En celle année fu éclipse de lune et de soleil par deux fois; la septiesme
ide de juin et la seconde kalende de janvier. En celle année yssirent les
Mores d'Espaigne et gastèrent toute l'isle de Corse.
En cel an, Abderame, le fils Abulas le roy des Cordes, chaça Amor de la
cité de Sarragoce, et cil s'en fouit par force et se retraist en la cité
d'Osque. Après la mort le roy Godefroy de Dannemarche, Aminge son frère
receut le royaume; paix et aliance conferma à l'empereur Charlemaines[481].
Arsaphie le message l'empereur de Constantinoble prist congié et se
départit de court. Avec luy envoia l'empereur ses propres messages pour
telle raison comme celluy estoit venu. Ces messages qui furent là envoiés
furent ainsi nommés: Haydon évesque de Basle, Hue le conte de Touraine,
Hayons un Lombart né de la cité d'Acquilée, Woleris duc de Venise, et Léon
né de Sézille. Celluy Léon renvoioit l'empereur en son païs par sa volenté,
car il s'en estoit à luy fouy, dix ans avoit jà passés, au temps qu'il
demouroit à Romme. A l'autre qui avoit nom Hayons fu commandé qu'il
retournast à son seigneur en Constantinoble qui devant l'avoit osté de son
honneur et de son estat par son meffait.