_De los que estan luengo tiempo sin dar los diezmos ó los dan
menguados, que se non pueden salvar si los non entregaren en su vida
podiéndolo facer._
Avaricia que quier decir escasedat, es pecado muy grande, et mueve
á algunos homes de manera que estan luengo tiempo que non dan los
diezmos, et face á otros que maguer los den, non los den complidamente
como deben. Onde si alguno destos conosciendo su pecado veniese á
penitencia et quisiese facer emienda dél, debel mandar aquel clérigo á
quien se confesase [1222] que dé todo aquello que tovo ó que non dezmó,
asi como debie; ca si lo non ficiese asi non se podrie salvar, segunt
dixo sant Agostin que non se perdona el pecado si non torna home lo que
tomó de lo ageno podiéndolo facer. Pero si aquel que hobiese á facer
tal emienda como esta fuese tan pobre, que si gelo mandasen todo tornar
luego que nol fincarie en que viviese, débenle mandar que dé dello de
manera que finque á él en que viva, et facerle prometer que si Dios le
ficiere merced que haya de que lo dar todo, que lo dé quanto mas aina
podiere.