_Coment le roy Loys entra en Espaigne à trois osts. Coment il prist
Barcinone, et de la famine qui fu dedens la cité de Barcinone. Et coment
son père luy envoya Pepin en secours. Et après, coment il entra de rechief
en Espaigne et puis coment il asségia la cité de Tortouse._
En pou de temps après, eut le roy conseil à ses barons d'asségier la cite
de Barcinone. Son ost devisa en trois parties. L'une en retint avec luy en
un lieu qui avoit nom Tutelle[770]; la seconde livra à un sien prince nommé
Rostaires[771], pour assiégier la cité d'Osque[772]; la tierce envoia après
la seconde au siége, pour secours faire sé mestier feust. Mais ceulx de la
cité, quant ils se virent asségiés, mandèrent secours au roy de Cordes, qui
tantost s'appareilla pour eulx secourre. Et quant la tierce partie de l'ost
le roy, qui aloient aider à ceulx qui tenoient le siège, furent venus
jusques à la cité de Sarragoce, il leur fu dit qu'ils devoient encontrer
les Sarrasins qui venoient au secours de la cité d'Osque[773]. De celle
ompaignie estoient chevetains Hademaire, et Guillerque[774] qui avoit la
première banière.
Note 770: Le latin porte: Dans le Roussillon, «unam Ruscellioni ipse
permanens secum retinuit.»