quoi il estoient là envoiiet, et il eut oy les raisons
et les doubtances que li rois englès avoit mises avant 15
à son conseil, il ne les oy mies à envis. Ains dist
que li rois n'estoit mies sans sens, quant il avoit ces
raisons et ces doubtances si bien considerées. Car,
quant on voet entreprendre une grosse besongne,
on doit aviser et considerer comment on le poroit 20
achiever, et au plus priès de le fin peser à quel chief
on en poroit venir. Et dist ensi li gentilz contes:
«Se li rois y poet parvenir, si m'ayt Dieus, jou en
aroie grant joie. Et poet on bien penser que je l'aroie
plus chier pour lui, qui a ma fille, que je ne seroie 25
pour le roy Phelippe, qui ne m'a nient fait tout
à point, comment que jou aie sa sereur espousée.
Car, il m'a destournet couvertement le mariage del
jone duch de Braibant, qui devoit avoir espouset
Ysabiel, ma fille, et le a retenut pour une sienne 30
aultre fille. Par quoi je ne faurrai mies à mon chier
et ainsnet fil le roi d'Engleterre, s'il troeve en son
conseil qu'il le voelle entreprendre. Ains li aiderai
de conseil et d'ayde, à mon loyal pooir. Ossi fera
Jehans, mes frères, qui là siet, qui aultre fois l'a siervit.
Mais saciés qu'il li faurroit bien avoir aultre 5
ayde, plus forte que n'est la nostre. Car Haynaus est
uns petis pays, ce savés, ou regard dou royaume de
France; et Engleterre gist trop loing pour nous souscourre.»--«Certes,
sire, vous nous donnés très
bon conseil, et nous moustrés grant amour et grant 10
volenté; de quoi nous vous regrations, de par nostre
signeur le roy», ce respondi li evesques de Lincolle,
pour tous les aultres. Et dist encores: «Chiers
sires, or nous consilliés des quelz signeurs nos sires
se poroit mieus aidier, et des quelz il se poroit miex 15
fiier, par quoi nous li puissions reporter vostre conseil.»--«Sour
l'ame de mi, respondi li contes, je
ne saroie aviser signeur si poissant, pour lui aidier
en ces besongnes, comme seroit li dux de Braibant,
qui est ses cousins germains, ossi li evesques de 20
Liège, li dus de Guerles, qui a sa sereur à femme, li
arcevesques de Coulongne, li markis de Jullers, messires
Ernoulz de Bakehen, et li sires de Faukemont.
Ce sont cil qui plus aroient grant fuison de gens
d'armes, en brief temps, que signeur que je sace en 25
nul pays del monde. Et si sont très bon guerrieur.
Et fineront bien, se il voellent, de huit mille ou de
dis mille armures de fier, mais que on leur doinst
de l'argent à l'avenant. Et si sont signeur et gens
qui gaagnent volentiers. S'il estoit ensi que li rois 30
mes filz vos sires euist acquis ces signeurs que je dis,
et il fust par deça le mer, il poroit bien aler requerre
le roy Phelippe oultre le rivière d'Oise et
combatre à lui.»
Cilz consaulz pleut grandement à ces signeurs
d'Engleterre; puis prisent congiet au conte de Haynau
et à monsigneur Jehan de Haynau, son frère. Si 5
s'en ralèrent viers Engleterre porter au roy le conseil
qu'il avoient trouvet ou dessus dit conte et à son
frère. Quant il furent venu à Londres, li rois leur
fist grant feste. Et il li racontèrent tout ce qu'il
avoient trouvet au conseil et à l'avis dou gentil conte, 10
et de monsigneur Jehan de Haynau, son frère. Dont
li rois eut grant joie et en fu grandement reconfortés,
quant il eut entendu tout ce que ses sires li eut
mandet et consilliet.
Or vinrent ces nouvelles en France et montepliièrent 15
petit à petit, que li rois englès supposoit et entendoit
à avoir grant droit à le couronne de France.
Et fu li rois Phelippes enfourmés et avisés de ses
plus especiaulz et grans amis que, s'il aloit ou voiage
d'oultre mer qu'il avoit empris, il metteroit son 20
royaulme en très grant aventure, et qu'il ne pooit
faire ne esploitier milleur painne que de garder ses
gens et ce qui sien estoit, et dont il tenoit le possession,
et qui devoit retourner à ses enfans. Si se refroida
grandement de celle crois emprise et preecie. 25
Et contremanda ses officiiers qui ses pourveances faisoient,
si grandes et si grosses que merveilles seroit
à penser, jusques à tant qu'il aroit veu de quel piet
li rois englès vorroit aler avant, qui mies ne se refroidoit
de lui pourveir et appareillier, selonch le 30
conseil que si homme li avoient raporté dou conte
de Haynau, et fist, assés tost apriès ce qu'il furent
revenu en Engleterre, ordonner et apparillier dis
chevaliers banerès et quarante aultres chevaliers jones
bachelers. Et les [envoya][26] à grans frès par deça
le mer, droit à Valenciènes, et le evesque de Lincolle,
qui fu moult vaillans homs, avoec eulz, en 5
cause que pour trettier à ces signeurs de l'Empire,
que li contes de Haynau leur avoit denommés, et
pour faire tout ce qu'il et messires Jehans, ses frères,
en consilleroient. Quant il furent venu à Valenciènes,
cescuns les regardoit à grans merveilles, pour 10
le biel et grant estat qu'il maintenoient, sans riens
espargnier nient plus que li corps dou roy d'Engleterre
y fust en propre personne, dont il acqueroient
grant grasce et grant renommée. Et si y avoit entre
yaus pluiseurs bachelers, qui avoient cescun un oel 15
couvert de drap, pour quoi il n'en peuist veoir. Et
disoit on que cil avoient voet entre dames de leur
pays, que jamais ne verroient que d'un oel jusques
adonc qu'il aroient fait aucunes proèces de leurs
corps ens ou royaume de France, les quelz il ne voloient 20
mies cognoistre à chiaus qui leur en demandoient.
Si en avoit cescuns très grant merveilles.
[26] Ms. de Gaignières, fo 29 vo.--Ms. 6477, fo 43 vo: «amena.»
Quant il furent assés festiiet et honnouret à Valenciènes
dou conte de Haynau, de monsigneur Jehan
de Haynau, son frère, et des signeurs chevaliers 25
dou pays, et ossi des bourgois et des dames de Valenciènes,
li dis evesques de Lincolle et li plus grant
partie d'yaus se traisent par devers le duch de Braibant,
par le conseil dou conte dessus dit. Si les festia
li dus assés souffissamment, car bien le savoit 30
faire. Et puis se accordèrent si bellement au duch
que il eut en couvent de soustenir le roy, son cousin,
et toutes ses gens, en son pays, car à faire l'avoit,
car c'estoit ses cousins germains: si pooit venir,
et aler et demorer, armés et desarmés, toutes 5
fois qu'il li plairoit. Et avoec ce il leur eut en couvent,
par tout son conseil et parmi une certaine
somme de florins, que, se li rois englès, ses cousins,
voloit le roy de France deffiier souffissamment, et entrer
à force en son royalme, et se il pooit avoir l'acord 10
et l'ayde de ces signeurs d'Alemagne deseure
nommés, il le deffieroit ossi et iroit avoech lui, à
tout mille armeures de fier. Ensi leur eut il en couvent
par son creance. De quoi il cancela et detria
puis assés, si com vous orés avant en l'ystore. 15
§ 58. Adonc furent cil signeur d'Engleterre moult
aise, car il leur sambla qu'il avoient moult bien besongnié,
tant comme au duch. Si retournèrent à Valenciènes,
et fisent, par messages et par l'or et l'argent
le roy d'Engleterre leur signeur, tant que li dus 20
de Guerles, serourges au dit roy d'Engleterre, li markis
de Jullers, pour lui et pour l'arcevesque de Coulongne
Walerant, son frère, et li sires de Faukemont vinrent
à Valenciènes parler à yaus, par devant le conte de
Haynau, qui ne pooit mès chevaucier ne aler, et par 25
devant monsigneur Jehan, son frère. Et esploitièrent
si bien devers yaus que, parmi grandes sommes de
florins que cescuns devoit avoir pour lui et pour ses
gens, il eurent en couvent de deffiier le roi de France,
avoech le roy englès, quant il li plairoit, et que cescuns 30
d'yaus le serviroit, à un certain nombre de
gens d'armes à hyaumes couronnés. En ce temps
parloit on de hyaumes couronnés; et ne faisoient li
signeur nul compte d'aultres gens d'armes, s'il n'estoient
à hyaumes et à timbres couronnés. Or est cilz
estas mués maintenant; on parolle de lances ou de 5
glaves et de jakes. Et vous di que cil signeur dessus
nommet eurent en couvent as gens le roy d'Engleterre,
que il leur aideroient à aultres signeurs d'oultre
le Rin, qui bien avoient pooir de amener grant
fuison de gens d'armes, mais que il ewissent souffissamment 10
le pourquoi. Puis prisent congiet li dessus
dit signeur alemant, et en ralèrent en leur pays.
Et li signeur d'Engleterre demorèrent encores à
Valencienes et en Haynau, dalés le conte, par quel
conseil il ouvroient le plus. Si priièrent et envoiièrent 15
encores souffissans messages devers l'evesque de
Liège, monsigneur Aoulz, et l'euissent volentiers attrait
de leur partie; mais li dis evesques n'i volt onques
entendre, ne riens faire encontre le roi de
France, à cui il estoit devenus homs et entré en se 20
feaulté. Li rois de Behagne ne fu point priiés ne
mandés, car on savoit bien qu'il estoit si conjoins
au roi de France, par le mariage de leurs deus enfans,
dou duc Jehan de Normendie, qui avoit à femme
ma dame Bonne, fille au dessus dit roy, que 25
pour celle cause il ne feroit riens contre le roy de
France. Or me tairai un petit d'yaulz, et parlerai
d'une aultre matère, qui à ceste se rajoindera chi
apriès.
§ 59. En ce temps dont jou ay parlet, avoit grant 30
dissention entre le conte Loeis de Flandres et les
Flamens, car il ne voloient point obeir à lui, ne à
painnes ne s'osoit il tenir en Flandres, fors en grant
peril. Et avoit à ce donc un homme à Gand, qui
avoit estet brassères de mielz. Chilz estoit entrés en
si grant fortune et si grant grasce, que c'estoit tout 5
fait quanqu'il voloit deviser et commander par toute
Flandres, de l'un des corons jusques à l'autre. Et n'i
avoit nullui, com grans qu'il fust, qui de riens osast
trespasser ses commandemens ne contredire. Il avoit
toutdis, apriès lui alans aval le ville de Gand, soissante 10
ou quatre vingt varlès armés, entre les quelz
il en y avoit deus ou trois qui savoient aucuns de
ses secrès. Et quant il encontroit un homme qu'il
avoit en souspeçon ou qu'il haioit, cilz estoit tantos
tués, car il avoit commandé à ses secrès varlès et 15
dit: «Sitos que jou encontre un homme, et je
vous fai un tel signe, si le tués sans deport, com
grans ne com haulz qu'il soit, sans attendre aultre
parolle.»
Ensi avenoit souvent, et en fist en celle manière 20
pluiseurs grans mestres tuer. Par quoi il estoit si
doubtés que nulz n'osoit parler contre cose qu'il volsist
faire, ne à painnes penser de lui contredire. Et
tantost que cil soissante varlet le avoient raconduit
à son hostel, cescuns aloit disner à se maison; et 25
tantost apriès disner, il revenoient devant son hostel,
et beoient en le rue, jusques adonc qu'il voloit aler
aval le rue jouer et esbatre parmi le ville; et ensi
le conduisoient jusques au souper. Et saciés que cescuns
de ces saudoiiers avoit, cescun jour, quatre 30
compagnons ou gros de Flandres, pour ses frès et
pour ses gages. Et les faisoit bien paiier, de sepmainne
en sepmainne. Et ossi avoit il, par toutes les villes
et les chasteleries de Flandres, sergans et saudoiiers
à ses gages, pour faire tous ses commandemens, et
espiier et savoir s'il avoit nulle part personne qui
fust rebelle à lui, ne qui desist ne enfourmast nullui 5
contre ses volentés. Et si tost qu'il en savoit aucuns
en une ville, il ne cessast jamais, si l'euist fait banir
ou fait tuer sans deport: jà cilz ne s'en peuist garder.
Et meismement tous les poissans de Flandres,
chevaliers, escuiers et bourgois des bonnes villes, 10
qu'il pensoit qu'il fuissent favourable au conte en
aucune manière, il les banissoit de Flandres, et levoit
le moitiet de leurs revenues, et laissoit l'autre
moitiet pour le doaire et le gouvrenement de leurs
femmes et enfans. Et cil qui ensi estoient banit, des 15
quelz il estoient grant fuison, se tenoient à Saint-Omer
le plus, et les appelloit on les avollés ou les
oultre avollés.
Briefment à parler, il n'eut onques en Flandres, ne
en aultre pays, conte, duch, prince, ne aultre, qui 20
peuist avoir un pays si à se volenté, com cilz avoit
et eut longement. Et estoit appellés Jakemars d'Artevelle.
Il faisoit lever les rentes, les tonnieus, les
winages, les droitures et toutes les revenues, que li
contes devoit avoir et qui à lui apertenoient, quèle 25
part que ce fust parmi Flandres, et toutes les maletotes:
si les despendoit à se volenté et en donnoit,
sans rendre nul compte. Et quant il voloit dire que
argens li falloit, on l'en creoit par sen dit, et croire
l'en couvenoit, car nulz n'osoit dire encontre. Et 30
quant il en voloit emprunter à aucuns bourgois sour
son paiement, il n'estoit nulz qui le osast escondire
à prester. Or voel jou retourner as messagiers d'Engleterre.
§ 60. Chil signeur d'Engleterre, qui estoient envoiiet
par deça le mer, et estoient si honnourablement
à Valenciennes, com vous avés oy, se apensèrent
entre yaus que ce seroit grans confors pour leur 5
signeur le roy, selonch ce qu'il voloient entreprendre,
se il pooient avoir l'acort des Flamens, qui
adonc estoient mal dou roy de France et dou conte,
leur droit signeur. Si s'en consillièrent au conte de 10
Haynau, qui leur dist que voirement seroit ce li plus
grans confors qu'il peuissent avoir. Mais il ne pooit
veir que il y peuissent pourfiter se petit non, se il
n'avoient premierement acquis le grasce et le faveur
de celui Jakemart d'Artevelle. Il disent qu'il en feroient 15
leur pooir temprement.
Assés tost apriès çou, il se partirent de Valenciènes,
et s'en alèrent vers Flandres, et se departirent en
trois, ne sai, en quatre routes, s'en alèrent partie à
Bruges, partie à Ippre, et li plus grant partie à Gand, 20
et tout despendant si largement qu'il sambloit que
argens leur pleuist des nues. Et queroient acord par
tout, et prommetoient as uns et as aultres, là où on
les consilloit, et où il creoient miex emploiier, pour
parvenir à leur entente. Toutes voies, li evesques de 25
Lincolle et se compagnie, qui alèrent à Gand, fisent
tant, par biel parler et autrement, qu'il eurent l'acord,
l'acointance et l'amisté de Jakemart d'Artevelle,
et grant grasce en le ville, et meismement
d'un vaillant chevalier anciien, qui volentiers demoroit 30
à Gand, et y estoit durement amés. Si le appelloit[on][27]
monsigneur le Courtrisien, et estoit chevaliers
banerès, et le tenoit on pour le plus preu chevalier
de Flandres, et pour le plus vaillant homme,
et qui le plus hardiement avoit toutdis servi ses signeurs.
5
[27] Ms. de Mouchy-Noailles, fo 30 vo.--Ms. 6477, fo 46 (lacune).
Cilz sires Courtrissiens compagnoit et honnouroit
durement ces signeurs d'Engleterre, ensi que vaillant
homme doient toutdis honnourer estragnes chevaliers,
à leur pooir. Mais il en eut, au darrain, mauvais
loiier. Car il en fu[28] accusés de celle honneur 10
qu'il faisoit as Englès, enviers le roy de France, si
ques li rois commanda très estroitement au dit conte
de Flandres qu'il fesist tant, comment que ce fust,
qu'il ewist le dessus dit chevalier, se tant l'amoit, et
qu'il li fesist coper le tieste. Li contes, qui n'osa 20
trespasser le commandement le roy, ains fist tant,
je ne sai comment ce fu, que li sires Courtrisiens
vint là où li contes le manda. Si fu tantost pris et
tantost decolés. De quoi moult de gens furent durement
dolant de pitié, car il estoit moult amés et 25
honnourés ou pays, et en seurent moult mal gret au
conte.
[28] Ms. 6477, fo 46: «fu _si_ accusés.»--Les leçons de plusieurs
bons mss., notamment du ms. de Gaignières, fo 30 vo, du ms. 2641,
fo 31 vo et du ms. de Besançon, fo 33, autorisent à supprimer ce
_si_ qui se retrouve une ligne plus bas dans _si ques_.
Tant esploitièrent cil signeur d'Engleterre en Flandres,
que cilz Jakemars d'Artevelle mist pluiseurs
fois les consaulz des bonnes villes ensamble, pour 30
parler de le besongne que cil signeur d'Engleterre
queroient, et des franchises et amistés qu'il leur offroient
de par le roi d'Engleterre leur signeur, sans
cui terre et acord il ne se pooient bonnement
longement chevir. Et tant parlementèrent ensamble
qu'il furent d'acort en tel manière, qu'il plaisoit
bien à tous le consaulz de Flandres que li rois englès 5
et toutes ses gens pooient bien venir et aler, à
gens d'armes et autrement, par toute Flandres, ensi
qu'il li plairoit. Mais il estoient si fortement obligiet
envers le roy de France qu'il ne le poroient grever
ne entrer en son royalme, qu'il ne fuissent attaint 10
de une si grande somme de florins, que à grant malaise
en poroient il finer. Et leur priièrent que ce
leur volsist souffire jusques à une aultre fois. Ces responses
et cil esploit souffirent adonc assés à ces signeurs
d'Engleterre, puis s'en revinrent arrière à 15
Valenciènes, à grant joie. Et souvent envoioient leurs
messages devers le roi, leur signeur, et li signefioient
ce qu'il avoient besongniet. Et li rois leur renvoioit
grant or et grant argent, pour paiier leurs frais, et
pour departir à ces signeurs d'Alemagne, qui ne 20
convoitoient aultre cose.
En ce temps, trespassa de ce siècle li gentilz contes
Guillaumes de Haynau, sept jours ou mois de
juing, l'an de grasce mil trois cens trente sept. Si fu
ensepelis as Cordeliers, à Valenciènes; et li fist on là 25
son obsèque. Et chanta le messe li evesques Guillaumes
de Cambrai. Si y eut grant fuison de dus, de
contes et de barons, ce fu bien raisons, car il estoit
grandement amé et renommés de tous. Apriès son
trespas, se traist à le conté de Haynau, de Hollandes 30
et de Zelandes, messires Guillaumes, ses filz, qui
eut à femme la fille au duch Jehan de Braibant. Et
fu ceste dame, qui s'appelloit Jehane, doée de le
terre de Binch, qui est un moult biaus hiretages et
pourfitables. Et ma dame Jehane de Vallois, sa mère,
s'en vint demorer à Fontenielles sus Escaut, et là
usa sa vie comme bonne et devote en le ditte abbeye, 5
et y fist moult de biens.
§ 61. De toutes ces devises et ces ordenances, ensi
com elles se portoient et estendoient, et des confors
et des alliances que li rois englès acqueroit par deça
le mer, tant en l'Empire comme ailleurs, estoit li 10
rois Phelippes tous infourmés; et euist volentiers
veu que li contes de Flandres se fust tenus en son
pays et euist attrais ses gens à son acord. Mès cilz
Jakemars d'Artevelle avoit jà si sourmonté toutes manières
de gens en Flandres que nulz n'osoit contredire 15
à ses oppinions, meismement li contes, leurs
sires, ne s'i osoit clerement tenir, et avoit envoiiet
ma dame, sa femme, et Loeis, son jone fil, en France,
pour le doubte des Flamens.
Avoec tout ce, se tenoient en l'ille de Gagant aucun 20
chevalier et escuier de Flandres, en garnison,
dont messires Ducres de Halluin et messires Jehans
de [Rodes][29] et li enfant de Le Trief estoient chapitain
et souverain; et là gardoient le passage contre les
Englès, et faisoient guerre couvertement: dont li 25
chevalier d'Engleterre, qui se tenoient en Haynau,
estoient tout infourmet que, se ilz s'en raloient par
là en leur pays, il seroient rencontré; pour quoi, il
n'estoient mies bien aseur. Non obstant ce, se chevauçoient
il et aloient à leur volenté parmi le pays
de Flandres, et par les bonnes villes, mais c'estoit
sus le confort Jakemon d'Artevelle, qui les portoit
et honnouroit en toutes manières, ce qu'il pooit.
Or retourrons nous un petit au duch de Braibant. 5
[29] Ms. de Mouchy-Noailles, fo 29.--Ms. 6477, fo 47: «Rodais.»
§ 62. Quant li dus de Braibant ot fait ses couvenences
à ces signeurs d'Engleterre, si com vous avés
oy, il s'avisa que li rois de France aultre fois li avoit
fait contraire. Si se doubta qu'il ne fust durement 10
infourmés contre lui, à l'ocquison des Englès et, se
il avenoit que li entrepresure que li rois d'Engleterre
avoit emprise ne venist avant ou ne venist à bon
chief, que li rois de France ne le volsist guerriier, et
li faire comparer che que li aultre aroient acordet. 15
Si envoia de son conseil au roy de France monsigneur
Loeis de [Cranahen][30], sage chevalier durement,
et pluiseurs aultres avoech lui, pour lui excuser,
et pour priier au roy qu'il ne volsist croire nulle
mauvaise information contre lui; car moult à envis 20
il feroit nulle alliance ne couvenence contre lui,
mais li rois d'Engleterre estoit ses cousins germains:
se ne li pooit bonnement escondire sa revenue dedens
son pays, de lui ne de ses gens, leurs frais
paians; mais plus avant il n'en feroit riens qui deuist 25
estre au desplaisir dou roy. Li rois le crey à celle
fois, si s'en apaisa atant. Et toutes voies li dux ne
laissa mies pour ce, qu'il ne retenist des gens d'armes
en Braibant et ailleurs, là où il les pooit ne
pensoit à avoir, jusques à le somme que couvenenciet
avoit au roi d'Engleterre.
[30] Ms. de Gaignières, fo 31 vo.--Ms. 6477, fo 47: «Cravehen.»
Et quant li dessus dit signeur d'Engleterre eurent
fait en partie ce pour quoi il avoient passet mer, il
se partirent de Valenciènes, où il tenoient leur souverain 5
sejour, premierement li evesques de Lincolle,
messires Renaulz de Gobehen et li aultre. Et vuidièrent
Haynau, et vinrent à Dourdresch, en Hollandes.
Et montèrent là en mer, pour eschiewer le passage
de Gagant, où li dessus dit chevalier de Flandres se 10
tenoient en garnison, de par le roy de France et le
conte de Flandres, si com on disoit. Et s'en revinrent
au mieus qu'il peurent, et au plus couvertement,
arrière en leur pays, devers le roy englès, leur
signeur, qui les rechut à grant joie. Se li recordèrent 15
tout l'estat des signeurs de par de dechà, premierement
dou duch de Braibant, dou duch de Guerles,
dou conte de Jullers, de l'arcevesque de Coulongne,
de monsigneur Jehan de Haynau, dou signeur de
Faukemont, et des alloiiés, comment et sus quel 20
point il s'estoient alloiiet et accordé à lui, et à
quelle quantité de gens d'armes cescuns le devoit
servir, et ossi quel cose cescuns devoit avoir. A ces
parolles entendi li rois englès volentiers, et dist que
ses gens avoient bien esploitiet. Mais trop durement 25
plaindi le mort le conte de Haynau, qui fille
il avoit, et disoit qu'il avoit perdu en li un très
grant confort: se li couvenoit il porter et faire à l'avenant.
Encores recordèrent li dit signeur au roi le couvenant 30
de chiaus qui se tenoient en le garnison de Gagant,
et qui herioient ses gens tous les jours; et
comment, pour le doubte d'yaus, il estoient revenu
par Hollandes, et avoient eslongiet grandement leur
chemin. Donc dist li rois que il y pourveroit temprement
de remède. Si ordonna assés tost apriès le
conte Derbi, son cousin, et monsigneur Gautier de 5
Mauni, qui y avoit tant fait de belles bacheleries, en
Escoce, qu'il en estoit durement alosés, et ossi aucuns
aultres chevaliers et escuiers englès, qu'il vosissent
traire devers Gagant, et combatre chiaus qui
là se tenoient. Li dessus dit obeirent au commandement 10
le roi, leur signeur, et fisent leurs pourveances
et lor amas de gens d'armes et d'arciers à Londres,
et chargièrent leurs vaissiaus en le Tamise. Quant il
furent tout venu et apparilliet, il estoient environ
cinq cens armeures de fier et deus mille arciers. Si 15
entrèrent en leur navie, qui estoit toute preste, et
puis si se desancrèrent. Et vinrent, de celle marée,
le première nuit, gesir devant Gravesaindes. A l'endemain,
il desancrèrent et vinrent devant Mergate.
A le tierce marée, il tirèrent les voiles amont, et 20
prisent le parfont, et nagièrent tant par mer qu'il
veirent Flandres. Si arroutèrent leurs vaissiaus, et
misent en bon couvenant. Si vinrent assés priès de
Gagant, à heure de nonne. Che fu le nuit Saint Martin
en hyvier, l'an mil trois cens trente sept. 25
§ 63. Quant li Englès veirent le ville de Gagant,
où il tendoient à venir, et combatre chiaus qui par
dedens se tenoient, si se avisèrent et regardèrent
qu'il avoient vent et le marée pour yaus, et que ou
nom de Dieu et de saint Jorge il approceroient. Donc 30
fisent il sonner leurs trompètes, et s'armèrent et apparillièrent
vistement, et ordonnèrent leurs vaissiaus,
et misent les arciers devant, et singlèrent fors viers
le ville.
Moult bien avoient les gettes et les gardes, qui en
Gagant se tenoient, veu approcier ceste grosse armée. 5
Si supposoient assés que c'estoient Englès; pour quoi
il s'estoient jà tout armet et rengiet sus les dikes et
sus le sablon, et mis leurs pennons par ordenance
devant yaus, et fait entre yaus des nouviaus chevaliers
jusques à seize. Et pooient estre environ cinq 10
mille tout comptet, bien apert baceler et compagnon,
ensi qu'il le moustrèrent. Et là estoit messires Guis
de Flandres, frères au conte Loeis de Flandres, uns
bons et seurs chevaliers, mès bastars estoit, qui
amonnestoit et prioit tous les compagnons de bien 15
faire. Et là estoient messires Ducres de Halluin, messires
Jehans de Rodes, messires Gilles de le Trief,
qui fu là fais chevaliers, messires Symons et messires
Jehans de Brukedent, qui y furent fait ossi chevalier,
et Pières d'Englemoustier, et maint compagnon baceler 20
et escuier et appert hommes d'armes, ensi qu'il
le moustrèrent, et qui moult desiroient le bataille as
Englès.
Et estoient tout cil ordenet et rengiet à l'encontre
des Englès. Et n'i eut riens parlementé ne devisé, 25
car li Englès, qui estoient en grant [soucy][31] de yaus
assallir, et cil de deffendre, criièrent leurs cris et fisent
traire leurs arciers moult roit et moult fort, et
tant que cil qui le havene deffendoient en furent si
ensonniiet que, vosissent ou non, il les couvint reculer. 30
Et en y eut dou tret à ce premiers moult de
mehagniés. Et prisent terre li baron et li chevalier
d'Engleterre, et s'en vinrent combatre as haces, as
espées et as glaves, li un à l'autre.
[31] Ms. de Gaignières, fo 32.--Ms. 6477, fo 48 (lacune).
Et là y eut pluiseurs belles baceleries et apertises 5
d'armes faites. Et moult vassaument se combatirent
li Flamench. Ossi moult bachelereusement les requisent
li Englès. Et là fu moult bons chevaliers li contes
Derbi, et s'avança de premiers si avant qu'il fu,
en lançant de glaves, mis par terre. Et là, li fu messires 10
Gautiers de Mauni bons confors, car par apertises
d'armes il le releva et osta de tous perilz, en
escriant: «Lancastre au conte Derbi!» Et adonc
approcièrent il de tous lés. Et en y eut pluiseurs
mehagniés, et par especial plus des Flamens que 15
des Englès. Car li arcier d'Engleterre, qui continuelment
traioient, leur portoient trop grant damage.
§ 64. A prendre terre ou havene de Gagant, fu li
bataille dure et fière. Car li Flamench qui là estoient, 20
et qui le ville et le havene gardoient et deffendoient,
estoient très bonne gent, et de grant apertise plain.
Car, par election, li contes de Flandres les y avoit
mis et establis, pour garder cel passage contre les
Englès. Si s'en voloient acquitter bacelereusement, et 25
faire leur devoir en tous estas, ensi qu'il fisent. Là
estoient li baron et li chevalier d'Engleterre: premierement,
le conte Derbi, filz au conte Henri de
Lancastre au Tors Col, li contes de Sufforch, messires
Renaulz de Gobehen, messires Loys de Biaucamp, 30
messires Guillaumez filz Warine, li sires de
Bercler, messires Gautiers de Mauni et pluiseur aultre,
qui très vassaument s'i portoient et assalloient
les Flamens.