_Coment Regnaut se parti du royaume et s'alia à Othon et au roy
d'Angleterre; et coment le roy Phelippe reçut en grace sa femme la royne
Ingebour._
Bien sceut le conte Regnaut qu'il ne pourrait contrester à la force le roy,
pour ce laissa la conté de Bouloigne et toutes les forteresses à
monseigneur Loys de qui il les tenoit en fié. Et le roy saisi d'autre part
toute la conté de Dampmartin, de Mortueil, d'Aubemalle, de Bonneuil[207],
de Danfront et toutes les appartenances que cil conte tenoit par le don et
par la grace le roy. Après ce que il eut ainsi perdu toutes ces contrées,
il s'en ala au conte du Bar son cousin et demoura là avec luy. En ce conte
Regnaut avoit moult de choses dignes et pluseurs vices qui à louenge sont
contraires: volentiers grevoit les églyses, de quoy il avenoit que il
estoit presque tousjours escommenié; les orphelins et les veuves metoit à
povreté; tousjours estoit en haine vers ses nobles voisins et leur
destruisoit leur maisons et leur forteresses.