Dilecti Filii, salutem et apostolicam benedictionem. Exigit vestrae
devotionis affectus, nec non religionis zelus, ut petitionibus
vestris, quibus possitis Domino quietiori mente servire, quantum cum
Domino possumus, favorabiliter annuamus. Cum itaque, sicut nobis,
nuper, tam pro parte vestra quam dilectorum filiorum communitatis
Florentiæ expositum fuit; vos qui alias, sub Protectore et Magistro
generali ordinis vestri fratrum prædicatorum existebatis; et, processu
temporis, cum hanc domum vestram, dilectorum filiorum vestrorum
Congregationis Lombardiæ dicti ordinis gubernationi dicti ordinis
commendastis. Post aliquantum temporis, Prior quidam, tunc istius
domus, prætextu quorundam litterarum apostolicarum in forma Brevis,
per eum a Sede Apostolica obtentarum et clam nobis impetratarum; et
ipse tantum et uno, forsan paulo pluribus illius fratribus consciis,
secum consentientibus, dictæ Congregationi ac illius superioribus et
institutionibus vos. Domum vestram subiicere attentavit. Cupiatis,
ut Domino quietius possitis famulari, et alias ex certis causis, a
prædictis congregatione et præsidentibus, illiusque institutionibus et
ordinationibus eximi et liberari.
Nos vestris et Communitatis prædictorum, nobis pro vobis super
hoc humiliter supplicantium, ex præmissis et aliis vestro nomine
nobis expositis causis, in hac parte supplicationibus inclinati;
vos et Domum vestram prædictam, illiusque Priores et Fratres
nunc et pro tempore existentes, a dictis Congregatione nec non
praesidentibus, diffinitoribus seu etiam officialibus ac superioribus
quibuscumque, nunc et pro tempore existentibus, eorumque visitatione,
superiositate,[495] præceptis, censuris, assignationibus fratrum,
factis aut faciendis, auctoritate Apostolica perpetuo eximimus et
liberamus. Ita ut ipsi præsidentes, vel Congregationis huiusmodi
superiores, nullam in vos aut aliquem vestrum jurisdictionem aut
superiositatem exercere possint; ac vos et domum vestram prædictam
sub Protectoris et Magistri vestri, Generalis dicti ordinis, et ab
ipso Magistro pro tempore confirmandi Prioris cura, visitationi ac
superiositati perpetuo subiicimus. Ita ut his et non aliis sitis
immediate subiecti, et in Priorem istius domus pro tempore electum
ab ipso nostro Generali, pro tempore exisiente, confirmari debeat;
sic tamen, ut singulis annis, die ipsa suæ electionis, intelligatur
absolutus, et aliter vel etiam idem opportuno tempore eligatur.
Concedentibus fratribus, dictæ domus nunc existentibus et qui ad alias
domos ordinis et Congregationis prædictorum, et aliquot aliis fratribus
dictæ Congregationis, qui ex aliis domibus ad ipsam domum transmissi
sunt; quod si ad eamdem domum redire voluerint, per vos, de consilio
seniorum fratrum dictæ domus, recipi et ipsi (quacunque conditione
præsidentium et officialium dictæ Congregationis non obstante) ad
ipsam domum. Ipsi, vero, aliquot fratres aliarum domorum prædictæ
Congregationis, in ipsa domo vestra existentes, ad ipsam domum vestram
pertinere et in ea de consilio seniorum permanere. Insuper, etiam,
licentia vestra non petita, ad domos Congregationis prædictæ redire
libere et licite valeant. Decernentes et inritum et inane, si secus
super his a quocunque, quavis auctoritate, scienter vel ignoranter,
contigerit; non obstantibus præmissis ac Constitutionibus ac
ordinationibus apostolicis; nec non Congregationis et domus prædictorum
juramento, confirmatione apostolica vel quavis firmitate alias
roboratis statutis, consuetudinibus ac quibusdam excommunicationibus
felicis recordationis Pauli Secundi, impetratis a dicta Congregatione
contra fratres recedentes ab ea, sub bulla aurea expediti, et aliis
Sixti Quarti romanorum Pontificum prædecessorum nostrorum literis;
quibus, etiam si de illis, de verbo ad verbum, toto tenore, non
autem per clausulas generales, etiam mentionem specialem importantem,
specifica et individua mentio habenda esset; illis alias in suo robore
permansuris. Hac vice, dumtaxat, specialiter et expresse derogamus
et per præsentes illis sufficienter derogatum esse volumus atque
decernimus, cæterisque contrariis quibuscunque.
Datum Romæ apud S. Petrum sub anulo Piscatoris, die XXII Maij
_mccccxciij_, Anno Primo.
(_a tergo_)
Dilectis Filiis Priori et Fratribus Domus S. Marci Florentiæ, ordinis
prædicatorum.