bestellen, das die ketten pei allen thoren auf bede seitten hinter der
stat meur auch bei den kornheusern und oben am perk umb die vesten
gegen dem Marckt herab alle angelegt werden, außgenomen ein fare soll
man vor den heüsern für des Elwangers hoff hin auf offen lassen etc.
Zu nacht an demselben obgeschriben pfintztag des wirdigen heiltumbs
abent umb den garauß soll der stat paumeister bestellen vier oder sechs
gesellen der tagloner und ein drei zuber und kleine schefflein und
do am Marckt am schönn prunnen das gitter lassen auf sperren und die
kuffen, so man des tags vor auf den Marckt gefürt hat, mit frischem
wasser füllen lassen, als vill der ist. und von dem wasser zu tragen
und die kuffen zu füllen gibt man der tagloner einem sechs pfenning
nach altem herkommen.
[81^b] Der stat paumeister soll bestellen mit dem zimmerman, der stat
meister, das er am pfintztag zu nacht umb den garauß die schneller und
prücken unden umb den heiligtum stull auch hinten vor des Schoppers
haus für richten loß.
Mer soll der stat paumeister bestellen zwen zimmergesellen, die an dem
heiltumb abent under dem heiligtum stull die nacht wachen und in acht
haben, das iemant am stull und holtzwerck icht schadens thue. der iedem
gibt man ein taglon zu lon.
Am freitag an des hochwirdigen heiligtumbs weisung tag früe soll der
stat paumeister bestellen und in iede kuffen, die er auf den Marckt mit
wasser setzen hat lassen, ein kleins geltlein und ein hültzen schüssel,
die geprennt sein mit einem N, werfen lassen.
Es soll darzu der stat paumeister bestellen zwen oder drei gesellen in
den schön prunnen, die inwendig des gitters sein an dem freitag früe
piß man das heiligtum geweist, un denselben gesellen bevelhen, das
sie niemant lassen an den gittern hinauf oder in den prunnen steigen,
sunder das den leuten weren. auch süllen dieselben gesellen haben
pei inen geltlein und schüsselein, darmit sie wasser herauß reichen
mochten, ob es not thun würde etc. in das gitter bestellt man von ratz
wegen auch alleweg zwen gesworen schützen, das thun die kriegsherren
etc. süllen auch niemants hinein lassen weder frawen noch man.
[82^a] Darnach am sambstag nach des wirdigen heiltumbs weisung tag soll
der stat paumeister die stöck und schrancken wider außgraben und an
die ent, do die ir beheltnüs haben, bestellen zu zu füren, und mit den
pflasterern bestellen, dieselben löcher fürderlich zu zu machen.
Nach des wirdigen heiltumbs weisung am montag darnach soll der stat
paumeister bestellen mit der stat zimmermeister, das er mit sein
gesellen den heiltumb stull wider abheb, wo das zelt anders drucken
ist, wo das aber naß und nit recht drucken were, so müst man verziehen
mit dem abnemen. darzu der stat paumeister mit pferden und mit wegen
auch taglöner bestellen soll, den stull fürderlich zu füren, und das
ie ein wagen umb den andern geladen werde, darmit er fürderlich von
dem Marckt gefürt werde und wider unter die hütten, die darzu gehoret,
gelegt werd. wann dann der stull also gantz ab gehoben wirt, so gibt
ein paumeister der stat zimmermeister und sein zimmergesellen sechtzig
pfenning zu verdrincken, alles nach altem herkomen.
Item im sechsundsechtzigsten jare macht man ein newes zelt uber den
heiltumb stull, das hat kost mit dem plaben underzuch und allen dingen
fünftzig güldein; das alt wart zu einem raishütlein zugericht und
gepessert etc.
[82^b] Von den vierteilmeistern.
Und als die stat hie zu Nuremberg vor dem nechst vergangen krieg in
acht teil geteilt wart, nemlichen her diesset der Pegnitz in sant
Sebolts pfarr vier teil und do jenset der Pegnitz in sant Laurentzen
pfarr vier teil alles in der rinckmaur, auch dozumall als palt zu iedem
vierteil zwen vierteilmeister gesetzt und gegeben wurden, und darnach
verlassen ir iedem funftzehen liderein eimer und zwue groß messein
sprutzen zu geben, also wo fewer pei oder in iren vierteilen auß keme,
das sie dann soliche eimer und sprutzen zu dem fewer pringen und senden
solten damit rettung zu thun etc. die vierteil und vierteilmeister
steen hernach geschriben, welliche die ietzunt sein. und soliche eimer
sein alle gezeichent mit einem .N. desgleichen die sprutzen auch
gezeichent mit der stat woppen etc. der eimer einer kost funfthalbs
pfunt alt und ettlich vier pfunt alt und achtzehen pfenning, der
sprutzen eine acht pfunt alt etc.
[83^a] Von dem vierteil am Weinmarckt.
Viertelmeister am Weinmarckt sein Wilhelm Löffelholtz und Hanns
Birckhamer, der ieder hat in seinem haus funftzehen liderein eimer und
zwu groß messen sprutzen in einem lideren sacke.
Das vierteil am Weinmarckt hebt sich an mit der were und zwinger mit
dem grossen thuren und vorwerck im wasser auf dem Newenpawe, genant der
Schleyer thuren, der mit dem grün O gezaichent ist, und geet hin auf
piß an das Newthore mit sampt der hochen stat maur auch dem zwinger und
vorwerck am Newenthore und mitsampt dem thuren des Newenthors, der mit
einem grün R gezeichent ist, gehort alles in das vierteil.
So hebt sich das vierteil in der stat nach den gassen und heusern
auch leuten, die darinnen wonen, an an dem Newenthore und geet in der
rinnen, die mitten herein geet, alles auf die rechten hant fur des
Conrades, des Rudoltz, Spalters, Irherpads, gulden ring, Closs Geyers,
Kilian Theyers mit sampt dem almusen heuslein auf sant Seboltz kirchoff
und also fur Paulus Rietter, Ketzel, Birckamer, Freyen, Gartners am
Fischmarckt heusern hinab am Marckt fur die trög und kandelgiesser
kreme piß an die Pegnitz alles zu der rechten hant ist in dem vierteil,
und also nach der Pegnitz hinab piß zu dem obgenanten grossen thuren
im wasser auf dem Newenpaw, genant der Schleyer thuren etc. und von
demselben thuren an der stat meur wider hinumb zu dem Newenthore.
[83^b] Von dem vierteil am Milchmarckt.
Vierteilmeister am Milchmarckt sein Mertein Holtzschuer und Endres
Tucher, der ieder hat in seinem haus funftzehen liderein eimer und zwu
groß sprutzen in einem liderein sack.
Das vierteil am Milchmarckt hebt sich an mit der were und zwinger
oberhalb dem Newenthore und vorwerk als man hinauß geet auf der rechten
hant und nemlichen auf der hochen statmaur an dem nechsten thuren ob
dem Newenthore, der mit einem grün S gezeichent ist, und geet also
hinauf piß an die vesten mitsampt dem vorwerck vor Thiergartner thore
und dem thuren mit dem grün X bezeichent auf der hochen stat meur
oberhalb Thiergartner thors.
Item die vesten ist auch in dem vierteil; die bewaren die obersten
haubtleut in dem zwinger und sust mit der were allenthalben im schloß.
Item das haus, genant der berkfrit, mitsampt der schlachprucken und
erckern hinten hinauß, auch der hochen statmeur und dem thuren, alt
Nuremberg genant, gehort auch in das vierteil mit der were.
Auch so hebt sich das vierteil in der stat nach den gassen und heusern
auch leuten, die dorinnen wonen, an mit dem thurn, alt Nuremberg
genant, und geet also in der rinnen, die mitten herab geet, ales auf
die rechten hant fur die schiltroren, Rebels, meister Hannsen Lochners
und [der] Snödin haus am kirchoff, und also umb sant Sebolts kirchen
fur des Jacob Awers, Hugels am Weinmarckt, der Heidenin und fur das
haus am ratprunnen, und also piß zu und an das Newethor alles her
dieset der rinnen zu der rechten hant ist alles in dem vierteil etc.
außgenomen des reichen almusen heuslein auf sant Sebolts kirchoff
gehort in das Weinmarckt vierteil, und also von dem [84^a] Newenthore an
der stat meur hinumb piß wider zu dem thuren, alt Nuremberg genant, mit
sampt der vesten und dem berckfrit etc.
[84^b] Von dem vierteil pei sant Gilgen.
Vierteilmeister in sant Egidien vierteil sein Bertholt Pfintzing und
Hanns Lemlein, der ieder hat in seinem haus funftzehen liderein eimer
und zwu groß messen sprutzen in einem liderein sacke.
Das vierteil sant Gilgen hebt sich an mit der were und zwinger an dem
Luginslant, der mit dem swartzen A bezeichent ist, und geet also hinab
mit sampt den zwingern darvor und der hochen stat meur zu dem eussern
Lauffer thore und thuren, der mit dem swartzen p gezeichent ist, mit
sampt dem vorwerck vor demselben eussern Lauffer thore, gehort alles in
das vierteil.
So hebt sich das vierteil in der stat nach den gassen und heusern auch
leuten, die darinnen wonen, an mit dem eussern Lauffer thor und geet
also in der rinnen, die herein in die stat geet, was auf die rechten
hant ist von dem eussern Lauffer thore gerichtz herein biß zu dem
innern Lauffer thore, und von dem innern Lauffer thore die Lauffer
gassen hinfur biß an das eckhaus, darinnen der Wolflein beck sitzet,
und von dan uberzweirch über den Heumarckt auf des Wagners eckhauß
und die Pintergassen hinfur, alles auf die rechten hant, piß fur des
Zerungers haus, das ettwan der Pfintzing was; und von dann durch das
rathaus und voren herauf fur Hanssen von Lochems haus, der prediger
closter, des Horstorffers und Lengenfelders heuser gerichtz hinauf piß
wider an den thuren Luginslant, und von dannen an der stat meur hinumb
aber piß zu dem eussern Lauffer thore etc.
[85^a] Von dem vierteil am Saltzmarckt
Anthoni Tucher und Nicklas Groß sein vierteil meister am Saltzmarckt,
der ieder hat in seinem haus funftzehen liderein eimer und zwue groß
sprutzen in einem liderein sack.
Mit der were und zwinger hebt sich das vierteil am Saltzmarckt an
underthalb des eusseren Lauffer thors und vorwercks, als man hinauß
geet auf die rechten hant, und nemlichen auf der hochen statmaur an
dem Lauffer thuren, der mit dem swartzen p gezeichent ist, und geet
hinab fur das Weerder thurlein und uber die Begnitz, die beider seitten
herein in die stat geet etc. und geet biß auf den wasser thuren, der
hinter sant Katherein weier steet und mit dem ploben G gezeichent ist,
dann derselb thurn auch in das vierteil gehört; und geet also verrer
nach der Begnitz herab piß an die fleischprucken, was auf die rechten
hant ist.
In der stat noch den gassen und heusern so hebt sich das vierteil an
an der fleischprucken und geet gegen dem Marckt auf die rechten hant
fur des Meischners und Sebolt Rietters heuser, den Marckt herauf fur
des Paumgartners und Nicklas Hallers haus, auch durch das rathaus und
umb Jeronimus Rumels eckhaus die Pintergassen hin hinter alles auf die
rechten hant fur Anthoni Tuchers haus und zwerch uber den Heumarckt
fur Nicklas Grossen eckhaus, und die Lauffer gassen gerichtz durch
das inner Lauffer thore, und von dem innern Lauffer thor gerichtz die
eusseren Lauffer gassen biß zu dem eussern Lauffer thor zu, alles auf
die rechten hant, und von dem eussern Lauffer thore nach der stat
meur hinab an und uber die bede Begnitz, und von der Begnitz nach dem
wasser herab biß wider an die fleischprucken ist alles in dem vierteil,
außgenommen die leut auf der Mang, in dem [85^b] Wildpat und auf der
Pleich, die gehoren in Cristan Imhoffs und Steffan Hallers vierteil in
sant Laurentzen pfarre etc.
[86^a] Von dem vierteil pei den parfusen.
Vierteilmeister pei den parfusen [sein] Cristan Imhoff und Steffan
Haller, der ieder hat in seinem haus funftzehen liderein eimer und zwu
groß messen sprutzen in einem lideren sack.
Das vierteil pei den parfussen hebt sich an mit der were und zwinger
neben dem thuren, der do steet am wasser hinder sand Katherein, der
mit dem ploben G gezeichent ist, und geet von demselben thuren hinauf
mit dem zwinger und der hochen stat meur hinter der Peunt piß an das
vorwerck und das eusser Frawenthore, das mit einem ploben X bezeichent
ist, doselbst.
So hebt sich das vierteil in der stat nach den gassen und heusern auch
leuten, die darinnen wonen, an an der fleischprucken pei des Preglers
haus und geet fur der parfusser closter und sant Laurentzen, alles
auf die lincken hant, piß an den Fischpach, der durch die Pfantschmit
gassen leuft, und geet am selben Fischpach hin hinter durch die
Pfantschmitgassen und fur paß durch die Fleischgassen hinaus piß an
die stat maur, do der Fischpach herein fleust, was auf die lincken
hant ist, und von dannen nach der stat meur hinab fur den ploben stern
und das eusser Frawenthore, und also hinab hinter der Peunt piß wider
an das wasser zu dem thuren, der mit dem ploben G bezeichent ist, was
auf die lincken hant in dem kreiß ist. auch gehoren in das vierteil
die leut auf der Mang, in dem Wildpat und auf der Pleich, die doch in
herren Anthoni Tuchers [und] Nicklassen Grossen vierteil sust liegen
etc. und geet also verrer nach dem wasser und Pegnitz herab piß wider
an die fleischprucken pei des Preglers haus doselbst.
In dem vierteil ist ein haubtmanschaft, die gehort in Hanns Imhoffs
und [86^b] Anthoni Holtzschuers vierteil, nemlich von dem eckhaus am
Fischpach voren an der Pfandschmit gassen, doran die rotten köpf steen,
piß hin hinter an das eckehaus pei der alten statmeur gegen meister
Lorentzen hoff uber, was der heuser an derselben richsen am Fischpach
sein und nit mer etc.
[87^a] Von dem vierteil pei den kartheusern.
Vierteilmeister pei den kartheusern [sein] Hanns Imhoffe und Anthoni
Holtzschuher, der ieder hat in seinem haus funftzehen liderein eimer
und zwue groß sprutzen messen in einem liderein sacke.
Das vierteil pei den kartheusern hebt sich an mit der were und zwinger
mit dem eusseren Frawenthore, das mit einem ploben x bezeichent ist,
mit sampt dem vorwerck vor Frawenthore, das auch in das vierteil
gehort, und geet also hinumb gegen dem Spitaler thore mit dem zwinger
und der hochen statmeur piß an den thuren, der mit dem rotten l
bezeichent ist; derselb thuren gehort aber nit in das vierteil sunder
in das ander vierteil darnach.
So hebt sich das vierteil in der stat nach den gassen und heusern auch
leuten, die darinnen wonen, an pei dem Vischpach und dem eckhaus,
das do steet an der Fleischgassen pei der eussern statmeur, als der
Vischpach herein in die stat fleust auf die lincken hant, und geet
also nach dem Fischpach herab die Fleischgassen und fur das Sündergew
und verrer in die innern stat, als auf die lincken hant; und also dem
Vischpach nach durch die Pfandschmid gassen fur Hanns Imhoffs und
verrer fur des Wernitzen eckhaus vor sant Laurentzen uber, als dem
Fischpach nach fur Frantzen Rumels, Merthein Peßlerin, Lorentz Wagners,
des Salmans und Ungerleins heuser hinab, alles auf die lincken hant,
piß an den weisen thurn, der gehort in das ander vierteil darnach
und nit in das vierteil. und darnach von der pruck, die hinter dem
newen korenhaus gegen sant Jacobs prunnen hinauß geet, was heuser auf
die lincken hant steen, also hin hinder fur die Walg an die statmaur
doselbst, und also verrer hinter der statmeur wider hinauf an das ent
und eckhaus, do der Fischpach herein fleust, was auf [87^b] die lincken
hant in der gegent ist, das gehort alles in das vierteil, und des mer
die haubtmanschaft und heuser, die do sein in der Pfandschmidgassen,
was der ist jenset des Vischpach auf die rechten seitten als er herein
fleust von dem eckhaus pei der alten statmeur gegen meister Laurentzen
hoff über piß hinfur an das eckhaus vorn in der Pfandschmitgassen,
daran die rotten köpf steen, dieselben heuser doch sust in Cristan
Imhoffs und Steffan Hallers vierteil sein, die gehoren auch in das
vierteil etc.
[88^a] Von dem vierteil am Korenmarckt.
Vierteilmeister am Korenmarckt [sein] Hanns Volckamer und Wilhelm
Rumel, der ieder hat in seinem haus funftzehen liderein eimer und zwu
groß messen sprutzen in einem lideren sack.
Das vierteil am Korenmarckt hebt sich an mit der were und zwinger auch
auf der hochen statmeur mit dem thuren, der mit dem rotten l bezeichent
ist, derselb thuren dann auch in das vierteil gehoret; und geet also
hinumb biß an das eusser Spitaler thore, das dann mit dem grün A
gezeichent ist, mitsampt demselben vorwerck davor, das alles gehort in
das vierteil.
So hebt sich das vierteil in der stat nach den gassen und heusern
auch leuten, die darinnen wonen, an an des Erhart Zapfenmachers
haus am Kornmarckt und geet herein gegen der frawen prüder closter,
was heuser sein auf die rechten hant von des Zapfenmachers haus den
Korenmarckt herfür fur Caspar Alls haus, des Haußners, der Storrin, fur
des Burckhart Peßlers eckhaus und furpaß fur Hanns Peßlers eckhaus,
fur Cristan Weissen haus und die Schuster und Huttergassen gegen
dem Lauckamer hinfur und do pei dem grün schilt umb dasselb eckhaus
hinauf, alles auf die rechten hant, fur des Dintners haus gegen
sant Laurentzen, und ferrer fur des Schmidmars, Krels, Gorg Hallers
eckhaus hinumb zu der rechten hant fur der Hertzogin haus; furpaß
fur Hanns Volckamers hinterhaus, Endres Geuders haus, fur der frawen
prüder closter und der Storrin hinterhaus, und ferrer biß wider und
an das vorgeschriben eckhaus des Zapfenmachers haus am Kornmarckt
doselbst, und in der vorstat hebt sich das vierteil an an des Models
messingschlahers eckhaus an der statmeur bei dem eussern Spitaler thor
und geet herein gerichtz gegen sant Jacobs, was heusser auf die [88^b]
rechten hant ist: und also durch den ganck fur sant Jacobs kirchoff
pieß umb des Ramen eckhaus auf dem graben pei dem weissen thuren, und
auf demselben graben hinauf gegen der pruck die uber den graben pei
dem newen kornhaus herauß geet an das eckhaus und fur des Küstrichs
heuser hin hinter gegen der Walg piß an die statmaur doselbst, was
heuser auf die rechten hant ist; und also nach der statmeur wider
hinumb an des Models eckhaus pei dem eussern Spitaler thor gehort alles
in das vierteil etc.
[89^a] Von dem vierteil pei sant Elspetten.
Vierteilmeister pei sant Elspetten [sein] Endres Geuder und Fritz
Dinthner, der ieder hat in seinem haus funftzehen liderein eimer und
zwu groß messen sprutzen in einem lideren sack.
Das vierteil pei sant Elspetten hebt sich an mit der were und zwinger
am eussern Spitaler thore und thuren, der mit dem grün A gezeichent
ist, und geet von demselben thuren und vorwerk hinab gegen dem wasser
und doselbst uber das wasser piß an den thuren, der mitten im wasser
steet und mit dem grün O bezeichent ist, genant der Schleyer thuren;
derselb thuren aber nit in das, sunder in das ander vierteil am
Weinmarckt gehort.
So hebt sich das vierteil in der stat nach den gassen und heusern auch
leuten, die darinnen wonen, an an der padstuben pei der fleischprucken
und geet die Huttergassen auf die rechten hant hin umb und also durch
die Schustergassen zu der Krottenmüll und fur des pecken eckhaus, das
gegen Cristan Weissen über ist, und fur des Teurleins eckhaus also
über den Kornmarckt, was auf die rechten hant ist, biß auf des pecken
eckhaus, das gegen des Zapfenmachers haus über steet; und also furpaß
gegen dem weissen thuren, der dann auch in das vierteil gehort, und
furpaß in der vorstat fur sant Elspeten hinauß durch den ganck auf
des pecken eckhaus gegen dem teutschen hoff über, und von demselben
eckhaus hinauß piß an das eusser Spitaler thore, was heusser auf die
rechten hant ist; und von dannen nach der statmeur doselbst hinab piß
uber den Newenpaw an das hultzen pollwerck, das auch in das vierteil
gehort, und ferrer gegen dem wasser herauf piß wider an das padhaus pei
der fleischprucken. was also in dem kreiß ist, das gehort alles in das
vierteil etc.
[89^b] Von den liderein eimern.
Mer ist bevolhen an die hernachgeschriben ent auch der liderein eimer
zu geben, das dann gescheen ist als hernach steet. dieselben eimer sie
dann auch zu den fewern senden sullen, wo des not wer.
Item herrn Hannsen Coler als einem zeugmeister funftzehen liderein
eimer.
Item Sebolt Kressen auf des kunigs vesten zweintzig liderein eimer.
Item dem kirchenmeister zu sant Sebolt funftzehen liderein eimer.
Item dem kirchenmeister zu sant Laurentzen funftzehen liderein eimer.
Item so sein auf der Peunt zweintzig liderein eimer etc.
[90^a] Von den fewermeisteren.
Darnach hat ein erberger ratte hie furgenomen und gesetzt sechs
fewermeister, der ieder dann auch sein eimer und sprutzen soll haben,
und wo feur auß kem in der stat sullen solich fewermeister darzu
komen mit iren eimern und sprutzen, do helfen das volck anschicken
zu arbeitten, auch hocken und feurleittern zu weisen den leutten und
retten helfen so sie immer pest mugen, als ir ieder des ein püchlein
und schrift hat wie ers halten soll. solich feurmeister steen hernach
geschriben. dieselben eimer sein auch ale gezeichent mit einem N.
Item Ludwig Pfintzing der hat funfundzweintzig liderein eimer und zwu
sprützen in einem sack.
(Ebenso hat jeder der nachfolgenden feuermeister 25 eimer und 2
sprützen:)
Linhart Grolant, Wilhelm Derrer, Gotlieb Volckamer, Peter Hortorffer,
Frantz Rumel.
So ist allen scharwachtern bevolhen, so palt feur auß kumpt und sie
des gewar werden, so soll ein ieder in dem vierteil, do er innen geet,
denselben vierteilmeister und feurmeister im selben vierteil das zu
wissen thun und die wecken und sagen wo das fewer sei.
Item so hat der feurmeister ir ieder drei liderein schuffen an stilen
zu redtung des fewers dienent etc.
[90^b] Von den thorsperrern.
Mer hat man in neulichkeit einem ieden thorsperrer und turleinsperrer
geben sechs liderein eimer; dieselben thorsperrer vormals schaff
hetten, die dann zulechzten und zuviellen. denselben thorsperrern ist
gesagt, das sie solch eimer zu keinem feur in die stat tragen noch
senden sullen, sunder die eimer pei inen behalten; wo feur pei den
thoren oder türlein, die sie sperten, aufging, so solt ein ieder sein
eimer darzu senden oder pringen etc. solich ir eimer, auch die andern
eimer sein alle gezeichent mit einem N. auch so sullen die thore und
türleinsperrer do heim bei iren heusern pleiben, wo fewer auß kumpt, ob
man ir bedarf, das man sie bei iren heusern vindt.
Item den zweien Irherthürlein sperrern ir iedem sechs liderein eimer.
Item den dreien thorsperrern am Newenthore ir iedem etc. (wie oben.)
Item den dreien thorsperrern am Thiergartner thore etc.
Item den dreien thorsperrern am Lauffer thore etc.
Item den zweien Werderthürlein sperrern etc.
Item den dreien thorsperrern am Spitaler thore etc.
Item den zweien thorsperrern am Frawenthore ir iedem sechs liderein
eimer.
[91^a] Von den müllnern in der stat.
Es hat ein erberger ratte hie von gemeines nutz wegen bevolhen, den
hernachgeschriben mullnern schleifen und wasserkuffen zu geben und ir
iedem zwu sprutzen, also wenn feur auß kem, das sie dann furderlich
ir pfert an dieselben schleifen setzen und wasser darauf zu füren zu
dem fewer. auch soll man alle vierteil jars pei den hernachgeschriben
mullnern die sprutzen suchen, ob die vorhanden sein pei der pueß, die
darauf gesetzt ist, wo man der nit vindt, ein pfunt newer haller. die
sprutzen sein alle gezeichent und auch die kuffen mit der stat schilt
Nuremberg geprennt.
Item des Swoben müll auf dem Newenpaw ein schleifen und kuffen und zwu
sprutzen.
Item des Drubachers müll bei irher stegen ein schlaifen und kuffen und
zwu sprutzen.
Item die müll hinter den fleischpencken hat zwu sprutzen und ein
schlaifen und kuffen.
Item die müll mitten im wasser pei den fleischpencken hat ein schlaifen
und kuffen und zwu sprutzen.
Item der almusen müllner hat etc. (wie früher).
Item der krotten mullner hat etc.
Item der mullner bei sant Katherein hat etc.
Item der müllner am Sant hat etc.
Item der Heintz Löffler bei sant Claren hat ein einrussige schlaifen
und kuffen darauf.
Item der Thumirnit, der in der wag fert, hat ein einrussige etc.
(wie vorher).
Item der Göckerhennlein hat auch ein einrussige etc.
[91^b] Item so hat man in den newen spital auch geben ein schlaifen und
darauf ein grosse kuffen etc.
[92^a] Von den fewerschaffen in den hutten.
So hat man an acht enden in der stat getailt ettliche karen, darauf
schaff steen, die alle geprennt sein mit einem N, in den hutten,
als hernach geschriben steet; wo fewer auß kumpt, das man dann
soliche schaff darzu furderlich fure. und die schlussel zu denselben
schaffhütten haben die nechsten nachtpauren dorpei; welicher dann
der erst mit einem karn mit schaffen kumpt zu dem fewer, dem gibt
man als hernach steet geschriben. so ist ie auf einem karen pei
funfundzweintzig schefflein.
Item pei dem Irhertürlein zwen karn mit fewerschaffen in der hutten
doselbst.
Item neben dem Thiergartner thore zwen karn mit fewerschaffen in der
hutten.
Item neben dem Luginslant zwen etc. (wie vorher).
Item neben dem innern Lauffer thore zwen etc.
Item im Marstall zwen etc.