‘Lo, right so as the love of Crist,’ quod she, 295
‘Made me thy brotheres wyf, right in that wyse
Anon for myn allye heer take I thee,
Sin that thou wolt thyn ydoles despyse.
Go with thy brother now, and thee baptyse,
And make thee clene; so that thou mowe biholde 300
The angels face of which thy brother tolde.’
[519: T. 15770-15804.]
Tiburce answerde and seyde, ‘brother dere,
First tel me whider I shal, and to what man?’
‘To whom?’ quod he, ‘com forth with right good chere,
I wol thee lede unto the pope Urban.’ 305
’Til Urban? brother myn Valerian,’
Quod tho Tiburce, ‘woltow me thider lede?
Me thinketh that it were a wonder dede.