force li rois de France ne le renvoiast en Engleterre; et s'avisa que,
par dons, il atrairoit si le roy de France et son conseil qu'il
n'aroient nulle volenté de la dame aidier, ne lui porter contraire. Donc
envoya, par messaiges secrès et afaitiés de ce faire, grant plentet d'or
et d'argent et jeuiaux rices et especiaux deviers le roy et son plus
privet conseil. Et fist tant, en brief termine, que li roys et tous ses
conssaulx furent ossi froit d'aidier la dame comme il avoient estet en
grant desir. Et brisa li roys tout ce voiaige et deffendy, sus à perdre
le royaumme, qu'il ne fuist nuls qui avoecques la roynne d'Engleterre se
meist à voie, pour elle aidier à remettre en Engleterre à main armée.
Dont li pluiseur chevalier et bachelier du dit royaumme en furent moult
courouchiet, et s'esmervillièrent entre yaus pourquoi si soudainement li
rois avoit fait ceste deffensce. Et en murmurèrent li aucun et disent
bien que ors et argens i estoit efforcheement acourus d'Engleterre[66].
Fo 3.
[66] _Les mss. A 11 à 13 ajoutent_: et que François sont trop
convoiteux. Fo 4 vo.
P. 19, l. 8: messages.--_Ms. d'Amiens et mss. A_: Encoires vous diray
je, se j'ay loisir, de quoy chilx messires Hues li Espenssiers s'avisa.
Quant il vit qu'il n'avoit garde dou roy de Franche ne de ce costé, pour
embellir et florir se mauvaitié et ratraire la roynne en Engleterre, et
remettre en son dangier et dou roy son marit, il fist le roy
d'Engleterre escripre au Saint Père en supliant assés affectueusement
que il volsist escripre et mander au roy Charle de Franche que il lui
volsist renvoiier sa femme, car il s'en voloit acquiter à Dieu et au
monde, et que ce n'estoit mie sa couppe que elle estoit partie de lui,
car il ne li voulloit que toutte amour et bonne loyaulté, telle que on
doit tenir en mariaige. Avoecq ces lettrez que li dis messires Hues fist
le roy d'Engleterre escripre au pape et as cardinaus en lui escusant,
comme vous avés oy, et encorrez par pluiseurs soubtieves voies qui cy ne
puevent mie estre touttes descriptez, il envoya grant or et grant argent
à pluiseurs cardinaux et prelas les plus secrès et prochains du pape, et
aussi les [messagiers sages[67] et advisez] et bien ydonne et taillié de
faire ce messaige. Et mena tellement le pape, par ses dons et par ses
fallasses, qu'il contournèrent dou tout la roynne Ysabiel d'Engleterre
et condempnèrent en son tort, et misent le roy d'Engleterre et son
conseil à son droit. Et escripsi li papes par le conseil d'aucuns
cardinaulx, qui de l'acord le dessus dit Espenssier estoient, au roy
Carlon de Franche que, sour painne et sentensce d'escumeniement, il
renvoyast sa serour la roynne Ysabiel en Engleterre devers le roy son
marit. Ces lettrez veues et apportées devers le roy de Franche[68] et
par si especial messagier que par l'evesque de Saintes en Poitau que li
pappez y envoiioit en legacion, li roys fu durement esmeus sur sa
sereur, et dist qu'il nel volloit plus soustenir à l'encontre de
l'Eglise. Et fist dire à sa seur, car jà de grant temps ne parloit il
plus à elle, que elle widast tost et hastivement son royaumme, ou il
l'en feroit widier à honte[69]. Fo 3.
[67] Ms. A 1, fo 5 vo.--Ms. d'Amiens (lacune).
[68] _Le ms. de Valenciennes ajoute_: qui jà estoit desvoiez par
les dons qui d'Engleterre estoient venus, si se meut durement à
parler à la roynne. Et luy dist plainement: «Je ne veul plus
soustenir vous ne vostre fait en mon pays, mais partez vous
hastivement. Se widiés mon royalme ou je vous ferai widier.» Fo 6
vo.
[69] _Les mss. A 20 à 22 ajoutent_: et dommaige d'elle et des
siens. Fo 17.
=§ 8.= P. 20, l. 12: nouvelles.--_Ms. d'Amiens et mss. A_: Si (la royne)
ne seut que dire ne quel advis prendre, car jà l'eslongoient chil de
Franche par le commandement dou roy, et n'avoit à nullui conseil ne
retour, fors seulement à son chier cousin monseigneur Robert d'Artois.
Mèz chilx secretement le consseilloit et confortoit che qu'il pooit, non
à veue, car il ne l'osast fère pour le roy qui deffensce y avoit mis et
en quel haynne et malivolensce la roynne estoit esceue, dont moult li
anoioit, et savoit bien que par mal et par envie elle estoit ainssi
decachie. Si estoit chils messires Robiers d'Artois si bien dou roy
qu'il volloit; mès il ne l'en osoit parler, car il avoit oy dire le roy
et jurer que chilx qui l'em paroit, quelx qui fust, il lui torroit sa
terre et son royaumme. Si entendi il secretement que li roys estoit en
vollenté de faire prendre sa soer, son fil, le comte de Cam et messire
Rogier de Mortemer, et de remettre eus ès mains dou roy d'Engleterre et
dou dit Espenssier. Et ensi le vint il dire de nuit à le roynne
d'Engleterre, et le avisa dou peril où elle estoit. Dont fu la damme
moult esbahie et requist, tout en plorant, conseil à monseigneur Robert
d'Artois quel cose elle poroit faire ne ù traire à garant et à conseil:
«En non Dieu, damme, dist messires Robiers, li royaumme de Franche vous
loe je bien à widier et retraire deviers l'Empire. Là a il pluiseurs
grans seigneurs qui bien aidier vous poroient, et par especial li comtes
Guillaummes de Haynnau et messirez Jehans de Haynnau ses frèrez. Chil
doy sont grant seigneur, preudomme et loyaul, cremu et redoubté de leurs
ennemis, amés de leurs amis et pourveu de grant sens et de parfaite
honneur. Et croy bien que en yaux vous trouverés toutte adrèce de bon
conseil, car autrement il ne le saroient ne voroient faire.» Fo 3.
P. 20, l. 28: apriès lui.--_Ms. de Rome_: La dame se ordonna apriès le
consel de son serourge le conte de Qent, et prist congiet à son frère le
roi de France. Li rois li donna assés legierement, mais il voloit que
ses neveus Edouwars demorast avoecques lui, mais la dame l'escusa et
dist que, sans son fil, point elle n'oseroit retourner en Engleterre. Li
rois n'en parla plus avant, et li fist delivrer par ses chevaliers
d'ostel deus mille florins, pour paiier ses menus frès sus son cemin. Et
pour lorz estoit servis li rois d'un chevalier de Cambresis, qui se
nonmoit li sires d'Esne. Li chevaliers s'offri à cevauchier avoecques la
roine et en demanda congiet au roi, et li rois li acorda..... Et les
conduisoit li sires d'Esne et aconduisi et amena en Cambresis, et furent
un jour et une nuit en son chastiel, et de là vinrent à Buignicourt. Fo
5.
P. 20, l. 31: chastiel.--_Ms. d'Amiens et mss. A 1 à 7, 9, 15 à 35_: en
l'ostel d'un petit chevalier. Fo 3.--_Mss. A 11 à 13_: en la maison d'un
vaillant chevalier. Fo 5 vo.--_Ms. de Rome_: Pour ces jours i avoit ung
chevalier et une dame de trop grant gouvernement. Fo 5.
P. 20, l. 31: Buignicourt.--_Mss. A 7, 18, 19, 23 à 33_: Aubrechicourt.
Fo 5.--_Mss. A 36 à 38_: Chambresicourt. Fo 3.--_Mss. A 34 et 35_:
Ambixecourt. Fo 6.
P. 21, l. 9: Buignicourt.--_Mss. A_: Aubrecicourt. _Ms. A_ 1, fo 6.
P. 21, l. 9: chevalier.--_Ms. de Rome_: Et vint li sires d'Esne, sitos
que la roine fu descendue à Buignicourt où elle fu dou chevalier et de
la dame très joieusement requelloite, en la ville de Valenchiennes, car
il n'i a pas de là longe voie à cevauchier: pour ces jours s'i tenoient
li contes et la contesse et messires Jehans de Hainnau, sires de
Biaumont, lors frères; et vint deviers euls en la Salle de
Valenchiennes, et lor recorda ces nouvelles desquelles il furent tout
resjoi. Adonc dist li contes à son frère: «Jehan, cevauciés jusques à
Buignicourt, et nous amenés nostre cousine la roine d'Engleterre: nous
le volons festoiier en nostre pais.» Li sires de Biaumont respondi:
«Volentiers.»
Tantos chevaus furent ensellé, et montèrent messires Jehans de Hainnau
et sa route, car il estoit bien acompagniés, et issirent de
Valenchiennes. Derechief li contes de Hainnau, qui fu uns moult
honnourablez sires, et qui voloit requellier honnourablement la roine
d'Engleterre et estre acompagniez de barons et chevaliers de son pais,
mist messagiers en oevre et manda le signeur d'Antoing, le senescal de
Hainnau, le signeur de Ligne, le signeur de Bailluel, le signeur de
Barbançon, le signeur de Haverech, le signeur de Gonmegnies, le signeur
de Vertain et moult d'autres, que tantoz et sans delai, il venissent à
Valenchiennes. Il vinrent tout en bon arroi, et le plus vestis des draps
de la livrée que li contes donnoit; et aussi dames et damoiselles
vinrent dalés la contesse.
Messires Jehans de Hainnau cevauça et vint à Denaing oultre
Valenchiennes, et là s'aresta. Et renvoia le signeur d'Esne à
Buignicourt, et estoit moult tart, et li dist: «Je serai, à quelle heure
que ce soit, encores à nuit dalés madame la roine. Dites li ensi.» Et
fist tout ce pour mains cargier l'ostel, car il sentoit le chevalier et
la dame de tout oultre bonne volenté. Li sires d'Esne vint à
Buignicourt, et compta à la roine tout ce que il avoit veu et trouvé,
dont la dame fut moult contente, et se reconforta mieuls que devant.
Messires Jehans de Hainnau soupa à Denaing entre les damoiselles de
l'abeie, gentils fenmes qui là estoient. Et tantos apriès souper, il
prist Phelippe de Chastiaus, le plus proçain esquier que il euist; et
montèrent as chevaus et deus pages, et cevaucièrent tous les plains et
tantos furent à Buignicourt; et missent piet à terre, et entrèrent ens
ou chastiel, car on les atendoit.
Messires Jehans de Hainnau se traist en une cambre où la roine
d'Engleterre estoit, li contes de Qent, messires Rogiers de Mortemer et
toutes les gens d'onnour, qui issu estoient d'Engleterre avoecques la
ditte roine, laquelle estoit toute droite, et messires Jehans de Hainnau
s'enclina moult bas contre lui. La dame le prist par la main, et le leva
et l'enmena arrière; et qant la roine parloit au chevalier, il
s'enclinoit tout bas, car des honnours de ce monde, messires Jehans de
Hainnau estoit tous fais et nouris. Là furent les aquintances douces et
courtoisses; là remoustra la ditte dame au chevalier moult doucement
toutes ses mesestances. Fo 5.
=§ 9.= P. 22, l. 11: doucement.--_Ms. de Rome_: Et qant la roine vint à
la parole de dire comment li Londriien, par le consentement de
pluisseurs prelas et barons d'Engleterre, le mandoient que elle
retournast en Engleterre, et que elle fesist tant que elle euist trois
cens ou quatre cens armeures de fier, car li langages dou prononchier
pour le temps de lors estoit tels, et les amenast ou pais, et li
Londriien les delivreroient de tous poins et se meteroient en lor
compagnie: «car par ma foi, messire Jehan et biau cousin, je n'ai de
quoi faire ce paiement: je n'ai finance fors que pour mes menus frès;»
il respondi promptement et dist: «Madame, vechi vostre chevalier qui n'a
pour le present que faire, ne à quoi entendre. Si voel estre en vostre
service, et n'entenderai jamais à autre cose, si vous aurai remis en
Engleterre. Monsigneur mon frère et moi, avons finance assés, chevaliers
et esquiers qui desirent les armes, et qui ne sont pour le present de
riens cargiet ne ensonniiet: si ne vous fault point doubter que, par
faute de mise et de chevalerie, vostres voiages soit requlés, car à
l'aide de Dieu et de saint George, nous l'acheverons.»
A ceste parole, plora moult tendrement la dame de joie et de pité, et
l'en remerchia de bon coer. Et puis li dist messires Jehans de Hainnau:
«Madame, monsigneur mon frère et madame ma soer la comtesse de Hainnau
vous prient par moi que vous les venés veoir et lors enfans.» La roine
respondi et dist que, de ce faire elle estoit toute preste et tenue dou
faire, et que pour euls veoir principaument, elle estoit avalée et venue
de France jusques à là. Ensi se portèrent les premières acquointances
entre la roine d'Engleterre et messire Jehan de Hainnau; et fu là
environ deus heures, et parlèrent de pluisseurs coses assés, et prissent
vins et espisces par deus fois.
Tout ce fait, messires Jehans de Hainnau prist congiet à la roine et à
son fil et au conte de Qent et à tous et à toutes, et issi hors dou
chastiel, et monta à ceval et son esquier et leur page. Li sires d'Esne,
li sires d'Aubrecicourt et trois dez enfans de Mauni qui là estoient,
Gilles, Jehans et Tieris, le reconvoiièrent. Watiers et Willaumes de
Mauni demorèrent dalés la roine. Et s'en revinrent messires Jehans et
li aultre à Denaing, et là demorèrent la nuit; mais chil qui acompagniet
avoient le signeur de Biaumont, retournèrent à Buignicourt dalés la
roine d'Engleterre. Fo 5 vo.
P. 23, l. 11: remuneret.--_Ms. d'Amiens et mss. A_: Je devenroie vostre
serve, et mes fils vostres sers à tous jours, et mettriens tout le
royaume d'Engleterre à vostre abandon, et à bon droit. Fo 3.
P. 23, l. 13: Byaumont.--_Ms. d'Amiens et mss. A_: qui estoit en le
fleur de son eage. Fo 3.
=§ 10.= P. 23, l. 24: se parti.--_Ms. de Rome_: Qant messires Jehans de
Hainnau eut dormi et reposé tout à son aise en l'abeie de Denaing, il se
leva et apparilla, et puis monta à cheval, et prist congiet à dames et à
damoiselles qui pour ces jours i estoient. Et s'en vint à Valenchiennes,
et descendi à la Sale dou Conte, et trouva jà des barons et des
chevaliers de Hainnau qui estoient venut. Il se traist deviers son frère
qui devoit aler à table; se li recorda, avant que il s'aseist, tout ensi
comme il avoit fait, et l'estat et l'ordenance de la roine et des
paroles et requestes que elle avoit misses avant, et aussi de celles que
il avoit respondu. De tout se contenta li contes et dist que il avoit
moult bien fait, et li savoit très bon gré de ce que il s'estoit offers
et mis ens ou service de la roine d'Engleterre et de son fil, et que
point il ne li faudroit, fust de gens, fust de finance: «En nom Dieu,
biau frère, respondi li sires de Biaumont, sus la fiance de vous ai je
parlé si hardiement; et aussi certainnement je ai eu si grant pité de la
bonne dame et ai encores, que je ne li poroie fallir pour mettre toute
ma cavance.» Adonc lavèrent li signeur et se asissent à table.
Apriès disner, ordonné fu que messires Jehans de Hainnau, li sires
d'Enghien, li sires d'Antoing, li sires de Ligne et li sires de Havrech
chevauceroient ce soir et iroient à Bouchain souper, et à l'endemain il
iroient querir la roine d'Engleterre à Buignicourt et son fil et le
conte de Qent et toute lor compagnie, et les amenroient disner à
Bouçain; et puis apriès disner, il s'en departiroient, et venroient par
Haspre et tout le grant chemin de Cambrai, et enteroient à
Valenchiennes, par la porte c'on dist Cambrissienne, et les amenroient à
la Sale; et là les recheveroient li contes, la contesse, signeurs, dames
et damoisellez qui lor venroient à l'encontre. Celle ordenance sambla
bonne, et, se li hostels dou Conte estoit bien pourveus, encores fu ils
renforciés; et furent envoiies, à chars et à chevaus, grandes
pourveances à Bouchain. Et là vinrent messires Jehans de Hainnau et li
signeur desus nommé ce soir souper et jessir. Qant ce vint à l'endemain,
tout montèrent qant il orent oy messe, et puis cevauchièrent moult
ordonneement tout cel pais et plain d'Ostrevant, et vinrent au chastel
de Buignicourt. Et jà estoit la roine d'Engleterre segnefiie de lor
venue et toute ordonnée pour partir, car bien savoit que on le venoit
querre de par le conte de Hainnau; et li avoit madame Jehane de Valois,
contesse de Hainnau, envoiiet son char ordonné et apparilliet ensi que
pour lui. Chil baron de Hainnau vinrent à la roine d'Engleterre, et
l'onnou[rè]rent grandement, ensi que bien le sceurent faire, et elle
euls.
Adonc prist la roine congiet à la dame de Buignicourt et à tous ses
enfans, dont elle avoit assés, fils et filles, et li dist et proumist
que, pour la bonne chière que elle avoit trouvé en li et en son mari,
elle se sentoit grandement tenue à euls, et que si enfant, ou temps à
venir, en vaudroient mieuls. La bonne dame de Buignicourt et
d'Aubrecicourt, comme sage et discrète, se humelia et remerchia de tout.
Adonc entra la roine ou char la contesse de Hainnau, et mist son fil
Edouward en coste li et une dame d'Engleterre qui l'avoit acompagniet,
que on nonmoit la dame de Briane, et avoient li rois et li Espensiers
fait decoler son mari; et puis se departirent de Buignicourt et
cevauchièrent tout souef à belle compagnie, tous jours messire Jehan de
Hainnau dalés la roine au char, et vinrent à Bouchain et là disnèrent.
Apriès disner, tout s'en departirent et se missent au cemin et passèrent
Haspre, qant tous et toutes orent beu un cop, et prissent le cemin de
Valenchiennes.
Ensi que la roine et chil signeur desus nonmé descendoient ens ès
praieries de Fontenielles, jà estoient venu chevaliers et esquiers, qui
bouté s'estoient et armé pour la jouste, ens ès bois de Fontenielles, et
aultres officiiers de par le conte, qui presentèrent à la roine et à son
fil et au conte de Qent et à messire Rogier de Mortemer, chevaus et
palefrois si bien aournés de tout ce que à euls apertenoit, que riens
n'i avoit espargniet, laquelle cose la roine d'Engleterre vei moult
volentiers. Aussi fist ses fils et toutes lors gens, et les avoit on là
amenés et envoiiés pour la roine et la dame de Briane et les damoiselles
monter sus et renouveler de monteure, mais la ditte roine ne la dame,
qui ens ou char estoient, n'en issirent point, si furent venu en la Sale
à Valenchiennes; mais li jones Edouwars monta sus un palefroi tout
preparé et ordonné pour lui. Toute la compagnie montèrent sus les camps,
en aprochant le bos de Fontenelles. Et dou bois issirent chevaliers et
esquiers armés pour la jouste, et là joustèrent moult radement devant la
roine et les signeurs. Et tout en venant et en chevauçant vers
Valenchiennes, chevalier et esquier joustoient sans euls espargnier,
tels que li sires de Gonmegnies, li sires de Vertain, li sires de
Mastain, li sires de Biellain, li sires de Hordain, li sires de
Potelles, li sires de Vendegies, li Borgnes de Robertsart, Gilles de
Mauni, dis Grignars, Gilles de Soumain et Ostes ses frères, et plus de
quarante chevaliers et esquiers. Et tout ce veoit la reine d'Engleterre
moult volentiers, et aussi faisoit ses fils. Et durèrent ces joustes
jusques à moult priès de Valenciennes.
Si issirent hors de la ville grant fuisson de bourgois de Valenchiennes,
bien montés et aournés et en bonne ordonnance[70], et vinrent contre la
roine et son fil et les signeurs. Et fu ensi la roine d'Engleterre
amenée honourablement jusque en la Salle de Valenchiennes, et issi au
piet des grès hors dou char. Et encontrèrent à l'entrée de la Salle
amont le conte de Hainnau, tout à nu chief, la contesse sa femme et lors
enfans, Margerite, Jehanne, Phelippe, Isabiel et lor frère Guillaume,
qui tout estoient jone; si honnourèrent la roine, et elle, euls. Et la
conjoirent et la requellièrent moult doucement li contes et la contesse,
ensi comme il apertenoit et que bien le sceurent faire. Et vous di que
toute la Salle fu adonc laissie pour la roine d'Engleterre logier et ses
gens; et li contes et la contesse estoient logiet en l'ostel de
Hollandes, et lors enfans, à Malaunoit, et aussi avoient il là par jour
lor retret.
[70] _Ms. d'Amiens et mss._ A: Et contre lui widièrent moult de
bourgois de le ville, bien paret et ordonnet, pour lui
honorablement recepvoir. Fo 3 vo.
La roine d'Engleterre veoit que li contes de Hainnau et la contesse li
faisoient tant d'onnour que plus ne l'en pooient faire; si en looit Dieu
et regratioit grandement en soi meismes, car elle esperoit bien que par
euls et les Hainnuiers, elle seroit confortée et adrechiée, eusi que
elle fu si grandement, comme vous orés recorder avant en l'histoire. Et
fu la ditte roine et ses fils et li contes de Qent grandement tenu au
conte de Hainnau et à messire Jehan de Hainnau, son frère, et as
Hainnuiers, car elle ne trouvoit en France, ne aultre part, nul confort,
ne qui se vosist ensonniier de ses besongnes, qant li gentils chevaliers
messires Jehans de Hainnau emprist le faix et le carge. Dont pluisseurs
gens, en Hainnau meismement, l'en tenoient à fol et à mal consilliet,
qant à tout une poignie de gens, il se mist en l'aventure d'aler en
Engleterre à rencontre dou roi, dou signeur Espensier et de ceuls de lor
sieste. Au voir dire, se li Londriien n'euissent esté, et auquns nobles
dou pais qui furent dou confort et aliance la roine, jamais piés n'en
fust retournés. Fo 6.
P. 24, l. 5: faire.--_Ms. d'Amiens et mss._ A: Adonc, avoit li comtes
Guillaumme quatre fillez, Margherite, Phelippe, Jehanne et Ysabiel. De
quoy li jones Edouwars, qui fu puis roys d'Engleterre, s'adonnoit le
plus et s'enclinoit de regart et d'amour sus Phelippe que sus lez
autrez. Et ossi la jonne fille le connoissoit[71] plus, et lui tenoit
plus grant compaignie que nule de sez sereurs. Ainsi l'ay je oy depuis
recorder la bonne damme qui fu roynne d'Engleterre, et dallés qui je
demouray et servi; mès ce fu trop tart pour my. Si me fist elle tant de
biens que j'en sui tenus de priier à tous jours mès[72]. Fos 3 vo et 4.
[71] _Mss. A 7, 18, 19, 29 à 33_: conjoissoit. Fo 5 vo.
[72] _Mss. A 1 à 9, 15 à 22_: pour elle. Fo 7.--_Mss. A 11
à 13_: pour l'ame d'elle. Fo 6.--_Mss. A_ 34, 35: pour elle et
pour ses amis, tant comme je vivray. Fo 7.
P. 24, l. 10: trois sepmainnes.--_Ms. d'Amiens et mss. A_: huit jours.
Fo 4.
P. 24, l. 14 et 15: Hasbaing.--_Ms. A_ 7: Bashaingne. Fo 5 vo.--_Mss. A
18, 19, 23 à 35_: Behaigne. Fo 7.
P. 24, l. 15: prioit.--_Ms. de Rome_: En ces sejours, joies et
esbatemens où li contes Guillaumes de Hainnau tint et rechut la roine
d'Engleterre en la ville de Valenchiennes, fu ordonné de messire Jehan
de Hainnau comment il feroit, ne quel carge de gens d'armes il aueroit.
Pluisseur jone chevalier et esquier de Hainnau s'offroient à messire
Jehan et li disoient: «Sire, menés nous avoecques vous, nous vous volons
servir sus ce voiage à nostres costages.» Li gentils chevaliers
respondoit et disoit: «Grant merchis, biau signeur, j'en aurai avis. Je
ne vous refuse pas; mais le carge que je aurai, monsigneur mon frère le
me fera.» Ensi s'escusoit li chevaliers. Fo 7.
§ =11.= P. 25, l. =11=: Ensi.--_Ms. et Amiens et mss. A_: Enssi estoit
meus et encoragiés messires Jehans de Haynnau, et faisoit se semonse et
se priière des Haynuyers à estre à Hal, et les Braibenchons à estre à
Bredas, et les Hasbegnons au Mont Sainte-Getrud, et les Hollandois, dont
il eut aucuns, à estre à Dourdrecq. Lors prist congiet la roynne
d'Engleterre au comte de Haynnau et à la contesse, et les remerchia
grandement et doucement de l'honneur, de le feste et de le bonne chierre
et belle recoeilloite qu'il li avoient fet, et le baisa au partir et la
contesse et leurs biaux enfans. Ainssi se parti la damme et ses filz et
toutte leur routte, acompaigniet de monsigneur Jehan de Haynnau, qui à
grant dur et moult envis avoit eut congiet de monseigneur son frère,
quoy qu'il se fuist de premiers acordés et asentis ad ce voiaige; mès
finablement il li dounna de bonne vollenté. Et li dist ensi messires
Jehans par trop biau langaige: «Monseigneur, je sui jones et encorrez à
faire. Si croy que Dieux m'ait pourveu de ceste emprise pour mon
avanchement; et, se Dieux me vaille, li couraige m'en siet trop bien que
nous en venronz à nostre deseure; car je quide et croy de verité que par
peciet, à tort et par envie, on a ceste bonne roynne decachie et son fil
hors d'Engleterre. Si est aumousne et gloire à Dieu et au monde
d'adrecer et reconforter les desconfortéz et desconfortées, et
especialment si noble et haute damme comme cesti est, qui fu fille de
roy et est descendue de royal lignie, et sommes de son sancq et elle dou
nostre. Je aroie plus cher à renuncher à tout che que j'ay vaillant, et
aler servir Dieu oultre mer, sans jammais retourner en ce pays, que la
bonne damme fust partie de nous sans comfort et ayde. Si me layés aller
et donnés congiet de bonne volenté; si ferés bien et vous en saray gré,
et s'en esploiteront mieux mes besoingnes.»
Quant li bons comtez de Haynnau eut oy son frère et perchut le grant
desir qu'il a de faire ce voiaige, qui à très haulte honneur li puelt
retourner et à ses hoirs à tous jours mès, et congnoist bien qu'il dist
verité, si en eult grant joie et li dist: «Biau frère, ne plaise jà à
Dieu que vostre bon pourpos je vous brise ne oste, et je vous donne
congiet ou nom de Dieu.» Lors le baisa et li estraindi le main en signe
de grant amour. Ensi se parti messires Jehans de Haynnau, et s'en vint
ce jour jesir à Mons en Haynnau, et ossi la roynne d'Engleterre. Que
vous eslongeroie la matère? Il lisent tant par leurs journées qu'il
vinrent à Dourdrech en Hollandez où li especiaux mandemens estoit fès.
Fo. 4.