_Qué cosas deben facer los que se confesaren para ser su confesion
verdadera et complida._
Quatro cosas debe facer todo home que se confesare para ser su
confesion verdadera et complida: la primera tenerse por culpado en
su voluntad repintiéndose del mal que fizo: la segunda contar por
su palabra verdaderamiente todos los pecados que hobo fechos, non
encobriendo ninguno á sabiendas: la tercera emendando por fecho el mal
que fizo segunt le mandare el penitenciador: la quarta partiéndose del
pecado que fizo en tal manera que despues non torne en él. Ca maguer
se doliese del mal que fizo et non dixiese la verdat, ó deciéndola non
ficiese la emienda que le mandasen facer, ó emendando non se partiese
del pecado de guisa que hi non se tornase despues, non serie complida
la confesion nin verdadera. Et á semejanza desto da santa eglesia
enxiemplo de Amos el profeta, que amenazó por mandado de nuestro Señor
Dios á Azahel, que fue rey de Damasco, deciendol que por los males et
por las premias que feciera tres vegadas al pueblo de los judíos que si
se repintiese dello conosciéndolo, et lo emendase, que lo perdonaria;
mas si despues tornase á facerlo otra vez, que non habrie perdon, ante
recebrie por ello pena. Onde como quier que las tres maneras de pecado
que facen los homes son muy grandes en cuidar et en obrar, et non
emendar, mayor es la quarta en tornarse despues á ello: ca en esto se
muestra que se non dolió del yerro que fizo, nin lo confesó asi como
debiera verdaderamiente, nin hobo sabor de complir la emienda quel
mandaron, pues que porfia en no se partir dello. Et por ende el que en
tal estado estudiese, et en este moriese, siempre haberie pena por
ello en el otro mundo.