_Por qué razones los que fueren en una órden pueden pasar á otra._
Fuerte seyendo la órden et áspera de guisa que non se atreviese á
sofrirla aquel que entrase en ella, bien puede sallir ende si quisiere
et pasar á otra que sea mas ligera; pero esto puede facer ante que faga
profesion et non despues: mas si dexando la primera órden que habie
tomado con entencion de non tornar al sieglo [861], tomase despues
muger ante que se camiase á otra religion, non valdrie tal casamiento,
nin se puede excusar por él de non entrar en alguna órden, ca maguer
que el hábito solo que tomó en la religion primera non haya tanta [862]
firmedumbre por quel puedan apremiar que finque en ella; pero porque
consentió de non vevir mas al sieglo, aquella voluntad que hobo tanta
fuerza ha quel embarga que non puede despues casar nin fincar al mundo.