(Lorenzo Tiepolo, nota 3).
Offitialibus super auro cocto et argento.
_Millesimo ducentesimo. LXVIIII, indictione XIII, die VIII intrantis_
_decembris_.
Capta fuit pars quod eligantur duo utiles homines super facto auri et
argenti cocti, quod coquitur et quod percutitur, qui sciant cognoscere
aurum et argentum; et eligantur sicut eliguntur alii offitiales; qui
debeant accipere unam stationem in Rivoalto ad fictum, ubi eis
videbitur, ad quam stationem ire teneantur omni die, exceptis, festis
et occasionibus aliis offitialibus exceptatis, ante quam campana
offitialium cesset pulsari, et stare usque ad terciam, et post nonam
usque ad vesperas, et plus si necesse fuerit; qui etiam teneantur
observare ordinamenta que eis dabuntur per Iustitiarios, et habeant
pro suo sallario libras LXV in anno pro quolibet; et accipere debeant
unum scribanum laycum, qui sit cum eis in offitio, cui dare debeant
pro sallario tres libras in mense, et minus si eis videbitur. Et
stridetur quod nullus audeat facere aurum coctum sine licentia
dominorum qui preerunt isti offitio, in pena librarum XXX et soldorum
XII ÷, et plus ad voluntatem eorum. Et ponatur in eorum capitulari,
quod omnibus illis quibus dabunt licentiam faciendi aurum coctum
accipere sacramentum et plezariam de libris D, quod aurum quod faciet
coctum sit de karatis XXIII ÷ vel inde supra, in pena librarum XXX et
soldorum XII ÷, et plus ad voluntatem dominorum. Et quod totum aurum
quod coquetur et argentum quod finabitur pro isto opere faciendo,
debeant coqui et finari ad istam stationem; et si ement argentum
finum, quod portent ipsum ad ipsos dominos ut videant si erit finum,
et hoc in pena librarum XXX et soldorum XII ÷ et plus ad voluntatem
eorum. Et teneantur ipsi domini inquirere si erit ita finum duabus
vicibus in mense, et facere ipsum extimari per extimatores communis,
et si aliquod invenerint non esse de karatis XXIII ÷ vel plus,
accipiant illi cui dederint licentiam faciendi libras XXX et soldos
XII ÷, et plus ad voluntatem eorum. Et faciant sibi fieri rationem
omni mense quid fecerint de isto auro cocto illi qui faciunt ipsum
coctum. Item totum aurum quod dabunt pro facere aurum coctum scribatur
in uno quaterno per se, et nomen et supranomen illius cui dabunt
licentiam faciendi ipsum coctum, et quantum ponderabit, et de quot
karatis erit. Et teneatur ille cui dabitur aurum ad coquendum ducere
quando erit finum ad illos dominos, et ipsi videbunt si erit tantum
quantum debebit esse per rationem; et si erit tantum ut debebit,
scribent ipsi domini: talis homo habet tantum aurum coctum; et
precipient ei, in pena soldorum V pro libra, quod non vendet ipsum
alicui a duabus unziis supra, si ante illos dominos non conducet
emptorem; et ipsi examinabunt emptorem quid ipse vellit de eo facere;
et ipsi dabunt ei postea licentiam emendi si eis videbitur; et facient
scribi in quaterno auri cocti: talis homo emit tantum aurum coctum a
tali homine. De argento vero ipsi domini accipiant sacramentum et
plezariam librarum D illis qui faciunt ipsum batere, quod non facient
batere argentum minus finum de denario grosso, et facient ipsum
indaurari de ita fino auro ut dictum est supra, in pena librarum XXX,
soldorum XII ÷, et plus ad voluntatem eorum. Item illis qui batunt et
illis qui indaurant accipiant sacramentum et precipiant eis, in pena
librarum X, quod non batent argentum nec indaurent cum auro minus fino
de eo quod dictum est supra. Et si sciunt quod indauretur vel batetur,
debeant manifestare dominis quam cicius poterunt. Item teneantur
domini ire ad inquirendum argentum et aurum bis in mense, et facere
extimari extimatores; et si non invenietur ita finum ut dictum est
supra, accipiant libras XXX soldos XII ÷ et plus ad voluntatem eorum.
Et quod illi qui batunt argentum debeant mittere unum sazum et quartam
auri fini pro marcha argenti. Et quod aurum batutum dare debeant pro
tali pretio quali hodie dant. Et quod illi qui faciunt batere argentum
debeant solvere communi soldos V pro marcha de toto argento quod
facient batere pro expensis opportunis in isto officio. Salvo quod si
de illo argento folliaretur vel incideretur de latere quod illud
ducant ad cameram et scribatur. Et si voluerint ipsum gitare, quod
nichil solvant de eo; et illi qui erunt super isto offitio recipiant
istos denarios et faciant expensas necessarias pro suo officio, et
faciant rationem de intrata et exuta, ut faciunt alii officiales. Et
habeant libertatem imponendi penam et penas ad inquirendum quod
spectabit ad offitium suum, et etiam ponere personam et personas ad
sacramentum pro suo offitio; et penam et penas quas imposuerint domini
de nocte excutere teneantur ab illis qui ceciderint in easdem; et
habeant ipsi domini quartum pene, et tres partes deveniant in commune.
Capte fueriunt die V intrantis decembris.
(Archivio di Stato in Venezia. -- Maggior Consiglio, registro _Commune_
II, carte 140; e Avogaria del Comun, Delib. del M. C., _Bifrons_,
carte 60 tergo).