et dormoit non point trop durement
si luy fut advis que quelque chose luy levoit son queuvrechef tout
bellement et luy fesoit au front le signe de la croix puis doulcement et
souef en la bouche le baisoit. Incontinent la pucelle se réveille non point
grandement effrayée ains tant seulement esbahye, pensant a par soy que ce
pourroit estre qui l'auroit baisée et de la croix signée, entour d'elle
rien n'apperçoit... pour cette fois la pucelle ne y prinst pas grand advis
cuydant qu'elle eust ainsi songé et n'en parla a personne.
Advint aucuns jours après qu'elle ouyt quelque chose entour d'elle faisant
aucun son, et comme soubz ses pieds frapper aucuns petiz coups, ainsi qui
heurteroit du bout d'un baston dessoubz ung carreau ou un marchepied. Et
sembloit proprement que ce qui fesoit ce son et ainsi heurtoit fust dedans
terre profondement; mays le son qui se faisoit estoit ouy quasi quatre doys
en terre tousjours soubz les piedz de la dicte pucelle. Je l'ay ouy maintes
fois et en me repondant sur ce que l'enqueroys frapoit tant de coups que
demandoys. Quand la pucelle eut ja plusieurs fois entendu tel son et bruyt
estrange elle commença durement s'esbahir, et toute espouvantée le compta a
la bonne abbesse, laquelle bien la sceut réconforter et remectre en bonne
asseurance non pensant à autre chose qu'à la simplesse de la pucelle. Et
pour mieulx y pourvoir ordonna qu'elle coucheroit en une chambre prochaine
d'elle si que la pucelle n'eust sceu tant bellement se remuer que
incontinent ne l'eust ouye.
«Les povres religieuses de léans furent toutes esperdues de prime face,
ignorans encore que c'estoit. Si vindrent premièrement au refuge à nostre
Seigneur et se misrent toutes en bon estat. Et fut interroguée la pucelle
diligemment assavoir que lui sembloit de ceste adventure. Elle respond
qu'elle ne sçait que ce pourroit estre si ce n'estoit seur Alis la
secrétaine pourtant que depuys son trespas souvant l'avoit songée et veue
en son dormant. Lors fut conjuré l'esperit pour sçavoir que c'estoit. Il
respondit qu'il estoit l'esperit de seur Alis véritablement de léans jadis
secrétaine. Et en donna signe évident. La chose fut assez facile à croyre
par ce que moult tousjours avoit aymé la pucelle. L'abbesse, voyant ce,
délibéra apres soy estre conseillée envoyer quérir le corps de la
trespassée et pour ce fut enquise l'âme premierement si elle vouldroit que
son corps fust léans en terre. Elle incontinent donna signe que moult le
désiroit; adonc la bonne dame abbesse l'envoya déterrer et amener
honnestement en l'abbaye. Cependant l'ame menoit bruit entour la pucelle a
mesure que son corps de léans approuchait de plus en plus. Et quand il fut
à la porte du monastère moult se démenoit en frappant et en heurtant
dessoubz les pieds de la pucelle. Durant aussi que les dames faisoient le
service de ses funérailles ne cessoit et n'avoit aucun repos. Bonnemens ne
sçait-on pourquoy ainsy se démenoit cette ame ou pour la douleur qu'elle
enduroit ou pour le plaisir qu'elle avoit de veoir son corps en son abbaye
dont jadis elle estoit partie. Le service achevé fut mys en une fousse la
casse ou cercueil qui contenoit les ossements en une petite chapelle de
Notre-Dame, sans les couvrir aultrement fors d'ung drap mortuaire. Et ainsi
me fust montré.
«Or sachez sire que cest esperit ne faisoit aucun mal, frayeur ne
destourbier a créature, ains les dames de léans le tindrent depuys à grande
consolation pourtant que le dit esperit faisoit signe de grand
resjouissance quand l'on chantoit le service divin et quand l'on parloit de
Dieu fust à l'esglise ou aultre part. Mais jamais n'estoit ouy si la
pucelle n'estoit présente, car jour et nuict luy tenoit compaignie et la
suyvoit; ny oncques puis ne l'abandonna en quelque lieu qu'elle fust. Je
vous diray grand merveille de ceste bonne ame. Je luy demanday en la
conjurant ou nom de Dieu assavoir si incontinent qu'elle fut partie de son
corps elle suyvit ceste jeune religieuse. L'ame respondit que ouy
véritablement ny jamais ne l'abandonneroit que ne vollast au ciel pour
jouyr de la vision éternelle entièrement. Ce sçay bien véritablement car ce
luy ay je demandé depuys et l'ay ouy maintes fois. Et moult estoit
famyliere de moy. Et par elle ont esté sceuz de grans cas qui ne pourroient
estre congneuz de mortelle créature dont je me suys donné grand admiration
et merveilles. Les secretz de Dieu sont inscrutables et aux ignorants
incrédibles. Mais ceulx qui ont ouy et veu telles choses certes l'en les
doit croire plus entièrement.»
II.--REVENANTS, SPECTRES, LARVES.