_Coment l'aumaçor de Cordes et le roy de Sebille rappareillèrent bataille
contre Charlemaines, puis qu'ils furent eschapés; de la cautèle malicieuse
que les Sarrasins firent pour les chevaux des nostres espouventer, et du
remède que l'empereur trouva contre ce, et coment le roy de Sebille fu
occis, et l'aumaçor eschapa qui puis fu baptisé._
En pou de temps après ces choses ainsi faittes, fu raconté à Charlemaines
que en la cité de Cordes l'attendoient à bataille l'aumaçor de celle cité
meisme, et Hébraïm, le roy de Sebille, qui s'en estoient eschapés de la
bataille de Pampelune, où Agoulant fu occis. Si estoient à eulx venus en
aide les Sarrasins de sept cités, de Sathine, de Dénie, de Rebode, de
Abule, de Baécie, de Sebille et de Grenade.
Quant il oït ces nouvelles, il ordonna son ost pour chevauchier contre eulx
à bataille. En ce qu'il s'approchoit de la cité de Cordes, les deux roys
issirent tout armés contre luy à bataille rengée, et chevauchièrent contre
Crestiens, entour quatre milles loing de la cité. Si estoient environ dix
mille, et les nostres entour sept mille. Lors devisa Charlemaines son ost
en trois batailles. La première fu de chevaliers très-preux, la seconde de
gens à pié, la tierce de chevaliers. Tout en telle manière devisèrent les
Sarrasins leurs gens.
En ce point que nostre première bataille dut assembler à la première des
Sarrasins, une grant tourbe de leurs gens à pié se mist devant les chevaux
à nos combateurs, et avoit chascun en sa teste une barboire[656] cornue
noire et horrible, ressemblant à deable, et tenoist chascun deux timpanes
en ses mains, qu'il heurtoit ensemble, et faisoit une noise et un tumulte
grant et si épouventable, et les chevaux de nos combateurs eurent si grant
paour, qu'ils s'enfouirent arrière, ainsi comme tout forsenés, maugré ceulx
qui les chevauchoient.