bonnes villez et tous li communs pays se consseillièrent sur chou, et
raportèrent leur consseil tout d'un acord. Liquelx consseils et rappors
fu telx que il leur sambloit que li roys ne pooit plus porter par
honneur les tors que li rois d'Escoche li faisoit: «car il est bien sceu
et est tout cler que anchiennement li roys d'Escoche faisoit houmage au
roy d'Engleterre, car jà n'ont il en leur pays nulle provinse, mès sont
enexé et conclavé en le provinse de Evruich, qui est archevesquiet et
dou royaumme d'Engleterre. Encoires avant il prendent le fourme de leur
monnoie sus les communez et ordonnanches d'Engleterre, et ont touttez
telx loix et telx coustummez que li Englèz ont, et ung meysme langage.
Dont il appert que li royaummes d'Escoche se depent et descent dou
royaumme d'Engleterre. Et troevent bien li Englèz que ychil doy pays
furent jadis tout à ung seigneur roy d'Engleterre, liquelx rois eut deus
filz. Si departi ens ou lit de le mort, presens tous les noblez des deus
pays qui à ce devoient y estre appellés, les deus royaummes; et donna
l'ainet Engleterre et au maisnet Escoce, parmy tant qu'il le devoit
tenir en fief et hoummaige de son frère le roy d'Engleterre. Or ont li
Escot, qui sont dur à entendre, tenu depuis une aultre opinion, liquelle
ne fet mie à souffrir. Si conseillonz et voullons, chiers sirez, que ces
coses soient encorrez remoustrées au roy d'Escoce et à son consseil, et
y metons cel loisir et grace pour l'onneur et amour de medamme vostre
sereur qu'il a espousée; et s'il ne vient à voie de congnissance des
requestez que on li a faittez et fera, il soit deffiiés; et vous
pourveés si efforchiement que pour entrer ou royaumme d'Escoce apriès
les deffianches faittez, si poissamment que pour ravoir et raquerre le
bonne cité de Bervich, qui est de vostre hiretaige; et ayés tel par
forche et par constrainte le roy d'Escoce qu'il soit tous joians s'il
puet venir à vous à hoummaige et faire satifation des tors et des
outraiges qu'il vous a fès ou li rois ses pères. Et enssi nous sommes
tous desirans d'aller avoecq vous à vostre commandement.»
Quant li rois d'Engleterre eut oy le responce de son consseil, et il eut
veut le bonne volenté de ses hommes, si fu moult liés et les en
remerchia grandement. Dont fu là regardé et avisé qui yroit en Escoce.
La besoingne et li voiaiges fu assis sus l'evesque de Durem et sus le
seigneur de Persi et le seigneur de Moutbray et le seigneur de Felleton.
Chil prelas et chil troy hault baron, qui là estoient presens,
acordèrent, à le priière et requeste dou roy, ce voiaige. Encores pria
li roys à tous que il se volsissent pourveir et appareillier à ung jour
qui adonc fu nommés, chascuns seloncq son estat, à estre au Noef Castel
sur Tin; et il li disent qu'il y seroient bien et volentiers, et n'y
aroit point de deffaulte. Ensi se departi li conssaulx del roy, et s'en
ralla chacuns en son lieu. Et ossi messires Jehans de Haynnau prist
congiet au roy, et se presenta à lui de bon coer et de grant vollenté.
De quoy li roys l'en seut grant gret, et li dist: «Biaux oncles, très
grant merchis à vous, et à vostre aye ne renunche jou pas; et se
besoings me croist ne touche, je vous manderay.» Sur che se parti li dis
messires Jehans del roy et de le roynne, se nièche, qui moult doucement
l'acolla au partir, et li pria qu'il le volsist recoummander à
monseigneur son père et à madamme se mère, et saluer ses bellez soers;
et il li dist qu'il le feroit vollentiers. Sour ce, se parti li dis
messires Jehans et toutte se compaignie, et s'en revint en Haynnau. Fo
15.
_Ms. de Rome_: Depuis ne demorèrent point lons jours que li rois
d'Engleterre auna tous les barons et prelas d'Engleterre qui ordonné
estoient à lui consellier, et les hommes des bonnes chités et villes,
qui par droit estatut y devoient estre convoqiet, car il estoit ensi
acordé que riens ne se devoit ne pooit passer sans euls. Qant tout
furent venu à Londres, li parlement et li consel conmenchièrent à
Wesmoustier, et furent li ambassadour d'Escoce apellé. Il vinrent et
entrèrent tout en la cambre dou consel, et là estoit li rois
d'Engleterre presens. Là lor fu demandé quel besongne les amenoit pour
ces jours en Engleterre. Li evesques de Saint Andrieu d'Escoce, qui fu
uns moult sages et discrés homs, remoustra la parole pour tous, et bien
le sceut faire. Qant il ot parlé, on les fist issir de la cambre, pour
euls consillier et faire response. Il alèrent petiier le parvis et le
clostre, tant qu'il fuissent rapellé.
Or conmenchièrent chil dou consel à parler et à proposer pluisseurs
coses, et ne peurent estre d'acort, et furent li Escoçois appellé; il
vinrent. Qant il furent venu, li archevesques de Cantorbie lor dist que
il ne pooient estre si tos definitivement respondu, mais il le seroient
au plus tos que on poroit, et que lor demande ne requeroit pas si brief
consel. Il n'en porent aultre cose avoir, et se departirent de là et
retournèrent à lors hostels. Et li consauz demora; et parlèrent
d'aultres besongnes qui lor touçoient, car il n'estoient pas asamblé
tout pour une cose. Et li rois s'en vint à Cènes, assés priès de
Wesmoustier, un hostel roial qui sciet sus la Tamise. Chil Escoçois
demorèrent plus d'un mois à Londres et ne pooient estre respondu, car li
consauls ne voloit, et tant que il furent si hodé et si tané que il
requissent et priièrent que, fust pour euls ou contre euls, il fuissent
respondu.
La cause qui metoit detriance ou consel dou roi, je le vous dirai. Il
consideroient generaulment entre euls deus coses: li une si estoit que
lors sires li rois estoit jones et à faire, et ne le voloient pas tenir
ne nourir en wiseuses, mais en painne et en travel d'armes; car, par les
wiseusses que ses pères avoit eu, estoit d'onneur li roiaulmes
d'Engleterre requlés, à laquelle cose il voloient retourner ou tout
parperdre. Li secons articles estoit que li Escoçois tenoient la chité
de Bervich et Struvelin, Dombare, Dalquest, Haindebourch et tout le pais
jusques à un pas que on dist Quinnesferi, où la mer d'Escoce doit
departir les deus roiaulmes, et que li Escoçois l'aueroient trop bon
parti, se uns si grans hiretages lor demoroit pasievlement, et que ce ne
faisoit pas à requerre ne à sousfrir: «Voire, disoient li auqun vaillant
homme ou consel dou roi, li Escoçois sont bien fol et ignorant, qui
quident, pour une fenme qui est serour de nostre roi, que nous doions
cest, que est hiretages à la couronne d'Engleterre, quiter. Il nous
tourneroit à grant blame et reproce, et aussi nous ne le poons faire.
Nous avons cause raisonnable de respondre as Escoçois et dire ensi: Il
nous rendent Bervich et tout le pais, ensi que li bons rois Edouwarz le
tint en son temps; et puis dou sourplus, nous entenderons à lors
tretiés. »
Ensi fu conclu ens ou consel d'Engleterre, et li Escoçois respondu, qant
il orent sejourné à Londres bien un mois. Qant li Escoçois oïrent ceste
response, il furent tout abus et veirent bien que li Englès voloient la
guerre. Toutes fois, il respondirent et dissent que il n'estoient pas
cargié de proceder sus tels trettiés, et que les paroles, que il avoient
oy et entendu, seroient reportées au pais. Si issirent hors dou consel,
et montèrent sus lors cevaus, et se departirent dou palais de
Wesmoustier. Et cevauchièrent au lonch de Londres, et vinrent à Saint
Jehan Lane en Griscerche, là où il estoient descendu. Et fissent par
tout lors hostels compter et paiier, et puis issirent de Londres; et
cevauchièrent tant par lors journées que il retournèrent en Escoce.
On estoit trop esmervillié pourquoi il demoroient tant. Qant il furent
revenu, li baron et li signeur d'Escoce vodrent savoir des nouvelles.
Ils ne les publiièrent pas sitos que il furent revenu, mais fissent
venir à Haindebourc tous ceuls qui tailliet estoient d'en savoir. Qant
tout furent venu en la presence dou roi meismes, li evesques de Saint
Andrieu parla et remoustra toute l'ordenance de lor voiage, et quel et
conment il avoient trouvé le roi d'Engleterre et son consel, et que plus
d'un mois il avoient atendu à avoir response. En la fin il l'eurent
tèle. Adonc lor remoustra li dis evesques toute l'ordenance des paroles
que li consauls d'Engleterre avoient respondu.
Qant chil qui là estoient entendirent que les besongnes se portoient
ensi, si furent tout abus, et dissent li plus sage: «Nous auerons la
gerre, il manque dou pourveir. A celle fois ichi, li Englès nous rueront
jus, ou nous les meterons en ce parti. Nostres rois est jones, et aussi
est le leur. Il fault que il s'asaient. Desous le solel, n'a plus
orguilleus ne presomptieus peuple que le peuple d'Engleterre est.» Li
jone chevalier et esquier d'Escoce, qui amoient les armes, et qui se
desiroient à avanchier, furent tout resjoy de ces nouvelles, car il
avoient assés plus chier la guerre que la paix. Fos 29 vo et 30.
=§ 51.= P. 107, l. 5: Li jours.--_Ms. d'Amiens_: Or revenrons à le
matère des Englès et des Escos. Li jours, qui denommés estoit, aprocha;
et vint li noblez rois Edouwars à tout son ost au Noef Castiel sur Tin,
et encoirez toudis li croissoient gens. Et là se tint par l'espasse de
huit jours, attendans chiaux qu'il avoit envoiiés en Escoche deviers le
jouène roy David et son consseil, liquel revinrent deviers lui au
neuvième jour, comme chil qui ne raportèrent aultre responsce que le
premierre. Et disent bien au roy d'Engleterre que li Escot estoient tout
appareilliet de lui recepvoir, puisque gueriier les voloit: «Dont, sire,
quant nous veysmes l'ordonnanche d'iaux et le affection qu'il ont de
tenir leur oppinion, nous deffiamez le roy et les siens de vous et des
vostrez. Si poés d'ores en avant, et sans fourfet, entrer sur yaux. Or,
regardés de quel costet.» Dist li roys: «J'en aray avis.» Adonc, s'en
consseilla, et on li dist que premiers on alaist deviers Rosebourch
[Bervich], et le assiegast on de tous lés, car c'est ungs castiaus qui
siet sus marche, et que li Escos tiennent pour concquès. Ceste cose fu
acordée.
Dont se parti li nobles roys Edouwars dou Noef Castiel, et fist ses
marescaux chevauchier devant, le comte de Sufforch et monseigneur
Thummas Waghe. Che premier jour, s'en vint li rois jesir à Urcol, ung
castel et une ville qui est au seigneur de Persi. Li ville estoit toutte
gastée des Escos, mais li castiaux n'avoit garde. L'endemain, vint li
roys dinner à Persi, et se tint là tout le jour, en atendant ses os et
ses gens, qui encoires estoient par derière. Fo 15 vo.
_Ms. de Rome_: Environ la Saint Jehan Baptiste, que on compta l'an de
grasce mil trois cens trente et un, li jones rois Edouwars d'Engleterre
et la roine s'en vinrent à Evruich euls tenir et lor estat, et cachier
as cerfs, as dains et as cheviruels. Et entrues se ordonnoient les
pourveances, et se faissoient très grandes et très grosses, pour aler
ens ou roiaume d'Escoce. Et fist li rois faire un mandement que toutes
gens tenans de li, portans armes, fuissent, le premier jour d'aoust, à
Evruich. Li mandemens dou roi s'estendi par toutes les parties
d'Engleterre jusques ens ou fons de Cornuaille, et tout vinrent à
Evruich. Adonc se desloga li rois et vint à Durem; et ensi que il
ceminoit, la roine sa fenme le sievoit. Et vint li rois au Noef Chastiel
et là s'aresta, pour tant que tous ceuls des lontainnes marces
d'Engleterre n'estoient point encores venu.
Ces nouvelles estoient bien sceues en Escoce, conment li rois
d'Engleterre, à poissance de gens d'armes et d'archiers, les venoit
veoir. Les auquns en faisoient grant doubte, et li aultre non. Toutes
fois, ils pourveirent les villes et les chastiaus tenables, et par
especial la chité de Bervic. Et i ordonnèrent li signeur d'Escoce à
chapitainne, mesire Alixandre de Ramesai, un trez vaillant et sage
chevalier, et des aultres chevaliers et esquiers assés avoecques lui. Et
li rois et la roine se tinrent en la marce de Haindebourch. Et n'avoient
pas li Escoçois entension que d'atendre le roi d'Engleterre, et de
combatre à lui poissance contre poissance, car il n'avoient pas gens
pour resister encontre les Englois. Il laisseroient bien perdre une
partie de lor pais et puis le recouveroient; et aussi il poursievroient
les Englès sus lors logeis, de nuit ou de jour, et lor poroient bien par
ce parti porter aucun damage. En ce consel s'arestèrent il. Et li rois
d'Engleterre se tenoit au Noef Chastiel sur Thin, et toutes ses gens
estoient logiet autour de li; mais point n'avoient encores passé la
rivière, pour la doubtance des Escos.
Entrues que li rois d'Engleterre estoit sus ce voiage, vint deviers lui
messires Robers d'Artois, ensi conme uns chevaliers tous desconfortez,
et il le savoit bien où prendre. Li rois d'Engleterre et la roine le
requellièrent moult doucement, car il lor estoit moult proçains de
linage. Et li dist li rois: «Messires Robert, biaus cousins, nous avons
assés pour nous et pour vous. Puis que vostre amic de delà la mer vous
deffallent, nous ne vous faudrons point à vostre besoing.» Et messires
Robers li avoit respondu et dit: «Monsigneur, grant merchis.» Li
intension dou roi et de son consel estoit tèle que, le roi retourné de
ce voiage et venu en la marce de Londres, il [li] asigneroit en
Engleterre terre, rentes et revenues, pour vivre honnourablement et
tenir son estat.
Qant li rois ot sejourné au Noef Chastiel sur Thin environ douse jourz,
et toutes ses gens furent venu, moult i avoit grant peuple. On nombra
les hommez d'armes, chevaliers et esquiers, à siis mille hommes, et les
archiers à chienqante mille. Si passèrent tout oultre la rivière dou
Thin, sus le pont dou Noef Chastiel; ailleurs ne le pooient passer. Et
passèrent chil de l'avantgarde, laquelle li connestables d'Engleterre et
li marescal menoient; et s'en alèrent logier sus le pais encontre la
frontière de Northombrelande, et ne prissent pas le cemin pour aler
viers Bervich, mais viers Rosebourch; et vinrent à Anwich et en la terre
le signeur de Persi.
Ensi que li rois d'Engleterre estoit logiés en la ville de Anwich et
toutes ses gens là environ, uns hiraus d'Escoce, qui s'apelloit Dondée,
vint deviers le roi et deviers les signeurs, et pria que il peuist estre
oïs; il le fu. Il dist au roi, presens ceuls qui le peurent oïr: «Très
chiers sires, je sui chi envoiiés de par aucuns prelas et barons
d'Escoce, qui sont venu jusques à la Mourlane, et là me doient il
atendre tant que je soie retournés deviers euls; et venroient volentiers
parler à vous et à vostre consel, sauf venant et sauf retournant.» Li
rois regarda sus le conte Henri de Lancastre, et sus auquns barons et
prelas qui là estoient. Adonc fist on traire le hiraut arrière, tant que
li rois fu consilliés. Acordé fu que li hiraus les nonmast là par noms,
liquel c'estoient, qui venir voloient: on lor acordoit volentiers la
venue et le retour. Li hiraus les nonma: il en i avoit sept, deus
prelas, et chevaliers jusques à chiench. Tantos, une lettre de sauf
conduit fu escripte et seelée et delivrée au hiraut, qui se departi de
là et retourna à ses mestres, et leur bailla le sauf conduit.
Qant il l'orent, il i ajoustèrent foi; et se departirent de la Mourlane,
et cevaucièrent tant que il vinrent à Anwich. Li rois d'Engleterre, à
l'eure que li Escos vinrent, estoit alés logier ou chastiel, et là
tenoit son estat. Quant li Escoçois furent venu et descendu de lors
chevaus, il furent logiet de par les officiiers dou roi. Adonc vinrent
auqun chevalier d'Engleterre qui les requellièrent, et qui à ce faire
estoient conmis; et les enmenèrent deviers le roi et les signeurs, qui
atendoient lor venue. Tout li signeur d'Engleterre, qui là estoient en
la presence dou roi, s'ouvrirent et laissièrent les Escoçois passer. Il
enclinèrent le roi, et non plus avant. Li rois les requelli de une
parole tant seullement, ce fu que il dist en son langage: «Bien venant.»
De trop petit se disfèrent li uns langage de l'autre.
Or vous nonmerai les deus prelas et les chienc chevaliers, l'evesque de
Saint Andrieu et l'evesque d'Abredane, messire James Douglas, frère à
messire Guillaume qui porta le coer dou roi Robert de Brus en Grenade et
là morut, messire Arcebaus Douglas son fil, le conte de Qarrich, mesire
Robert de Versi et mesire Simon Fresiel. Li evesques de Saint Andrieu fu
chils qui remoustra la parole et dist: «Sire rois, et vous baron et
prelat d'Engleterre, qui chi estes, nous sonmes ichi envoiiés de par
toute la generalité dou roiaulme d'Escoce, et sonmes esmervellié, euls
avoecques nous, et nous avoecquez euls, à quel title si soudainnement
apriès les trieuves fallies entre Escoce et Engleterre, vous estes esmeu
à nous faire gerre, qant nostres sires li rois d'Escoce a, sire rois
d'Engleterre, espousé vostre soer. Nous i adjoustions au dit mariage
grans aliances, et fuimes generaulment en toute Escoce moult resjoi,
qant la dame nous demora roine. Et nous torne à grant mervelle celle
dureté que vous avés empris à faire à vostre frère, nostre roi, et
vostre serour, nostre roine, qant ce tant de petit hiretage que Dieus
lor a donné, vous volés destruire. Si vous prient, par nous, nostres
sires li rois et madame la roine que vous ne voelliés pas faire celle
cruaulté que d'ardoir et essillier lor hiretage; et retraiiés vous et
faites retraire vos hommes, et leur donné[s] congié çasqun de retourner
en son lieu. Et prenés trois ou quatre prelas des vostres et otant des
vostres barons d'Engleterre, et nostres sires li rois en metera otretant
à l'encontre; et ce que chil trouveront ou decré de lor disposition, il
deposeront sus l'ordenance des deus roiaulmes. Et sera tenu à ferme et à
estable, pour tous jours mès, ce que deposé en sera; et demorrés, vous
et vostre frère, en paix, et ensi vostre hiretage. C'est la parole que
nous vous remoustrons, et pour qoy nous sonmes venu, et sur ce nous
demandons à avoir response.»
Qant li evesques de Saint Andrieu d'Escoce ot ensi parlé, il fu moult
bien oïs et entendus. Donc fu dit as Escoçois que il se traissent
arrière, on conselleroit lor parole, et puis aueroient response. Il le
fissent; et s'en alèrent li Escoçois tout ensamble en une aultre cambre
qui estoit ordonnée pour euls. Encores fu conmandé que tout widassent de
la cambre dou roi, reservé ceuls dou consel. Il widièrent chil qui là
n'avoient que faire. Là repliqièrent li signeur, en la presence dou roi,
toutes les paroles et requestez des Escoçois, et demandèrent: «Or sus,
qui fera la response, et qui parlera à point sus che que il ont dit et
proposé?» Donc parla messires Renauls de Gobehen, uns moult sages et
vaillans chevaliers, pères à mesire Renault, qui fu depuis aussi uns
moult preus et vaillans chevaliers, et dist: «A tout ce que chil
Escoçois reqièrent et demandent, ne fault pas trop grant consel. Il
seront respondu ensi, pour ce que il ont demandé à quel title li rois
nostres sires et nous lor faissons gerre: c'est por le mauvesté et
rudèce de euls. Car jà sèvent il et ont sceu leur père, passé sont li
terme de cinq ans, que li rois d'Escoce doit tenir et relever et faire
honmage au roi d'Engleterre de tout le roiaulme d'Escoce, reservé auquns
isles qui marcissent à l'encontre d'Irlande et de Norvègue, les quels
isles sont nonmé les sauvages Escos, et ont un signeur pour euls, qui se
nonme Jehans des Adultilles. Chils obeist au roi d'Escoce, et non à
nous. Et ceste raison, on lor metera en termes tout premiers, car elle
est toute clère; et bien le scèvent, quoi que il en ignorent.
Secondement, pour reconquerre ce qui est nostre, la chité de Bervich et
tout le pais jusques à la mer c'on dist d'Escoce; et se ce il nous
voellent rendre debonnairement, et que li rois viengne à honmage au roi
nostre sire et recongnoise l'onmage à estre lige, presens les barons
d'Engleterre et ceuls d'Escoce, et que de ce soient lettres escriptes et
seelées dou roi d'Escoce et des barons d'Escoce, il demorront en paix.»
Adonc fu dit à messire Renault de Gobehen: «Sire, il plaist au roi que
vous fachiés la response, car avés la matère toute pourveue.» Donc
respondi messires Renauls et dist: «Je le ferai volentiers.»
Adonc furent appellé li Escot. Il vinrent avant et entrèrent dedens la
cambre, et nuls fors euls. Li consauls dou roi se mist sus deus èles, et
les Escoçois enmi euls. Qant il furent tout aquoisié, messirez Renauls
de Gobehem parla et dist: «Entre vous, signeur d'Escoce, vous demandés à
avoir response et non aultre cose, et vous l'auerés, et bien briefment.
Vous avés demandé à quel title nous vous volons presentement faire
guerre. Vous le savés bien, quoi que vous ignorés; mais puis que il faut
que nous renouvellons la parole, je parole pour nostre sire le roi et
pour tout le pais generaument d'Engleterre. Et dissons que vostres rois
est tenus, et ont esté tout si predicessour, roi d'Escoce, et seront li
successour, à faire honmage au roi d'Engleterre, à ceuls qui furent et
seront. Et cela avoech le calenge nous volons tenir en droit, et le
demandons et requerons comme le bon hiretage à la couronne d'Engleterre.
Avoecques tout ce, nous disons, et pour ce sonmes nous logiet sus les
camps, que vous, qui estes d'Escoce des plus grans et li consauls dou
roi, tenés contre l'onnour et majesté roial dou roi d'Engleterre et de
ses hoirs, la chité de Bervich et grant pais qui s'estent jusques à
bonnes de la mer d'Escoce, et volés demorer en celle tenure par manière
de conquès. Sachiés que nostres sires li rois ne le puet sousfrir ne
voelt. Et se il le voloit par auqune dissimulacion, pour tant que avés
mis en termes que il deveroit tenir en pais ce tant de petit hiretage
que son frère le roi d'Escoce et sa serour ont, et tient à present, se
ne le sousferroient pas si homme, et sont tout conforté que toutes ces
coses vous remeterés arrière. Et fera vostres sires li rois foi et
hommage lige à nostre sire le roi d'Engleterre, se il voelt demorer en
paix. Et le feront aussi tout chil qui sont enexsé et conclavé ens ès
terres, qui sont et doient estre tenues et relevées de foi et d'onmage
de nostre signeur le roi d'Engleterre. Et se vous estez fort, de par
vostre roi et les vostres, de acorder toutes ces coses recordées, si
ditez oil; et nous entenderons à la paix.» Donc respondirent li Escoçois
et dissent: «Nennil, ne nous n'en sonmes ne cargié ne introduit.» Donc
respondi li chevaliers englois et dist: «Vous perdés aultrement vostre
langage; et puis que vous volés proceder dou contraire, retraiiés vous
viers les vostres, et lor dites ce que vous avés trouvé en nous, car
vous n'enporterés aultre cose.»
Qant li Escoçois orent entendu messire Renault de Gobehem ensi parler et
soustenir la querelle des Englois par celle voie, si furent tout abus
et ne sceurent que dire, ne que repliqier, mais il prissent congiet dou
retraire; on lor donna. Et issirent dou chastiel, et retournèrent là où
lor cheval estoient; et burent un cop et mengièrent, car des biens de
l'ostel dou roi on lor envoia assés. Et puis montèrent sus lors chevaus,
et partirent de Anwich; et chevauchièrent tant que il trouvèrent le roi
et auquns des signeurs d'Escoce, par lequel consel il estoient venu
deviers le roi d'Engleterre et son consel. Si lor recordèrent tout au
lonch quel cose il avoient trouvé, et la response grande et orguilleuse
que il avoient eu des Englois. Et moustroient bien en lor parole que li
rois d'Engleterre n'avoit en toutes ces coses nulle poissance, et que li
pais et roiaulmes d'Engleterre faisoit fait et partie dou calenge et dou
proceder avant; et avoient bien entendu que, se li rois d'Engleterre se
voloit dissimuler, taire tous quois et quiter l'onmage et le calenge, se
ne le quiteroient pas ses gens. Adonc dissent ils entre euls:
«Confortons nous et faisons dou mieuls que nous poons. Nous auerons la
gerre, et ne l'euimes onques si dure ne si folle que nous auerons pour
le present.»
Ensi demorèrent les coses en cel estat, ne depuis n'i ot trettié nul
quelconques, pour celle saison, entre Engleterre et Escoce; mais se
departi li rois d'Engleterre et toute sa poissance de Anwich et de là
environ, où ses gens estoient logiés. Cil avoient encores cent mille
chevaus; et ensi que il ceminoient, pourveances les sievoient à esfort,
as sonmiers et à charroi. Et prissent li Englois pour celle fois le
cemin de Rosebourch et de Miauros. Encore s'esten toute Engleterre
jusquez à là. Miauros est une abbeie de Saint Benoit; et là se depart, à
une petite rivière qui i court, li roiaulmes d'Escoce d'un lés, et li
roiaulmes d'Engleterre d'aultre. La première ville que on trueve en
alant en Escoce, c'est la Mourlane: là vinrent logier li connestables
d'Engleterre, li contes de Norhanton et li marescal, li sires de
Felleton et messires Thomas Wage. Qant ce vint à l'endemain, toute li
hoos fu logie en Escoce, et laièrent Bervich à la bonne main. Bien
savoient que il i retourneroient qant il aueroient fait lor emprise;
mais il voloient veoir se il trouveroient à qui parler, car il ne
demandoient que la bataille. Si esploitièrent tant li rois d'Engleterre
et ses hoos que il foullèrent grandement la plainne Escoce, et ardirent
et essillièrent moult de villes et de hamiaus.
Moult petit de villes fremées sont en Escoce: il i a grant fuisson de
chastiaus, et non pas tant de diis fois que il i a en Engleterre. Et ont
li Escoçois celle manière et condition, qant il sentent les Englois
venir à poissanche telle que pour lors il avoient, il tiennent les
camps. Et ne s'encloent point li signeur en lorz chastiaus; et dient que
uns chevaliers, qui là est enclos, ne puet non plus faire que un aultre
homme. Li Englois quidièrent trouver le roi en Haindebourc, car c'est
Paris en Escoce, mais non fissent; car il en estoit alés oultre et mené
sa fenme sus la sauvage Escoce. Et li chevalier et esquier dou pais
s'estoient requelliet et mis ensamble, et avoient fait mener tous lors
meubles et cachier lors bestail, dont il ont grant fuisson, ens ès forès
de Gedours qui sont inhabitables; et bien scèvent que les Englès ne les
iroient jamais là querre, car point ne congnissoient les entrées et les
issues, et sont fortes à cevauchier.