_Porqué convino que fuese fecho el apostóligo._
Convino por derecha razon que quando nuestro señor Iesu Cristo subió
á los cielos que sant Pedro, á quien habia dado la mayoria de los
apóstoles, et poder de absolver et de ligar, que fincase en lugar dél
para facer guardar los sus mandamientos, et facer á los homes que
usasen dellos. Ca maguer que la fe [532] que nos dexó es muy noble
et muy santa en sí; pero tanta es la flaqueza de la [533] natura de
los homes, que si non hobiesen quien los guiase et les amostrase la
carrera della, podrian errar de manera que la bondat de la fe non les
ternie pro. Onde por esta razon [534] puso á sant Pedro en su lugar; et
despues quel murió fue menester que hobiese hi otros que toviesen sus
veces, de guisa que siempre hobiese uno en que fincase el su poder: et
este es aquel á quien llaman apostóligo [535], que es el papa.