tost qu'il peult, et s'en vint en Haynnau deviers le comte Guillaume,
qui adonc regnoit et se tenoit en l'ostel de Hollandes, à
Vallenchiennes, maladieus et travilliés par heures de gouttes. Et
recorda au comte sen avenue, et coumment li rois de France l'avoit
aqueilliet en grant haynne. Si l'en demanda à avoir consseil. Li comtes
de Haynnau, qui ses serourges estoit, car il avoient deux serours
espousées, fu durement esmervilliéz de ces nouvelles, et li dist que
vollentiers pour l'amour de lui il envoieroit deviers le roy de Franche,
et li aideroit à faire sa pais. Si em pria monseigneur Jehan de Haynnau,
son frère, et l'evesque de Cambrai, qui estoit pour le temps, que il y
volsissent aller. Cil li acordèrent vollentiers et vinrent en Franche
deviers le roy, pourveu et avisé de lettres de par le comte de Haynnau,
et de biel langaige pour excuser le dit monseigneur Robert, en lui
priant que il lui vosist pardonner son mautalent et li rendre ses enfans
et sa terre. Mès li roys n'y volt oncques de riens entendre, ains manda
au comte de Haynnau, par monsigneur Jehan de Haynnau son frère que, se
il soustenoit ne tenoit ne comfortoit en riens le dit messire Robert, il
n'aroit pieur ennemit, ne plus grant de lui.
De quoy li comtez de Haynnau fu moult corouchiés, quant il oy ces
nouvelles et si fors mandemens dou roy. Et s'en consseilla as pluiseurs
grans barons de son pays qu'il en estoit bon à faire, car il amoit
durement le dit monseigneur Robert; et bien disoit que, se il fuist
hetiés et que il pewist chevauchier, il li cuideroit bien faire se pès,
avoec l'ayde dou duc de Braibant. Dont dissent li baron de Haynnau que
il n'avoit que faire d'entrer en haynne, ne mettre son pays en guerre
contre le roy de Franche pour messire Robert d'Artois; mès, se il le
volloit aidier et comforter de misse secretement, faire le pooit, et le
laissast pourcacher et querre amis là où bon li sambloit, car il avoit
bien des plus prochains qu'il ne li fust. Li comtes crut son consseil et
fist delivrer à messire Robert secretement six mille viés escus pour
paiier ses frès; et li donna draps, chevaux et jeuiaux au departir, et
le recoummanda à Dieu. Et s'en vint adonc le dit messires Robiers
d'Artois à Namur veoir sa soer la comtesse de Namur et le jouène comte
Jehan de Namur, son nepveult et les autrez, Guillaume, Robert et Loeis,
qui estoient adonc mout jone damoizel. Sa serour le rechupt à joie, et
li fist feste ce qu'elle peult; che ne fu nient longement, car li roys
de Franche y mist remède.
Quant li roys Phelippes oy dire que messires Robiers d'Artois se tenoit
à Namur dalés le jouène comte son nepveult, si en fu courouchiéz et
manda et coummanda outreement et très especialement au comte que, se il
ne li faisoit wuidier sa terre, il le courouceroit hasteement, et li
torroit tout ce que il tenoit de lui en Franche, et li feroit ardoir et
courir son pays de ses voisins meysmes. Quant li jouènes comtez de Namur
et ses conssaux oïrent che, si ne vorent pas courouchier le roy, et
obeirent à ses mandemens. Lors se parti messires Robers et s'en vint en
Braibant deviers le duc Jehan son cousin, qui lors se tenoit à le Leuwre
et qui le rechupt à joie, à qui messires Robiers d'Artois dist toutte
sen aventure et coumment li roys le decachoit et faisoit decachier de
pays en pays, et ne savoit mès où aller, s'il li falloit. Dont li dist
li ducs de Braibant: «Biaux cousins, ne vous esbahissiéz de riens, car
j'ai terre et mise asséz pour vous conforter, ne je ne sui de riens tenu
de obeir au roy de Franche. Si vous tenés dallés moy, et je regarderay
et pensseray à vos besoingnes.» Fo 19 vo.
_Ms. de Rome_: Et couvint le dit messire Robert soudainnement laissier
fenme et enfans, des quels li rois de France estoit oncles, et partir
dou roiaulme et venir en l'Empire. Et se tint à Namur un petit de temps,
car la contesse estoit sa serour. Et de là il vint en Braibant, et le
quida li dus de Braibant apaisier au roi de France, mais il ne peut.
Adonc vint il en Hainnau, car li contes et li avoient deus serours
[espousées]. Li contes se mist en painne de remettre à paix messires
Robers d'Artois au roi de France, et i envoia sa feme, qui serour
estoit dou roi Phelippe, et messire Jehan de Hainnau, son frère; mais il
retournèrent sans riens faire.....
Qant messires Robiers d'Artois se vei ensi aquelliés dou roi Phelippe et
de la roine, et que à la priière dou duch de Braibant, dou conte de
Hainnau et dou conte de Blois, il ne pooit venir à paix, et estoient sa
fenme et si enfant enprisonné, il li deubt tenir et tourner à grant
desplaisance, car encores n'avoit il de quoi vivre, se li signeur ne li
aidoient. Si s'avisa, puis que ensi estoit, il honniroit tout, et
meteroit tel tourble et descort en France que les traces i demorroient
deus cens ans à venir. Il prist congiet au conte de Hainnau et à la
contesse. Ce fu li darrains hostels adonc, dont il se parti. Li contes,
qui fut moult amis et honnourables, et qui avoit grant pité de li, et
aussi avoient tout signeur et toutes dames de bien, li fist delivrer et
baillier or et argent pour paiier ses menus frès, car il s'en voloit
aler en Engleterre; mais il s'avisa que il iroit prendre congiet aussi
au duch de Braibant, qui moult l'amoit, et li contes de Hainnau li
consella.
Si se departi de Valenchiennes et vint à Mons, et puis à Halle et à
Brouselles, et là trouva le duch de Braibant. Se li remoustra, quoi que
li dus en seuist assés, toutes ses tribulations. Li dus en ot pité et li
dist: «Biaus cousins, on vous fait tort, et li rois de France est mal
consilliés. Bien veons et entendons qu'il est aournés et parés de
mauvais consel: se l'en pora bien mesceir. Nous avons terre et pais
assés pour vous tenir à l'encontre de tous vos nuisans.» De ces
proumesses se resjoi messires Robers d'Artois et se tint dalés le duch
de Braibant, son cousin, pour tant que il en pensoit mieuls à valoir, et
que li dis dus, qui rices et poissans estoit, le deuist mettre à coron
de tous ses incouveniens, mais non fist; car la poissance dou roi de
France est trop grande et avoit en trop grande haine encargié le dit
messire Robert d'Artois, ensi que il fu apparans. Fos 28 vo et 29.
P. 101, l. 27: soustenroit.--_Ms. B 6_: Sy le soustint le plus longement
le ducq Jehan de Brabant, qui ly presta son chastel d'Argentuelle. Mais
le roy Phelippes fist deffier le duc de Brabant pour celle cause, et
envoia douze prinches qui ardirent le pais. Et y furent les Lygois adonc
jusques à [Hanut][85]. Fo 61.
[85] _Ms. B 6_: huit. _Mauvaise leçon._
P. 102, l. 2: poroit.--_Ms. d'Amiens_: Li dus de Braibant ne fist comte
de ces manaces et remanda au roy, par ses messagiers meysmez, que
messires Robiers d'Artois estoit ses cousins bien prochainz et ung des
plus nobles de sancq du monde. Si le devoit aidier et conforter par
linage. Et encoires li mandoit il que il ne creoit mies que messires
Robiers d'Artois euist cause nulle à ce dont il l'amettoit, et que il
faisoit mal et pechiet, quant ainssi pour amise il le deshonneroit et
tolloit son hiretaige. Fo 19 vo.
P. 102, l. 9: tant.--_Ms. de Rome_: par son or et par son argent dez
grans amis en Alemagne. Fo 29.
P. 102, l. 11: Liège.--_Ms. d'Amiens_: messire Awous de le Marce, qui
estoit evesque pour le tamps. Fo 19 vo.
P. 102, l. 12: Coulongue.--_Les mss. de Valenciennes et de Rome
ajoutent_: l'arcevesque de Trièves. Fo 40.--_Le ms. d'Amiens ajoute_: le
arcevesque de Maience. Fo 19 vo.
P. 102, l. 12: li dus.--_Ms. de Rome_: le conte de Gerlles. Fo 29.
P. 102, l. 13: Jullers.--_Le ms. d'Amiens ajoute_: le comte de le
Marche, le comte des Mons, messire Ernoul de Bakehen. Fo 19 vo.--_Ms. de
Valenciennes_: conte de Jullers. Fo 40.
P. 102, l. 15: tout.--_Ms. de Rome_: sus un jour et à une fois. Fo 29.
P. 102, l. 16: roy.--_Ms. d'Amiens_: et leur donna grant or et grant
argent, affin que il vosissent deffiier le duc de Braibant et le
gueriier; et il s'i asentirent parmy les grans dons qu'il en eurent.
Encoires y vot mettre et bouter li roys le jouène comte de Namur, mais
il s'en excusa bellement et dist qu'il serviroit le roy de France en
touttes autrez manièrez, fors en ceste. Fo 19 vo.
P. 102, l. 18: Hanut.--_Ms. de Rome_: et demorèrent deus jours. Fo 29.
=§ 49.= P. 103, l. 16: Vous avés.--_Ms. de Rome_: Vous sçaves, si com il
est contenu ichi desus en nostre histore, conment les trieuwes furent
prisses et données entre Engleterre et Escoce, et aussi conment li
mariages fu fais dou jone roi David d'Escoce à la serour le roi
d'Engleterre. De quoi li Escoçois en quidièrent trop grandement mieuls
valoir, mais li Englès ne l'entendoient pas ensi, eulz qui ne pueent
amer les Escos, ne ne fissent onques, ne jà ne feront. Qant les
trieuwes furent fallies entre euls et les Escos, qui avoient duret trois
ans, il ne vodrent point sousfrir par nulle voie que les trieuwes
fuissent reprisses, car il voloient avoir la guerre, car li sejourners
lor desplaisoit trop grandement, Englès sont de celle nature: il ne
sèvent, ne pueent, ne voellent longement sejourner sans euls ensonniier
en gerre; et demandent les armes, n'ont cure à quel title, et trop
grandement s'i dilitent et abilitent. Encores estoient les Escoçois
assés au desus de lors besongnes et tenoient la chité de Bervic, que li
rois Robers de Brus, qant il leva le siège de Struvelin, avoit conquis
sus le roi Edouwart, père au jone roi Edouwart, dont il desplaisoit
grandement as Englès. Et pour ce avoient li auqun parlé vilainnement en
Engleterre sus le conte de Qent, qant il acorda si tos sa cousine,
Isabiel d'Engleterre, par mariage, au roi d'Escoce, lor adversaire.
Qant les trieuves furent fallies d'Engleterre et d'Escoce, li Escoçois,
qui quidièrent trouver auqune amour et aliance deviers le roi
d'Engleterre et son consel, pour la cause de ce que lors sirez avoit à
fenme la serour le roi d'Engleterre, envoiièrent ambassadours d'Escoce,
tels que l'evesque de Saint Andrieu, l'evesque d'Abredane, messire
Robert de Versi, messire Arcebaut Douglas, messire Simon Fresel et
messire Alixandre de Ramesai, deviers le roi d'Engleterre et son consel.
Et vinrent chil prelat et chil chevalier d'Escoce, sus bonnes
asegurances, en la chité de Londres. Pour lors, li rois d'Engleterre et
la roine Phelippe tenoient leur hostel, une fois à Eltem, et l'autre
fois à Windesore. Pour ces jours que li Escoçois vinrent, estoient li
rois et la roine à Eltem; si se traissent deviers euls tout
premierement, ensi que pour mieuls valloir. Car au voir dire, il avoient
plus chier à entendre à unes longes trieuves ou avoir paix que la
guerre; car lor poissance en Escoce estoit trop afoiblie, tant dou roi
Robert qui mors estoit, que de mesire Guillaume Douglas et dou conte de
Moret.
Li rois d'Engleterre et la roine et li chevalier d'ostel requellièrent
assez courtoisement ces signeurs d'Escoce, pour la cause de ce que li
rois Davis, lors sires, avoit à fenme leur serour; et remoustrèrent au
roi moult doucement ce pourquoi il estoient là venu et envoiiet de par
tout le pais. Li rois respondi à ce et dist que il fuissent li bien
venu, et que volentiers il meteroit son consel ensamble et là seroit; et
toute l'adrèce que il poroit faire, fust de trieuves ou de paix, salve
l'onnour de li et de son roiaulme, il i meteroit. Ceste response souffi
assés as Escoçois, et retournèrent en la chité de Londres. Fo 29.
P. 104, l. 14: barons.--_Ms. d'Amiens_: Lors assambla tout son consseil,
les nobles et les grans barons d'Escoce et ossi les prelas. Fo 14
vo.--_Ms. de Valenciennes_: Lors assambla tout son conseil, prelas,
barons et citoiens. Fo 30 vo.
P. 105, l. 12: conseil.--_Ms. d'Amiens_: qui desiroient à avoir le
guerre as Escos, et contrevengier le mort de lor proismes, qui furent
ochis devant Struvelin et en le cache qui fu assés dammagable et
honteuse pour les Englès. Fo 15.
P. 105, l. 20 et 21: decaciés.--_Mss. A 1 à 6, 18 à 22_: de Braibant. Fo
27.
P. 105, l. 25: l'Empire.--_Ms. d'Amiens_: Enssi ne se peult messires
Robiers d'Artois tenir ne en France ne en l'Empire. Si eult avis et
consseil qu'il s'en yroit en Engleterre veoir le jouène roy Edouwart, et
li metteroit avant tel cose dont gaires ne se dounnoit garde, qui
coustèrent au royaumme de Franche. Si prist congiet au duc de Braibant
qui li fist au partir delivrer six mille viés escus pour paiier ses
frès, et se parti couvertement de Braibant et vint en Anwerz. Là entra
il en ung gros vaissiel et toutte se mesnie, et fist tant et naga par
mer qu'il ariva à Zanduch[86] en Engleterre, en ce tamps que li rois
englès estoit en Escoce, ensi que vous avés oy chy devant.
[86] _Ms. de Valenciennes_: Eurewich. Fo 40.
Quant messires Robiers d'Artois oy ces nouvelles que li roys
d'Engleterre estoit en Escoce, qui gherioit là les Escos, si n'en fu mie
plus liés. Nonpourquant il prist ghides pour lui mener celle part, et se
parti de Zandvich o toutte se routte, et prist l'adrèce pour venir vers
Stanfort et vers Lincelle et tout le droit chemin d'Escoche; et passa
ces villes que je vous nomme et pluiseurs autrez, et vint à Dancastre et
de là à Yorch[87] c'on dist Ebruich, où la roynne Phelippe d'Engleterre
sa cousine et sa nièche estoit toutte enchainte du biau fil, qui depuis
fu noummés Edouwars et princhez de Galles[88]. Quant la roynne seut la
venue de monseigneur Robert d'Artois son oncle, si en eult grant joie,
et le requeilli et festia grandement, enssi que bien le seut faire, et
le retint dalléz lui environ six jours. En ce termine, vinrent
certainnes nouvellez à le roynne que li roys sez maris avoit pris le
castel de Haindebourch, et s'estoient chil dedens rendu au roy, sauve
leurz viez, par les enghiens qui nuit et jour jettoient à le fortrèche.
Ensi eult la roynne double joie.
[87] _Ibid._: Bervich. Fo 40 vo.
[88] _Ibid._: qui fu moult vaillans, dont tant avez oy parler.
Lors se parti messires Robiers d'Artois, et dist que il volloit aller
deviers Escoce, et veoir le roy comment il s'i maintenoit. Dont fist la
roynne appareillier grans gens d'armes et bien trois cens archiers, dont
messires Henris de Biaumont fu chiéz, pour aconduire le plus sauvement
jusques au roy monseigneur Robiert son biel oncle, liqués chemina et
esploita tant avoecq se route qu'il vint à Bervich en Escoche qui se
tenoit de par le roy d'Engleterre. Et rechurent chil qui dedens
estoient, par le congnissance qu'il eurent de monseigneur Henry, le dit
monseigneur Robert et touttes ses gens à grant joie, et se rafreschirent
en Bervich trois jours. Là eurent il nouvelles que li roys estoit partis
de Haindebourch, et avoit mis grant garnison ou castel, et en estoit
allés devant Struvelin et l'avoit asegiet. Lors se parti li dis messires
Robiers d'Artois de Bervich, et chevaucha à esploit celle part.
Tant esploita messires Robiers que il approcha l'ost le roy. Et quant il
fu ensi que environ trois lieuwes englesces priès, messires Henris de
Biaumont qui le conduisoit, chevaucha devant, et vint deviers le roy, et
li dist les nouvelles de monseigneur Robiert qui venoit. Liquelx roys fu
moult liés, et fist monter aucuns de ses barons et venir contre lui; et
l'amenèrent tout parlant et devisant en l'ost et en le tente dou roy,
qui vint contre li bien avant et le festia grandement et li demanda:
«Biaux cousins et oncles, quelz besoingnes vous amainnent maintenant en
ce pays?»--«El non Dieu, sire, dist messires Robers, vous le saréz, car
c'est raisons.» Adonc li compta il toutte se fortunne et sen aventure,
et coumment li roys Phelippes, à qui il avoit fait tant de biens, li
avoit tollut sa terre et emprisonnet ses deus fieux, Jehan et Carle, et
bani publiquement du royaumme de Franche. Plus avant il ne le laioit en
nulle place delà le mer demourer; ne il n'estoit comtes de Haynnau, ne
duc de Braibant, ne comtes de Namur, ne autrez sirez qui, pour le
doubtance dou roy de France, le pewist ne osast conforter, ne tenir
dalés li.
De ces parolles et de pluiseurs autres que messires Robiers li recorda,
fu li rois moult esmervilliéz. Si recomforta le dit monseigneur Robiert
et li dist: «Biaux oncles, nous avons assés pour nous et pour vous. Ne
vous sousiiés ne esbahissiés de riens, car se li royammez de France
vous est petis, li royaummes d'Engleterre vous sera grans
assés.»--«Monsigneur, che dist messires Robiers, toutte men esperance
gist en Dieu et en vous, et me confesse chi que, à tort et à pechiet, je
consenti jadis vostre deshiretance. Et[89] fis en partie celui roy dou
noble royaumme de Franche, qui nul gret ne m'en set, et qui pas n'y a si
grant droit comme vous advés. Car, par droit, et par proismetet de le
sucession monseigneur Carlon, roy de Franche, vostre oncle, vous
deveriés tenir l'iretaige et en estes sans cause eslongiés; car cils qui
l'est estoit plus lontains de vous ung point: il n'estoit que cousins
germains, et vous nepveus.» De ces parolles fu li rois tous penssieux,
et touttesfois il les oy vollentiers; mès, tant qu'adonc, il n'en fist
mies trop grant compte, car[90] bien savoit qu'il y retouroit quant il
vouroit. Si fist le dit messire Robert pourveyr de logeis et de toutte
ordonnanche qu'il li appertenoit. Fo 20.
[89] _Ms. de Valenciennes_: et fis pour celui roy plus que nulx.
Fo 41.
[90] _Ibid._: car à ce convenoit grant conseil et advis de le
laissier pour l'eure ensy.
P. 105, l. 27: Ricemont.--_Ms. de Rome_: De rechief, pour tant que tous
li consauls d'Engleterre estoient là asamblés, li clers meismes, liquels
avoit parlé et remoustré les besongnes qui touçoient au roi et au
roiaulme par le conmandement et ordenance dou roi, parla là pour le
asignation de mesire Robert d'Artois avoir, qui estoit li uns des plus
gentils homs de ce monde. Et remoustra li dis clers tout au lonc conment
Phelippes de Valois l'avoit de fait et de poissance banit et escachiet
hors dou roiaulme de France. Se avoit il sa serour espousée, laquelle il
tenoit en prison et ses enfans. Or voloit li rois d'Engleterre, qui
l'avoit retenu et de son consel, puisque on li avoit osté et pris le
sien en France, que en Engleterre il euist terre et revenue, pour lui
deduire et tenir son estat.
A ceste requeste et ordenance descendirent et s'enclinèrent tout li
signeur legierement. Regardé fu que il i avoit une conté en Engleterre
qui estoit en la main dou roi; et pooit par an valoir la revenue trois
mille mars, et la conté est nonmée Beteforde. Si fu dit et acordé que
il seroit contes de Beteforde, et en leveroit tous les pourfis. Messires
Robers d'Artois remercia le roi de ce don et tous les signeurs, et
devint là homs au roi d'Engleterre de la conté de Beteforde. Fo 34 vo.
=§ 50.= P. 106, l. 8: messages.--_Ms. d'Amiens_: Quant li roys
d'Engleterre eut oy les hommes de bien qu'il avoit envoiiet en Escoche
devers le roy son serourge, et les responsses tellez que li rois li
avoit fait, se li samblèrent d'un lés assés durez contre l'onneur de lui
et de son royaumme, et ossi assés raisonnables tant qu'à fraternité, car
voirement estoit il tenus à souffrir de lui, pour le cause de sa sereur
que il avoit espousée; et assés legierement s'en fust souffers, sauve
l'onneur de lui et de son pays. Mais chil qui dallés lui estoient, et
par qui consseil en partie il ouvroit de ceste besoingne, ne li
laiièrent guairez longement endormir; ains li disent pour lui esmouvoir
et escauffer: «Sire, vous avés juret solempnelment, par dignité de roy,
à tenir, maintenir, soustenir, deffendre et garder et acroistre lez
drois de vostre royaumme. Dont, se vous laissiéz celle bonne chité de
Bervich et ce bel castel de Rosebourch, qui sont sus marce et clefs de
vostre pays à l'encontre del royaumme d'Escoche, ens ès mains des
Eschos, vous ne vos acquittés mies bien contre vo sierment, et en
afoiblissiéz vostre honneur et vostre hiretaige; et mains en seréz
doubtéz et honneréz, qui estes jouène et en vo venir. Et poront dire
tout chil qui parler en oront, que faute de hardement et faintize de
coer, che qui n'est pas bien seans en jouène seigneur, le vous vont
faire. Encorres plus avant tous les jours, li Escochois poevent, par
l'entrée de Bervich et par le castel de Rosebourch, entrer et courir en
vostre royaumme bien avant, ce que pas ne feroient se chil hiretaige,
qui jadis fuirent à vos predicesseurs, estoient racquis à vous, enssi
que de legier le pourés faire se vous vollés, car li forche des Escos
est moult amenrie et afoiblie puis trois ans en enchà. Si sont il grant
et orguilleux, et qui petit amirent ne prisent vostre pays. Encorez tous
les jours sus marche, ensi que nous sommes enfourmet souffissamment par
nos voisins qui les marchissent, chiaux dou Noef Castiel sur Tin, de
Branspes, de Persi, de Urcol et des autres castiaus voisins, li
Escochois les manachent[91] et dient qu'il chevaucheront encorres plus
avant en vostre pays que li roys Robiers ne fist oncques, mais que li
rois David leur sires ait ung peu plus d'eage; et que pour ce que vous
volliés nourir pès à yaux et tenir vostre terre sans guerre, acordastez
vous le mariaige de medamme vo soer à yaux. Dont telx coses et plus
assés que touttes ne poons mies recorder, mès tous les jours en oons
nouvelles par les marchissans, ne font mies à souffrir ne à conssentir.
Si aiiés sour ce bon advis et hastieu consseil, nous vous en prions.»
[91] _Ms. de Valenciennes_: Car encore est le orgeul des Escos si
grans qu'ilz ne leur souffist point à ce qu'ilz tiennent de
vostre heritage, mais menacent. Fo 31 vo.
Quant fu li rois Edouwars d'Engleterre conseillés et enfourmés contre
les Escos que il fist criier une moult belle feste à Londrez, et furent
de trente chevaliers de dedens et ossi de trente escuyers, et manda que
tous nobles et prelas fuissent à Londres ou environ à le Purification
Nostre Damme qui fu l'an mil trois cens trente et un, tout y furent ensi
que ordounnet estoit. Et fu la feste mout noble, bien festiée et bien
joustée; et à celle feste fu messires Jehans[92] de Haynnau, lui douzime
de chevaliers. Et eut adonc, de chyaux de dehors, le pris des joustes li
sires de Fagnoellez, qui estoit de le compaignie monseigneur de
Biaumont; et des escuyers de dehors, Francque de Halle qui encoires
n'estoit mies chevaliers, mès il le fu celle année ens ès armées
d'Escoce, en le compaignie dou roy. Tout les huit jours, on jousta et
festia grandement à Londrez; et grant fuison de seigneurz, de dammes et
de dammoiselles il y eut. Au chief des huit jours, sus le departement de
le feste, li roys assambla tout son consseil, prelas, comtes, barons,
chevaliers et bourgois sagez et honnestes des bonnes villez. Et là leur
fist li roys remoustrer par ce vaillant prelat le evesque de Lincolle,
coumment il avoit fait requerre au roy d'Escoce son serourge que il
volsist oster se main de le chité de Bervich et dou castel de Rosebourch
que il detenoit à tort, et qu'il volsist faire hommaige à lui de son
royaumme d'Escoce, ensi qu'il devoit, et ossi coumment li roys d'Escoce
avoit respondu à ses mesages. Si pria à tous li rois, par le bouche dou
dessus dit evesque, que chacuns le volsist sur chou si consiller que se
honneur y fuist gardée.
[92] _Ms. de Valenciennes_: et par especial y fu messire Jehan de
Haynnau, lui douzième de chevaliers, et eut le prix de ceulx de
dehors. Et estoit avec le dit messire Jehan le seigneur de
Faigneulles. Fo 32.