septembre à estre à Dourdresc. Et tout se ordonnèrent et apparillièrent,
chil qui aler i devoient. Et vinrent devant le jour li pluisseurs en la
ville de Dourdresc, et là atendirent tout l'un l'autre. Là estoient gens
d'office de par messire Jehan de Hainnau, qui faisoient les pourveances
de mer et apparilloient barges et balenghiers, pour passer oultre en
Engleterre. Toutes ces coses furent sceues deviers le roi d'Engleterre
et le signeur Espensier et lors complisces, comment la roine
d'Engleterre et ses fils et li contes de Qent estoient descendu de
France en Hainnau et avoient tant fait deviers le conte et son frère que
messires Jehans de Hainnau, à poissance de gens d'armes, les devoit
ramener et remettre en Engleterre, maugré tous lors nuissans. Adonc i
pourveirent il pour obviier à l'encontre de euls, et fissent garder
pors, havenes et passages à grant fuisson de gens d'armes et d'archiers.
Et lor estoit estroitement commandé que tout ce que il veroient, qui
prendre terre vodroient en Engleterre, fuissent mort, sans nului prendre
à merchi.
Qant messires Jehans de Hainnau senti que toutes les pourveances
estoient faites, et ses gens desquels ils se voloit aidier, venu à
Dourdresc, et plus encores que il n'en euist pris et retenus, il dist à
la roine d'Engleterre: «Dame, il est temps que nous nos metons à voiage,
car ceuls que je pense amener avoecques nous en Engleterre, sont tout
prest et nous attendent au passage.» La dame respondi: «Dieus i ait
part!» Adonc prist elle congiet au conte de Hainnau et à la contesse, et
les remerchia moult doucement de la bonne et honnourable requelloite que
fait li avoient. Là fu pris li congiés, et baissa la roine à son
departir tous les enfans, l'un apriès l'aultre, de Hainnau, et aussi
fist son fil Edouwars. Phelippe de Hainnau, qui puis fu roine
d'Engleterre, commença trop fort à plorer, qant li jones Edouwars prist
congiet. On li demanda pourquoi elle ploroit: «Pour ce, dist elle, que
mon biau cousin Edouwars d'Engleterre se depart de moi, et je l'avoie jà
apris.» Dont commenchièrent li chevalier qui là estoient, à rire, et
depuis li fu ramenteu, qant li mariages fu tretiés de lui et de
l'anfant d'Engleterre. Et elle en respondi adonc sagement et dist que
son coer s'i traioit trop grandement, et pensoit bien que elle seroit
encorez sa fenme.
Ensi se departi la roine d'Engleterre du conte de Hainnau et de la
contesse. Et estoient, pour ce jour que li congiés fu pris, à Mons en
Hainnau, et vinrent jessir à Binch, et à l'endemain à Nivelle, et à
l'endemain à Villevort. Et esqievèrent Brousselles et passèrent à
destre, et fissent tant que il vinrent à Mont Sainte-Gertrut et de là à
Dourdresc. Et n'i sejournèrent que demi jour que il entrèrent ens ès
vassiaus, car il gissoient ou havene à l'ancre et estoient tous prês. Et
qant li ceval furent tout guidé ceuls que mener on en voloit, et la mer
fu revenue, tout par ordenance entrèrent ens ès vassiaus. Et estoit
marescaus de le ost messires Jehan de Hainnau et messires Fasterés dou
Rues. Qant tout furent entré, il desancrèrent et puis traissent les
voilles amont; si esquipèrent et se departirent, et avoient vent et
marée pour euls. Pour ce temps, estoit messires Jehans de Hainnau en la
droite flour de sa jonèce, et de si grant volenté que nuls chevaliers
pooit estre. Et pour ce entreprist il le dit voiage si liement, et ne
resongnoit painne ne peril qui li peuist avenir. Aussi il n'i pensoit
point, et estoit et fu tout dis ens ou vassiel la roine d'Engleterre et
de son fil. Fo 7.
P. 26, l. 10: d'Antoing.--_Le ms. d'Amiens omet_: Robers de Bailluel,
_et il ajoute_: li sires de Havrech castelain de Mons, messires Robiers
de Biaufor. Fo 4.--_Le ms. d'Amiens et les mss. A omettent_: Fastres dou
Rues,.... Sanses de Biauriu, li sires de Wargni, _et ils ajoutent_: li
sirez de Villers, li sirez de Henin, li sirez de Sars, li sirez de
Bousiez[73], li sirez de Vertaing[74],.... li sirez d'Estrumel[75],
messires [Waflars][76] de Gistellez. Fo 4.--_Le ms. de Rome ajoute_:....
messire Gerart de Vendegies,.... le signeur d'Espinoit, le Borgne de
Robertsart, messire Gille Grignart de Mauni, Willaume dou Casteler, Oste
et Gille de Soumain et pluisseurs aultres. Et estoit li sires de
Fagnuelles compains à banière à messire Jehan de Hainnau, et marescaus
de l'oost messires Fasterés dou Rues. Fo 7.
[73] _Mss. A 1 à 6, 20 à 22_: Bousiers. Fo 7 vo.--_Mss. A 11
à 13_: Boursiers. Fo 7.
[74] _Le ms. de Valenciennes ajoute_: messire Feris de Hordaing,
le sire de Hertaing. Fo 9 vo.
[75] _Ms. A_ 2: d'Estrumelin. Fo 8.
[76] Ms. de Valenciennes, fo 9.--_Ms. d'Amiens_: Souffars. Fo 4.
P. 26, l. 13: Ligne.--_Mss. A 15 à 17_: Ligny. Fo 7 vo.
P. 26, l. 13: Boussoit.--_Mss. A 11 à 13, 34, 35_: Bouffort. Fo 7.
P. 26, l. 14: Semeries.--_Mss. A 1 à 6, 8 à 17, 20 à 22_: Sameries. Fo 7
vo.--Ms. A 23: Smeriz. Fo 8 vo.
P. 26, l. 16: li sires de Montegni.--_Ms. d'Amiens_: li Estandars de
Montegni. Fo 4.--_Ms. de Rome_: le signeur de Montegni en Ostrevant. Fo
7.
P. 26, l. 17: d'Aubrecicourt.--_Mss. A 2, 20 à 22_: d'Ambrecicourt. Fo
8.--_Ms. A 18_: d'Aubregicourt. Fo 8.
P. 26, l. 19 _et_ 20: Hesbegnons.--_Mss. A 1 à 6, 11 à 13, 15 à 35_:
Behaignons. Fo 7.
P. 26, l. 21: par mer.--_Ms. d'Amiens et mss. A_: Quant il furent parti
dou havene de Dourdrec, moult estoit la navie belle seloncq la quantité
et bien ordonnée, et li tamps biaux et souefs, et li airs assez moistes
et atemprés; et mirent à l'ancre ceste première marée devant les dicques
de Hollande sus le departement de le terre. L'endemain, il se
desancrèrent et sachièrent les singles amont, et se missent au chemin en
costiant Zellandes. Fo 4.
P. 26, l. 24: tourmens.--_Ms. de Rome_: (Il) orent ce premier jour et le
second assés bon vent, et avoient jetté lor avis signeurs et maronniers
que par la grasce de Dieu il iroient prendre terre au port à Orvelle, en
la marce de Exsesses. Or lor revint un fors vens contraires qui les
rebouta moult arrière de ce port, et ce fu tout à lor pourfit et droite
grasce que Dieus lor fist; car se il fuissent arivé à Orvelle, il
euissent trouvé plus de vint mille hommes, qui là les atendoient,
archiers et aultres, et pour euls tous ocire et destruire. Ensi estoit
il commandé et ordonné dou roi et dou signeur Espensier et dou conte
d'Arondiel qui estoit de lor aliance. Et estoient les pors et les
havenes d'Engleterre si bien gardés à l'encontre de Flandres et de
Hollandes que on n'i pooit venir ne entrer, fors par la bataille. Chils
vens contraires lor dura deus jours, et costiièrent Frisse; et ne
savoient bonnement à dire li maronnier où il estoient.
Au tierch jour, vens lor revint à droit souhet, et qui les mena et bouta
droit contre Engleterre, et tant que li maronnier en orent la
congnissance. Si demandèrent à la roine et as signeurs quel cose il
voloient faire, et se il prenderoient terre à l'aventure en Engleterre,
car il disoient que il estoient trop en sus de Orvelle et de Clocestre
et des pors et des havenes de celle bende. Il dissent: «Oil» et
presissent terre où que fust, au plus tost que il peuissent, car prendre
lor couvenoit pour euls rafresqir et lors chevaus. Et vous di que tout
chil maronnier estoient de Hollandes et de Zellandes, et ne connissoient
pas bien tout le pais et encores ce que la mer les avoit tourmentés.
Adonc singlèrent ils à l'adrèce, ensi que li vens les menoit et que
Dieus proprement les conduisoit et voloit que ils euissent ce cemin et
non aultre, et s'adrecièrent contre Engleterre, que il veoient devant
euls. Et s'en vinrent ferir lors nefs tout de une flote sus le sabelon
en terre descongneue, où il n'avoit ne havene ne port; mais le sabelon
estoit assés ferme et bon pour ancrer et sans peril. Et si veoient assés
plain pais et ouni devant euls, fors tant que il i avoit grant fuisson
de genestres et de petis buissons, ensi comme en lieu où nuls ne nulle
ne demeure ne ne converse. Toutesfois il prissent la terre, et furent
trop resjoi qant il se veirent à ferme terre et hors des dangiers de la
mer, et missent lors chevaus petit à petit hors des vassiaus et toutes
lors pourveances, et traissent tout hors en sus de la mer, et là où elle
ne pooit monter ne venir. Et trouvèrent un rieu d'aige moult clère, qui
venoit d'amont de fontevis; et ce fist grant bien à euls et à lors
chevaus, car il en furent rafresqui.
Et ne savoient li contes de Qent, messires Rogiers de Mortemer, ne nuls
Englois qui là fuissent, où il estoient arivet, fors tant que il
disoient que il estoient en Engleterre. Toutesfois il se logièrent entre
ces broussis, car il faisoit biel, chaut et cler, ensi comme il fait ou
mois d'aoust. Si portoient l'un par l'autre lor painne et travel, assés
liement et legierement, et ne savoient à dire se il estoient en pooir
d'amis ou d'ennemis. Et orent, en trois jours que il furent là, tamainte
imagination pour sçavoir se il renteroient en lors vassiaus, et
costieroient Engleterre par mer, tant que ils trouveroient havene ou
port. Toutesfois tout consideré, li plus des signeurs ne s'acordoient
point de rentrer en mer pour la cause de lorz chevaus, mais se voloient
mettre au cemin parmi Engleterre, à l'aventure. Chils consauls fu
arestés et tenus, et furent les nefs recargies de tout ce que il veoient
que point mener il n'en pooient. Et fu dit as maronniers: «Retournés ent
arrière en Hollandes, et se on vous demande de nous, si dittes ce que
vous en savés, et riens oultre, car il n'i a nul en nostre compagnie
qui sace à dire où nous sonmes, fors en Engleterre; et achevirons che
pourquoi nous i sonmes venu, ou nous i demorrons tout.» Li maronnier
respondirent: «Dieux i ait part, mais encores serons nous ichi à l'ancre
jusques à demain, que vous dittes que vous vos deslogerés.» Et li
signeur respondirent: «Vous dittes bien.»
Quant ce vint au quatrime jour, et que euls et lors cevaus furent tout
rafresqi et en grant volenté de ceminer avant pour trouver quelsque
aventures, il se departirent et se recommandèrent en la garde de Dieu,
et ceminèrent parmi ces broussis. Et les couvint aler tout le pas, car
le plus de lors chevaus estoient cargiés de lors armeurez et de
pourveances. Qant li maronnier les veirent eslongiés et que la mer fu
revenue, il se departirent de là, tout de une flote, et traissent les
voilles amont et entrèrent dedens la mer, et retournèrent arrière sans
peril et vinrent en Hollandes. Et qant on lor demanda que la roine
d'Engleterre et messires Jehan de Hainnau et li chevalier et lors gens
estoient devenu, il en respondirent tout ensi et ou parti où il les
avoient laissiet en Engleterre. Et qant li contes de Hainnau entendi ces
premières nouvelles, si ot pluisseurs dures imaginations, et fu en grant
esmai de son frère et de toute la compagnie.
Tant ceminèrent à destre et à senestre la roine d'Engleterre et ses fils
et messires Jehans de Hainnau et toute la route que il trouvèrent un
petit hamelet, où il n'avoit que sis maissons. Et un petit oultre, il
veirent un hault moustier, dont furent il tout resjoi, et dissent: «Nous
orons et auerons, se il plaist à Dieu, proçainnement bonnes nouvelles.»
Adonc s'arestèrent ils tous sus les camps. Et envoia li contes de Qent,
un varlet à cheval au village, pour savoir comment li moustiers, que il
veoient, se nonmoit. Li varlés englois cevauça jusques à là, et raporta
as signeurs que chils hauls moustiers estoit une abbeie, que on nonme
Saint Ainmon, et [de] noirs monnes. Adonc se departirent euls de là, et
s'adrechièrent viers l'abeie.
Qant il furent là venu, et il entrèrent dedens le porte, li monne
chantoient vespres, mais il orent si grant paour que il lassièrent tout
en mi plain, et s'en alèrent reponre, dont chà, dont là; et proprement
li abbes s'ala bouter dedens un celier et là enclore. Et quidoient bien
chil monne que ce fuissent Escoçois ou Danois, de ces gens d'armes, qui
là fuissent venu par mer, pour euls rober. Et ne savoient li signeur à
qui parler; toutesfois tant alèrent et vinrent que il trouvèrent un
convers, qui issoit hors d'un gardin et venoit en la court. Qant il vei
ces gens d'armes, il s'en volt fuir, mais il ne pot. On le prist, mais
on l'aseura; et li fu demandé où l'abbé et li monne estoient. Il
respondi que il ne savoit, et que il les quidoit ou moustier. Dont li fu
dit que il les alast querre et asegurer, car il ne lor voloient que tout
bien.
Li convers, suz ceste asegurance, fist tant que il trouva les monnes; si
les asegura de par les signeurs, et les fist venir avant. Qant il furent
venu, li signeur parlèrent doucement à euls. Et se nonmèrent li contes
de Qent et messires Rogiers de Mortemer, et leur dissent: «Alés querre
vostre abbé, et li dittes que il ne soit en nulle doubte, et que la
roine d'Engleterre et ses fils le demandent.» Sus ces paroles, il
quissent tant l'abet que il le trouvèrent; se li comptèrent cez paroles.
Qant il entendi ce, si fu tous resjois; et se traist tantos avant, et
s'en vint deviers la roine et son fil. Et s'umelia et s'escusa de ce que
ils et si monne estoient ensi demuchié et repus, car il quidièrent bien,
tel fois fu, à estre tout pris et perdu d'Escoçois ou de Danois ou
d'aultres robeours qui venissent rober l'abbeie. On les tint bien pour
esqusés et à bonne cause.
Adonc furent il logiet là dedens, selonch l'ordenance de la maiso[n],
assez aise. Et eurent li signeur cambres, et trouvèrent grant fuisson de
grains et de fourages pour lors chevaus, qui leur fist grant bien. Et
bien en avoient li cheval mestier, car il avoient esté travilliet de la
mer, et aussi couchiet trois nuis sus les bruièrez; si prissent en grant
gré cel aise et che repos. Et aussi fissent la roine d'Engleterre et li
signeur et lors gens, et se rafresqirent dedens l'abeie de Saint Ainmon
de tous poins, et i furent trois jours. Et lor amenistra li abbes
varlès, pour aler là où il les envoiièrent. Premierement il
segnefiièrent lor venue au conte Henri de Lancastre au Tors Col, qui
frères avoit esté au conte Thomas de Lancastre, qui fu decolés, ensi que
vous avés oy; secondement, au maire et à la ville de Londres, au conte
de Warvich, au baron de Stanfort, au signeur de Briane, au signeur de
Manne, au signeur de Persi et à tous les barons, sus laquelle seureté il
estoient venu en Engleterre. Fos 7 vo et 8.
P. 26, l. 29: davantage.--_Ms. B 6_: car messire Hues le Despensier, qui
savoit tout le couvin et le conduite de la damme, et comment à gens
d'armes elle volloit venir ou pais, avoit prouveu sur le pasaige plus
de dix mille hommes, qui tous estoient aparliet de mettre à l'espée le
royne d'Engleterre, son filz et tous les autres, sans nulluy prendre à
merchy. Fo 12.
=§ 12.= P. 27, l. 29: premiers.--_Ms. de Rome_: Li contes Henris de
Lancastre au Tors Col fu tous li premiers qui vint à grant fuisson de
gens d'armes et d'archiers. Puis vinrent de Northombrelande li sires de
Persi, li sires de Noefville, li sires de Montbrai et li sires de Lussi.
Puis vint li sires de Stanfort; et ensi chevaliers et esquiers et
archiers venoient de tous lés. Sitos que les nouvelles furent sceues sus
le pais que la roine d'Engleterre et ses fils estoient arivet et venu à
belle compagnie de gens d'armes, li Londriien furent trop grandement
resjoi de la venue de la roine, et ordonnèrent tantos à aler à
l'encontre de li. Et se departirent de Londres en bon arroi deus mille
hommes d'armes et quatre mille archierz, et li maires meismes en fu
menères et conduisières. Tout ne peurent pas venir à l'abeie de Saint
Ainmon, avant que la roine s'en departesist; mais sitos que li contes
Henris de Lancastre fu venus, qui grandement honnoura messire Jehan de
Hainnau et les Hannuiers, dou grant et biau service que il faisoient à
la roine d'Engleterre et à son fil et au pais, il eurent avis et consel
que il s'en iroient tout droit vierz Bristo, là où li rois d'Engleterre,
et chils Hues li Espensiers et ses pères et li contes d'Arondiel se
tenoient. Si se missent au cemin, et tous les jours venoient gens de
tous costés ens ou service de la roine, et tant que il se trouvèrent
bien, qant li Londriien furent venu, quatre mille hommes d'armes et vint
mille archiers.
Cez nouvelles furent sceues à Bristo, qui est une bonne ville et forte,
et bon port de mer. Et là se rentre la rivière de la Saverne, qui depart
le roiaulme de Gallez et Engleterre, en la mer. Et est la ville de
Bristo forte et bien fremée. Et encores est li chastiaus plus fors, qui
sciet sus la mer, car il est environnés de la Saverne et de la mer. Qant
li rois et li sires Espensiers entendirent que la roine et ses fils
venoient là à poissance de gens d'armes, et estoit li contes Henris de
Lancastre en la compagnie, et li maires de Londres et li Londriien en
lor compagnie, si furent tout esbahi et trop esmervilliet par où il
estoient entré ne arivé en Engleterre, qant les pors et les havenes
estoient partout si bien gardé. Il lor fu dit et compté toute la
manière, ensi que il lor en estoit avenu. Adonc demanda li rois consel
au comte d'Arondiel, liquels avoit la fille au signeur Espensier, et au
signeur Espensier le père et le fil, comment il se poroit tenir de ceste
avenue et resister à l'encontre de euls, car fuirs ne eslongiers ne lor
estoit pourfitable, ne honnourable. On li dist: «Sire, envoiiés messages
à tous lés et faites un commandement que toutes gens viennent et sans
delai, et sus la painne que de perdre corps et avoir, et especiaument
mandés en Galles: li Galois ne vous faudront point. Nous nos tenrons
bien en ceste ville, car elle est forte assés, tant que seqours vous
sera venus de tous costés. Et les gens d'armes et les archiers que vous
avés establis sus les pors et sus les havenes, il ne puet estre que il
ne soient ores enfourmé de ces nouvelles; et creons bien que il viennent
efforciemment et que proçainnement il seront chi, ou il combateront la
roine et ses gens sus son cemin.» Li rois tint ce consel, autre ne pooit
avoir, et envoiia ses messages et ses varlès partout là où il pensoit à
avoir gens et par especial en Galles, car ce li estoit la terre la plus
proçainne.
Vous devés sçavoir que chil qui furent escript et mandé dou roi, qant il
entendirent que la roine venoit à poissance de gens d'armes et
d'archiers, et estoient li Londriien en sa compagnie, ne se hastoient
point de venir, mais se dissimuloient, car il veoient bien que les
besongnes se porteroient mal pour le roi et ses complisses. Messires
Henris de Biaumont, un grant baron d'Engleterre, et messires Thomas
Wage, son oncle, qui venoient servir la roine d'Engleterre, trouvèrent
d'aventure sus les camps des varlès dou roi, liquel estoient parti de
Bristo et aloient au commandement dou roi semondre chevaliers et
esquiers et euls dire que tantos et sans delai il venissent à Bristo
deviers le roi, et commandoit que à ce besoing nuls ne le fausist, sus
la painne de estre pugnis de corps et d'avoir. Furent requis que il
alaissent celle part, il respondirent et demandèrent: «Et de qui se
doubte li rois?» et ignorèrent que il n'en savoient riens. Chil varlet
et messagier dou roi leur dissent que nouvelles estoient venues au roi
et à messire Hue l'Espensier et au conte d'Arondiel, que la roine, ses
fils et li contes de Qent avoit pris terre en Engleterre; et estoient en
sa compagnie grant fuisson de gens d'armes que li contes de Hainnau lor
avoit delivrés. Chil doi chevalier fissent l'esmervilliet et dissent:
«Alés, alés, nous alons celle part.» Il disoient verité, mais c'estoit
en confortant la roine. En ce meisme jour, il trouvèrent la roine et
toute sa route. Si recordèrent ces nouvelles; on n'en fist nul compte,
car li seigneur savoient bien que il ne seroient grevé ne rencontré de
nului. Et sitos que chil doi chevalier furent venu, messires Thomas Wage
fu ordonnés à estre marescaus de toute l'oost; et chevaucièrent tant, en
traversant le pais, que il aprocièrent Bristo. Et par toutes les villes
là où il venoient et entroient, on lor faisoit feste et honnour; et tout
dis leur venoient gens, à destre et à senestre, de tous costés. Et tant
fissent par lors journées que il vinrent devant la ville de Bristo, qui
est forte assés; si le assegièrent à droit siège fait. Fos 8 vo et 9.
P. 28, l. 3: au duch.--_Ms. d'Amiens et mss. A_: Henri. Fo 4 vo.
P. 28, l. 22: quatre vins et dis.--_Ms. de Valenciennes_: quatre vingt
et douze. Fo 10 vo.
=§ 13.= P. 29, l. 7: tenoient.--_Ms. d'Amiens et mss. A_: volentiers. Fo
4 vo.--_Ms. de Valenciennes_: Quant le roy et messire Hue le fil virent
leur ville ainsi assise, si se mirent ou chastel. Fo 10 vo.
P. 29, l. 12: acord.--_Ms. de Rome_: car là où li Londriien s'accordent
et aloient, nuls n'ose resister. Il pueent plus que tous li demorans
d'Engleterre; ne nuls ne les ose au fort courechier, car il sont trop
poissant de mise et de gens. Fo 9.
P. 29, l. 16: royne.--_Ms. de Rome_: et messire Jehan de Hainnau, car
riens ne se faisoit ne passoit, fors par le dit signeur de Biaumont. On
ne voloit point ceuls de Bristo prendre à nulle merchi, mais leur
proumetoit on que seroient tout mort, se on ne lor rendoit le conte
d'Arondiel et messire Hue l'Espensier le père. Fo 9.
P. 29, l. 18: d'Arondiel.--_Ms. d'Amiens_: lesquels elle hayoit
souverainement[77]. Fo 4 vo.
[77] _Ms. de Valenciennes_: amerement. Fo 10 vo.
P. 30, l. 1: Jehans.--_Mss. d'Amiens et de Valenciennes_: Jehans de
Eltem. Fo 4 vo.
=§ 14.= P. 30, l. 24 et 25: l'autre.--_Ms. de Rome_: Il furent tout doi
mis en la garde de messire Thomas Wage qui bien ensongna dou garder,
puisque reconmandé il li estoient, tant que la reine aueroit consel quel
cause en seroit bonne à faire. Et regardèrent là li signeur ensamble que
on renvoieroit lez Londriiens, et que il estoient au desus de lors
besongnes, car otretant bien aueroit on le roi et messire Hue le
Espensier le jone que on avoit eu les aultres. Si fu appellez li maires
de Londres et remerciiés de la roine et de son fil, de ce que fait
avoit, et que bien s'en pooient partir, qant il voloient, et retraire
viers Londres. A tout ce s'accordèrent li Londriien, et se ordonnèrent
de departir et de retourner en lor lieu. Le secont jour, apriès ce
que il se furent departi, on ot consel en l'oost de la roine que on
deliveroit par jugement le conte d'Arondiel et messire Hue le Espensier
le viel. Si furent amené en place devant les barons d'Engleterre, liquel
furent ordonné pour euls juger. Fo 9 vo.
P. 31, l. 1: sieute.--_Ms. de Valenciennes_: par acort de tous et par
jugement. Fo 11.
P. 31, l. 4: clers.--_Ms. A 2_: herites. Fo 9.
P. 31, l. 13: et six.--_Ms. de Rome_: un vendredi. Fo 9 vo.
P. 31, l. 14: en octembre.--_Ms. d'Amiens_: le onzième jour de octembre.
Fo 5.--_Ms. de Valenciennes_: le neuvième jour de novembre. Fo 11.
=§ 15.= P. 31, l. 20: yaus deus.--_Ms. d'Amiens_: et yaux dixime
seullement. Fo 5.--_Ms. de Rome_: et n'estoient que euls sept dedens
celle barge. Fo 9 vo.
P. 31, l. 21: aler.--_Ms. de Rome_: à l'aventure, là où la marée et li
vens les menroient, fust en Galles ou en Irlande. Fo 9 vo.
P. 31, l. 23: sauvé.--_Ms. de Rome_: sans che que cil de l'oost en
seuissent riens. Et tout che il pooient bien faire, car au derrière dou
chastiel la mer bat assés priès; et là a un courant qui entre dedens le
chastiel, et de ce courant [on va] en la mer. Fo 9 vo.
P. 31, l. 25: onze.--_Ms. de Valenciennes_: neuf. Fo 11 vo.--_Ms. B 6_:
quatre. Fo 16.
P. 31, l. 27: si lonch.--_Ms. de Rome_: plus hault de deus lieues en
mer. Fo 9 vo.
P. 32, l. 2: royne.--_Ms. d'Amiens_: De premiers il cuidoient que ce
fuissent pescheur, mais quant il lez virent tant variier sur mer et qui
bien ewissent pris terre ou havene de Bristo s'il volsissent, mais il
mettoient painne à yaux de fuir et eslongier et si ne pooient, si
souppechonnèrent li pluiseur que ce estoit li roys ou messires Hues li
Espenssiers. Adonc, par le consseil de monseigneur Jehan de Haynnau,
aucun maronnier et compaignon de Hollandes se misent en batiaux et en
bargettes qu'il trouvèrent là, et nagièrent apriès yaux tant qu'il
peurent. Fo 5.
_Ms. de Rome_: ... Et s'en conmenchièrent à esmervillier et à parler
l'un à l'autre, et à dire li auqun par imagination: «Nouz veons
mervelles; nous avons veu celle barge, passet à? sept jours, estriver
contre le vent, et se voelt bouter en la mer et se ne puet. Il fault que
ce soit cose à soupeçon, car chil qui sont dedens, ne voellent point
venir à Bristo, mais l'esqievent et fuient ce que il pueent.» Messires
Henris de Biaumont, qui estoit uns jones chevaliers et de grant volenté,
s'asaia et dist que il iroit veoir que c'estoit. Et entra dedens une
barge grosse assés, et environ trente archiers en sa compagnie; et se
fist à force de rimes mener jusques à la barge dou roi. Qant il furent
là venu, il l'arestèrent et veirent que li rois estoit dedens, et son
consillier messires Hues li Espensiers. En euls, ne en lors gens n'i ot
point de deffense: la barge, par ceuls meismes qui le menoient et par
auquns des hommes à messire Henri, fu ramenée ou havene de Bristo.