lui ayda a armer sa salade; et dist Girart a celle damoiselle: «Belle,
ne vous desconfortez point, car aujourd’uy au plaisir de Dieu serez
asseuree de la grant paour que vous avez.» Girart monta sur son cheval.
La damoiselle lui bailla sa lance, et lui dist que pour lui elle
voulsist prier. Quant le geant aperceust Girart venir vers lui, de la
grant joye qu’il eust se venoit tout poursaillant et ne prisoit Girart
tant ne quant. Il vinst pasmoyant sa masue. Moult fierement se
regarderent l’un l’autre. Girart picqua cheval d’esperon et baissa la
lance et rencontra le geant et l’assigna en la poitrine ung cop si
merveilleux que sa lance voula en pieces. Alors le geant leva sa mace
pour frapper Girart. Girart guencist arriere et leva son escu. Le cop
cheust a terre et entra dedans bien ung pié, et se Girart n’eust guencié
le geant l’eust tout fourdroyé de ce cop. Le geant cuida marvoye de ce
qu’il se sentist frappé et navré. Girart qui moult estoit desirant de
tuer le geant retourna encores sur le geant et lui bailla au plus pres
de la ou il l’avoit attaind ung si grant cop d’espee que une playe lui
fist en la cuisse moult grande et tant que le sanc en saloit a grant
randon; et au passer que fist Girart le geant leva sa massue en cuidant
attaindre Girart sur la teste, mais il faillist pour ce qu’il destourna
ung peu arriere; toutesvoyes il l’attaindist le cheval sur l’arçon de la
selle qui fut tout fourdroyé; et pensez que s’il eust attaint Girart
qu’il ne lui eust point falu de mire. Girart veant son cheval mort fut
moult doulant et non sans cause, mais lui comme vertueux chevalier moult
vivement se getta hors de la selle l’espee en la main, la visiere
abaissee, son escu mis en avant et courist sus au geant, si le commença
a frapper de son espee en l’assenant sur le costé et le navra moult
fort; dont le geant fut bien couroucié, et cuida marvoyer de ce que
Girart lui duroit tant, et s’avança en cuidant frapper Girart, mais il
faillist par ce qu’il rencontra une pierre a quoy il choppa et cheust a
terre et en cheant sa massue lui cheist hors des mains. Girart qui ne
dormoit pas s’avança et prinst la massue et commença a frapper sur le
geant; le geant qui estoit fort a merveilles se releva, lequel estoit
moult fort blessié, et vinst a Girart et lui donna ung cop de poing si
grant que Girart fut tout estourdy, puis prinst Girart par l’escu et lui
tira hors du col, puis a deux mains le hausa et frappa sur Girart ung si
grant cop qu’il le feist cheoir a la renverse. Le geant ne le povoit pas
bien choisir pour le sanc qu’il lui couroit sur les yeulx des cops que
Girart lui avoit donnez.
La damoiselle et ses freres veant Girart estre a terre cuidoient qu’il
fust mort, dont ilz eurent grant douleur et cuidoient tous estre perdus.
Girart qui estoit vigoreux incontinent se releva la massue en ses mains,
desirant soy vengier, frappa le geant si grant cop en la teste qu’il lui
fendist la teste en maniere que la cervelle lui sailloit hors. Le geant
sentant le cop de la mort getta ung cris si tres horrible que a l’oyr
estoit chose espaventable et cheist a terre tout mort et a cheoir qu’il
fist prist si grant flac qu’il sembloit ung arbre qui cheist a terre.
Quinze piés avoit de longueur quant il estoit en son estant. La pucelle
et les seps chevaliers freres veans le geant abatu furent moult joyeux
et non sans cause, et fort troublez de ce qu’ilz veoient Girart moult
fort blecié. Pas n’estoit de merveilles s’il estoit las et traveillié,
car de grans cops avoit receuz du geant et tant qu’il estoit pasmé par
terre. Lors les sept chevaliers ayans grans joye et leur seur
pareillement qui commença cryer a haulte voix: «Par ma foy, jamais nul
jour de mon vivant n’auray mary se je n’ay cellui qui est navré a mort
pour amour de moy et cellui qui m’a delivree des mains de ce deable
adversier; se pour moy meurt je prie a Dieu que la mort me soit
prouchaine, car apres sa mort jamais plus ne vueil vivre.» Apres le pere
et la mere vindrent devers Girart qu’ilz trouverent couchié a terre, et
le assuerent d’un couvrechief le sanc et la sueur qu’il avoit ou visaige
qui lui couvroient toute la veue. Lors Girart se revint de pasmoison et
se leva et dist a haulte voix: «Dieu me doint ceste grace que encores
puisse trouver Euriant m’amye par quy j’ay eu maint mal et mainte
peinne. Mais pas ne m’en doit desplaire, car vers elle l’ay bien
deservy.» La damoiselle entendist Girart et cheist comme pasmee; son
pere et sa mere et ses freres vindrent vers elle et lui aroserent le
visaige. Quant elle fut revenue a elle ilz lui disrent que pas n’estoit
saige quant encores ne scet la volenté du chevalier ne quel chose il
vouldra faire. «Ha sire, dit la pucelle, ores entendis du chevalier
qu’il fist ung reclain moult piteux pour une sienne amye qu’il nommoit
Euriant par qui il disoit avoir tant de maulx souffert lesquelz il
portoit bien en gré.» «Ma fille, dit le chevalier, delaissiez vostre
dueil et couroux; nous irons parler a lui.» Ilz vindrent a Girart et le
trouverent couchié sur son escu. Ilz se misrent a genoulx devant lui et
le desarmerent du tout puis lui aroserent le visaige d’eaue rose. Apres
le seigneur lui dist: «Sire, pas ne sçay vostre nom, mais je vous prie
que dire me vueilliez comment vous vous sentez et s’il vous semble que
puissiez eschapper.» «Sire, dit Girart, j’ay esperance en Dieu que de
mort n’auray garde, ja soit ce que par cest anemy ay esté moult fort
blecié, meshuy m’en iray avec vous. Car se demain povoye estre gary,
tantost me mettroye au chemin pour aler en une queste ou il couvient que
je voise.» Girart se leva sus et ala avec eulx ou chasteau; quant ceulx
de la forteresse les virent venir ilz vindrent au devant d’eulx et
avoient la plus grant joye du monde et tous lui crioient: «Sire, a bonne
heure soyez venu! Pardeça de servitute nous avez mis en franchise. A
tousjours mais estiesmes perdus se ne fussiez vous. Benoit soit le pere
qui vous engendra et la mere qui vous porta quant du terrible geant nous
avez fait delivre.»
Alors a grant joye et a grant lyesse entrerent dedans le chastel. Si
grant feste menoient le seigneur et la dame et tous ceulx de l’ostel a
Girart que merveilles. La fille lui faisoit de moult piteux regars et
disoit en soy mesmes que jamais n’avoit plus bel chevalier veu, que ores
pleust a Dieu que fusse s’amye mais que amer daignast. Alors de tous
costez, varletz et gentilz hommes, chascun se efforçoit de servir
Girart. Ilz le menerent en une chambre et le desvestirent et lui misrent
a point ses playes; en la char n’estoit gaires navré parquoy il se deust
couchié, fors de grans cops et pesans qu’il avoit receuz dont il estoit
las et foulé. Ilz le firent couchier en ung lit pour soy reposer; quant
il eust reposé il se leva et habila et vestist ung mantel d’escarlate
qu’ilz lui aporterent puis l’amenerent en la saule. Tous acouroient pour
le veoir, car tant bel chevalier estoit que tous disoient que oncques
plus bel n’avoient veu. Les tables furent mises et le disner prest. Ilz
laverent les mains ensemble puis se assirent. Les sept chevaliers freres
le servirent a ce disner, que oncques Girart ne peust tant faire qu’ilz
se voulsissent seoir. Le seigneur et la dame s’efforçoient de le conjoyr
et faire tout l’onneur qu’ilz povoient. Souvent le regardoit la pucelle
qui empres luy estoit assise. Grant desir avoit qu’il la voulsist prier
d’amours. Mais a Girart gaires n’en chaloit car autrepart avoit mis son
cuer. Moult richement furent servis a ce disner. Quant ilz eurent disné
et osté les nappes et lavé, Girart appella le seigneur de l’ostel et lui
dist: «Sire, grant necessité est de moy partir pour achever et mettre a
fin une chose que j’ay entreprinse. Et pour ce avant que demain vienne
je vueil prendre congié de vous en vous merciant du bien et de l’onneur
que m’avez fait.» «Sire, dist le chevalier, en moy n’est vous rendre le
service et bien que m’avez fait, et aussi a tous mes enffans, car du
servage ou nous estiesmes nous avez affranchiz; a tous avez sauvé la
vie. Ma terre et mon avoir vous requiers que vueilliez prendre, et ma
fille avec, pour laquelle deffendre avez mis vostre vie en aventure. Car
ce ne fust par vostre grant proesse et vaillance a tousjours mais
estiesmes en exil. Loué en soit Nostre Seigneur et vous qui de ce peril
nous avez getté.» Lors furent alumees torches. Il prinst congié du
seigneur et de la dame, de la fille et des sept freres, lesquelz le
menerent en sa chambre ou son lit fut moult richement paré et mis a
point, puis firent collacion; apres se partirent et laisserent deux
escuiers avec Girart pour le couchier et servir. Girart se coucha qui
estoit traveillié, jusques ce vinst le matin qu’il se habila et mist a
point et puis vinst en la sale ou il trouva le seigneur auquel il pria
que lui voulsist prester ung cheval. «Sire, dist le chevalier, a cheval
ne povez faillir car tout ce qui est ceans est vostre; mais je vous
vouldroye bien prier que si tost ne vous vueilliez departir d’icy et
attendez tant que soyés plus fort et gary de tout point.» «Ha sire, dit
Girart, je vous prie que du demeurer ne me parlez plus; ja vous ay dit
que besoing m’est de partir d’icy pour accomplir mon voyage, que long
temps a que l’ay promis. Et pour ce sire vous me pardonnerez car
autrement ne le puis faire.» «Sire, dist le seigneur, puis qu’il vous
vient a plaisir et que estre ne peult autrement, vostre voulenté se face
soit d’aler ou de demeurer.» Alors lui fist amener ung cheval ung des
meilleurs qu’il eust.
[Illustration]
Comment Girart prinst congié du chevalier et de la dame, et du grant
dueil que demena la damoiselle quant elle veist partir Girart.
Apres ce que Girart eust prins congié du seigneur et de la dame, il
monta a cheval. La pucelle saichant le partement de Girart estre si
subit, en pur cotheron, les cheveulx espars, ayant ung chappellet de
roses sur son chief, vint acourant au devant devant la sale ou elle
trouva Girart a cheval prest pour soy partir. Icelle pucelle avoit la
couleur fresche plus vermeille que la rose n’est en may qui est couloree
de blanc et vermeil. Les yeulx avoit beaulx et vairs, les sourcis
traictis, le corps bien fait, les bras longs, les mains blanches et bien
faictes; ung petit avoit surlevé son cotteron qui estoit de damas blanc,
par quoy on veoit son petit pié.
De la grant haste qu’elle avoit de venir a Girart se bleça ou petit
artoil a l’encontre d’une pierre tant que le sanc en sailloit. Quant
elle veist Girart estre monté, par grant force d’amours vinst a lui et
le prinst par la bride de son cheval et lui dist: «Ha sire, pour Dieu
mercy, vueilliez prendre pitié de moy et ne rompés point la grant amour
que j’ay a vous. Jusques a ores ne le vous ay osé dire jusques a ce que
fussiez gary, car bien cuidoye que ceans deussiez longuement demeurer.»
«Belle dist, Girart, je vous jure loyalment que en moy n’est plus de
demeurer. Partir me couvient d’icy: pourtant je vous prie qu’il vous
plaise moy donner congié.» La pucelle veant que nullement ne povoit tant
faire a Girart qu’il voulsist demeurer fut moult doulante. Girart les
commanda tous a Dieu, et eulx prierent a Nostre Seigneur pour lui, fors
la pucelle qui demenoit grant douleur. Girart se partist du chastel et
se prinst a chevauchier bien roidement car tousjours lui souvenoit
d’Euriant. Tant chevaucha celle journee sans aucune adventure trouver
qui face a raconter. Il veist devant lui ainsi comme a heure de vespres
ung chastel moult bel et fort seant sur une riviere et avoit nom icellui
chastel Mousson. Il passa le pont et la porte pensant en lui mesmes que
celle nuyt vouloit la demeurer, pour enquerir et savoir se aucunes
nouvelles pouroit oyr d’Euriant s’amye. Quant dedans le bourg fut entré
il veist une dame vefve assise devant son huys, a laquelle il requist
que celle nuyt le voulsist abergier. La dame lui respondist moult
courtoisement que voulentiers elle le feroit. Il descendist et entra
dedans; assés trouva varletz et serviteurs qui lui prindrent son cheval
et le menerent en l’estable; les autres le menerent en sa chambre.
Le souppé fut apresté et la table mise; la dame commença deviser a lui;
apres on apporta l’eaue et laverent puis se assirent entre eulx deux et
furent tresbien servis. Quant ce vinst apres souppé et qu’ilz furent
levez de table Girart prinst congié de la dame et s’en ala dormir,
jusques ce vinst le matin qu’il se leva, et n’avoit gaires dormy celle
nuyt car il n’avoit fait que penser a Euriant s’amye. Quant il veist
qu’il fut cler jour il ala oyr messe; quant il eust oy messe il prist
une souppe en vin et puis prinst congié de son hostesse et monta a
cheval et partist de la ville par la porte ou il estoit entré. Toute
celle matinee chevaucha tant qu’il vinst assés pres de Metz. Si pria
Dieu devotement que de s’amye Euriant peust avoir nouvelle. En faisant
ainsi ses prieres se trouva en une lande moult grande et plaine ou il se
prinst fort a chevauchier, et vist venir a dextre grant foison de gens a
cheval qui fasoient mener devant eulx grant foison de hernois, males et
bahus. Girart desirant savoir de leurs nouvelles les surattendist affin
qu’il peust chevauchier avec eulx et sçavoir de leurs nouvelles. Ilz
vindrent, Girart les salua et eulx Girat, et chevaucha avec eulx.
[Illustration]
Comment Girart vinst a Metz et trouva en son chemin gens qui y venoient
et lui dirent comment par une femme estrange la seur du duc avoit esté
murdrie par quoy ilz venoient pour la jugier.
Quant Girart fut meslé avec eulx moult courtoisement leur prinst a
demander a quy estoit le riche arnois qu’ilz menoient. «Sire, dist l’un
d’eulx, tout le harnois que vous veez est au conte de Bar, lequel vient
cy apres nous et va a Metz pour une piteable aventure que n’a gaires y
est advenue. Le duc de Metz nepveu de monseigneur avoit une sienne seur
germaine, laquelle de nouvel a esté piteusement murdrie par une femme
espaysee qu’il trouva en une forest au retour qu’il fist de saint Jaques
ou il avoit esté en pelerinage. Tant estoit amee du duc et si grant
fiance avoit en elle que du tout le gouvernement de sa seur lui avoit
baillié, et couchoit chascune nuyt avec elle, et saichiez que ce
n’eussent estez ses barons et conseilliers il l’eust esposee et prinse a
femme. Quant Girart oyst l’escuier qui lui disoit ces nouvelles, il lui
demanda combien de temps il avoit que le duc l’avoit amenee. Cellui se
pensa ung peu et lui dist la verité. Girart ayant oy l’escuier pensa ung
peu en lui mesmes qu’il couvenoit que ce fust s’amye Euriant selon le
jour et terme que par le duc avoit esté amenee de la forest ou il
l’avoit lassee. Si se teust atant sans lui plus riens enquerir; car
advis lui estoit que lui estre venu en la cité plus amplement le poura
sçavoir. Au plus tost qu’il peust se partist d’eulx et vinst en la cité
et se logea en ung des meilleurs hostelz de la ville, et tantost apres
lui y ariva le conte de Bar, lequel fut moult haultement receu par le
duc de Metz son nepveu et fut mené en son palaix; mais d’icelle venue
Meliatir ne s’esjoyssoit gaires, car bien eust voulsu estre a ceste
heure en Jherusalem. Moult doulant estoit que Euriant n’estoit arse et
brulee. D’autrepart Girart estre arivé en son hostel et en sa chambre
manda son hoste, que on nommoit Thibault, et lui pria que avec lui
voulsist disner. L’oste veant a son semblant Girart estre homme de façon
lui accorda moult voulentiers. La table fut mise ilz se assirent et
firent bonne chiere. Quant ilz eurent disné et qu’ilz furent levez de
table, Girart pria a son hoste qu’il lui voulsist tenir compaignie
jusques au palaix, pour ce qu’il avoit oy dire que jugement se devoit
faire d’un crisme que on disoit avoir esté commis par une damoiselle
estrange, et que bien fait seroit d’y aler; car en oyant pletz et
procés, jugemens et autres choses touchans justice, a l’oyr on povoit
moult aprendre.
«J’ay grant merveille comment ceste damoiselle a eu couraige de murdrir
celle dont tant estoit amee. Et pour ce, bel hoste, je vous prie que
dire me vueilliez la chose ainsi qu’elle est alee.» «Sire, ce dist
l’oste a Girart, puis que savoir le voulez je vous diray toute la
verité.»
Lors lui racompta et dist tout au long ainsi que la chose estoit
advenue, et ainsi parlant s’en alerent jusques au palaix. Quant la
furent venus ilz virent grant assemblee de gens, de chevaliers, de
barons.
Le duc de Metz et le conte de Bar son oncle estoient assis sur ung banc
bien richement paré pour oyr le jugement de la damoiselle. Girart et son
hoste se misrent en la presse avec les autres pour escouter et oyr.
Gaires ne furent la arrestez qu’ilz virent ung ancien chevalier qui se
leva de son siege, lequel estoit parent de Meliatir, qui commença a
plaidoyer la cause d’un lengaige moult affaictié et dist tout hault:
«Mes tresredoubtez seigneurs, pour ce que par vous ay esté requis de
parler, il n’est aujourd’uy tresor que avoir voulsisse que droit,
loyaulté et justice ne voulsisse conseillier. Mais s’il vous plaist sans
plus en riens dire pour ceste fois n’en diray plus, raison le doit: car
je suis prouchain parent a Meliatir, car riens ne vouldroye dire ou
mettre avant chose dont eust suspection sur moy qui mieulx saura si le
die.»
[Illustration]
Comment les barons estoient au conseil pour jugier la belle Euriant a
mort, et comment Girart emprinst a combatre a l’encontre du chevalier
qui l’avoit accusee a tort et sans cause.
Quant le seigneur de Nauvy eust finé sa raison et que autre chose ne
vouloit dire, le seigneur d’Aspremont se leva et dist: «Seigneurs, se
vostre plaisir est de moy ung peu entendre de ceste chose vous diray mon
advis. Verité est que l’omme qui entreprent a faire ung jugement fait
grant mal et pechié se il ne dist la juste verité; jamais a tort
jugement ne se doit faire s’il ne scet loyale occasion parquoy a mort
doye jugier homme ou femme. Vous avez oy Melyatir qui veult maintenir
que ceste damoiselle estrange a esté prinse au fait, ayant la main sur
le coutel duquel la seur du duc a esté murdrie. Quant est a moy jamais
ne croiray et si est impossible a croire que ceste damoiselle ait commis
ce crisme dont elle est accusee, que jamais elle ne fust arrestee ne
attendue d’avoir esté trouvee au fait, mais s’en fust enfuye ou musee en
lieu que par homme n’eust esté trouvee, et jamais ne se fust endormie
avec elle. Oncques tel hardement ne fut en homme ne en femme s’ilz
n’estoient hors du sens. Quant est a moy jamais ne le croiray. Elle fut
trouvee dormant. Saichiés que en ce point ne le feriés mie, et aussi en
veillant jamais ne l’eust frappee que incontinent ne s’en fust enfuye et
soy mise a sauveté. Si conseille, et est mon oppinion, que on voise vers
elle et que on lui demande se elle a commis le cas: c’elle dist non il
couviendra que Meliatir prengne la lance et l’escu pour ce que lui
mesmes dist que elle a fait et commis le murdre. Se chose est que la
dame treuve champion qui pour elle se vueille combatre Dieu lui porroit
aidier. Car selon mon advis la damoiselle n’y a coulpe se autrement ne
se peult prouver.»
Alors tous les barons et chevaliers qui la estoient dirent tous a une
voix que jamais meilleur conseil ne virent ne plus droicturier n’avoit
esté dit. Et conseillerent tous au duc que la damoiselle envoyast
querir. Euriant fut amenee, laquelle estoit bien pale et bien deffaicte
du desplaisir qu’elle avoit. Quant elle fut amenee devant le duc il lui
demanda pourquoy ne a quel cause elle avoit esté si hardie d’avoir
murdrie sa seur. «Sire, dist Euriant, oncques jour de ma vie le crisme
ne commis. Se il est trouvé et sceu a la verité que aye celle traÿson
commise, je abandonne mon corps a faire tel justice qu’il vous plaira.»
Lors Girart saillist en place et dist: «Sire, je m’offre pour elle pour
son droit et querelle deffendre. Je dis et vueil maintenir que se
Meliatir veult dire ne prouver qu’elle ait commis le murdre dont par lui
a esté enculpee, je suis cellui qui vueil prouver pour elle que oncques
elle ne le fist.»
Lors Meliatir saillist avant et dist: «Vassal, saichiés que autre chose
ne demande. Car avant qu’il soit vespre vous en recevrez la mort, et la
desloyale en sera brulee et arse en ung feu d’espines. Riens n’est
aujourd’uy au monde que avoir voulsisse, que a l’encontre de vous ne me
combate.» «Vassal, dist Girart, vostre hault parler ne orgueilleuses
manieres et menaces ne me font de riens esbaÿ. Car tel menace aucunefois
qui a grant paour. Je croy que avant que le vespre soit venu on verra
lequel de noz deux se gabera de son compaignon. A nul chevalier
n’appartient soy vanter ne dire chose dont a autre puist desplaire. Se
je treuve baron ou chevalier qui me vueille faire ceste courtoisie de
moy prester harnois, des maintenant suis prest de deffendre la querelle
de ceste damoiselle.» Quant le seigneur d’Appremont oyst Girart soy
plaindre d’armures, il lui dist: «Sire chevalier, pour armures ne
destrié ne demourez de deffendre la damoiselle, car assez vous en feray
avoir des meilleures que porray finer.»
[Illustration]
Comment Girart desconfist Meliatir et lui fist cougnoistre la mauvaise
traÿson qu’il avoit commise.
Alors incontinent sans plus actendre le duc fist aprester le champ et
les lices ainsi comme pour lors estoit accoustumé de faire, puis firent
alumer ung grant feu, puis fut amenee Euriant ou champ, laquelle estoit
piteuse chose a veoir, et prioient pluseurs a Dieu qu’il voulsist aidier
son champion. Girart se fist armer en son logis des armes que le
seigneur d’Appremont lui avoit envoyés. Pareillement Meliatir se ala
armé, triste et desplaisant de ce que justice n’estoit faicte d’Euriant;
laquelle estoit devant le feu, ou elle fasoit a genoulx et a mains
joinctes son oroison moult devote, priant Dieu que son champion voulsist
aydier et secourir aussi vrayement que a tort estoit accoupee. Pas ne
l’avoit recougneu car elle estoit en telle paour que mieulx sembloit
morte que vive.
Les deux champions furent amenez es lices montez chascun sur ung
puissant destrier. Girart veant Euriant empres le feu par grant couraige
appella Meliatir et lui dist: «Vassal, il n’est pas temps d’user de
menaces: or y perra lequel fera le mieulx. Je vous deffie de Dieu et de
la vierge Marie sa mere.»
Alors se reculerent et picquerent cheval d’esperon l’un contre l’autre
et baisserent les lances et rencontrerent tellement que leurs lances
furent rompues en plus de cent pieces, puis misrent la main a l’espee et
se combatirent merveilleusement, et frappoient si grans cops que le feu
partoit de tous costez, et tellement combatirent qu’ilz furent tous deux
bleciez et navrez. Euriant prioit tousjours Nostre Seigneur de bon cuer
que aydier voulsist son champion a son bon droit. Girart et Meliatir se
combatoient tousjours a l’espee, et tant que Meliatir, qui estoit hardy
et vaillant chevalier, leva l’espee contremont et frappa Girart sur le
heaume si grant cop que se Girart n’eust guency il l’eust fendu jusques
es dens.
Lors Melyatir lui escria: «Vassal, je croy que aujourd’uy vous
monstreray la grant folie que avez entreprinse de vous avoir voulu
combatre contre moy. Jamais plus beau jour ne verrez, se ainsi est que a
moy ne vous rendez vaincu.» Girart oyant Meliatir l’encommença fort a
regarder sans ce que ung seul mot lui voulsist respondre. Il tenoit
l’espee en la main dextre et frappa Meliatir sur le heaume si
couraigeusement que le nez et la moittié du menton lui abatist tout jus.
Le cop fut si merveilleux et si pesant qu’il vinst descendant comme
fourdre sur le col du cheval de Meliatir tant qu’il lui coppa tout jus
et fut force a Meliatir de tomber per terre lui et son cheval.
Lors Girart lui escria a haulte voix et lui dist a haulte voix: «Vassal,
desormais je vous conseille que voz vantises et haulx parlez vueilliez
refraindre. Assés de foy ay oy dire que trop parler nuyt, pour ce est ce
folie de menacier. Car au departir on verra lequel sera maistre de nous
deux.»
Meliatir soy voyant par terre fut bien esbaÿ; se leva a cop l’espee ou
poin, affermant en son coraige que mieux amoit morir qu’il ne rendist a
Girart le cop qu’il lui avoit donné. Car si grant angoise avoit que
gaires n’en failloit qu’il ne yssist de son sens. Il tourna son escu sur
son dos puis a deux mains leva son espee et frappa Girart sur son heaume
ung si merveilleux cop qu’il fut tout estonné, dont les barons qui la
estoient se esmerveillerent moult et disoient que Meliatir estoit
vaillant chevalier et que grant dommaige estoit de les laissier
combatre.