2.
Circa fratres ignem ingressuros.
Die XXX mensis martii 1498. — Item, dicti Domini simul adunati etc.,
attendentes diversitatem ortam in eorum civitate et populo propter
discordantiam Fratrum Sancti Dominici habitantium in ecclesia Sancti
Marci, ac asserentium aliquas conclusiones contingentes, et Fratrum
ordinis Minorum negantes eas, et consequenter diversimode in rebus
futuris Ecclesie sententium; et quod duo ex supradictis religionibus,
ad probandas et comprobandas dictas conclusiones que indigent
probatione supernaturali, nuper, coram eorum Dominationibus convenerunt
ad invicem, promictentes eorum propria manu se subscribendo papirum,
pariter ac simul ignem ingredi, ad libitum prefatorum Dominorum, ut ex
igne exeunti inleso rationabiliter credi possit; ad hoc, ut huiusmodi
popularis seditio tollatur e medio in omni eventu eorum altercationis:
Ideo, servatis servandis, et obtento inter eos partito, secundum
ordinem etc., deliberaverunt et deliberando voluerunt, quod casu quo in
isto experimento per ignem, a dictis partibus fiendo, pereat dictus ex
fratribus Santi Dominici, tunc et eo casu, Frater Hieronimus Savonarola
de Ferraria, huius ordinis Santi Marci, primarius et eiusmodi doctrine
seminator, ac etiam frater Dominicus de Piscia, eiusdem ordinis, et
eiusmodi doctrine professor et predicator, intelligantur et sint
confinati et relegati in perpetuum extra dominium Florentinum,
nec possint remicti aut restitui, nisi precedente deliberatione
Dominorum pro tempore existentium, cum eorum venerabilibus Collegiis
et Octoviris, per quadraginta quatuor fabas nigras, obtempta postea
per opportuna Consilia eorum civitatis Florentie. Si vero in dicto
experimento perierit tantum dictus ex fratribus Minoribus sic ignem
ingressus, salvo remanente dicto ex fratribus Santi Dominici, tunc
et eo casu intelligantur, ut supra, et sint relegati et confinati
in perpetuum extra dominium, frater Franciscus ordinis fratrum
Minorum predicans in presentiarum in aedibus Sancte Crucis dicte
eorum civitatis Florentie; et cum eo frater Laurentius de Corsis
dicti ordinis fratrum Minorum; qui non possint restitui, nisi servata
forma ut supra servanda in restitutione dictorum fratris Ieronimi et
fratris Dominici ordinis Predicatorum. Sed si quilibet ex dictis sic
ignem ingressis periret, quoad effectum huius partiti et relegationum
predictarum, voluerunt non aliter haberi, quam si solus dictus ex
fratribus Sancti Dominici perisset;[976] ac, casu quo, quacumque
ratione vel causa, per dictas partes, vel aliquam dictarum partium,
staret tempore requisitionis eorum Dominationum de ignis ingressione
fienda quod non ingrederetur, pollicitus vel pollici (_sic_) ignem
ingrederentur vel eiusdem ordinis sacerdos aut sacerdotes eius vel
eorum loco surrogatus vel subrogati ingrederentur; constitutus in mora
vel constituti ingrediendi ignem vel patroni et principes factionis
dicti constituti vel dictorum constitutorum in mora intelligantur
et sint confinati ut supra, vel alter eorum vel altera eorum pars
intelligatur et sit confinata, ad declarationem eorum Dominationis,
ita quod effectus sit, quod pars per quam staret quod non fieret
experimentum, patiatur relegationem; et si per utramque fieret, utraque
patiatur relegationem. Et supradicta omnia et singula deliberaverunt
omni meliori modo etc.; confinantes ut supra, ex nunc prout ex tunc, et
ex tunc prout ex nunc, casibus suprascriptis. Mandantes etc.
3.
Contra fratrem Hyeronimum.
Die VI aprilis 1498. — Item, dicti Domini, simul adunati etc.,
deliberaverunt etc., quod casu quo ardeat Frater Dominicus de
Piscia,[977] frater ordinis Predicatorum, in ecclesia Sancti Marci de
Florentia, qui ingressurus est ignem, ut convenit, cum Fratre Iuliano
de Rondinellis ordinis Minorum; tunc Frater Ieronimus Savonarola,
eiusdem Fratris Dominici doctrine primarius, intelligatur et sit
rebellis; et sibi, dicto casu, assignaverunt tempus trium horarum ad
egrediendam urbem Florentie. Mandantes etc.