_Quáles pueden facer voto, et quáles non lo pueden prometer sin
otorgamiento de otri._
David que fue rey et profeta dixo que el voto que home faz tenudo es
de comprirlo; pero si alguno lo quisiere camiar [911] en otro mayor,
puédelo facer, porque bien semeja que es voluntad de Dios [912] de
crecer todavia el bien, et por ende non gelo puede ninguno vedar. Mas
con todo eso personas hi ha que lo non pueden facer sin licencia de
otros, asi como el obispo que non puede facer voto para entrar en órden
sin mandado del apostóligo: otrosi el que non fuere de edat [913] non
puede facer tal prometimiento á menos de mandado de su padre [914] ó de
su guardador; nin el siervo sin voluntad de su señor, nin el marido sin
otorgamiento de su muger, nin ella sin otorgamiento dél, nin el monge
para facer mas áspera vida que los otros frades del monesterio á menos
de licencia de su abad: et esto es porque podria ende nascer escándalo
á los otros.