_En qué manera se face el homecillo por premia._
Premia es cosa que escusa á los clérigos de pena, de manera que maguer
fagan homecillo, non han menester dispensacion para usar de las órdenes
que ante habien, como quier que non puedan sobir á mayores, á menos de
dispensar primeramente el papa con ellos. Et esto serie como si algunt
clérigo matase home defendiéndose, non lo podiendo escusar en ninguna
manera. Et aun podrie acaescer que algunt clérigo farie homecillo de
otra guisa que serie como en manera de premia, pero non se podrie
escusar de pena el que lo feciese [742]: et esto serie como si sopiese
quel venien á cercar la casa ó el lugar en que estaba, ó que andaban
algunos para lo matar, ó en alguna otra manera semejante destas, et
sabiéndolo et podiéndolo escusar non lo quisiere facer. Ca si en tal
manera feciese homecillo, non se podrie despues ordenar de mayores
órdenes, como quier quel puede su obispo sofrir en aquellas que ante
habie, et dexarle sus beneficios por facerle bien et merced, desque
hobiere complida la penitencia quel dieren por razon del homecillo que
hobiese fecho de esta manera.
[743] LEY XVII.
_Cómo el homecillo que es fecho en manera de justicia embarga al que lo
face para non se poder ordenar._
Lugar teniendo algunt home de juez si ficiese matar ó lisiar á otro
por razon de justicia, non se podrie despues ordenar para ser clérigo:
eso mesmo serie de los que se acertasen en pleito de tal justicia por
fecho, ó por mandado, ó por consejo ó por ayuda. Et por ende si alguno
que fuese de otra ley se hobiese acertado en facer tal justicia como
esta ante que se tornase cristiano, embargarle hia el homecillo que asi
hobiese fecho de manera que se non podrie despues ordenar, como quier
quel non embargarie la muerte que hobiese fecho en otra guisa como
non debia et non por razon de justicia, si despues que fuese bateado
quisiese recebir órdenes. Et esto tovo santa eglesia por bien, porque
en matar home por justicia non hay pecado ninguno por que el derecho lo
manda. Et pues que pecado non hi yace, non se tuelle por el bautismo
que lava los pecados, pero nasce ende embargo al que tal homecillo
face, de manera que despues non se puede ordenar.