Quant le père qui tousjours ama paix eut ainsi fait paix et amour entre les
frères et entre les barons à son povoir, il donna congié à Lothaire de
retourner en Italie. Mais avant luy donna de grans dons et sa benéiçon. Et
si luy admonnesta qu'il gardast sa loyaulté et ce qu'il luy avoit promis.
Tout cel yver demoura à Ais-la-Chapelle et célébra la Nativité et la
Résurrection avant qu'il s'en partist. [987]Moult porta grief ceste
partition Loys, le roi de Bavière. Ost assembla et saisit toute la terre
delà Rin. L'empereur, qui ces nouvelles oït, le souffrit jusques à Pasques.
Tantost après la feste esmut son ost et trespassa le Rin et la cité de
Maïence et ala jusques à Tribure[988]. Là demoura un pou pour accueillir et
pour attendre son ost. Lors s'en partit et vint jusques à la cité de
Bodomat[989]. Là vint à luy son fils moult humblement quelque grief qu'il
en eust; des parolles du père fu blasmé et repris; et luy recongnut qu'il
avoit mal fait et promist qu'il amenderoit tout. Et le père qui tousjours
fu doulx et débonnaire luy pardonna tantost. Avant le chastia et reprit de
parolles dures si comme il l'avoit desservi; après le blandit et assouagea
de belles paroles. A tant luy donna congié de retourner en Bavière. Et
l'empereur se mist au retour; le Rin passa et entra en Ardaine pour
chascier, si comme il avoit accoustumé en celle saison.