Note 285: _Acquise_. Variante: _Acquisse_. J'ignore le sens de cette
expression, qui ne répond d'ailleurs à aucun mot latin.
Et quant le roy eut ainsi toute Lombardie prise et soubmise à sa volenté,
et de ces choses ordonné si comme il luy plut, il retourna en France et en
amena le roy Desier pris et lié. Adelgise, un sien fils, auquel les
Lombards avoient grant fiance, s'enfouit en Constantinoble à l'empereur
Constantin, quant il vit que son père estoit pris et que la terre fut
gastée. Là demoura et gista le remenant de sa vie en une dignité que
l'empereur luy eut donnée[286]. Pris fu le roy Desier, sa femme, sa fille
et tous ses barons. Tout rendit aux Romains quanques les Lombards leur
avoient tollu. Ainsi fut le royaume de Lombardie soubsmis au royaume de
France; et cessèrent à régner les roys, deux cens et quatre ans après leur
commencement.