Op my ou ramkietjie,
Met nog net een snaar,
Speel ek in die maanskyn,
Deurmekaar.
Ek sing van Adam
En Eva se val,
Van die ou Paradys--
„Halfpad mal!”
So sê die mense
Wat my hoor speel.
As die skemer my wang soen
Soos ferweel;
As die maan my aanhoor,
En die sterre knik,
Dan speel ek kordaat voort,
In my skik.
Wat gee ek om mense
Wat sê ek ’s mal,
As die varings my aanhoor
By die wal?
Wat om my vriende--
Wat nooit nie verstaan--
As die sterre my toeknik
En die maan?
Op my ou ramkietjie,
Met nog net een snaar,
Speel ek in die maanskyn,
Deurmekaar.