_Comment le roy Loys devint hors de sens pour ce que il prist un des os du
bras monsieur saint Denis_.
[26]Le roy Loys gouverna son royaume paisiblement; sans guerre et sans
bataille fu tous les jours de sa vie. Une fois vint en l'églyse
Saint-Denis, ainsi comme mauvaise fortune le menoit, pour déprier les
martirs. Et pour ce que il voloit avoir aucunes aliances d'eus avec soi, il
commanda que les chasses des martirs fussent ataintes[27]; après fist
ouvrir et desjoindre par fole présumpcion le vessel en quoi le précieux
corps saint repose, moins religieusement le regarda que il ne dut. Ja soit
ce que il le fésist par dévocion, si ne lui suffit pas le regarder tant
seulement; ains brisa l'os de l'un des bras et le ravist. Et le martir
monstra bien tantost que il ne lui plaisoit pas dont son corps estoit ainsi
traitié: car le roy fu tantost si espoventé et si esbahi, que il chaï en
frénésie et perdit son sens et sa mémoire en cette heure mesme; tantost fu
le moustier raempli de ténèbres et d'oscurté; et une paour si grant prist
soudainement à tous ceus qui là estoient, que ils se mirent à la fuite. Le
roy donna puis aucunes villes au martir pour lui apaisier et pour ce que il
recouvrast son sens et sa mémoire; l'os que il avoit folement desevré du
corps fist vestir et aorner d'or pur et de pierres précieuses, et le fist
remettre en la chasse avec le corps. (Pour cette raison puet-on prouver que
le corps du glorieux martir gist laiens entièrement; quant il ne put
oncques souffrir que un petit osselet fust osté de son bras ni desmembré de
son corps, moins volentiers souffriroit donques que le chief de lui fust
déseuré, et que il ne feust en sa chasse ou en l'églyse de léans.[28]) Le
roy toutes voies recouvra son sens en partie, mais non pas entièrement, né
en tel point comme il l'eut devant eu[29]. Si ne vesqui pas puis moult
longuement, car il trespassa au chief de deux ans après que ce lui fu
avenu.