(Tomaso Mocenigo, nota 15).
_MCCCCXVII, die XI novembris_.
Capta.
Cumzosiaché la nostra cecha da l'arzento bexogne de grandissima e
notabel reformation, perché da molti mexi in qua la è andà in
dessolution e reduta quasi a niente, e per questo l'è anche desviado
el corso e la mercadantia de l'arzento in Veniexia, la qual cossa è
retornada et ogni di pluj retorna a danno grandissimo del nostro
comun, si cercha la utilità che se soleva recever de la cecha, chomo
di datii nostri, e de la università de la merchadantia e de molte
fameie le qual viveva de quel mestier, le qual se desperde; e oltra de
questo le monede che se fa al presente se fano cum sì pocha raxon e
ordene, che l'è cum grandissima infamia de la nostra Signoria e pocho
contentamento de tuti i nostri subditi; Et el sia utilissima cossa e
honor nostro a far bona provision, sì per redur el corso de l'arzento,
como per che el nostro comun non sia fraudado e chel se faza bone
monede; Anderà parte che da mo avanti el se debia observar li ordeni
infrascritti:
Prima, per che li ordeni e muodi di quinti i qual se oserva al
presente, sì in lo affinar de l'arzento como in lo apresentar al pexo
de comun a Rialto, son sì scuri che solo Dio porave guardarsse chel
non fosse fato grandissimo dano al nostro comun; Sia ordenado che da
mo avanti non se meta pluj quinti in cecha, ma debiasse observar como
qui de soto se noterà.
Che tuto l'arzento che serà conduto a Veniexia se debia apresentar al
pexo de Rialto, segondo li ordeni che se contien in lo capitolar del
dito offitio, i quali son utili e boni, e quelli se debia in tuto
oservar cum le pene e muodi che in quelli se contien. Dechiarando che
cussì como l'arzento che se apresenta al dito pexo de Rialto, è uxado
de scriverse per man del scrivan del dito pexo, cussì se debia anche
notar e scriver per man de uno di officiali nostri del dito pexo. Et
chadaun de lor sia tegnudi, de quatro in quatro mexi, notar insembre
cum el scrivan, como è dito, suxo un quaderno tuto l'arzento che serà
apresentado al so offitio. E oltra questo sia tegnudo el scrivan notar
tuto el dito arzento ordenadamente suxo un libro grando over mare, che
romagna sempre in lo offitio a caxon che perdandosse i diti quaderni
sempre se possa veder l'arzento che serà apresentado.
Item che tuti quelli che apresentarà arzento al pexo de Rialto, per
portarlo a affinar ala moneda, e per simele queli che avesse comprado,
debia portar quelo ad afinar cum li muodi e ordeni che se al dito
offitio del pexo de l'arzento de Rialto. E azò che le cosse vada pluj
ordenadamente, sia tegnudi i diti offitiali dal pexo de Rialto notar
su i suo libri quelo argento che se porterà ad affinar ala moneda, e
de che sorta arzento el sera, e far una cetola cum la suo bolla a
queli che porterà l'arzento ad affinar. Su la qual sia notà le marche,
le onze e li quarti che pexerà el dito arzento. Notando la qualità
over sorta de cadaun arzento da per si, e altramente non se possa
portar algun arzento ad affinar per algun muodo. La qual cetola se
debia apresentar ai masseri de la moneda da sen Marcho, over a quello
a chi tocherà star ala affinaria de l'arzento, el qual debia notar sul
so libro, e per simele el so scrivan, tuto l'arzento camerado che serà
portado ad affinar chomo se contignerà suxo la cetola che farà e
manderà i officiali dal pexo de Rialto. E debia notar cadauna persona
de chi serà el dito arzento da per si. E quando el dito arzento serà
affinado e bolado e batudo, debiasse pexar a ponto, presente el masser
da la finaria. Et coluj de chi serà l'arzento debia de presente pagar
al masser che serà a recever l'arzento per far moneda, grossi quatro
et un quarto a oro per marcha, che vien ducati tre e grossi do a oro
per cento. E no se debia muover el dito arzento sel non serà pagado
como è dito.
Et infin da mo sia ordenado chel se debia far un sufficiente scrivan
ala dita affinaria de l'arzento per scrutinio de misser, consejeri,
cavi e masseri da l'arzento, perché altramente non se poria far, el
qual sia pratico in tegnir de le raxon et in lo pexar de l'arzento; el
qual habia de salario ducati LXXX a l'ano per aver persona ben
sufficiente, cumzosiaché tuto el fondamento de questi fati
principalmente consiste a regolar la affinaria de l'arzento ala moneda
per muodo che le cosse vada sì chiare che algun ingano non possa esser
fato.
Et azò che le cosse vada cum ordene e qualitade, debia i diti tre
masseri partirse in questo muodo, zoè l'un a recever l'arzento del
qual se farà moneda, l'altro ai tornexi e ai pizoli, e l'altro a la
affinaria de l'arzento. E de quatro in quatro mexi se debia cambiar da
offitio a offitio cadaun de lor. E quel masser che serà ala affinaria
de l'arzento per i suo 4 mexi debia notar suxo uno quaderno tuto
l'arzento camerado che se porterà ad affinar ala moneda; e simelmentre
el scrivan suxo un altro quaderno como de sovra è dito. E oltra de
questo el dito scrivan debia notar simelmente suxo una mare azò che
sempre se possa ben veder quelo che serà fato ala dita affinaria. E
azò che, le cosse se scontre e sia ben chiare, debiasse principiar a
notar in uno medemo tempo tute queste cosse al pexo de Rialto, e ala
affinaria de l'arzento, sì che l'un offitio e l'altro se possa ben
intender e scontrar. E sia tegnudo el dito masser da la affinaria,
subito complidi i suo 4 mesi, e per simele queli dal pexo de Rialto,
mandar i suo libri ai officiali da le raxon nuove azò chel se possa
veder chiaramente sel nostro comun averà recevudo algun ingano.
E simelmente el masser che receve l'arzento per far moneda, complidi i
suo 4 mexi, debia pluj presto che se porà soldar le suo raxon e portar
i suoi libri ai diti officiali de le raxon nuove azò che i possa veder
la raxon del nostro comun.
E perché molte volte vien apichado de le peze che se affina ala dita
moneda, le qual se convien voltar perché a quelli de chi serà
l'arzento bexogna ale fiade aver monede basse per acompagnar quele
peze apichade; sia ordenado chel non se possa recever algun arzento
camerado ad affinar senza la poliza de quelli dal pexo de Rialto, como
è dito; el qual arzento apichado abia termene ad esser voltado e fato
de bola infra otto dì. E quando el dito arzento serà bolado e batudo
como è dito, se debia pexar per lo muodo predito, e pagar grossi 4 e
uno quarto per marcha; et per algun muodo non se possa recever questo
pagamento sel non serà prima bolado e batudo a raxon che tuto vada
regoladamente.
Item, perché molte volte se porta ad affinar arzento che tien oro, sia
ordenado che quando el serà afinado, el se debia pexar aponto como è
dito de sovra, e pagar per ogni marcha i diti grossi 4 1/4. E perché el
dito arzento dorado se convien partir, e un altra volta se convignerà
portar ad affinar, debiasse de questo tal arzento far chiareza suxo i
libri de la affinaria per muodo chel nostro comun non sia inganado.
Et de tuti i deneri che receverà el masser che lavora l'arzento, zoè i
diti grossi 4 e un quarto per marcha de l'arzento de bola afinado a la
moneda, se debia far e seguir como se feva de la utilitade de quinti,
zoè in far quelle spexe che bexognerà. E lo resto, complidi i suo
quatro mexi, debia dessignar segondo uxanza al masser di tornexi e di
pizoli, per far tornexi e pizoli como se contien in le parte et ordeni
che parla sovra de zo.
Anchora, che l'arzento che serà portado ad affinar ala moneda non se
possa meter in fuogo ad affinar senza parola del masser o del scrivan
dala affinaria, sì che sempre al men uno de lor sia presente quando se
deverà meter ad afinar. E se algun affinador metesse in fuogo ad
affinar senza parola, como è dito, caza in pena de libre X de pizoli
per cadauna fiada. E cadaun mercadante che metesse o fesse meter
contra l'ordene predite, caza de libre L per zascaduna fiada; le qual
pene debia scuoder i masseri sovraditi de la cecha da l'arzento, de le
qual el terzo sia del nostro comun, e i altri do terzi se parta entro
i diti masseri e tutti i scrivani de la dita cecha, zoè de la
affinaria e de l'arzento e di tornexi e pizoli, segondo chomo se suol
partir le altre suo utilitade.
E debia el dito masser da la affinaria, e el so scrivan, tegnir sì
chiaramente tuto il conto e le raxon de l'arzento camerado che se
porta ala finaria, e per simel de quello che romagnerà de bola, che el
nostro comun non possa per algun muodo esser inganado.
E de tuto l'arzento che serà affinado e bolado e averà pagado i diti
grossi 4 e un quarto per marcha, sia tegnudi quelli de chi el serà
meter un quarto in cecha per far moneda, azò che la nostra moneda non
manche. E se i vorà meterne pluj, questo sia in so libertade, e debia
pagar la fatura deputada segondo li muodi e ordeni infrascriti; e
habia pexo per pexo; e questo quarto debia haver messo fra otto di
dapuò chel serà affinado e bolado soto pena del quarto per cadaun che
contrafesse e zaschaduna fiada, la qual pena se scuoda e parta como è
dito de le altre de sovra.
Item, che zaschaduna persona, sì teriera como forestiera, possa
comprar argento francho, e quelo possa trar de Veniexia per zaschaduna
parte e luogo, per mar o per terra, senza pagar alguna cossa, e anche
possa meter in cecha a far moneda, habiando pexo per pexo, e pagando
le fature ordenade del lavorar de la dita moneda como se fa del quarto
sovradito.
Et azò chel sia dado materia a tuti de condur arzento a Veniexia, e
che i mercadanti forestieri veza esser ben tractadi, sia prexo e
ordenado: che algun over alguni compradori de arzento non possa far
conventicole né compagnie contra over a dano de queli che conduxe
l'arzento a Veniexia per vender; e anchora che subito vendudo e pexado
l'arzento, se faza i pagamenti segondo i ordeni e soto quele pene che
se contien in lo capitolar de queli dal pexo de Rialto; li qual
ordeni, sì de le compagnie como del pagamento e in tute altre cosse, i
diti officiali dal pexo debia del tuto observar e mandar ad execution
soto pena de libre CC in li suo proprii beni. E zaschadun li possa
acusar, sì ai Avogadori de comun como ai provededori, e a tuti
officiali de contrabandi, se i contrafarà; de la qual pena la mitade
sia del acusador e l'altra mitade se parta tra el nostro comun e queli
officiali a chi serà fata la cusa, e non se possa far alguna gratia
soto quela medema pena.
Perché l'è ordene ala cecha de la moneda, che le monede che se lavora
debia andar libre XXVII soldi IIII per marcha, el qual ordene fo fato
quando el ducato valeva soldi 93; el qual ampuo za bon tempo non è sta
oservado né se poria oservar, perché zustandosse le monede segondo
quel ordone, algun non poria meter arzento in cecha, vaiando el ducato
soldi cento, per che li ne perderia grossamente, e cussi l'arzento no
seria mai conduto in Veniexia. E benché la cecha habia lavorado in fin
per tutto 1415, questo è stado perché le monede non se mendava né
zustava; e le monede che insiva de la cecha era sì varie e inequal che
tute se trabuchava; e da le grieve a le leziere iera tanta deferentia
che le leziere che romagniva e che se spendeva in questa terra andeva
da Livre 32 infina 32 1/2 per marcha, e questa iera et è pessima moneda
e cum infamia de la nostra Signoria e pocho contento de tuti. E
fazando provision che le monede vada soldi C per ducato, seguirà molti
beni, prima che la nostra moneda serà bela e bona, e la cecha
lavorerà, e tanta maistranza cum le suo fameie viverà, e serà
principal caxon de far condur arzento a Veniexia, e porasse meter in
cecha cum avantazio e sostignerasse l'arzento al corso uxado de ducati
V e grossi XVIII la marcha. Pertanto sia ordenado che da mo avanti le
monede se debia far e lavorar per muodo che le vada livre XXVIIII
soldi VIIII per marcha; le qual, metando l'arzento ducati V grossi
XVIII la marcha, e metando la spexa de la fatura, vien a ponto soldi C
per ducato. Dechiarando che la mitade se faza in grossi e la mitade in
soldi, pagando i grossi de spexa, de fatura, soldi XII per ogni
marcha; e i soldi, soldi XVI per marcha, che vien a esser soto sovra
soldi XIIII de spexa per ogni marcha. E debiasse observar queli muodi
e ordeni a zustar, pexar, e mendar e lavorar la dita moneda, li qual
mo nuovamente son stadi trovadi e ordenadi per li masseri de la cecha
e per ser Alvise Corner e ser Antuonio Miorato, azò che le monede se
faza zuste, bone et egual, sì che le non se possa trabuchar. E ben che
ogni moneda al mondo se possa trabuchar, senza dubio, observandosse li
muodi e ordeni prediti, questa moneda serà sì zusta e cum tanta raxon,
che pur trabuchandosse, la utilità serà sì pizola, che serà a dir
niente, et algun non vorà perder tanto tempo per sì minima cossa. E
azò che la sia sempre lavorada cum li muodi e ordeni debiti, sia
tegnudi i officiali da le raxon nuove, o almen un de lor, andar una
fiada al mexe almen a veder chel sia lavorado e observado l'ordene
soprascrito, e referir ala Signoria nostra azò che questo dura, e che
sel serà bexogno far alguna provision, la se possa far.
Item chel sia fati do gastoldi de puovolo, i qual sia pratichi in lo
mestier de mendar e zustar la moneda, e de bona fama; i qual se faza
tra missier, consejeri, cavi e masseri de la moneda de l'arzento per
scrutinio, cum salario de ducati XXX a l'ano per cadaun, e habia le
soe regalie. Dechiarando che li non possa far in la dita cecha algun
lavorier che apartegna ala dita maneda, azò che i sia pluj soliciti e
atenti a far el so offitio. E questi gastoldi, sempre quando se
menderà e zusterà la moneda, debia esser ai luogi deputadi, dove se
menda e zusta la moneda, e debia molte fiade al dì guardar se i diti
mendadori e zustadori lavorerà la moneda cum i muodi e ordeni che li
serà dadi per li masseri de la moneda. E se i diti gastoldi troverà
algun mendador o zustador che non lavorasse le dite monede per li
muodi prediti, debia quelli manifestar a masseri soto pena de
privation del hoffitio; i qual masseri debia condenar queli che non
farà el so dover libre X de pizoli per cadauna fiada. E se i serà
trovadi in fallo da tre volte in suxo, sia privadi per uno anno de non
poder lavorar ala moneda. E de le dite pene non possa esserli fato
gratia per algun muodo. E le pene pecuniarie predite se parta tra i
masseri e gastoldi e scrivani.
E quando la moneda serà mendada e zustada, avanti che la sia dada ala
maistranza di ovrieri a lavorarla, debia i diti gastoldi un'altra
volta solenemente examinarla se la serà ben lavorada; e trovando algun
fallo, se debia conzar a le spexe de quelli che serà stadi colpeveli,
e condenarli per lo muodo dito de sovra. E da può che la moneda serà
stada in man di ovrieri, quando la serà complida per dar a stampir,
debia anchora esser ben examinada per li diti gastoldi, e per un di
masseri de la moneda, se la sta ben chomo la die; e trovando algun
fallo, se debia conzar a spexe de queli che ne serà stadi colpevelli,
e caza a quelle pene che s'è dite di mendadori e zustadori.
I stampidori che stampisse la moneda sia tegnudi stampirla per lo
muodo che li serà commesso per i masseri; e se i serà trovadi in algun
fallo, che quela moneda sia desfata e refata a le spexe de queli che
averà falido. E se i cazerà in questo defeto da tre volte in suxo, sia
privadi per uno ano che li non possa lavorar algun lavorier in la dita
moneda.
E se i diti masseri de la moneda trovasse algun di prediti in algun
fallo, e a queli non desse la pena predita, incora a pena de livre C
per zaschadun, e zaschaduna fiada; la quale pena se scuoda per li
officiali da le raxon habiando parte como de le altre del so offitio.
E per dar materia a zaschadun che conduga arzento a Veniexia, per lo
gran benefitio che siegue a la terra nostra, sia ordenado che
zaschaduna persona, sì terriera como forestiera, che meterà arzento in
Cecha li sia dado pexo per pexo e mezi grossi e mezi soldi; e debia
pagar per fatura soldi VIII de pizoli solamente, e lo resto, che è
soldi VI, vada a spexe del nostro comun per la utilità che l'a da
grossi IIII 1/4 per marcha de tutto l'arzento che vien affinado a la
cecha como è dito de sovra.
L'ordene che die dar i masseri de la moneda ai lavoradori si è questo:
Prima ai mendadori sia dadi i pexi i qual sono fati per la pruova fata
nuovamente. E apresso quante monede die andar per marcha che son per
numero Libre 29 soldi 9 pizoli.
Quello che die far li ovrieri si è che la moneda sia ben tonda e ben
fata como la die esser de raxon.
Ai stampidori che la sia ben e diligentemente stampida chomo la die
esser de raxon.
Spexe de fature per i soldi per ogni marcha:
per i masseri per marcha soldi 1 pizoli 0
per lo pexador per marcha soldi 0 pizoli 3
per i gastoldi per marcha soldi 0 pizoli 4
per i scrivani per marcha soldi 0 pizoli 3
per i fondadori per marcha soldi 0 pizoli 6
per i ovrieri per marcha soldi 5 pizoli 0
per i mendadori per marcha soldi 3 pizoli 0
per i stampidori per marcha soldi 3 pizoli 0
per i cali del fondedor e altri cali uxadi
per marcha soldi 2 pizoli 6
Suma soldi 15 pizoli 10.
Spexe de fature per i grossi per ogni marcha:
per i masseri per marcha soldi 1 pizoli 0
per lo pexador per marcha soldi 0 pizoli 3
per i gastoldi per marcha soldi 0 pizoli 4
per i scrivani per marcha soldi 0 pizoli 3
per i fondadori per marcha soldi 0 pizoli 6
per i ovrieri per marcha soldi 3 pizoli 0
per i mendadori per marcha soldi 1 pizoli 4
per i stampidori per marcha soldi 1 pizoli 4
per i cali del fondedor e altri cali uxadi
per marcha soldi 2 pizoli 6
Suma soldi 10 pizoli 6.
Suma la spexa de la fatura di soldi e grossi, soldi 26 pizoli 4, che
vien per metà soldi 13 pizoli 2 per marcha. Avanza al nostro comun
pizoli 10 per marcha.
De parte 95; -- de non 14; -- non sinceri 4.
(Senato, _Misti_, registro 52, carte 54 tergo.)