von
Klaus Groth.
Aanten int Water,
wat vaern Gesnater!
Aanten in Dik[27],
wat vaern Musik!
De Wart is wat heesch[28]: Wat wat wat schüll wie eten?
Murt[29], inne Murt, inne Grund is dat fett!
Höja! de graue fangt lud[30] an to reden:
Quark un warm Water! Un alle ropt mit.
Aanten int Water,
wat vaern Gesnater!
Aanten in Dik,
wat vaern Musik!
De Rünnsteen hentlank all int Trünneln un Snappeln[31]!
Barbeent un plattföt[32] un jümmer vergnögt!
Hier is de Kaekenguß[33]! Beersupp mit Appeln!
Wackeli, gackeli -- süh, wa se sökt[34]!
Aanten int Water,
wat vaern Gesnater!
Aanten in Dik,
wat vaern Musik!
Nu oppen Wall! un nu ropt wi de Günner[35]!
Nu kamt se an, un nu gift dat en Snack[36].
Nu fleegt wi dal[37], un nu dukt wi uns ünner!
All dat warm Water löppt blank vunne Nack!
Aanten int Water,
wat vaern Gesnater!
Aanten in Dik,
wat vaern Musik!
Wat wat wat wüllt wi? Nu wüllt wi na ’n Misten.
Hör! se döscht Weten[38]! Wi krupt daer de Rill[39]!
Kamt man! man sachden! op Töntjen[40] mit Listen!
Nückt mit den Kopp, un et gau[41], un swigt still!
Aanten int Water,
wat vaern Gesnater!
Aanten int Stroh --
wat vaern Halloh!
Dar kumt de Kaeksch[42]! Neiht man ut, brukt de Flünken[43]!
Hoch aewern Tun[44] un koppheister na ’n Dik!
Swimm’ as de Pocken[45], un flegen as Lünken[46],
klok as en Minsch -- un so dick! un so dick!
Aanten int Water,
wat vaern Gesnater!
Aanten in Dik,
wat vaern Musik.
Matten[47] Has’
von
Klaus Groth.
Lütt Matten de Has’,
de mak sik en Spaß,
he weer bi ’t Studeern,
dat Danzen to lehrn,
un danz ganz aleen
op de achtersten[48] Been.
Keem Reinke de Voß[49]
un dach: das en Kost!
Un seggt: „Lüttje Matten,
so flink oppe Padden[50]?
Un danzst hier aleen
oppe achtersten Been?
„Kumm, lat uns tosam!
Ik kann as de Dam!
De Krei[51], de spelt Fidel,
denn geit[52] dat canditel[53],
denn geit dat mal schön
op de achtersten Been!“
Lütt Matten gev Pot.
De Voß beet[54] em dot;
un sett sik in Schatten,
verspis’ de lütt Matten:
de Krei de kreeg[55] een
vun de achtersten Been.