God liste to shewe his wonderful miracle
In hir, for we sholde seen his mighty werkes; (380)
Crist, which that is to every harm triacle,
By certein menes ofte, as knowen clerkes, 480
Doth thing for certein ende that ful derk is
To mannes wit, that for our ignorance
Ne conne not knowe his prudent purveyance.
Now, sith she was not at the feste y-slawe,
Who kepte hir fro the drenching in the see? 485
Who kepte Ionas in the fisshes mawe
Til he was spouted up at Ninivee?
Wel may men knowe it was no wight but he (390)
That kepte peple Ebraik fro hir drenchinge,
With drye feet thurgh-out the see passinge. 490